Esta mañá, os docentes e usuarios do Programa de Lecer do Fórum Metropolitano e do Ágora continuaron coas súas mobilizacións para solventar a problemática xurdida arredor dos cursos culturais. Aproveitando o Entroido, este Mércores de Cinza realizaron o “Enterro do Programa de Lecer” ás portas do edificio municipal da Marina nunha acción festiva e reinvindicativa pola actualización dos soldos, e mellora salarial, a posta en marcha urxente dos cursos neste 2026, e a preparación duns pliegos axeitados á realidade formulados para o contrato do curso que vén.
Unha concentración que aproveita o Movemento Sumar Coruña, que quere trasladar o seu apoio ás traballadoras e traballadores do programa. “O que está a acontecer non é unha cuestión menor nin técnica: é unha responsabilidade política directa”, sinala a voceira, Trinidad Palacios. “Non é tolerable que haxa salarios pendentes nun programa municipal que funciona e que ten demanda. Estamos falando de dereitos laborais e de respecto á cidadanía”.
Palacios sinalou ao presidente do IMCE e concelleiro competente, Gonzalo Castro, como máximo responsable da situación: “Non pode permanecer impasible mentres un programa consolidado queda paralizado e mentres o persoal agarda por salarios que lle corresponden. “O IMCE ten que pagar o que debe e activar xa a programación deste ano”.
“Se o Goberno municipal non é capaz de garantir algo tan básico como pagar a tempo e manter en marcha un programa consolidado, entón o problema xa non é puntual: é estrutural”, sentencia.
Máis novas
O Programa de Lecer e as débedas dos docentes, pendentes da vontade da empresa reincidente
Docentes e usuarios defenden o Programa de Lecer nunha reivindicativa ”aula aberta” en María Pita
