Este sábado 14 de marzo, ás 12:00h nas Conchiñas, a Plataforma polo Dereito á Vivenda convoca unha concentración na praza das Conchiñas.
Un lugar escollido por varios motivos, tendo en conta que falamos dun dos barrrios máis densamente poboados da cidade, onde o problema da vivenda xa afecta mesmo ás persoas con traballo, e onde 30.000 habitantes compiten por menos de 20 pisos ofertados, todos por riba dos 650 €.
Así o explicaban esta mañá en rolda de prensa dous membros da entidade. “O que pasa na Agra do Orzán non é un caso illado, é un exemplo de todos os barrios da cidade”.
E puxeron datos: O aluguer subiu un 80% en 10 anos, de modo que un piso que hai 10 anos custaba 400€, hoxe custa 750, para un barrio o soldo medio rolda os 1200€”. Un barrio no que o metro cadrado supera os 2.400€ incluso en edificios con máis de 40 anos de antigüidade.
Tamén falaron da compra: “A situación tamén empeorou, o prezo subiu máis do 65% na última década”, provocando que “as familias teñan que marchar dos seus barrios”.
A Zona Tensionada non funciona
Sobre a declaración de Zona Tensionada, reflexionaron que “calquera medida pode estar ben, pero vemos que non funciona, os prezos non baixan. E non funciona porque non incide co principal problema que é acabar coa especulación, acabar con que a vivenda sexa un activo financieiro para caseiros rentistas multipropietarios ou fondos de investimento. É só un parche”.
E puxeron un dato claro: “A día de hoxe nas plataformas hai 1.372 Vivendas de Uso Turístico dispoñibles (a maioría non cumplen as normativas ademais); pero só hai 430 para aluguer “normal”, se ben algunhas son para estancias por temporada, e só un 8% están por debaixo dos 700€”.
Vivenda Pública
Parece que as administracións acordaron este ano de falar vivenda pública, despois de décadas nas que a promoción de vivende protexida foi esquecida. “España é un dos países con parque público de vivenda máis baixo de toda Europa mentres a SAREB segue a acumular vivendas”, reflexionaron.
Apoio da CGT
A Confederación Xeral do Traballo (CGT) da Coruña fai un chamamento urxente á cidadanía para sumarse á concentración organizada pola Plataforma. “O sindicato apoia e participa nesta mobilización, que busca garantir unha vivenda digna e frear a presión especulativa que empobrece traballadoras, traballadores e pensionistas”.
Lembran que “a emerxencia habitacional afecta a moitas persoas que, a pesar de contar con ingresos mensuais, viven con medo de non poder pagar o alugueiro ou vense obrigadas a compartir vivenda pola falta de alternativas accesibles”.
O sindicato insiste: “o acceso a unha vivenda digna non pode seguir subordinado aos intereses dos especuladores nin a gobernos cómplices, como o da Xunta de Galicia e o do Estado español. Garantilo é unha cuestión de xustiza social e dignidade”.
Máis novas
A Plataforma polo Dereito á Vivenda comeza unha campaña no barrio con maior densidade de poboación de Galicia
