Inicio Blog Páxina 435

Tres alumnas do IES Agra do Orzán gañan o certame Reimaxina a Ciencia

europapress
-
0
Tres alumnas do IES Agra do Orzán gañan o certame Reimaxina a Ciencia

A Xunta de Galicia eloxiou as vocacións científicas entre os máis novos, na entrega do premio do concurso Reimaxina a Ciencia, no que participaron máis de 1.500 estudantes galegos, e no que se alzaron co galardón tres alumnas do IES Agra do Orzán (A Coruña): Elba Belmonte, Claudia Seco e Manuel Souto. Así o trasladou o conselleiro de Sanidade, Antonio Gómez Caamaño, que na gala de entrega do premio celebrou o “moito talento” que hai entre os estudantes galegos, que é “a esperanza para un futuro mellor”.

O titular de Sanidade referiuse ao traballo da administración para buscar as mellores solucións para as enfermidades dos pacientes e, respecto diso, lembrou que a Xunta destinou este ano máis de 43 millóns de euros para financiar o labor das tres funcións públicas sanitarias.Ademais do proxecto gañador, no acto foron presentando os cinco vídeos finalistas restantes sobre ensaios clínicos, dos centros Seminario Menor daAsunción (Santiago), IES de Brión e CPI de Atios (Valdoviño).

O concurso Reimaxina a Ciencia buscar achegar a ciencia e a tecnoloxía aos máis novos dunha maneira divertida, ademais de fomentar vocacións científico-tecnolóxicas e impulsar oportunidades profesionais na contorna STEM.

A compra venda de vivendas sobe máis dun 30% na Coruña

editor
-
0
A compra venda de vivendas sobe máis dun 30% na Coruña

A compravenda de vivendas en Galicia subiu un 38,4% o pasado febreiro, en comparación co mesmo mes de 2023, ata situarse nos 2.090 inmobles, segundo datos publicados este luns polo Instituto Nacional de Estatística (INE), recollidos por Europa Press.

Desta maneira, Galicia rexistrou un incremento seis veces superior ao da media estatal, xa que no total de España a compravenda de vivendas creceu un 5,8% no segundo mes do ano, con 52.796 unidades.

En Galicia, 517 das vivendas comercializadas eran novas, case un 46,9% máis, mentres que 1.573 eran usadas, un 37% máis. Por outra banda, 2.009 tratábase de vivenda libre e os 81 restantes, protexidas.

Por provincias, a compravenda de vivendas na Coruña subiu en febreiro un 30,4%, ata 858 casas, mentres que en Lugo duplicouse, con 392 e en Ourense subiu un 43,6%, ata 201. Pontevedra rexistrou o menor dos incrementos, cun 22,2%, ata 639 vivendas.

En total, en Galicia transmitíronse 9.495 leiras, un 12,7% máis que en febreiro de 2023, das cales 2.358 eran leiras rústicas e 7.137, urbanas. Destas últimas, 3.938 eran vivendas, sendo transmitidas por compravenda 2.090, mentres que 26 foron doazóns; 8, permutas; 1.016, herdanzas, e 798, outro tipo de transmisión.

A Coruña acolle este sábado a gala dos XI Premios Juan Mayorga das Artes Escénicas

europapress
-
0
A Coruña acolle este sábado a gala dos XI Premios Juan Mayorga das Artes Escénicas

A Coruña acolle este sábado a gala do XI Premios Juan Mayorga das Artes Escénicas, presentados este martes nun acto con presenza, entre outros, do concelleiro de Cultura, Gonzalo Castro. Estes galardóns recoñecen o traballo do teatro afeccionado a nivel nacional e foron creados por Escenamateur e a Confederación Nacional de Teatro Amateur e apadriñados polo dramaturgo e director Juan Mayorga.

Este ano a Federación Teatral Afeccionada de Galicia, FeteaGal, organiza esta gala coa colaboración do Concello. O evento terá lugar o sábado 27 de abril, a partir das 19,30 horas, no Teatro Colón, espazo que acolleu esta mañá a presentación.

DIA DA CIENCIA

Por outra banda, o parque de Santa Margarita acollerá un ano máis o Día da Ciencia na Rúa, con propostas no mesmo o próximo 4 de maio.

Serán case un centenar de actividades de bioloxía, tecnoloxía, matemáticas e física dirixidas a todos os públicos e coa presenza dun milleiro de escolares procedentes de 54 centros.

O BNG pide que se analice o cumprimento das obras de dragado da Ría do Burgo

europapress
-
0
O BNG pide que se analice o cumprimento das obras de dragado da Ría do Burgo

O BNG rexistrou novas iniciativas no Congreso para que o Ministerio de Transición Ecolóxica e Reto Demográfico (Miteco) analice o cumprimento do proxecto para a drenaxe da Ría do Burgo antes de recibir a obra e manteña as axudas ao sector marisqueiro ata a plena capacidade produtiva.

