O Comité de empresa de Abai Coruña convoca mobilizacións ante a falta dun plan por parte da dirección de Abai que garanta todos os postos de traballo e a viabilidade do centro que ten nesta cidade. O xoves, 11 de abril, ás 12 horas está convocada unha concentración diante da tenda de Movistar na praza de Pontevedra.
A subcontrata de Movistar levou a cabo en xuño de 2023 un expediente de regulación temporal de emprego (ERTE) que afectou a máis de 50 traballadoras só no centro da Coruña. Esta medida foi rexeitada polos sindicatos ao entender que non existían causas, a carga de traballo no campaña de Movistar, un dos principais clientes de Abai, non diminuíra, senón todo o contrario e os criterios utilizados para escoller ás persoas afectadas foron absolutamente arbitrarios.
Segundo este sindicato, durante os 9 meses que durou esta situación, a dirección da empresa non se tomou en serio as reubicacións. En ningún momento puxo en marcha novas campañas no centro da Coruña nin permitiu as reincorporacións á servizo de atención ao cliente de Movistar, a pesar de que as chamadas entran sen parar.
Unha vez transcorrido o tempo máximo do ERTE, as traballadoras incorporáronse de novo, pero sen un posto nun servizo concreto, e sen que se lles asigne carga de traballo, algo que o Comité de empresa valora negativamente, “a dirección está a buscar escusas para destruír emprego pola porta de atrás”. A falta de compromiso co futuro do centro da Coruña levou ao Comité de empresa a poñer en marcha accións de protesta como unha concentración o día 11 de abril ás 12 horas diante da tenda que ten Movistar na praza de Pontevedra. O Comité ten claro que a compañía de telecomunicacións está detrás de todo isto. Tamén sinala a responsabilidade social que debe de ter unha empresa que foi pública e que agora ten entre os seus accionistas ao Goberno do Estado español.
No calendario de mobilizacións inclúese unha xornada de folga de 24 horas o día 17 de abril cunha manifestación ás 19 horas que partirá do edificio Proa, situado no barrio de Matogrande. O 17 de abril o Comité e a Empresa sentaranse ante o servizo de mediación da Xunta de Galicia (AGA). O Comité resalta que os seus obxectivos son claros, Abai tense que comprometer a non destruír un só posto de traballo, a respectar os dereitos laborais como o Plan Familia e asegurar a viabilidade do centro a través de campañas estables.
Unha furgoneta resultou calcinada este mércores na A-6, ao seu paso polo concello de Arteixo, segundo informa o Consorcio Provincial de Bombeiros. Os bombeiros do parque comarcal de Arteixo foron alertados sobre as 07,40 horas deste mércores do incendio no citado vehículo, á altura do punto quilométrico 590.
Á súa chegada, atopáronse unha furgoneta ardendo, con dous ocupantes fora do vehículo, precisan sobre a intervención nun comunicado. A mesma consistiu inicialmente na extinción das chamas coa posterior sinalización xa que o fume dificultaba a visibilidade para o tráfico rodado.
Volveu demostrar a cidade da Coruña o seu compromiso co pobo palestino na charla que organizou a Asociación Cultural Alexandre Bóveda en colaboración co Xornal da Coruña, BDS GALIZA, SUGxPalestina, e o grupo de igualdade da Facultade de Ciencias da Educación da UDC. Unhas 60 persoas ateigaron o salón de actos da ACAB, sito no primeiro andar do Circo de Artesáns, para escoitar o potente discurso do oftalmólogo e activista Mohamed Safa.
Tiven a oportunidade de presentar a figura do escritor, aficado en Galicia (en Corcubión e Cee) dende hai máis de 30 anos, e dar conta da súa influencia na comarca da Costa da Morte, onde a veciñanza case coñece máis a realidade do pobo palestino que da Barbanza.
Cunha forza imperante no seu discurso, Safa fixo patente un dos elementos que simbolizan o mal chamado “conflito”: as gañas de contar que ten o pobo palestino, fronte as gañas de agocharse do pobo sionista.
Con todo, e a pesar da “indecente” posición dos estados de Occidente, Safa quédase co alento e o apoio da sociedade civil, que se confirma coas continuas concentracións realizadas nas vilas galegas.
