As praias de Riazor, Orzán e Matadoiro, pechadas o martes ao baño por presenza de carabelas portuguesas, foron abertas de novo, segundo ratificou a alcaldesa, Inés Rey.
A preguntas dos xornalistas, e con motivo da rolda de prensa que ofreceu para informar os asuntos abordados na Xunta de Goberno, precisou que agora se fará unha revisión “para comprobar se existen exemplares na auga e preto da costa”.
No entanto, pediu á cidadanía que se se achegan ás praias “non as toquen” e que respecten as indicacións dos servizos de salvamento marítimo, a pesar de que as carabelas detectadas onte “fóronse afastando da costa”. O consistorio xa solicitou o martes que se seguisen en todo momento as instrucións do persoal de salvamento tras prohibir o baño por precaución.
Debut de Imanol Idiakez como adestrador do Depor en partido oficial (0V 1E 0D)
— — —
Comezou unha nova tempada para o Depor e o fixo dunha maneira ben morna. Sabendo que aínda quedan fichaxes por pechar e que aínda estamos en agosto, o partido do sábado pasado deixou ver certas cousas boas no arranque da competición.
Deixou ver que o Depor xa conta cun bloque de partida fiable na defensa e serio en ataque, de aí que se conten por riba da decena as chegadas ó área rival con boa presenza de Yeremay e Lucas na maioría delas deixando claro que serán esas referencias que se pedían por parte do afeccionado. Faltan notas que afinar na partitura branquiazul e haberá que estar preto da evolución de Barbero, Davo, Jose Ángel, Palo Valcarce, Berto Cayarga. Este tempo dirá se o obxectivo do ascenso pasa polo sufrimento un ano máis ou viviremos alegrías alá por maio.
Tamén deixou ver o partido algo non tan novo por Riazor, como é que os rivais virán a pechar as liñas e frearán o ritmo continuamente, de aí a importancia de adiantarse pronto no marcador nos partidos da casa e tratar de chegar o descanso con vantaxe no marcador. Intentouno o Depor na primeira metade e logrouno na segunda, máis o árbitro decidiu que el tamén quería protagonismo e anulou un gol legal a todas luces. Mal o arbitro, peor ó liña.
Pouco máis deixou este primeiro partido. Un Depor preto do esperado, con cousas que pechar e ca necesidade de lograr a vitoria en Lugo esta fin de semana e comezar a sumar de tres en tres para espantar os fantasmas do ano pasado: mal comezo con Borja Jiménez e nulo éxito a domicilio có ínclito Oscar Cano.
Miguel Barreiro Bugallo. Coruñés e deportivista no exilio mesetario. Sufrindo ó depor dende 1988. O que sei de fútbol, o Depor empéñase en negarmo. Firme defensor do fútbol de botas negras.
Galicia acolleu a primeira xornada da reunión conxunta do equipo de traballo interregional do proxecto GIFT (Green Infrastructure for Forest and Trees), que se constituíu oficialmente o pasado mes de xuño e cuxa misión é establecer ao longo do próximos catro anos medidas e políticas sectoriais efectivas no campo da xestión da infraestrutura verde e da paisaxe.
A xornada contou coa participación de expertos internacionais. Concretamente, da Universidade de Zagreb, en Croacia, e da Universidade de Letonia, en calidade de socio asesor. Ademais, participaron especialistas da Xunta e doutras institucións galegas implicadas no coidado e na protección da paisaxe, como a Fundación Juana de Veiga e a Reserva de Biosfera Mariñas Coruñesas e Terras do Mandeo.
O encontro comezou cunha reunión técnica na Reitoral de Celas que inaugurou o director do Instituto de Estudos do Territorio (IET), Enrique de Salvador, e durante a que, da man dos socios implicados no proxecto, analizáronse os instrumentos políticos directamente relacionados coa infraestrutura verde, entendida como unha rede de espazos e elementos que melloran a resiliencia ante o cambio climático, contribúan á conservación da biodiversidade e beneficien ás poboacións da contorna.
Logo desta primeira asemblea e das dúas mesas de traballo da mañá, os invitados visitaron o Monte Xalo, en Culleredo, por tratarse dun “exemplo claro de combinación de valores naturais, culturais e panorámicos”, apunta a Xunta.
