Inicio Blog Páxina 399

O ecuador das festas de María Pita chega coas actuacións de Xabier Díaz e Adufeiras este martes

europapress
-
0
O ecuador das festas de María Pita chega coas actuacións de Xabier Díaz e Adufeiras este martes

O artista Xabier Díaz e Adufeiras do Salitre actuarán este martes nas festas de María Pita da Coruña, que chegan ao seu ecuador, segundo informa o consistorio.

O coruñés é un dos artistas de música tradicional galega de maior prestixio na actualidade e presentarase no escenario da praza cunha formación de dez cantoras e percusionistas.

Antes de comezar o seu proxecto individual con Adufeiras, formou parte de agrupacións como Xacarandaina, Rumbadeira, Nova Galega de Danza ou Berrogüeto.

Ademais, os días 25, 26 e 27 de agosto celebrarase a romaría de Santa Margarita, que se celebra cada ano no marco da programación das festas de María Pita.

O Mural pide á Xunta que supervise a inactividade do Concello na protección do Lugrís da rúa Olmos

Ubaldo Cerqueiro
-
0
O Mural pide á Xunta que supervise a inactividade do Concello na protección do Lugrís da rúa Olmos

A Xunta autorizou ao Concello da Coruña en abril para realizar unha serie de probas e ensaios, cualificadas como «urxentes» polos técnicos municipais para protexer os frescos de Lugrís. Malia esa autorización, catro meses despois, o goberno de Inés Rey aínda non as ordenou executar, segundo denuncia a Asociación O Mural.

Lembran que o pasado 21 de marzo, o arquitecto municipal emitiu un informe técnico no que «tendo en conta a situación de importante degradación detectada nos elementos (murais) protexidos» recomendaba ao Concello da Coruña «adoptar unha serie de medidas no prazo máis breve posible».

O 18 de abril, o Servizo de Patrimonio Cultural da Xefatura Territorial da Coruña do Consellería de Cultura autorizou ao Concello para que executase «as probas analíticas e os ensaios necesarios» recomendados polo arquitecto municipal tras a inspección do inmoble e o informe emitido por Carmen Jiménez Jiménez, unha restauradora que examinou os frescos.

Ante a falla de dilixencia do Concello, O Mural vén de solicitar formalmente que a Xunta de Galicia exerza a súa competencia de fomentar ás medidas e actuacións dirixidas a garantir a protección do patrimonio cultural de Galicia e exixa o Concello que leve a cabo ás probas analíticas e ensaios para os que está autorizado dende o 18 de abril deste ano.

Concretamente, a conservadora, recomendou adoptar, entre outras, as seguintes medidas de xeito urxente, en marzo de 2023: toma de mostras para a súa análise, reforzo das gretas con varias capas de protección, colocación de proteccións puntuais de seguridade, empapelado da superficie dos murais, colocación de testemuños para comprobar a evolución das gretas,…

Enumerando unha serie de medidas concretas para cada un dos 11 murais que se atopan no inmoble.

 

O Flores Rock, facendo cultura de barrio

editor
-
0
O Flores Rock, facendo cultura de barrio

Xa se coñecen os nomes que ocupan o cartel do Flores Rock 2023, logo da Festa de Presentación desta tarde, organizada polo Concello da Coruña en colaboración coa Plataforma Veciñal do Barrio das Flores. “O Flores Rock representa unha das mellores formas de facer cultura de barrio, con iniciativas como esta que nos axudan a coñecer artistas locais e levar a cultura e a música aos barrios”, sinalaron na presentación.

Boikot e Def con Dos serán o plato forte desta edición do festival, que terá lugar o 2 de
setembro no parque central do Barrio das Flores. A elas súmase como grupo estrela
Demenzia Social, banda gañadora da primeira edición da batalla de bandas do Flores Rock celebrada en xullo na sala O Túnel co obxectivo de dar a coñecer artistas locais.
Crowded e Noxxo, segunda e terceira clasificada da batalla de bandas, serán as
encargadas de abrir a xornada musical que continuará coa Paella Popular a partir das 14.00
horas. Xa pola noite retomaranse os concertos con Sol Rain e Del alma, aos que lle
seguirán Demenzia Social, Boikot e Def con Dos respectivamente.

