Inicio Blog Páxina 35

Adxudicadas as obras de mellora do parque de Santa Margarida

editor
-
0
Adxudicadas as obras de mellora do parque de Santa Margarida

Ademais da concesión da licenza da nova ITV no Polígono de Vío, e a adxudicación das obras de humanización dunha Praza no Castrillón, a Xunta de Goberno Local aprobaba esta mañá de mércores 22 de outubro, a adxudicación das obras de mellora do parque de Santa Margarida. A empresa Jardinería Arce contará cun orzamento de 899.000 euros para realizar unha actuación global no espazo de 78.000 metros cadrados de superficie.

A actuación comprenderá tres liñas de traballo:

  • Renovación e adaptación dos camiños e sendas do parque,
  • Ampliación e mellora dos equipamentos e mobiliarios de Santa Margarida, tanto deportivos como de lecer;
  • Mellora nos espazos verdes do parque en si, con novas especies.

Unha das principais necesidades detectadas no parque é a de renovar ou atender os camiños e espazos de paso, ben polo paso do tempo ou polo impacto que teñen as raíces das árbores.
Por iso, actuarase en puntos como as escaleiras que baixan desde a Casa das Ciencias á Rosaleda e tamén no cruce de camiños que dá inicio ao paseo das Ciencias, onde se substituirá o firme de asfalto por adoquín.

A isto sumarase a creación dun novo circuíto de sendeiros, aproveitando espazos infrautilizados do parque e conectando así os seus diversos espazos de ocio e lecer.

En canto aos equipamentos, no sector norte haberá unhas pistas para correr que chegarán, por exemplo, á nova área de calistenia que se habilitará sobre o espazo deportivo xa existente ao noreste do parque. E, ademais, crearanse máis sendeiros no sector sur-sureste, interconectando o mobiliario urbano de lecer alí existente. Neste sentido, tamén está previsto renovar o mobiliario urbano do parque e darlle uniformidade en termos estéticos.

A maiores, ampliarase a área de xogos infantís próxima ao acceso desde a avenida de Arteixo, sumando novos equipamentos e ampliando así o rango de idades para o seu uso, que xa é moi frecuente no día a día.
Tamén está previsto sumar novos exemplares de arbustos e flores, que complementarán ás 60 especies de árbores que xa hai no parque, reforzando a súa condición de pulmón verde na cidade.

A isto sumarase a renovación eficiente a rede de alumeado e a substitución da sinaléctica do parque para darlle unha uniformidade estética e reforzar a información que serve de orientación e guía ás persoas que visitan o parque.

 

O Polígono de Vío acollerá a primeira ITV da cidade

En marcha as obras de humanización da praza José María Hernansáez, no Castrillón

As 2,4 toneladas que un buque militar francés desembarcou na Coruña tiñan como destino España

europapress
-
0
As 2,4 toneladas que un buque militar francés desembarcou na Coruña tiñan como destino España

A droga incautada nun operativo conxunto con Francia e que foi trasladada nun buque militar francés ata o porto da Coruña ascende a un total de 2.400 quilos de cocaína, que foron intervidos nas costas de Lisboa nunha embarcación de alta velocidade, segundo informaron responsables do operativo.

O mesmo desenvolveuse baixo a coordinación da Fiscalía Antidroga, con intervención da Armada francesa e con participación de axentes do Corpo Nacional de Policía e membros do Servizo de Vixilancia Aduaneira. En concreto, grazas á colaboración internacional recibiuse unha información procedente da Drug Enforcement Administration (DEA) alertando da existencia dunha organización criminal dedicada ao transporte internacional de cocaína a través do Océano Atlántico sendo o destino final España, informa a Policía Nacional.

Detectaron que a embarcación tiña uns 12 metros de eslora e tres motores e que presentaba problemas mecánicos estando á espera de recibir apoio da outra parte do grupo que se atopaba asentado en Portugal. A investigación, coordinada pola Fiscalía Especial Antidroga da Audiencia Nacional, iniciouse o pasado venres tras recibir, grazas á colaboración e cooperación internacional, unha información da DEA acerca da posible existencia dunha organización criminal dedicada ao transporte de cocaína a través do Océano Atlántico cara a España.

DETENCIÓNS

Durante o dispositivo policial establecido para o traslado da embarcación, comprobouse o seu estado precario provocando finalmente o afundimento da mesma durante o seu remolque. Finalmente a operación culminou co arresto de catro homes como presuntos responsables dos delitos de tráfico de drogas e pertenza a organización criminal.

