200km en 38 horas polo Camiño dos Faros: Incrible fazaña de Maite Rojo
Please wait while you are redirected...or Click Here if you do not want to wait.
A normalidade chegarará aos accesos do CHUAC o vindeiro martes tras as obras en colectores
As obras de mellora e acondicionamento dos colectores e a rede de sumidoiros do Hospital da Coruña terminarán o vindeiro luns polo que a partir do martes, día 29, os accesos retomarán a normalidade.
Segundo informa o complexo hospitalario universitario da Coruña (Chuac), a realización desas obras de mellora foron necesarias para deixar en condicións óptimas toda a infraestrutura de saneamento do hospital cara o futuro.
Por outra banda, a Xunta informou que convocou en setembro e novembro aos titulares dos terreos necesarios para executar as obras de mellora dos accesos do novo hospital público.
O Boletín Oficial da Provincia da Coruña recolle este anuncio polo que se convocan os actos de levantamento de actas previas á ocupación para o 12 de setembro. A formalización das actas terá lugar o 15 de novembro.
A tradición marca a Romaría de Santa Margarida
Hoxe venres, 25 de agosto, comeza a tradicional Romaría de Santa Margarida, que porán o peche ás Festas de María Pita 2023. A tradición, como non podía ser doutro xeito, será protagonista, con 8 entidades herculinas como principal foco de atracción.
O venres comeza coa segunda gran noite do folclore, onde participarán Cántigas da Terra, Aturuxo, Donaire e Son d’aquí.
Xa para o sábado está preparada unha xornada participativa coas asociacións, onde o público poderá achegarse á explanada da Casa das Ciencias en horario de mañá e tarde para gozar de obradoiros para todos os niveis, así como coñecer máis das mesmas nos seus postos informativos. Para a noite, o anfiteatro de Santa Margarida converterase nun gran torreiro onde gozar de tres concertos galegos. Comezará Arredores, grupo novel, para continuar con Treixadura e, para rematar, Airiños da Freba.
A xornada do domingo 27 é a máis multitudinaria da Romaría. Pasarrúas con Pansenfron ou Os Gaiteiriños, o popular concerto da Banda de Música da Coruña e un novo escenario na zona das merendas. Á noite actuarán Xosé Lois Romero & Aliboria, proposta galega que precederá ao concerto de Sharon Shannon. A recoñecida acordeonista irlandesa visitará a cidade nunha noite que pechará Eliseo Parra. O gran renovador da música tradicional peninsular despídese este ano dos escenario e será a única cita programada en Galicia.
Ademais, e como broche especial, o luns 28 teremos o concerto de Rubén Blades, que foi adiado no seu día.
Arrincan as Festas de Novo Mesoiro
Este venres comezan as festas de Novo Mesoiro. Unhas festas das que se ten desmarcado a Asociación de Veciños pola falta de comunicación municipal, que contarán con catro xornadas con actividades para todas as idades.
O punto de partida será o espectáculo ‘¡Esto es rock!’, dirixido polo xornalista musical Javier Becerra e que conta coa actuación de Carolina Rubirosa. Trátase dun divertido e emocionante repaso da historia da música rock para toda a familia.
Por outra banda, o público infantil tamén contará nesta Festas de Novo Mesoiro cunha
xornada exclusiva para a súa idade. Baixo o nome de Día do Neno, o luns 28 de agosto as
atraccións instaladas no parque continuarán abertas e contarán con prezos especiais.
Por outra banda, DJ Javito únese á programación para amenizar e animar os períodos
anteriores e posteriores do resto de actuacións que se realizan no parque. Ademais, haberá polbo e churrasco a prezo rebaixad para promover a convivencia nestas festas.
O venres, día 25, despois do rock familiar, ás 22.00 horas terá lugar a actuación da banda coruñesa Doctor Snob.
O sábado 26 haberá actuación dentro do programa itinerante para todos os públicos Cascarillarte, a cargo de Máximo Óptimo, a partir das 12.30 horas. A sesión vermú comezará ás 14.00 horas co Dúo Karamba, mentres que ás 22.00 horas haberá actuación da orquestra Triunfo.
O domingo 27 a xornada comezará coa actuación, ás 14.00 horas, da banda Virtual Project. Pola tarde haberá unha nova sesión de Cascarillarte, ás 19.30 horas, a cargo de Bandullo Azul, que representará “Fazula” e “O Ladrón de Paraugas”.
A actuación de Café Quijano, todo un referente do pop e do rock en español, será o domingo ás 22.00 horas na explanada do centro cívico.