O deputado do Bloque na Cámara Baixa, Néstor Rego, esixe á ministra Teresa Ribeira “corrixir as afectacións e consecuencias negativas derivadas da vulneración da Declaración de Impacto Ambiental para poder realizar adecuadamente os labores de sementeira co permiso da Xunta”.

Tal e como explicou o BNG nunha nota de prensa, as actuacións de drenaxe e rexeneración da ría finalizarán o próximo 26 de abril, momento no que se procederá a sementar marisco co catro especies de bivalvos propias do espazo. Con todo, sinalaron os nacionalistas, será necesario un período de entre 18 e 24 meses para que se restaure a capacidade produtiva da Ría do Burgo e as persoas do sector poidan volver vivir do seu traballo.

Neste contexto, Néstor Rego lembrou que os mariscadores presentaron un informe no que indican que, “vulnerando o Estudo de Impacto Ambiental, as obras de drenaxe eliminaron o 40% do banco marisqueiro de O Carniceiro”, o que supón “unha grave alteración para o hábitat da ría e para a posterior produción marisqueira”. Así, detallou que dun total de 30 subzonas de produción, observouse que 27 delas “sufriron algún tipo de afectación como resultado das obras de dragado”.

“O Miteco debe analizar o cumprimento do proxecto de obra, atendendo ao Estudo de Impacto Ambiental, á vista do informe elaborado polos mariscadores e o biólogo da Xunta, que confirma a eliminación do 40 por cento do banco marisqueiro do Carniceiro e afectacións noutros bancos da ría para avaliar as posibles consecuencias que desta afectación derívanse”, manifestou.

Ingresado en planta con evolución favorable o home apuñalado no Orzán

europapress
-
0
Ingresado en planta con evolución favorable o home apuñalado no Orzán

O home apuñalado na zona de pubs do Orzán, na Coruña, na madrugada do pasado 19 de abril, atópase ingresado en planta, no complexo hospitalario universitario da Coruña (Chuac), con evolución favorable, segundo informaron fontes hospitalarias consultadas por Europa Press.

En relación a este caso, a maxistrada do Xulgado de Instrución número 2 da Coruña decretou o ingreso en prisión provisional, comunicada e sen fianza dos catro detidos. Segundo fontes do Tribunal Superior de Xustiza de Galicia (TSXG), todos eles están investigados por un delito de asasinato en grao de tentativa ou consumado, dependendo da evolución da vítima.

Os feitos ocorreron sobre o cinco da madrugada do venres na zona de copas desta rúa herculina, aínda que a detención produciuse pouco despois na rúa Torreiro.

Xulgan na Audiencia Provincial a catro persoas por contrabando de tabaco desde Andorra ata A Coruña en 2012

europapress
-
0
Xulgan na Audiencia Provincial a catro persoas por contrabando de tabaco desde Andorra ata A Coruña en 2012

A Audiencia Provincial da Coruña xulga a catro persoas por contrabando de tabaco, tres homes e unha muller, ás que Fiscalía pide penas de entre cinco e sete anos de prisión, e que foron arrestadas no marco dun operativo levado a cabo en 2012. Como resultado do mesmo, na causa figuran 17 persoas, tras operativos en distintas localidades galegas de Ourense, Pontevedra e A Coruña, pero tamén españolas como Sevilla ou Asturias.

Todo iso por, segundo recolle o escrito fiscal, contrabando de tabaco procedente de Andorra e que trasladaban en vehículos propios, como camións, pero tamén alugados. No caso dos que se xulga na Coruña, Fiscalía precisa que foron detidos dous dos homes, en xuño de 2012, cando transportaron un alixo de tabaco de contrabando que viña oculto no dobre fondo dun camión.

A detención, explica, produciuse, na cidade herculina, tras un traslado da mercadoría ata unha nave industrial situada na estrada de Nostián, onde lles estaba esperando para a descarga, engade, o outro home acusado, e que era arrendatario da mesma. Máis tarde, os axentes do Servizo de Vixilancia Aduaneira realizaron un operativo nun local do mercado de Santa Lucía, rexentado pola muller acusada. Nel, interveuse tabaco valorado nuns 38.000 euros. Fiscalía sostén que ela “se dedicaba a vender entre consumidores o tabaco de contrabando”.

