Foi no pleno de setembro cando se aprobaba, cos votos de PSOE e BNG, a nova ordenanza de mobilidade. A problemática dos Vehículos de Transporte con Condutor xa estaban enriba da mesa pero o goberno non afrontou a súa necesaria regulación.
Así llo recorda, despois da mobilización dos taxis, o portavoz municipal do PP no Concello da Coruña, Miguel Lorenzo, que vén de instar á alcaldesa, Inés Rey, a regular o sector da mobilidade polo conflito entre taxistas e VTCs.
“Non se trata de estar co PP, senón de apoiar aos taxistas e buscar solucións a un problema creado por Inés Rey e BNG cando desaproveitaron unha gran oportunidade ao aprobar hai só uns meses unha ordenanza de mobilidade que xa se quedou anticuada”.
Así o expuxo nunha rolda de prensa na que afirmou que “hai que sentar con todos, dialogar e regular o sector da mobilidade, incluíndo VTCs, respectando o gran labor que sempre fixeron os taxistas”.
Non fai autrocrítica o BNG, pero tende a man ao goberno ao presentar por rexistro unha ordenanza para regular a actuación dos VTC na Coruña. “Temos a man tendida ao diálogo para negociar un texto que regule a actuación dos VTC na cidade e que, á vez, defenda o sector do taxi”, afirma Avia Veira.
O BNG pide que os VTC non poidan facer viaxes urbanas no concello herculino, ou sexa, desprazamentos con saída e destino no noso termo municipal, unha vez que, dacordo coa normativa galega, só teñen título habilitante para facer viaxes inter-urbanas (entre concellos distintos).
De acordo coa proposta de ordenanza do BNG, os VTC non poderían estar en paradas para captar clientela nin poderían circular polo interior da cidade para ofrecer os seus servizos. Estes terían que ser precontratados cun tempo mínimo de antelación (60 minutos), os vehículos deberían estar convenientemente identificados como tales e estaren rexistrados nunha plataforma dixital.
Máis novas
Máis de cen taxis percorren a Coruña para denunciar o “intrusismo” dos VTC
A conxelación de taxas e os VTC protagonizan o pleno de novembro na Coruña
