A maxistrada do Xulgado do Penal número 4 da Coruña condenou, como autor dun delito de homicidio por imprudencia grave, en concurso cun delito de lesións con instrumento perigoso, ao acusado de causar a morte dun home de 31 anos, ao que golpeou cun cinceiro durante a Noitevella de 2020, nun hotel de Oleiros. Ademais, informa o Tribunal Superior de Xustiza de Galicia (TSXG), condenouno como autor dun delito de lesións sobre o pai do falecido, polo cal lle impuxo unha multa de 1.080 euros. A xuíza tivo en conta a atenuante de embriaguez.

En concepto de responsabilidade civil, deberá pagar aos familiares do falecido un total de 259.000 euros e, á persoa que lesionou, 6.000 euros polas feridas e 3.300 euros pola secuela que sofre. Así mesmo, terá que abonar ao Sergas 796 euros polos gastos de asistencia sanitaria prestada ao lesionado. Na sentenza, considérase probado que, sobre as 05.50 horas do día 1 de xaneiro de 2020, na zona onde se atopaba a barra na que servían as bebidas dun hotel de Oleiros, o acusado propinou un pisotón, golpeou e tirou ao chan a un home. O fillo da vítima, segundo o relato de feitos probados da sentenza, decatouse do sucedido e enfrontouse ao agresor, empuxándose ambos.

Nese momento, os empregados do establecemento abriron as portas para que saísen á terraza exterior, onde se agarraron polo pescozo, propinándose golpes. Algúns dos presentes lograron que o fillo do lesionado entrase de novo no local, pero volveu saír e aproximouse ao acusado, quen, agarrando un cinceiro metálico que se atopaba no lugar, golpeouno fortemente na cara, o que provocou que caese. Como consecuencia do golpe, sufriu unha hemorraxia que lle causou a morte.

ARGUMENTOS

A xuíza sinala que “se puido comprobar que a vítima consumira esa noite unha cantidade elevada de alcol e cocaína, circunstancia que favoreceu a hemorraxia e reduciu a reacción do organismo fronte ao traumatismo”. A titular do Xulgado do Penal número 4 da Coruña destaca na sentenza “a gravidade da neglixente actuación levada a cabo polo acusado, respondendo a unha omisión da dilixencia de todo punto intolerable, máxime atendendo que no momento en que a acometida co cinceiro foi levado a cabo, o acusado non estaba a ser agredido pola vítima”. Nela, engade que “o acusado, co seu imprudente e grave actuar, causou o falecemento da vítima”.

Na sentenza, subliña que “a característica da acometida, zona do impacto e intensidade do golpe abonan, sen dúbida, a gravidade da imprudencia na acción do acusado que conduciu ao fatídico resultado: a vítima non falecería de non recibir devandito impacto, razoamento tan simple como relevante, pois a hemorraxia inmediatamente causante da morte sobreveu, de maneira inmediata, tras o impacto”. Por iso, incide en que “o imprudente e grave actuar do acusado, ligado como mecanismo subxacente aos niveis de alcol e cocaína da vítima, causaron o falecemento”. A maxistrada, por tanto, considera probada a comisión dun feito doloso, é dicir, o golpe directo propinado na cara co cinceiro, e de “un feito consecuencia, non querido, pero previsible, actuando na confianza de que este non se producise, cal foi o resultado da morte da vítima”.

“No caso que nos ocupa, a utilización dun cinceiro para golpear á vítima, cinceiro de non reducidas dimensións, agarrándoo coa man para, a curta distancia, asestar un golpe dirixido á cara, merece, sen dúbida, pola natureza do instrumento e polas peculiaridades do método ou forma da agresión, a aplicación do tipo agravado do artigo 148.1 do Código Penal”. A xuíza recalca que “ningunha dúbida pode suscitarse, ademais, de que dita forma de agresión incrementou a gravidade do resultado, tal é así que a vítima faleceu, existindo relación causal entre o traumatismo e o resultado do falecemento”. A sentenza non é firme e cabe interpor recurso ante a Audiencia Provincial da Coruña.