Na mañá de hoxe tanto a droga como os detidos foron trasladados ao porto da Coruña para a continuación das dilixencias en relación a un operativo que se atopa baixo segredo de sumario.

De mascota a “perrhijo”: A Coruña, a cidade con máis cans que nenos

Ubaldo Cerqueiro
-
0
De mascota a “perrhijo”: A Coruña, a cidade con máis cans que nenos

Xa hai tempo que a curva dos cans superou ao de nenos na cidade da Coruña. A día de hoxe hai censados preto de 32.000 cans na cidade, polos 28.092 nenos/as menores de 15 anos (0 a 14) empadroados no Concello da Coruña, segundo os datos de 2024.

Unha cifra que dá boa conta da necesidade de facer políticas para os nosos compañeiros de vida, pero tamén para tomar medidas que axuden a controlar a correcta limpeza dos pises e as cacas dos mesmos.

Con todo, son varias as reflexións que xorden deste singular dato.

As Praias caninas

Moitos cans pero ata o de agora só temos unha praia canina, a mísera e contaminada cala de Bens.

Así o sinala a nova Ordenanza de praias aprobada hai apenas uns meses, se ben trala súa aprobación, o goberno municipal (PSOE) se comprometeu co BNG a habilitar tamén as minúsculas calas das Amorosas (en Durmideiras) e as calas de San Roque (pouco antes do Millenium) como espazos para o esparexemento canino. Algo que, de seguro, vai traer conflitos cos usuarios habituais desas calas paradisíacas.

De “mascota” a “perrhijo”

O aumento de cans nas nosas vidas trae tamén consigo cambios na linguaxe. A palabra “mascota” vai decaendo, e o concepto de “dono” que implica a pertenza dun animal ao ser humano cada vez é menos frecuente. Non así o “é o meu can”, que se segue a usar igual que “é o meu home” ou “é o meu fillo”, se ben comeza a escoitarse xa o concepto “perrhijo” ou ata “compañeiro de piso”.

Porque a realidade é que a día de hoxe temos cans en casas de xentes de todas as idades. Familias que tratan de implicar ás súas crianzas pequenas ou adolescentes no cariño e na responsabilidade de coidar un animal; xente nova solteira que adopta un fermoso e glamouroso galgo maltratado; ou maiores que, tras quedar sós na vida, recollen un deses cans palleiros ruidosos que tanta compañía ofrecen.

Adopción

En todo caso, cómpre lembrar a existencia da Canceira municipal, sitada en Bens (na Rúa Pedro Ferrer), aberta de luns a sábado de 9:00 h. a 19:00h, á que te podes achegar para acoller un amigo, ou chamar aos teléfonos 981 184 233 ou 981 184 315 para informarte. Está xestionada por Servigal, onde podedes ver os animais que buscan familia.

Máis novas

A Coruña insiste na importancia de recoller as deposicións dos cans coa campaña ‘Pode saír caro’

Os usuarios de praias da Coruña reclaman prohibir altofalantes, regular acceso de cans e acoutar áreas de xogo

A CoruñArt afondará en San Agustín na profesionalización do oficio literario, a música e a ilustración

editor
-
0
A CoruñArt afondará en San Agustín na profesionalización do oficio literario, a música e a ilustración

Queda menos para a I Feira das Industrias Culturáis e Creativas na Coruña. A CoruñArt, que se celebra o vindeiro 8 de novembro no mercado de San Agustín, vén de presentar o primeiro avance da programación exclusiva para profesionais, coa confirmación de catro mesas centradas en tres sectores: a literatura, a música e as artes gráficas e ilustración.

A primeira das mesas confirmadas leva por título “Profesionalizar a literatura: é posible vivir de escribir?”, unha charla centrada en iluminar o oficio da escrita dende unha perspectiva seria e realista, dando resposta a unha pregunta clara: Nunha industria na que as novidades literarias teñen unha vida curtísima e a venda de libros reporta unha porcentaxe de ingresos moi pequena aos autores, preguntámonos, é posible vivir da literatura? Como?

A mesa estará moderada polo escritor e xornalista Pablo Rañales (Premio Illa Nova 2023), e estará protagonizada por dúas mulleres que veñen de ver consolidadas as súas figuras profesionais como escritoras con sendos premios literarios: Abril Camino, Premio Xerais 2025, e Antía Yáñez, Premio Raíña Lupa 2025.