Así, os participantes eloxiaron a integración paisaxística e o bo estado de conservación desta zona, localizada en pleno corazón da reserva de biosfera coruñesa, declarada tamén Área de especial interese paisaxístico e proposta ademais como zona multifuncional na futura Infraestrutura Verde de Galicia, xa que supón “un excelente exemplo de interconexión entre zona rural e urbana”.
O encontro termina este mércores en Santiago cunha xornada que contará tamén cunha reunión técnica para revisar os aspectos tratados na primeira sesión e unha mesa de traballo para que os expertos debatan sobre as medidas para continuar xestionando adecuadamente a infraestrutura verde e a paisaxe nos seus territorios.
Por último, haberá un bloque de conclusións e fixaranse os prazos para o envío dos informes das revisións entre pares que deberán elaborar os socios do proxecto.
Non quedan impunes xa accións machistas e caciquís como as que leva protagonizado na última semana o presidente da Real Federación Galega de Fútbol. Así se deixou claro esta tarde de luns, con concentracións en todo o estado nos que os colectivos feministas e os clubs de fútbol, nomeadamente o fútbol feminino, saíron á rúa para amosar o seu apoio a Jenni Hermoso.
O Obelisco acollía a concentración con cánticos de “Rubiales Dimisión” e “Fóra acoso do deporte”, deixando claro que esas accións non van quedar impunes.
Con Jenni Hermoso, contra o machismo tolerancia cero. Imaxes da concentración na Coruña. pic.twitter.com/EUCGl8XmJb
O Concello da Coruña, a través da área de Fomentoy Promoción da Cidade, promove do 8 ao 10 de setembro o ‘IV Romaría de Elviña e Castro’.
“Unha celebración popular que forma parte do programa de festas nos barrios, que engloba todas as celebracións que se desenvolven ao longo do ano nas distintas zonas da cidade“, explica.
A programación deste IV Romaría de Elviña inclúe tres xornadas centradas na música e o baile tradicional galego, con actividades para todos os públicos.
A alcaldesa da Coruña, Inés Rey, expresou a súa “absoluta repulsa” e o seu “rexeitamento máis enérxico” ante o comportamento “impropio en calquera ámbito social” do presidente da Real Federación Española de Fútbol (RFEF), Luís Rubiales, quen bicou na boca á internacional Jenni Fermoso tras a final do Mundial.
A rexedora, ademais, mostrou o seu apoio á xogadora e “en xeral a todas as mulleres que sufriron nalgún momento da súa vida, que somos moitas, violencia sexual, entendida como comportamentos totalmente inapropiados na contorna laboral”.
Fíxoo, a preguntas dos xornalistas nun acto celebrado este martes na cidade herculina. Do mesmo xeito, Rey lamentou que “a maior xesta do fútbol feminino en España viuse embazada por unha actitude que non debería ter lugar en ningún ámbito da sociedade“. No entanto, dixo que a súa sensación se viu “mitigada” pola resposta social que foi “tan unánime, tan enérxica e tan contundente”.
“Se este feito serviu para que as mulleres deámonos conta de que seguimos sendo vítimas de violencia sexual en todas as súas manifestacións, obxecto de comportamentos inapropiados que atentan contra a dignidade das mulleres e de que temos que erradicar este tipo de comportamentos e seguir avanzando cara a unha sociedade en igualdade, pois benvido sexa”, engadiu.
Na mesma liña, Rey argumentou que “unha sociedade democrática e avanzada non se constrúe deixando á marxe ao 50 por cento da súa poboación, que somos as mulleres”. “Este tema tennos que levar a unha profunda reflexión como sociedade”, apostilou.
Cuestionada por se os proxectos que o Concello da Coruña poida ter coa RFEF poidan verse afectados por esta controversia, a alcaldesa sinalou que este tema “non ten absolutamente nada que ver“.
Dúas cidadás iranianas foron detidas no aeroporto de Alvedro, na Coruña, cando pretendían viaxar a Londres con pasaportes falsos, segundo informa a Policía Nacional.
O pasado 23 de agosto, ás 10.00 horas, axentes da Policía Nacional adscritos ao Posto Fronteirizo Aéreo de Alvedro, procederon á detención das dúas pasaxeiras tras detectar que a documentación que portaban podería ser falsa ou falsificada.