A regata da Tall Ships Races reúne 800 persoas dentro das tripulacións que chegan á cidade da Coruña
Unhas 800 pesonas conforman as tripulacións da regata Tall Ships Races, que chegou á cidade da Coruña. A alcaldesa, Inés Rey, deu a benvida ás tripulacións nunha recepción no peirao de transatlánticos.
Rei agradeceu que esta regata de grandes veleiros de ámbito internacional regrese á Coruña sete anos despois. “Hoxe retomamos esta conta pendente e facémolo con moita emoción e gran orgullo porque somos a cidade máis visitada pola Tall Ships Races en toda a súa historia”, expresou a alcaldesa na recepción oficial.
Os doce veleiros e catro buques da armada que participan na Tall Ships Races 2023 están atracados no porto da Coruña, no que permanecerán ata o domingo pola mañá, cando partirán rumbo a Lisboa.
Durante este catro días, o Concello organizou un amplo programa de actividades abertas ao público. Na recepción, á que asistiron, entre outros o presidente da Autoridade Portuaria da Coruña, Martín Fernández Prado, Inés Rey lembrou a primeira escala desta regata na cidade, que foi en agosto de 1958.
Denuncian ante a Inspección de Traballo á empresa Viraxes por vulnerar o dereito á liberdade sindical
A Federación de Atención á Cidadanía da Unión Sindical Obreira en Galicia (FAC-USO Galicia) continúa o proceso de denuncia de persecución dos traballadores do Centro Deportivo do Castrillón.
O sindicato vén de denunciar en Inspección de Traballo e Fiscalía a VIRAXES, S.L., e ao seu xerente por vulnerar a liberdade sindical, tras considerar que empresa que xestiona o Centro Deportivo do Castrillón conta cun contrato caducado dende o mes de xuño; que “existen franxas horarias onde a sala de fitness, non conta con persoal técnico, ou este se
atopa realizando outras funcións na piscina ou en información-recepción”; que “os socorristas e monitores vense obrigados, en ocasións, a compaxinar, as dúas funcións, sen
contar, no segundo caso, coa titulación requirida e necesaria; que os “traballadores/as realizan, en ocasións, xornadas continuas e ininterrompidas de ata 13 horas diarias durante as fins de semana e os días festivos”; que os “traballadores/as non contan cos descansos legais pertinentes, entre xornadas e dentro da propia xornada”; que os “traballadores/as non cobran pluses (nocturnidade, perigosidade, toxicidade, etc.)”; que “existen traballadores/as aos que non se lles aplica o “Convenio colectivo de instalacións deportivas e ximnasios da Comunidade Autónoma de Galicia”.
Lembran ademais que “o Centro Deportivo non conta, desde hai meses, co posto de director-coordinador, posto obrigatorio e estrutural, clave para o funcionamento, funcións que vén desempeñando unha monitora contratada para impartir actividades de fitness, que non conta nin coa experiencia requirida, nin tampouco coa titulación axeitada (intrusismo profesional)”.
Deputación e Concello da Coruña renovan a súa colaboración para financiar a Casa de Acollida
A Deputación da Coruña e o Concello herculino renovaron este xoves a súa colaboración para o financiamento da Casa de Acollida, destinada a vítimas de violencia de xénero, e tamén para a Orquestra Sinfónica de Galicia (OSG).
A alcaldesa, Inés Rey, e o presidente do organismo provincial, Valentín González Formoso, asinaron a renovación dos dous convenios. Un é para o mantenimeinto da Casa de Acollida e otropara o impulso da actividade da Orquestra Sinfónica de Galicia.
No caso da Casa de Acollida, é para os gastos de mantemento do centro, así como de dous pisos de inclusión e transición á vida autónoma para mulleres que sofren violencia de xénero. A través deste acordo, a Deputación achega este ano 120.926 euros, o 25,39% dos gastos.
Rey e Formoso asinaron tamén a renovación do convenio de colaboración para o cofinanciamento do programa de actividades da Orquestra Sinfónica de Galicia, formación que, ademais dos concertos que ofrecerá na Coruña, actuará tamén en Santiago e Ferrol ao longo deste ano.
Ademais, o presidente da Deputación, Valentín González Formoso, e o responsable do Banco de Alimentos de Santiago, José Pita, asinaron hoxe o convenio que ratifica a achega provincial e que supón o 80% do orzamento total que a entidade destina para a compra de alimentos, que ascende a 37.500 euros. No acto participou tamén a deputada de Servizos Sociais María del Mar García Vidal.
