Arrincou, con boa resposta da cidadanía, a primeira semana de Encontros Participativos arredor de dous proxectos claves para o futuro da cidade: Coruña Marítima e a nova rede de Transporte Urbano.
O Centro Cívico de Mesoiro acolleu a pasada tarde de martes 26 de marzo o primeiro dos 11 encontros de barrio para definir do novo modelo de autobús urbano. En total, preto dun cento de persoas (o 88% acodían a título persoal) participaron activamente nunha sesión que combinou a presentación do equipo técnico do estudo do transporte urbano cunha dinámica participativa na que as persoas asistentes puideron achegar propostas sobre frecuencias, liñas, accesibilidade, conexións intermodais ou cobertura territorial.
Mesoiro, o marco
O equipo municipal expuña primeiro os datos do distrito 9, onde se empraza o barrio de Mesoiro, que conta con aproximadamente 12.500 habitantes e se artella en cinco liñas de autobús urbano (21, 23, 23A, 24, UDC) máis o BUH e cun total de 80 paradas. Os principais fluxos de mobilidade diaria prodúcense co distrito 7 (21.460 viaxes/día), co distrito 8 (10.287) e dentro do propio distrito 9 (9.626 viaxes internas). O barrio conta cuns datos moi bos en materia de transporte público urbano, con case un 40% de persoas usuarias diarias e outro 37% que o emprega ocasionalmente.
As principais queixas e suxerencias
En canto aos aspectos a mellorar, as persoas asistentes manifestaron nun 64% estar pouco ou nada satisfeitas co servizo actual, fronte a un 35% que declararon estar entre “algo” e “bastante” satisfeitas. A enquisa tamén permitiu identificar cales son os aspectos máis valorados —e tamén os máis criticados— polos usuarios e usuarias do transporte urbano da Coruña. Nunha escala do 0 ao 10, os prezos foron o elemento mellor valorado, cunha media de 6,7 puntos, seguidos da accesibilidade (4,5) e das liñas e paradas (3,3).
Pola contra, os aspectos que recibiron unha valoración máis baixa foron a intermodalidade (2,5), a frecuencia dos servizos (2,8) e o estado das marquesiñas (3,2), evidenciando puntos febles relevantes que urxen ser abordados no novo modelo de transporte.
Neste sentido, a cidadanía identificou como ámbitos prioritarios de mellora:
- A frecuencia e tempo de espera dos autobuses, seleccionada por un 91% das persoas participantes,
- a intermodalidade con outros medios de transporte (56%).
- A adaptación de liñas aos barrios e novos puntos de interese (49%).
- Outros aspectos sinalados foron a accesibilidade (29%), a innovación dixital (21%), a sustentabilidade (16%), a concienciación e impulso ao uso do transporte público (13%) e, en menor medida, os prezos (12%), o que confirma que, malia ser un servizo con marxe de mellora, o custo non se percibe como un dos principais problemas actuais.
Máis encontros
Polo momento, o encontro conta con medio cento de persoas inscritas a través do formulario habilitado na web www.coruna.gal/participabus, aberto á asistencia de veciñas e veciños.
As seguintes citas serán:
- 8 de abril: Centro Cívico dos Mallos.
- 24 de abril: Centro Cívico de Monte Alto.
- 6 de maio: Centro Cívico de Monelos.
- 20 de maio: Centro Cívico do Birloque.
- 19 de maio: Centro Cívico dos Rosales
- 5 de xuño: Fórum Metropolitano.
- 10 de xuño: Centro Cívico de Eirís.
- 12 de xuño: Centro Cívico de Elviña.
- 14 de xuño: Circo de Artesáns.
Máis novas
11 Encontros de Barrio para analizar coa veciñanza as necesidades do transporte urbano
A Comisión Coruña Marítima invita á cidadanía a participar en 5 talleres formativos abertos