Tamén haberá actividades para os máis pequenos no marco do Flores Kids como guitarra e
batería, xogos, actividades teóricas e dous concertos con Pako Pakolas e a exhibición dos
alumnos da academia de Rock. O horario das actividades é de 11.00 a 19.00 horas e as
familias que o desexen poderán inscribir aos seus fillos e fillas con tres horarios diferentes.

Dende as 11.00 horas ata as 14.00 horas, ata as 16.00 horas ou até o fin do campamento.
As familias que o desexen poden inscribir aos seus fillos e fillas no correo
kids.floresrock@gmail.com indicando a modalidade. O prazo de inscrición é do 16 ao 29 de
agosto para nenos e nenas de entre 4 e 12 anos.

Programación | Flores Rock, 2 de setembro

13.00 horas | CROWDED
14.00 horas | NOXXO
A partir das 14.00 horas | PAELLA POPULAR
20.30 horas | SOL RAIN
21.30 horas | DEL ALMA
22.30 horas | DEMENZIA SOCIAL
23.30 horas | BOIKOT
1.00 horas | DEF CON DOS

FLORES KIDS Dende as 11.00 ás 19.00 horas
11.00 a 13.00 horas | Guitarra e batería en locais de ensaio
13.00 a 15.00 horas | Concertos principais e xantar
16.00 a 17.00 horas | Concerto de Pako Pakolas
17.00 a 18.00 horas | Concerto dos alumnos da academia de rock
18.00 a 19.00 horas | Actividades varias (pintacaras, tatuaxes, clases lúdicas, xogos…)

Lory Meyers e Primal Scream deixaron o listón moi alto para pechar un apurado Noroeste

Ubaldo Cerqueiro
-
0
Lory Meyers e Primal Scream deixaron o listón moi alto para pechar un apurado Noroeste

A pouca previsión coa que se presentou o cartel do Festival Noroeste 2023 (o retraso ou improvisación na organización foi confirmado por varias bandas que aseguraron que foron chamados un día antes da presentación oficial e unha semana antes do comezo do festival) facía que os amantes da música e deste festival de referencia en toda a provincia estivesen expectantes ao resultado.

Certo que finalmente quedou un cartel bastante completo, con máis de 60 artistas enchendo de cultura 9 espazos da cidade. Precisamente ese formato expandido é un dos grandes reclamos no último lustro, e a cidade espera que se manteña intacta esta aposta que nos permite disfrutar de noites inesquecibles como a vivida en Azcárraga cunha lenda do soul como Lee Fields (a praza do casco vello acolleu tamén o comprometido concerto da peruana afincada na cidade Pamela Rodríguez que mesmo cantou en galego); estreas locais como a de PAVA na Fundación Luís Seoane para abrir o festival; sesións divertidas como a que brindou Gitano del palo, o hiphopeiro galego Malandrómeda ou a singular Hdyn co seu “galeguinglis” no cañero Campo da Leña; solpores internacionais con Fatoumata Diawara ou Ana Tijoux no parque de Santa Margarida; noites máis xuvenís como a de Arde Bogotá no porto; esas sesións case máxicas no Castelo de San Antón con nomes como Silvia Penide ou Mallou; ou pinchadas golfas como a de Meneo na Cormelana Sellier.

Malandromeda no Noroeste
Malandromeda no Noroeste
Hdyn-en-concerto-no-campo-da-lena
Hdyn-en-concerto-no-campo-da-lena


Tras dous días de dispersión, venres e sábado as olladas estaban postas na praia de Riazor. Faltou o Pop e o Rock na primeira xornada do Noroeste de area, substituído pola música electrónica de Dj Grobas, 2ManyDj’s e Parov Stelar. Ben abriu, con camiseta de ZERA, o histórico pincha da cidade a sesión de zapatilla, con temazos que xa fixeron bailar aos máis mdrugadores.
A contratación inextremis debeu pillar por sorpresa á banda belga 2ManyDj’s, pois só apareceu en escena un dos irmáns que a compoñen convertindo en obrigada a brincadeira do 1manydj. Así e todo, o Dewaele valeuse apra facer bailar coas súas mesturas do século pasado aos que xa enchían o areal.