REDE EN GALICIA

Nas testificais, axentes de Vixilancia Aduaneira explicaron que se trataba dunha rede en toda Galicia para a subministración de tabaco de contrabando, en mercados como o da Pedra, en Vigo, e o de Santa Lucía, na Coruña. “Xente con patrimonios elevados que non podían demostrar outras fontes de ingresos que non fosen o contrabando de tabaco”, expuxeron. Sobre a muller, dixeron que estaba “en contacto” con subministradores e outros contrabandistas de Galicia e de Andorra. “Para nós a que manexaba todo era”, aseverou sobre a mesma un deles. Tamén explicaron que o transporte se facía en furgonetas e camións alugados, e con dobres fondos ocultos, para ocultar o tabaco, cun valor no mercado, segundo as cantidades incautadas, de entre 289.000 euros e os 21.000 euros.

O Depor Feminino celebra o primeiro ascenso da cidade apoiado polas familias

Ubaldo Cerqueiro
-
0
O Depor Feminino celebra o primeiro ascenso da cidade apoiado polas familias

Fin de semana de ensoño para o deportivismo e o deporte da cidade. O sábado, o Dépor masculino daba un novo paso cara o ascenso á 2ª División estatal nun día de récord, coa presenza de máis de 29.000 persoas no estadio de Riazor, a meirande entrada rexistrada nun partido de 1ª RFEF:

Pero a mellor nova quedaba para a mañá dominical. Riazor, volvía vestirse de gala para ver como o Dépor Abanca completaba esta espectacular temporada vencendo con solvencia ao Cacereño por 3-1 e rubricando a volta á Liga F, a 1ª División do fútbol feminino estatal.

As familias ao poder


Unha cita histórica tamén aupada por 14.057 persoas, novo récord tamén na 1ª RFEF feminina, o que demostra que somos unha afección doutra categoría, como recoñecía Irene Ferreras, a adestradora, na celebración no palco das Peñas. “Non son de aquí, pero síntome como se o fose. Ensinástesme o que é ser dun equipo, sodes unha afección de primeira”, berrou animadísima a armadanzas desta xesta.

Pero esta foi a fin de semana das Peñas, pero o domingo foi aínda máis a fin de semana das familias. Foron ducias de ANPAS as que conseguiron mobilizar para encher toda a grada de Preferencia de cor, facendo que todos os barrios, que os e as máis peques da cidade normalicen o fútbol feminino e se unan á bandeira deportivista.

No campo

Depor Feminino coas penas

No deportivo, nun céspede estupendo a pesar de terse xogado apenas 16 horas antes o choque masculino, o 11 deportivisita volveu demostrarse moi superior. Dende o primeiro minuto o choque se disputou no campo do Cacereño, con ocasións constantes. Cunha Henar coma sempre imperial no medio campo, a defensa non sufríu en case ningún momento. No medio Paula Gutiérrez aos mandos da nave, cada internada de Ahinoa Martín era un puñal. Cazouna a de Badalona ao fío do descanso para abrir o marcador e facer xustiza ao visto no campo.

Pronto se ocupou a killer Millene de facer o seu, marcando dous novos tantos e permitindo que a última media hora fose de festa, con onda e todo nas bancadas familiares do estadio.

Recibimento nas peñas

Ambientazo tamén fantástico nas carpas das peñas, con polvo, fideuá, cervexa e moita alegría para recibir ás protagonistas co polifacético Sergio TR, o speaker de moda da cidade que lembraba o traballo que lle queda de aquí a que remate a temporada, cos ascensos que quedan por vivir de aquí a final de temporada, co Basquet Coruña ou o Dépor masculino.

Olladas doutro tempo: Santa Cristina

Fernando Campos Mantiñán
-
0
Olladas doutro tempo: Santa Cristina

A Pasaxe da Foz era o nome que se empregaba antigamente para referirse ó paso estreito formado xusto á entrada da ría do Burgo, entre As Xubias e a lingua de area que hoxe chamamos praia de Santa Cristina. Alí estableceuse un servizo contínuo para cruzar en barca xa a finais do século XV, coma relata o historiador Xosé Alfeirán nun dos seus excelentes artigos, no cal trata a historia do embarcadoiro das Xubias. Éste tivo unha grande importancia durante varios séculos, pois a ponte da Pasaxe non sería unha realidade ata 1901. Antes diso, era necesario para calquer veciño, viaxeiro ou comerciante chegar ata a ponte do Burgo para cruzar á outra beira a pé, co enorme rodeo que iso supoñía.

Xa no século XX o paso en barca seguía a ter moita demanda, pero con outro obxetivo, o de desfrutar a praia para bañarse e tomar o sol. A Compañía de Tranvias chegou a crear en 1928 un servizo que combinaba a ida e volta en barca cos desprazamentos en autobús, conectando así Santa Cristina con Porta Real. Moi preto de alí moitos coruñeses e turistas tomaron durante décadas o barco que unía directamente a Dársena coruñesa co embarcadoiro de Santa Cristina, sobre todo no verán.

