A sección cuarta da Audiencia Provincial da Coruña condenou a unha empresa por plagiar as marquesiñas do Campo da Leña da cidade. Desta forma, declarou que se infrinxiron os dereitos de autor dos arquitectos demandantes e condenou á sociedade ao cesamento da comercialización das marquesiñas e ao abono dunha indemnización polos danos materiais de 15.760 euros e de 788 euros, a cada un dos arquitectos, polos danos morais.
Segundo informou o Tribunal Superior de Xustiza de Galicia (TSXG), a Sala destaca que “ningunha dúbida cabe de que ambos realizaron o deseño dunha obra arquitectónica consistente na remodelación dunha praza pública con relevancia dos seus elementos de mobiliario urbano, que presenta un claro carácter orixinal e expresa a personalidade dos seus autores, non só no deseño xeral da praza, senón tamén no das marquesiñas, sen que se pretendese desde o seu inicio que estas se elaborasen exclusivamente para dar resposta á súa finalidade funcional”.
“A deliberada imitación das marquesiñas –rexistradas como deseño industrial en 2015– resulta acreditada a través da conduta da demandada, quen recoñeceu a autoría das marquesiñas a un dos arquitectos demandantes, aínda que non ao outro, e precisamente publicitou na súa páxina web as marquesiñas porque foi o modelo que decidiu comercializar, a pesar de non ter concedidos os dereitos por parte dos seus titulares”, destacan os maxistrados na sentenza.
No fallo, a Sala explica que os arquitectos demandantes deseñaron o anteproxecto de remodelación do Campo da Leña da Coruña en 2009 e resultaron gañadores do concurso público convocado polo Concello, de forma que a construtora demandada executou o proxecto. Posteriormente, unha Unión Temporal de Empresas (UTE) resultou adxudicataria das obras de urbanización e restauración da avenida da Mariña da Coruña e subcontratou á sociedade demandada, “en atención a que foi a encargada de elaborar as marquesiñas da praza de España”, para a fabricación e instalación das novas marquesiñas, que se comercializaban a través da súa páxina web, segundo apunta a Sala.
“BASTARÍA UN ACTO DE CREATIVIDADE SEQUERA MÍNIMO”
Na sentenza, sinálase que o director da obra da Autoridade Portuaria indicou que solicitou “o modelo da praza de España como referente para a instalación das marquesiñas da Dársena”. A empresa percibiu da UTE a cantidade de 36.880 euros por fabricar e instalar as marquesiñas, a pesar de non contar coa autorización dos autores, segundo consta na resolución. “A sinxeleza, depuración de liñas ou a simplificación do deseño son características propias de moitas creacións, artísticas ou aplicadas á industria, sen que exista unha asimilación da falta de complexidade do deseño coa súa falta de altura creativa, requisito este último que, doutra banda, non resulta imprescindible para dotar de protección xurídica á obra de creación intelectual, xa que bastaría un acto de creatividade sequera mínimo”, subliña a Audiencia Provincial.
Ademais, destaca que, no presente caso, “aínda cando nos atopemos ante unhas marquesiñas deseñadas para ser elementos senlleiros ou destacados do proxecto arquitectónico dunha praza pública desta cidade, que serían, á súa vez, susceptibles de protección a través do deseño industrial por ser rexistradas como elementos independentes da praza para a que se idearon, existe unha acreditada constancia da súa orixinalidade e da elección creativa dos autores do proxecto arquitectónico”.
Os maxistrados afirman que o informe pericial achegado polos demandantes “resulta concluínte” ao acreditar “a orixinalidade do proxecto e a elección creativa dos seus autores”. Ademais, conclúen que no ordenamento xurídico harmonizado relativo á propiedade intelectual “se ha ido abandonando a esixencia de que a obra haxa de posuír certa altura creativa para recibir a protección do dereito de autor”, así, resalta que, en lugar de requirir unha creatividade destacada, “bastará con que a obra mostre orixinalidade, de forma que sexa unha creación orixinal do autor que exprese unha mínima elección creativa”. A sentenza xa é firme.