Mágoa que a chuvia fixera acto de presenza xusto no intermedio que impediu que a magnífica posta en escea e divertida proposta musical de electro-swing de Parov Stelar brillara máis forte.

Volveron reinar o rock e o pop na xornada do peche do festival con dous concertazos que van lembrar os asistentes. Arrincaban Lory Meyers, unha das bandas máis asentadas do pop nacional das últimas dúas décadas, que se deixaron a pel no escenario cun bolazo tremendamente potente. Calaron moitas bocas dos que acusaban á banda de ser algo frouxa e fixeron bailar, cantar e vibrar un ateigado areal, incluída a alcaldesa Inés Rey, que como unha “groupie” máis cantou a máis de media ducia de temazos convertidos en himnos que ten a banda “granaína”. Que cara se lle puxo á rexedora de “é por min, díxoo por min!” cando Noni comentou pisando a area entre o público “esto que lo escuche la alcaldesa”…

Sacou o seu acento a cantante cando puxo a camisola do Deportivo, desexándonos sorte e explicando que o facía porque candp o equipo da súa cidade estaba pola terceira división puxera a camiseta nun concerto e o equipo ascendía a 1ª nun par de anos… A ver se lle pasa aos xogadores branquiazuis un anaco da enerxía que aínda garda tras case 20 anos sobre os escenarios.

Lory Meyers no Noroeste Pop Rock

Quedaba a traca final, e o cabeza de cartel non defraudou. Cunha banda espectacular, con 11 persoas sobre o escenario e uns coros que parecían anxos, a banda escocesa deu un auténtico recital de potencia centrando a súa actuación nos seus discos do século pasado (Screamadelica, Give Out But Don’t Give Up ou Vanishing Point), máis fornecidos de rock que de electrónica. A voz e a presenza de Bobby Gillespie facíase notar, moi ben acompañada por veteran@s como Simone Butler, toda unha demostración de elegancia ao baixo, Martin Duffy aos teclados ou Andrew Innes á guitarra. Pero tamén brillou con luz propia o saxo do novo e poderoso Alex White.

Pechou así unha banda de máximo nivel internacional un festival do que se espera algo de máis de coidados, de atención, de respecto, para que siga sendo unha cita imprescindible para media cidade.

Máis novas do festi

21 minutos nos fogos da Batalla Naval

editor
-
0
21 minutos nos fogos da Batalla Naval

O vindeiro luns, 14 de agosto, A Coruña acollerá unha nova edición da Batalla Naval na enseada do Orzán. O espectáculo, que contará cunha tirada de 735 quilos de fogos piroctécticos, ten unha duración prevista de 21 minutos.

Como é habitual, dispoñeranse dúas zonas de disparo dos fogos, facendo a clásica loita entre os barrios de Riazor e Monte Alto. A principal estará situada na coiraza das Escravas, desde onde se lanzarán 2.251 unidades pirotécnicas e a segunda zona de disparo será a Finca dos Mariño, onde se dispararán 3.975 unidades.
En total, nos 21 minutos previstos de duración realizaranse un total de 3.898 disparos,
2.251 dende as Esclavas e 1.647 dende Os Mariño, utilizando 12.047 unidades pirotécnicas que cubrirán o ceo da Coruña e a auga do Orzán e Riazor, coa combinación de fogos acuáticos e aéreos. O 72% dos fogos de artifico son de fabricación nacional.

Afeccións ao tráfico

Con motivo da celebración da Batalla Naval, mañá luns 14 de agosto levarase a cabo un
corte total do tráfico no Paseo Marítimo, entre a glorieta das Esclavas ata a Avenida de
Hércules en horario de 21.30 horas ás 00.30 horas. A extensión poderá ampliarse, se fose
necesario pola afluencia do público, ata San Roque.

Para a mobilidade na zona, para a saída de Monte Alto recoméndase tomar como
alternativa a rúa Vermar cara a Mariña-Parrote; e para a entrada a Monte Alto, ben pola
avenida do Porto ben pola rúa de San Andrés. No caso da Praza de España, recoméndase
a saída cara o túnel de Avenida do Porto ou pola rúa de San Andrés.

