A semana que vén teremos boas novas sobre a restauración e conservación das 12 pinturas murais que sobreviven aos temporaís, á ruína e ao desleixo das administracións no baixo e no entresollado do antigo restaurante Fornos. Dende In Nave Civitas e O Mural, que levamos dende xuño de 2021 solicitando que Concello e Xunta fagan algo, estamos convencidos de que, a máis tardar o próximo mércores, a alcaldesa da Coruña e o conselleiro de Cultura van dar unha rolda de prensa para anunciar un paso transcendental para «poñer en valor esta obra única e senlleira do patrimonio cultural de Galicia».
Seguro que os que nos leron ou escoitaron outras veces sendo pesimistas, se preguntarán a que se debe esta ilusa esperanza nas administracións. É sinxelo: O Mural e In Nave Civitas veñen de convocar á cidadanía toda e a movemento asociativo a unha asemblea aberta baixo o lema «Salvemos os frescos de Lugrís!» e cada vez que algunha entidade ou persoa protestou; cada vez que saiu un artigo asinado por xente autorizada; despois de cada día Lugrís, algún dos nosos políticos pediu espazo nas páxinas de cultura dos medios de comunicación para anunciar que comenzaban facer algo «con urxencia» para salvar os frescos. Ante unha cidadanía crítica e mobilizada, un anuncio político potente. A estratexía propagandística é simple, mais venlles funcionando dende a noite dos tempos.
Pero as actuacións urxentes anunciadas por Inés Rey, Gonzalo Castro, Alfonso Rueda, Román Rodríguez ou José López nestes últimos 5 anos diluíronse co avance do calendario. E, disimulen a futuroloxía amadora, o mesmo vai pasar coa que calquera deses mandatarios poida facer na vindeira semana. A única finalidade do seu anuncio será conseguir que pouca xente acuda a Asemblea.
Por iso, diga o que diga o Concello e a Xunta, celebraremos a xuntanza o vindeiro xoves, 14 de maio, ás 20:30 horas no Circo de Artesáns da Coruña para armar o que queremos que sexa o «derradeiro» acto cidadán para pedir que fagan algo dunha vez para salvar esta obra única da arte galega que esmorece ante os nosos ollos.
Fican todos os lectores convidados a acudir a Asemblea para achegar imaxinación e folgos nesta reivindicación da ledicia e a beleza en tempos de escuridade e estupidez.
- Rodrigo Osorio Guerrero, do colectivo lugrisán In Nave Civitas.
Máis novas
Tecendo tapabocas á espera das accións da Xunta e do Concello nos frescos de Lugrís…