As pasaxeiras, detidas cando tentaban pasar o control de fronteiras nun voo con destino Londres, foron trasladadas a dependencias da Unidade Contra Redes de Inmigración ilegal e Falsidades Documentais da Coruña, onde, tras as xestións realizadas, conclúese a falsificación dos dous pasaportes intervidos.
Unha vez tramitadas as dilixencias correspondentes, as mulleres foron postas a disposición da autoridade xudicial xunto cos documentos falsos intervidos, tratándose de pasaportes de Malta e de Luxemburgo.
Anteriormente, no mes de abril deste ano, axentes do mesmo Posto Fronteirizo da Policía Nacional, detiveron a outro cidadán de Irán tras detectar que o documento de viaxe co que se identificou fora falsificado. Neste caso, tratábase dun pasaporte de Letonia.
O Tribunal Supremo absolveu á dona dun bar da Coruña, que ofrecía partidos de fútbol sen a correspondente autorización, dun delito de propiedade intelectual, polo que fora condenada por un xulgado coruñés a seis meses de prisión. Esta sentenza foi ratificada pola Audiencia da Coruña e agora revogada polo Supremo.
Os feitos, segundo recolle o fallo, ao que tivo acceso Europa Press, remóntanse a novembro de 2018 cando se detectou que a xerente dun bar da rúa Almirante Cadarso, na cidade herculina, estaba a emitir de forma pública na televisión un partido de fútbol de Primeira División.
“Como tamén o estaba facendo o 11 de decembro do devandito ano, sobre as 20.00 horas, sen autorización para a exhibición de tal evento e accedendo gratuitamente á Canle A liga de forma inconsentida mediante un decodificador pirata apto para iso”, recollía o fallo do xulgado, cunha actividade que ocasionou prexuízos á liga por valor de 431,45 euros.
Nunha sentenza ratificada logo pola Audiencia da Coruña, o Xulgado do Penal número 5 desta cidade condenouna pola comisión de senllos delitos, contra o mercado e os consumidores e contra a propiedade intelectual. Polo primeiro, impúxolle unha pena de tres meses de multa e polo segundo outro de seis meses de cárcere, con multa.
O Supremo ratifica que os feitos consisten no visionado de partidos da liga de Fútbol Profesional nun establecemento público sen o pago dos dereitos e utilizando un descodificador noautorizado.
No entanto, difire das anteriores sentenzas xa que entende que os feitos son legalmente constitutivos dun delito leve e continuado relativo ao mercado e aos consumidores e que corresponde unha pena mínima de tres meses de multa, cunha cota diaria de seis euros.
A súa decisión ten como base unha sentenza do Pleno do Supremo, de 2022, na que se analizou un caso similar: a retransmisión dun partido da liga de Fútbol Profesional en dous establecementos públicos, sen autorización dos titulares ou cesionarios dos dereitos e mediante o uso dun descodificar non autorizado que facía posible o acceso á retransmisión e que rexeitou a cualificación xurídico-penal como delito contra a propiedade intelectual.
Chus Castro é unha xornalista galega con moito afán de axudar á xente. Unha teima na que involucrou a uns cantos coñecidos que acabaron crearon ‘Solidarios cos Maiores‘, unha iniciativa que pretende axudar a un dos colectivos olvidados da sociedade actual, os maiores.
O equipo está formado pola propia Chus e tamén por Sabela Romar, Bea Soler, Amalia Baltar, Lucía Aller e Manolo Rodríguez, quen abre a porta ao Galicia Confidencial para contar máis sobre este proxecto.
‘Solidarios cos Maiores’ tenta dar resposta a problemáticas diarias que viven as persoas maiores, sobre todo ás que viven soas. “Algúns do equipo tiveron ao seu cargo a xente maior coma os seus pais e percataronse de todos os inconvintes aos que se enfronta este colectivo, xa sexa pola dixitalización constante, a falta de axuda e información ou mesmo a falta de apoio”, explica Manolo.
Para paliar esta situación, este equipo, onde a maioría moveuse ou aínda o fai no mundo da comunicación, decidiu comezar unha serie de videos onde dan ferramentas, información e axuda á situacións cotidianas como pode ser a factura da luz, o testamento, ou mesmo adiccións como a ludomanía ou o alcoholismo.
