Anunciaba a semana pasada a Xunta os novos proxectos de Interés Autonómico (PIA) en materia de vivenda. No marco de toda a burbulla de prezos de alugueiro e compra na cidade, mentres avanza, paseniño a declaración como Zona de mercado residencial tensionado, e en paralelo á política urbanística do goberno socialista local, que ten en marcha media ducia de megaproxectos urbanísticos máis clásicos dos anos 90 (véxase Castrillón, Visma-A Gramela, Percebeiras, Maestranza, Santo Amaro, as Xubias, ou mesmo o futuro da fachada marítima na zona de San Diego), a Xunta propón a construción de nada menos que 4.300 vivendas (os Rosais contan con 5.000) na zona de Monte Mero, en varias parcelas que ocupan 43 hectáreas entre a Fábrica de Armas (a nova cidade das TIC), os Maristas e Eirís.
A nova positiva deste proxecto que chega na cidade das 20.000 vivendas baleiras, é que o 80% das vivendas estarán en réxime de protección, entre protexidas e de promoción pública (o BNG tamén pedía onte que se dediquen a aluguer social). Un cambio na política de vivenda autonómica, que apenas leva erguido un edificio de 40 vivendas protexidas en Xuxán nos últimos anos.
Con todo, a preocupación na zona é evidente. A veciñanza non recibiu ningunha información por agora, e a Xunta xa avanzou que non descarta expropiacións. O cronograma dos proxectos, a expropiación, parcelación e proxecto de urbanización chega ata 2028.
Vivenda protexida tamén en Arteixo
No marco do PIA, a Xunta tamén anunciou unha urbanización de 160 vivendas, tamén o 80% protexidas, nunha zona de 8 hectáreas na Baiuca-Penouqueira, en Arteixo.
Máis novas
#Ninmedionormal, a campaña de @o.novo.normal.coruna pola Emerxencia Inmobiliaria
3 de cada 4 vivendas que se ofertan na Coruña xa son de uso turístico