A segunda das ponencias confirmadas, “O mercado musical en Galicia, oportunidades para novas propostas artísticas”, pon o foco no sector musical galego. É posible triunfar no mercado da música cunha proposta nova? Goza a música en Galicia de boa saude? Esta mesa pretende ser unha análise en profundidade da man de persoas con anos de experiencia no sector: Patricia Hermida, presidenta de AGEM e CEO de DotBeat!, Josiño Carballo, director de Ernie Records, e a moderación de Noel Turbulencias, divulgador musical e autor do libro Galicia MusiCalidade.

O sector das artes gráficas contará tamén cunha mesa específica, “Ilustrar un futuro profesional”, na que dúas das figuras da ilustración máis consagradas debatirán cos asistentes a realidade dun sector que ten unha diversificación cada vez maior. Santy Gutierrez e Irene Sanjuan, ilustradores con traxectorias longas e afianzadas, contarán coa compaña de Miriam García, profesional emerxente do sector.

A última das mesas confirmadas “Autopublicación, coedición e editorial tradicional: atopar a fórmula perfecta para o meu maniscrito”, busca servir de guia para os novos autores e autoras da literatura en Galicia, que buscan ser publicados e non teñen claro cal é a fórmula máis axeitada para o seu proxecto, o cal é a maneira de chegar a facer realidade un manuscrito. Sobre a autopublicación, a coedición e a edición tradicional debatirán Laura Rodríguez, editora jefe de Hércules de Ediciones, Iago Fandiño, editor jefe de Calacán e escritor, e Rober Cagiao, escritor con obra autopublicada e obra publicada en editorial tradicional

 

Estas catro primeiras citas súmanse ao pregón de Lúa Mosquetera, nesta cita pensada para profesionais, que poden adquirir xa a súa acreditación através de Ataquilla, como en citas abertas ao público xeral, que poderá disfrutar tamén de actividades culturáis, así como do acceso ao Mercado Cultural, conformado por postos de empresas, entidades e artistas do sector cultural que ofertarán os seus productos ao público xeral.

Unha marcha fúnebre de Samaín en Oleiros polo ensino público

editor
-
0
Unha marcha fúnebre de Samaín en Oleiros polo ensino público

Non decae a loita contra os recortes de profesionaro das ANPAS dos colexios de Oleiros. Neste caso, ANPA Valle Inclán, despois de concentracións, manifestacións e mesmo levar as demandas ao Parlamento Galego, convoca a toda a comunidade educativa e á veciñanza a participar este domingo 26 de outubro ás 12:00 h na Marcha fúnebre polo ensino público.

Faino, aproveitando as datas do Samaín, coa intención de simbolizar o fin do ensino público de calidade, e para denunciar a inacción da Xunta ante a manifesta falta de mestres que sobre o seu centro educativo, o que provoca un déficit da calidade do ensino.

A comitiva, apoiada polo Concello e á que tamén se unirán ANPAs doutros centros, sairá da fonte do Parque Nelson Mandela, pasará pola Rúa Areal e rematará na Rotonda do Sol y Mar, cunha sentada pacífica na N-VI.

Invitan a participar caracterizados, os adultos veñan vestidos de loito e, para darlle máis visibilidade e diversión, e a cativada disfrazada coa temática do Samaín: zombies, pantasmas, esqueletos…

”Non estamos a defender só un colexio, estamos a loitar polo futuro dos nosos nenos e nenas, que merecen unha educación de calidade”, sinalan abrindo as portas a toda a cidadanía.

Máis novas

Semana completa de mobilizacións, con visita ao Parlamento, das familias dos coles de Oleiros e Carral para conseguir máis docentes

Máis de 300 persoas secundan cunha marcha a denuncia polos recortes nos CEIPs de Oleiros

 

Outras novas das ANPAS

En marcha as obras de humanización da praza José María Hernansáez, no Castrillón

editor
-
0
En marcha as obras de humanización da praza José María Hernansáez, no Castrillón

A Xunta de goberno, ademais de aprobar a adxudicación das obras de renovación do parque de Santa Margarida, vén de adxudicaron as obras de urbanización da praza José María Hernansáez, un proxecto que foi presentado aos veciños e veciñas pola alcaldesa e que contará cun investimento municipal de 963.285 euros.

A reforma consistirá na creación dunha praza peonil con sendas e zonas de lecer accesibles, reorganización das áreas verdes ou reforzo da seguridade viaria na contorna, entre outras cuestións.

