Con indignación, pero tamén con retranca, recibiu o pobo galego os ataques á nosa lingua protagonizados polo colectivo de Hablemos Español. Esas provocadoras pancartas sobre a nosa toponimia xa se convertiron en tendencia nas redes sociais, facendo burla do xa superado intento por recastelanizar os topónimos oficiais.
Ademais dos carteis colocados en Sanxenxo, A Coruña ou Ourense, a sociedade tuitera ten feito verdadeiras demostración de sarcasmo.
Esta mañá, ademais celebrouse unha concentración no Obelisco convocada pola Mesa pola Normalización Lingüística. Un evento paa defender a lexislación vixente trala publicación dun manifesto na súa páxina web que recibiu máis de 7000 sinaturas de apoio en menos de 48 horas.
A Coruña, así a queremos! 🩵
A Mesa concentrou un cento de persoas na cidade herculina para denunciar as mensaxes de odio contra a nosa toponimia.
‼️ Atacar e ocultar a nosa toponimia é facelo tamén coa nosa dignidade colectiva e a capacidade de dicirlle ao mundo quen somos e… pic.twitter.com/1SJq2xDksA
— A Mesa Normalización Lingüística (@amesanl) June 30, 2023
O presidente da Mesa, Marcos Maceira, recordou que “a toponimia fala da Historia, da cultura e da lingua dos pobos” e que, polo tanto, “agredir a toponimia galega é agredir o pobo galego”. Neste sentido, criticou duramente as “campañas de odio, vidas desde fóra, que pretenden borrar a pegada que o pobo galego deixou no seu territorio, no noso territorio” e salientou a rápida e contundente resposta do pobo galego, que “non está disposto a ser humillado por ninguén” e, por iso, “respostou masivamente rexeitando as campañas de odio contra o galego”.
Maceira denunciou, sen embargo, a falta de resposta dos poderes públicos. “O máis preocupante”, abundou, “é o amparo dos poderes públicos a estas agresións, como o apoio da xefatura do Estado ou da presidencia da Xunta ao Foro que deturpa a toponima da Toxa ao final de cada verán”. Neste sentido, recordoulle ás administracións galega e española que “a cidadanía galega falou estes días alto e claro”, recordando “que os nosos lugares se chaman en galego”.
A Mesa recorda que os poderes públicos deben actuar en defensa da lei e contra o uso reiterado e sistemático das formas deturpadas tanto nesta campaña publicitaria como na sinaléctica, nos medios de comunicación ou mesmo mapas dixitais como os de Google.