Así mesmo, Formoso e a presidenta da Asociación Síndrome de Down Teima Ferrol, Patricia Serantes, asinaron un convenio de colaboración entre ambas as entidades para cofinanciar o Servizo de Formación Sociolaboral e Emprego que leva a cabo a asociación.
Piden máis vixilancia nos barrios
A veciñanza dos barrios de Elviña, Novo Mesoiro, Someso, O Martinete, Matogrande, e Barrio de las Flores, realizaban onte unha concentación diante do Club Financieiro para solicitar unha solución á problemática do aumento da delincuencia.
Unhas 200 persoas alzaron a voz para esixir máis presenza policial ante os numerosos roubos na zona, e aseguran que están pensando en poñer en marcha patrullas veciñais.
¡Los vecinos decimos BASTA YA!@Depucoruna @ConcelloCoruna pic.twitter.com/D1nHhoCP8S
— AV Monte Martelo (@avmontemartelo) July 31, 2023
Aproveitou o grupo do PP para manter unha reunión coa veciñanza, e poñer de manifesto os problemas da “ocupación”. O voceiro Popular Miguel Lorenzo considera necesario, como os veciños, “máis policía municipal e nacional, recupera a Policía de Barrio e moito máis coordinación entre administracións”, polo que lle demanda ao Goberno medidas municipais e da Delegación para devolver a seguridade aos barrios. Así, asumirá as demandas de
asociacións veciñais e levará o asunto ao pleno, no que pedirá, entre outras cousas “un teléfono para queixas de okupas” ou un “rexistro municipal de vivendas okupadas”.
O Concello de Cambre inicia o derrubo do edificio dos Campóns, erguido ilegalmente en 1995
O Concello de Cambre iniciou esta mañá os traballos de demolición dun edificio sen rematar nos Campóns (Sigrás). Trátase dun edificio de vivendas plurifamiliares de planta baixa máis tres plantas que se construíu no ano 1995. Tres anos despois paralizouse a construción por incumprir a normativa urbanística e tamén por carecer da correspondente licenza. A execución do proxecto adxudicouse por 112.429 euros.
O alcalde en funcións, Juan González Leirós, explica que este edificio “vulnera a tipoloxía de vivenda e a altura máxima permitida, polo que é necesario derrubar a estrutura, que non se pode legalizar. Precisamente pola imposibilidade de legalizar a construción non se pode destinar a vivenda social, como nos propuxeron algúns veciños no seu momento”.
O inmoble sitúase en terreos clasificados como urbanos de núcleo rural, incumprindo os seguintes parámetros: tipoloxía, parcela mínima, edificabilidade, ocupación, altura máxima -neste caso, a altura máxima sería de planta baixa máis unha planta-, distancia dun vía pública, non tendo executada, ademais, a urbanización da cesión parte da parcela.
Con esta operación, o goberno local busca pór fin á política do “ti vai facendo”, actuando e reafirmando o seu compromiso “con disciplina urbanística e con expedientes que quedaron esquecidos por mandatos anteriores”, sinala González Leirós, quen tamén subliñou que con esta actuación “Defendemos unha vella reivindicación da Asociación Veciñal de Sigrás”.
O Concello requiriu, en marzo de 2018, ao propietario do inmoble a presentación dun proxecto de demolición. Na dita resolución concedeuse o prazo dun mes para o inicio do proxecto e de cinco meses para a poxa das obras. Transcorrido este prazo, o Consello acordou, en outubro de 2018, retomar os trámites para a execución subsidiaria destas tarefas.
As intervencións suporán a demolición e a retirada dos entullos resultantes. Ademais, deixarase a parcela acorde co rasante preexistente e protexeranse os elementos públicos que poidan verse afectados pola realización destas obras.
Recuperan o cadáver dun home no mar do Parrote
Bombeiros da Coruña recuperaron esta medianoite no mar o cadáver dun home, segundo informan en relación a esta intervención na súa conta de twitter.
En concreto foi sobre as doce da noite e o corpo, dun septuaxenario, foi localizado na zona da dársena, enfronte da estatua do Parrote.
Ao lugar, trasladáronse tres dotacións dos bombeiros, ademais de efectivos da Policía Local, Nacional e de servizos sanitarios. En relación a este suceso, descartouse que estivese vinculado cun feito delituoso.
#Coruña – Despliegue de medios de emergencia 🚒🚑🚓🚨 en el Parrote después de que apareciese el cuerpo de una persona flotando en las inmediaciones 🌊 pic.twitter.com/izeUXTG3WL
— Eloy TP 𝕏 (@EloyTP) August 23, 2023