Así quedará a obra:

O Castrillón: Así será a necesaria reforma da praza José María Hernansáez

 

Outras novas do Castrillón

Desbloqueado o Proxecto de Urbanización na confluencia das rúas Cerca e Antonio Ríos

A veciñanza do Castrillón coñece o proxecto da urbanización das 1.000 novas vivendas

O Polígono de Vío acollerá a primeira ITV da cidade

editor
-
0
O Polígono de Vío acollerá a primeira ITV da cidade

A Xunta de Goberno local, ademais de aprobar as obras de mellora do Parque de Santa Margarida, e a adxudicación das obras dunha praza no Castrillón, tamén concedeu licenza para construír a primeira estación da Inspección Técnica de Vehículos da cidade, que estará situada no polígono de Vío, ao final do Polígono de Pocomaco. Un servizo que leva aprobado pola Xunta dende maio de 2024.

A empresa responsable, SYC Applus+, terá 20 meses para executar as obras e poñer en funcionamento este servizo, que facilitará aos cidadáns o trámite da ITV evitando desprazamentos e que suporá un investimento privado superior aos 2 millóns de euros.

Adxudicadas as obras de mellora do parque de Santa Margarida

Incautado un alixo de 2 toneladas de cocaína, con detencións en alta mar e un operativo no peirao de Calvo Sotelo

europapress
-
0
Incautado un alixo de 2 toneladas de cocaína, con detencións en alta mar e un operativo no peirao de Calvo Sotelo

Axentes españois e franceses colaboraron nun operativo antidroga co resultado da incautación dun “importante” alixo de cocaína e con detencións en alta mar, segundo confirmou o delegado do Goberno en Galicia, Pedro Blanco.

En concreto, fontes consultadas por Europa Press concretaron que se interviñeron máis de dúas toneladas de cocaína, no marco dun operativo que fai a Armada francesa pero que conta coa colaboración de axentes do Corpo Nacional de Policía e tamén de membros do Servizo de Vixilancia Aduaneira. Foi baixo a coordinación da Fiscalía Antidroga e co resultado de catro persoas detidas en alta mar, precisaron tamén sobre o citado operativo. Con motivo do mesmo, desde primeira hora da mañá púxose en marcha un amplo despregamento policial no porto da Coruña, en concreto no peirao do Calvo Sotelo. 

No mesmo, participaron, segundo fontes consultadas por Europa Press, axentes do Grupo de Resposta contra o Crime Organizado (Greco) e tamén membros do Servizo de Vixilancia Aduaneira no marco do operativo con intervención nunha fragata francesa, que se atopa atracada no porto coruñés. “Trátase dunha importante operación antidroga”, remarcou o delegado do Goberno, que subliñou o traballo conxunto entre as autoridades francesas e españolas e que deu como resultado detencións “en alta mar” e coa incautación dun “importante alixo de cocaína”.

“Está baixo segredo de sumario, cando se poñan a disposición xudicial –os detidos– poderemos dar os pormenores”, dixo para enxalzar o “traballo encomiable” das Forzas e Corpos de Seguridade do Estado, en colaboración con axentes franceses. Cuestionado tamén polo último operativo antidroga na zona do Salnés, precisou que se pode dar “case por finalizada” a parte policial e cualificou de “auténtico éxito” o mesmo. “21 detidos e 11 rexistros”, resumiu para lembrar que se centrou na loita contra o menudeo na venda de droga.

As fortes choivas causan afectacións ao tráfico por balsas de auga en Eirís e no paseo marítimo

europapress
-
0
As fortes choivas causan afectacións ao tráfico por balsas de auga en Eirís e no paseo marítimo

As fortes choivas da tarde deste martes causaron afectacións ao tráfico por balsas de auga en diversos puntos da cidade da Coruña. De feito, os Bombeiros da Coruña tiveron que intervir, minutos antes das 20.00 horas desta xornada, para desatascar sumidoiros na rotonda posterior ao túnel de Eirís. Tamén se produciron retencións no paseo marítimo. Desta forma, o noroeste da Coruña estivo, dende as 22.00 horas do martes e ata as 09.59 deste mércores, en alerta amarela ao agardarse precipitacións que podían alcanzar os 40 mm en 12 horas.

Avaliando a proposta de orzamentos da Xunta 2026 para a Coruña e a comarca

Ubaldo Cerqueiro
-
0
Avaliando a proposta de orzamentos da Xunta 2026 para a Coruña e a comarca

Complicado é mergullarse no portal de transparencia para avaliar a proposta de Orzamentos da Xunta para o 2026. O laberinto de orzamentos.xunta.gal fai complicado analizar os investimentos por comarcas ou concellos.