Resulta curioso coma en poucas xeracións pode cambiar tanto a forma de empregar un espazo. Mirando esta fotografía dos anos sesenta chámanos moito a atención a cantidade de coches metidos no areal. Algún deles ata circula a escasos centímetros da auga, por riba da liña de algas. Tomar o sol a carón do teu volkswagen escaravello pode estar a marcar unha grande diferenza. Semella un sinal de status, coma se fose necesario deixar ben claro que chegaron ata alí en coche, e non nunha ateigada lancha. Algo así coma quen deixa o iphone enriba da mesa, ben visible durante toda a cea.

Nos anos oitenta dispoñer de automóbil xa era algo habitual, ó alcance de case todos. Entón  estaba máis de moda ateigar de coches o piñeiral, circulando entre as árbores a modiño e cambaleando, tentando non estragar a suspensión coas irregularidades do terreo, buscando algún oco entre a desorde salvaxe para estacionar á sombra pero moi preto da area. Non era momento para darlle voltas a conceptos modernos coma a degradación dos espazos naturais ou cousas polo estilo. 

Podemos apreciar estes cambios de tendencias e usos coas instantáneas de Alberto Martí Villardefrancos, un dos fotógrafos máis coñecidos e lembrados da nosa cidade. Naceu en Santiago en 1922, pero moi pouco despois chegaría a Coruña, onde desenrolaría toda a súa labor artística. Con tan só 12 anos foi admitido coma recadeiro en Foto Blanco e alí foi aprendendo todo sobre o oficio da man do seu mestre Angel Blanco Villar. Ó longo da súa brillante traxectoria, tanto en Foto Blanco coma na Voz de Galicia, Martí capturou millóns de imaxes que retratan a evolución da nosa cidade durante case un século. 

Alí estaba Martí en 1961 para retratar esta estampa estival tan insólita para os ollos de hoxe en día. Non creo que nese momento se lle pasase pola cabeza chegar a ver praias case estandarizadas, coas súas casetas de salvamento, os cubos do lixo separados á mesma distancia, aparcadoiros asfaltados, sinalizados e mercantilizados, e ondeando ó vento as bandeiras azuis polas que os concellos pagan milleiros de euros cada ano. Polo menos reconfórtanos ver a evolución no uso do automóvil. De facerse donos de calquera espazo nos anos 70 e 80, cando rodaban e estacionaban case sen lei, pasouse agora a unha convivencia  bastante máis respetuosa. Eses cambios positivos no uso dos coches ó longo do tempo poden manter a esperanza de que nun futuro tamén empreguemos de xeito máis responsable, por exemplo, os teléfonos móviles.

 

FERnando-campos

  • Fernando Campos. Coruñés ata a médula e fanático da Historia, sobre todo se esa Historia é coruñesa. Máis de quince anos impartindo obradoiros culturais coma “Un paseo pola cidade”, “Personaxes da cidade” ou “A Cidade Perdida” no Fórum Metropolitano e no Centro Ágora.

OLLADAS DOUTRO TEMPO

Localizan o corpo sen vida do mergullador desaparecido no Orzán

europapress
-
0
Localizan o corpo sen vida do mergullador desaparecido no Orzán

Axentes do Grupo de Especialistas en Actividades Subacuáticas (GEAS) da Garda Civil localizaron o corpo sen vida do mergullador desaparecido na zona do Orzán, na Coruña. Ao fío das 15,00 horas un particular contactou cos Bombeiros da Coruña para alertar de que observaba un traxe de neopreno ou similar mergullado na praia das Amorosas.

Así, ata o punto desprazáronse tres dotacións e dúas lanchas de bombeiros, axentes da Policía Local, da Nacional e os GEAS da Garda Civil. Sobre as 19,30 horas efectivos participantes na procura confirmaron a localización do corpo. Ademais, as pertenzas do mergullador foron atopadas na zona.

Catro detidos tras un novo apuñalamento na zona de copas do Orzán

europapress
-
0
Catro detidos tras un novo apuñalamento na zona de copas do Orzán

Catro persoas foron detidas esta madrugada tras o apuñalamento dun home na Coruña, na zona de copas do Orzán na cidade herculina. Así o informaron fontes municipais consultadas por Europa Press que explicaron que as detencións se produciron tras unha agresión ocorrida sobre as cinco da madrugada.

Os feitos, de acordo coas mesmas, foi na zona de pubs desta rúa herculina aínda que a detención produciuse pouco despois na rúa Torreiro.

Agora están á espera do seu pase a disposición xudicial mentres que o ferido foi trasladado a un centro hospitalario. No caso de tres considéraselles partícipes da agresión e no dun cuarto houbo unha detención tamén no marco destes feitos, pero por enfrontarse aos axentes.

A maxistrada do Xulgado de Instrución número 2 da Coruña decretou o ingreso en prisión provisional, comunicada e sen fianza do catro detidos.

1...434435436...781Page 435 of 781