ALCOHOLISMO
O alcoholismo conformou a súa última peza audiovisual, ‘É posible abandonar o alcol‘. Realizouse en colaboración coa asociación Alcohólicos anónimos 24 horas Noroeste Coruña, co obxetivo de mostrar que hai saída ante esta problemática tan grave. España é o segundo país da Unión Europea onde máis alcohol se consume e causa miles de mortes ao ano.
O colectivo ‘Solidarios cos maiores’ descubriu nesta asociación que moitas das persoas dependetes do alcol non se daban de conta de que tiñan un problema ta o momento da xubilación. “Unha vez te xubilas comezas a ter moito tempo libre que antes ocupabas traballando polo que te das de conta de que acodes á bebida máis do normal e acabas por necesitala para sentirte ben”, conta Manolo.
Debido á normalización desta práctica, son moitas as persoas que se atopan en risco de sufrir alcoholismo polo que crearon este vídeo para “axudar e pór un gran de area nun problema tan gordo” segundo nos explica o membro do colectivo e engade, “está moi normalizado, tómase incluso co café, o famoso café con gotas, polo que non resulta doado percatarse de que algo vai mal”.
“UN MOMENTO EMOCIONANTE”
‘É posible abandonar o alcol‘ é unha pequena peza na que participan tres persoas que nun pasado tiveron unha adición á bebida e que actualmente atópanse recuperados. Mediante as súas testemuñas intentan facer ver que hai saída e que se un se deixa axudar é máis doado saír.
Os valentes protagonistas do vídeo son María, Ainoa e Antonio, os tres están dentro de Alcohólicos anónimos. Os tres prestaronse a contar a súa historia para que outros poidan ou sentirse identificados e ver que teñen un problema ou atopar esperanza para saír del.
“Foi un momento emocionante“, así describe Manolo a grabación. “Os tres son persoas moi valentes, pero a verdade e que no momento no que se grabou a María (a muller do principio) todos emocionamonos moito, pois estaba grabando de cóstas e finalmente decidiu dar a cara e a verdade e que eso foi moi bonito para o equipo”, asegura o membro.
DIFUSIÓN
Finalmente, Manolo responde a unha pregunta sobre o público ao que van dirixidos os vídeos, pois ao final os maiores son os primeiros en ter conflictos coas novas tecnoloxías e estes están publicados na web porén o Galicia Confidencial pregúntase cal é o plan para que todos os maiores poidan visualizalos.
“É verdade que ese é o noso principal inconvinte, pois moitos maiores vivien sós e sen acceso a internet, pero o plan é que as asociacións, ONGs ou colectivos que traballen con estas persoas faciliten a trasmisión do noso traballo“, responde Manolo Rodríguez.
O Concello de Oleiros (A Coruña) prohibirá o ‘Xacobebo’, unha ruta de cervexas polo municipio, con motivo das festas de Santa Cruz, segundo informa as pelexas rexistradas nas mesmas e que tanto o consistorio como os organizadores atribúen a mozos de fóra doutros municipios.
Nun comunicado, o goberno local felicita á comisión de fietas polo seu traballo, pero rexeita as críticas feitas desde a mesma, entre outras cuestións, por considerar que houbo falta de supervisión municipal.
O goberno local vincula as pelexas, do mesmo xeito que a comisión de festas, con “vándalos de fóra do municipio”, pero tamén ao “excesivo consumo de alcol e drogas”.
Tamén incide en que aínda que non hai achega económica por parte do consistorio, a colaboración “supera en moito ao diñeiro que se puidese dar cos servizos que se prestan”.
Respecto das críticas pola falta de Policía Local, asegura que o trasladado desde a citada comisión “non se axusta á realidade” e engade que houbo “sete axentes da Policía Local e nove axentes do servizo municipal de emerxencias”.
“É dicir, todos os recursos municipais dispoñibles”, asegura para salientar que as demais parroquias “tamén teñen que ser atendidas polos corpos de seguridade”. Ademais, alude á presenza de tres patrullas da Garda Civil.
En todo caso, remarca que a Policía Local “non é un corpo de antidisturbios nin tampouco ten capacidade nin medios para controlar a grupos organizados que provocan alteracións de orde pública”, á vez que lamenta que no comunicado non se fixese alusión á Garda Civil ou á Delegación do Goberno “con competencias en desordes públicas desta magnitude”.