Con todo, si que notamos unha baixada de investimento en Sanidade e Educación a nivel autonómico. Se en 2020, a Xunta dedicaba un 40,5 % do orzamento total a Sanidade, este 2026 serán un 37,49%. E se en 2020 a porcentaxe destinada a Educación era do 24,1 % , este vindeiro baixará ata o 21,01%.

Investimento na Coruña

Asegura o PP local que a Xunta propón un investimento total na Coruña de 710 millóns de euros (48 millóns máis que este ano), en vivenda, sanidade, benestar social, emprego, educación, deporte, transporte…

E debulla algunha das partidas principais, sendo a máis grande, de 43,7M€, para continuar no Novo CHUAC.
Neste punto, o BNG matiza que “nos orzamentos de 2024 a partida que aparecía na programación plurianual para 2026 era de 101,8 millóns de euros e este mesmo 2025 desde a Xunta afirmouse que no próximo exercicio irían consignados 64,2 millóns de euros, pero finalmente queda en 43,7M”. De feito, a Xunta xa admite que as obras non concluirán até máis alá de 2030, aprazando o groso do investimento -221,7 millóns de euros- a partir de 2029.

En materia de Sanidade tamén hai contemplados 4,4 M€ para o novo centro de saúde de Santa Lucía, e 1,7 M para novos equipamentos.

En materia de vivenda 13,2 M€ serán para construír vivendas públicas en Xuxán –onde nestes momentos hai 104 pisos en construción- e noutras zonas da cidade –onde hai 99 máis- e 1,34M€ para desenvolvemento de chan en Monte Mero –onde se prevén máis de catro mil vivendas das cales o 80% serán protexidas.

O PP pon en valor tamén os 3,6 M€ destinados para o Consorcio da Música, un 20% máis que hai 2 anos.

Partidas desprazadas do exercicio 2025 a 2026

En contraposición, o BNG denuncia unha práctica habitual da Xunta: “o vicio de desprazar dun exercicio a outro partidas non executadas”. Pon exemplos como a reforma da residencia Torrente Ballester, “unha obra cuxa execución demorará un mínimo de 24 meses. En 2025 o Goberno galego orzou 1,6 millóns de euros. Non os executou, e agora a Xunta consigna o total do investimento, 3,8 millóns de euros, para 2026”.
O mesmo acontece co Centro de Formación da Cidade das TIC. A partida de 4,1 millóns de euros de 2025, non executada, engrosa agora as contas para 2026.

Lamentan a forte redución para as reformas nos centros de ensino: En 2024, consignouse a cantidade de 8,2 millóns de euros. En 2025, 6,9. Agora, 4,3. Unha redución do 50% en dous anos”, denuncia o grupo do BNG.

Critican dende a oposición a falta de partidas para completar o cadro de persoal dos centros de orientación familiar, os COF, do Ventorrillo e Orillamar.

Investimentos na comarca

Dende o PPdG provincial recollen tamén varias partidas destinadas a concellos da comarca:

Culleredo recibirá 2,5 millóns de euros para financiar as obras de novo ‘Skate Park’ e unha partida de 1,5 millóns para levar a cabo melloras na instalación deportiva de de Acea de Ama.

A Xunta dedicará 3,4 millóns de euros para melloras nas instalacións ubicadas no INEF de Oleiros.

O Concello de Sada recibirá 6,4 millóns de euros para actuacións que permitirán evitar inundacións derivadas do cambio climático. Neste mesmo municipio, a Xunta investirá, neste ano 2026, 1.092.406 euros para a rehabilitacion do CEIP Pedro Barrie da Maza.

Carral contará cun novo CEIP Vicente Otero Valcárce -800.000 euros-, e tamén ahberá as melloras no IES Manuel Murguia de Arteixo por valor de 1.265.338 millóns de euros, dos que neste 2026 se investirán 379.601 euros.

Máis novas

A urbanización do Monte Mero, unha “bomba urbanística” para o anel verde da Coruña

Novos atrasos nas obras do ‘Novo Chuac’ e dificultades nas escavacións dos novos edificios

Adxudicadas as obras do novo Santa Lucía: As obras comezarán antes de que finalice o ano

 

1...343536...654Page 35 of 654

Xornal da Coruña é o primeiro gran xornal dixital exclusivamente en galego da Coruña e a súa área metropolitana

Contacta: redaccion@xornaldacoruña.gal

SÍGUENOS

© Xornal da Coruña - Xurimaru Servizos de Comunicación 2010 S.L.

QUE É XdC? | AVISO LEGAL | PUBLICIDADE | COOKIES