Concello da Coruña, Xunta, Ministerio de Transportes, Portos do Estado, Adif e a Autoridade Portuaria coruñesa subscribiron este mércores, nun acto institucional no Palacio Municipal de María Pita, o protocolo para a reordenación urbanística dos peiraos interiores, co compromiso de “cooperación” entre as administracións. Tamén co de mantemento da titularidade pública de espazos portuarios e a creación dunha comisión, presidida pola alcaldesa, Inés Rey, e designada polo consello de administración da Autoridade Portuaria da Coruña, para a proposta de medidas e o seguimento das actuacións.
Así se manifestou ao termo dunha reunión interadministrativa con presenza, entre outros, ademais da propia rexedora, do presidente da Xunta, Alfonso Rueda; do secretario de Estado de Transportes e Mobilidade Sustentable, José Antonio Santano; o presidente de Portos do Estado, Álvaro Rodríguez; o máximo responsable de Adif, Ángel Contreras; e o presidente da Autoridade Portuaria da Coruña, Martín Fernández Prado.
Sobre o asinado, denominado ‘Coruña Marítima’, a alcaldesa manifestou que é “un proxecto de futuro” para a cidade e para Galicia cun protocolo que abre “unha nova etapa de cooperación interadministrativa para a transformación e reordenación urbanística dos espazos portuarios interiores”, dixo sobre os que quedan liberados polo traslado de actividade a Punta Langosteira.
NOVO MARCO XURÍDICO
Agora, sinalou, será necesario definir “un novo marco xurídico consensuado” traballando “no mantemento da titularidade pública dos espazos para garantir a accesibilidade cidadá; favorecer a integración porto-cidade e resolver o déficit de espazos e dotacións públicas”, resumiu. A rexedora avanzou que se creará unha comisión integrada por todas as administracións asinantes e os partidos con representación no concello (PSOE, PP e BNG) de cara a trasladar as propostas nas que se avanzará a partir de agora.
“Un acordo entre administracións distintas con cores políticas diferentes”, expuxo o secretario de Estado de Transportes e Mobilidade Sustentable, José Antonio Santano, que cualificou de “estratéxica” a decisión adoptada no seu momento de construír o porto exterior (tras a catástrofe do ‘Prestige‘). “É un comezo para que o porto siga sendo un motor económico, ofreza oportunidades para vivir e gozar, lecer tamén en clave residencial”, sinalou sobre o subscrito.
Na mesma liña, o presidente da Xunta, Alfonso Rueda, que, como o anterior, resaltou a aposta no seu momento polo porto de Punta Langosteira, incidiu en que agora haberá que traballar para “concretar” que facer cos espazos que quedan liberados. “O porto ten que funcionar de maneira diferente e seguir construíndo cidade” para o que apelou a dar “pasos firmes” sen caer en formulacións “demagóxicas”. En similares termos, pronunciáronse o presidente de Portos do Estado, Álvaro Rodríguez, quen instou a converter Langosteira na “punta de lanza na transicion enerxética” ou o de Adif, Ángel Contreras, quen remarcou as actuacións en marcha para a conexión ferroviaria do porto exterior.
San Diego e DÉBEDA DO PORTO
Todo iso nun acto sen alusións a unha posible condonación da débeda contraída pola Autoridade Portuaria pola execución do porto exterior. Só o presidente da Autoridade Portuaria da Coruña, Martín Fernández Prado, que remarcou o acordo entre todas as institucións para avanzar nun tema “estratéxico”, fixo referencia ao “compromiso moral” coa situación financeira do porto herculino.
“Hai 20 anos dixéronnos endebédate e botarémoste unha man”, sinalou ao reclamar a necesidade de “apoio” por parte das administracións implicadas de cara a desenvolver na nova fase “un marco financeiro sustentable para todos”. No acto, estiveron presentes outras autoridades como o conselleiro de Presidencia, Xustiza e Deportes, Diego Calvo; a conselleira de Vivenda e Planificación de Infraestruturas, María Martínez Allegue; o delegado do Goberno en Galicia, Pedro Blanco, e Isabel Pardo de Vera, directora do Plan Estratéxico A Coruña 2030-2050.
Así, queda aberta a posibilidades de privatización da zona portuaria de San Diego, a máis grande, para poder paliar esa débeda.
A oposición
O portavoz do BNG no Concello da Coruña, Francisco Jorquera, e o seu homólogo do PP, Miguel Lorenzo, cualificaron de “positivo” a firma dun protocolo entre as administracións implicadas para o deseño da fachada marítima coruñesa. Pola súa banda, a Marea Atlántica cualificouno de “decepcionante”.
Nun comunicado, Jorquera, presidente da Comisión Especial da Fachada Marítima, advirte, no entanto, que “simplemente marca un comezo”. “Está todo aínda por facer”, sentenza. Tamén afirma que é positivo “que se parta da idea de que os peiraos manterán a titularidade pública”, mentres reclama a condonación da débeda do porto e non unha “reestruturación”.
“O importantes é a imaxe que damos hoxe e que esta imaxe continúe, a de colaboración de todas as administracións para sacar o futuro do porto adiante”, sinalou, pola súa banda, Miguel Lorenzo, sobre a firma entre o Concello da Coruña, Xunta, Ministerio de Transportes, Portos do Estado, Adif e Autoridade Portuaria da Coruña.
“O futuro — engade– pasa por tres principios básicos claros para todos: os terreos do porto van ser sempre de uso público, hai que renovar os convenios de 2004 superados pola realidade actual e hai que buscar unha solución para a débeda”.
Mentres, a Marea Atlántica cualifícao de “decepcionante” xa que entende que se romperon “consensos” alcanzados na súa etapa á fronte do goberno municipal. “O protocolo abre a porta á privatización da maior parte do bordo litoral para pagar a débeda derivada da construción de Punta Langosteira”.
“As administracións levantáronse da mesa sen asumir compromisos económicos”, sentenza para incidir en que o protocolo “limita a titularidade pública aos peiraos de Calvo Sotelo e Batería, mentres abre a porta á privatización no resto de ámbitos, singularmente San Diego”.