Máis actividades

A xornada complementarase ao longo do día con inicio do XXXVIII Certame de Habaneras
no marco das Festas de María Pita, que se celebrará do 14 ao 20 de agosto nos Xardíns de
Méndez Núñez. A primeira actuación corre a cargo das Corais dos Centros Cívicos, que
darán a coñecer as pezas a partires das 20.00 horas.
Tamén nos xardíns mañá, luns 14 de agosto, comeza a Feira do Libro Antigo e de Ocasión
que manterá as casetas ata o 3 de setembro para que todos aqueles amantes da lectura ou
coleccionistas se poidan achegar e mercar algún dos centos de libros expostos.

Un terremoto de magnitude 2,5 sacudiu a costa da Coruña esta madrugada

Ángela Precedo
-
0
Un terremoto de magnitude 2,5 sacudiu a costa da Coruña esta madrugada

O Instituto Xeográfico Nacional (IGN) rexistrou un terremoto de magnitude 2,5 na escala Ricther este sábado fronte á costa da Coruña.

Tal e como informan, o tremor produciuse ás 2.09 horas, mar dentro, e a unha profundidade dun quilómetro.

O Parque de Bombeiros de Arteixo, pechado por primeira vez

editor
-
0
O Parque de Bombeiros de Arteixo, pechado por primeira vez

O Parque de Bombeiros de Arteixo permanece pechado esta xornada de sábado 12 de agosto. A folga dos Bombeiros (lembren que a única medida é non facer horas extras) e a mala xestión do persoal deixou que non houbese un mínimo de 3 persoas, o que obriga ao consorcio a pechar as portas dun dos parques máis importantes da zona.

O Parque de Arteixo cumple 19 anos “coidando” unha poboación fixa de 130.000 persoas, ademais do fluxo xerado nos parques industriais da zona.

Dende o parque arteixán denuncian as malas condicións que sofren de persoal e material obsoleto.

O persoal do SAD da Coruña elabora un comunicado denunciado o empeoramento das súas condicións laborais

Águeda Cernadas
-
0
O persoal do SAD da Coruña elabora un comunicado denunciado o empeoramento das súas condicións laborais
O pasado mes de abril, o Concello da Coruña reorganizou o Servicio A Domicilio e adxudicou o servizo a novas empresa. Agora, moitas das persoas contratadas constatan un empeoramento das condicións laborais. “Levamos catro meses reclamando solucións, tanto ás empresas como ao Concello, mesmo coa intercesión do sindicato CIG, sen que polo momento a situación mellorase”, explica un grupo do propio SAD.
Os principais problemas e irregularidades denunciados polas persoas traballadoras son, en primeiro lugar, a deficiente explicación do servizo aos usuarios por parte da empresa, que obriga ás persoas traballadoras a enfrontarse a situacións negativas nalgúns fogares, chegando a ser consideradas como “mozas para todo”, máis aló dos servizos sociosanitario para a atención individual dos usuarios, sen lograr respaldo da empresa para resolver estas situacións.
Por outra banda, o novo sistema de organización do SAD faise mediante unha zonificación que divide o territorio municipal en 6 zonas. A día de hoxe, o persoal traballador non sabe a que zona pertence, e as empresas envían ao persoal onde queren. En terceiro lugar, as empresas utilizan a dixitalización para non respectar a necesidade das compañeiras que solicitan que se lles entregue a documentación impresa. Como consecuencia, algunha traballadora non ten na súa poder ningunha nómina dende o mes de abril, cando comezaron a dar servizo a través destas novas empresas.
En cuarto lugar, as traballadoras denuncia que a empresa non lles está proporcionando cuadrante anual como fixa o convenio e ademais denuncia que se lles avisa dos cambios destes incluso o mesmo día. Por outro lado, a imposibilidade da recollida de EPIS que só é en horario laboral polo que se están nun domicilio non poden ir.
Outro dos problemas que salientas estas traballadoras é o escaso tempo marcado polas empresas para realizar os desprazamentos entre un domicilio e outro, imposibles de cumprir en moitos casos. Ademais, as traballadoras afirman que o trato que algunhas coordinadoras dan ás persoas auxiliares de axuda a domicilio, cando se lles indica a falta ou atraso dalgún documento necesario para realizar o traballo, é despectivo e pouco resolutivo.
Por último, recordan que as empresas teñen a obrigación de contratar ao persoal auxiliar de Axuda a Domicilio por unha xornada mínima de 24 horas semanais. Con todo, hai traballadoras con contratos de 20 horas ou mesmo menos.
Por sito as traballadoras do SAD solicitan que os diferentes axentes implicados na prestación do SAD ofrezan solucións rápidas e efectivas ás situacións mencionadas, que se as trate de maneira profesional e cumprindo o convenio vixente en cada un dos puntos mencionados. E aproveitan para facer un chamamento a quen proceda a sentar a negociar un novo convenio.

Máis buses para as festas de Sada

Ángela Precedo
-
0
Máis buses para as festas de Sada

A Xunta reforzará as frecuencias de autobús durante as festas de Sada para facilitar os desprazamentos dos asistentes, segundo informaron a través dun comunicado. Así, o día 15 de agosto os usuarios disporán de servizos especiais de Entrexardíns a Sada ás 23.00 horas e, este ano, tamén desde Betanzos a Sada ás 22.30 e 23.30 horas, respectivamente. Doutra banda, os regresos realizaranse ás 4.30 e ás 5.30 horas desde Sada a Entrexardíns e ás 5.30 horas desde Sada a Betanzos.

Para o traxecto de Entrexardíns a Sada, o servizo especial fará paradas nos seguintes lugares: Entrexardíns, Costa Palloza 4 / 5, Coruña E.A., A Gaiteira, Os Castros, Chuac, Materno A Coruña, Xesuítas A Coruña, Ponte Pasaxe, Perillo, Perillo (Citroen), Perillo (Burger King), Graxal, San Pedro De Nós, Alsina, Mesón Da Auga, O Carballo, Cristo Rey, A Cruz, Piñeiro Piscina (Miraflores), Oleiros cara a Sada, Edreira, Osedo 1, Castelo Cruce Mosteirón, Pombal Osedo, Osedo 2, Osedo 3, Xeiseda, Xeitosiña, Tarabelo 1, Tarabelo 2, A Chaburra, Igrexa Nova, Concello De Sada e Sada Hotel Sada Palace.

Desde Betanzos a Sada, os puntos de paso serán os seguintes: Betanzos praza, Betanzos Instituto , Angustias, Castro 2, Castro 1, Ponte de Ferro, Miodelo, Salloso, Carrio 3, Carrio 2, Carrio 1. Cruz do Sar. San Isidro, Reboredo 2, Reboredo 1, Tatin, Gandario (Mallorca), A Lagoa, Mariña Española, Sada gasolineira, Concello de Sada e Sada hotel Sada Palace.P

Catro feridos nun accidente de tráfico en Bergondo, con retencións na circulación en ambos os sentidos

europapress
-
0
Catro feridos nun accidente de tráfico en Bergondo, con retencións na circulación en ambos os sentidos

Un accidente de tráfico en Bergondo deixou este sábado catro feridos con prognóstico reservado e con retencións na circulación en ambos os sentidos.

Segundo informou o Concello nun comunicado, ao redor das 13.00 horas produciuse un choque frontal na AC-164, á altura do KM 4, fronte á farmacia. Un equipo de Protección Civil e unha ambulancia do 061 atópanse agora no lugar do sinistro atendendo aos feridos.

O Concello pide precaución aos condutores que circulen pola estrada autonómica xa que aínda se atopa na calzada un dos vehículos implicados no accidente, á espera de ser retirado. O outro vehículo acabou nunha horta tras o impacto.

1...398399400...586Page 399 of 586

Xornal da Coruña é o primeiro gran xornal dixital exclusivamente en galego da Coruña e a súa área metropolitana

Contacta: redaccion@xornaldacoruña.gal

SÍGUENOS

© Xornal da Coruña - Xurimaru Servizos de Comunicación 2010 S.L.

QUE É XdC? | AVISO LEGAL | PUBLICIDADE | COOKIES