A fame como arma de guerra
Safa comezou poñendo datos sobre a ocupación do estado israelí sobre Gaza e Cisjodania, destacando a fraxilidade dunha zona que ocupa 365km2 (a provincia da Coruña ten 7.950 km), na que viven 2 millóns de persoas cunha densidade de poboación de 5.000 habitantes/km2 (en Galicia anda polos 100…)
Safa lembrou a impunidade de feitos como a destrución de casas, rúas, hospitais, escolas… e sobre todo destacou que a día de hoxe morren máis xente en Gaza de fame que de bombas, rompendo con todos os dereitos fundamentais da ONU.
Operación militar
Sorprende, nunha sociedade allea ás armas como a nosa, como Safa puxo en valor e loubou, case como se se puxera dende unha perpectiva de 20-30 anos por diante, a operación militar realizada pola resistencia palestina o 7 de outubro de 2023, comparándoa con fitos históricos como a revolución do Vietnam do 68. “Ese día non foi o inicio da guerra, como moitos pensan, é un día máis dunha ocupación de 75 anos”, resaltou, “pero que si foi o espertar dun sentimento de liberdade que parecía xa vencido, non só dentro, senón tamén fóra de Palestina”.
Outra consecuencia desta operación é acabar co axioma que Israel tiña inserido en todos os países árabes, de que o seu exército é invencible. A comunidade árabe, que aceptara a cultura da derrota, xa non compra máis ese discurso dende a operación do 7 de outubro, unha operación baseada na “non tecnoloxía”.
”A milagre é que a día de hoxe, 5 meses despois, a resistencia siga viva en Gaza, e que aínda onte se lanzasen misiles dende o norte da Franxa de Gaza, onde Israel xa ten arrasado con todo. A clave está na rede de máis de 1.000 km de túneles que a resistencia palestina leva décadas construíndo”, explicou.
Deu tamén unha chave: “As sociedades colonialistas non soportan demasiado sacrificio nunha ocupación; pero os pobos ocupados non poñen límites, non pon teitos, á súa liberdade”, dixo apuntando tamén que “o dereito dunha persoa israelí non pode estar por riba da vida dunha persoa palestina”.
Visión colonialista
”Por que a Ucrania se lle permite o dereito á autodefensa, e porén ao pobo palestino se nos tacha de terroristas?”, leva preguntándose Safa estes últimos meses. “Moitos pensan na influencia económica de Israel, no medo… pero eu creo que se debe a permanencia dunha visión colonialista por parte do mundo occidental”, lamentou, deixando patente que “todo colonialismo de asentamento conleva unha limpeza étnica”.
Pola contra, en alusión a falta de apoio histórico dos países árabes, deixou claro que ”non queremos unha loita étnica, isto é unha guerra anticolonialista, contra unha ocupación que rompe todos os dereitos internacionais”.
Nese sentido tamén, critico a “comprensión” de Borrel, e lamentou a súa falta de contundencia. “Non queremos esa simpatía, que ademais só se mantén ata que deixes de ser vítima. Queremos que defenda os dereitos internacionais”.
Xenocidio en vivo: Gaza como Laboratorio de Armas
Interesantísimo tamén o apuntamento que fixo Safa sobre a importancia da industria armamentística de Israel nesta ocupación. “Dende que comezou esta nova masacre, a industria militar israelí creceu, porque está utilizando Gaza como un laboratorio de armas. E por iso non ten medo en ensinarlle ao mundo o que está facendo, como nos está matando, porque ve que a resposta internacional é mínima, e pola contra, estalle servido para ensinar o poder das súas armas”, denunciou. “Ali, en plan de broma, dicimos que Israel pasou de ser un produtor de laranxas a un produtor de granadas”.
Como usar a memoria
Outra idea ben interesante sobre a reflexionou foi o xeito de usar a memoria que teñen os pobos. Fixo referencia sobre como pobo sudafricano axudou a reconstruír o país despois do aparheid, e porén como o pobo xudeo está pasando de ser vítima dun xenocidio a culpable de outro.
O Boicot
Safa alentou a seguir a campañas como a de BDS Boicot a Israel, e a superar as críticas que van chegar, de seguro. “Se resisitimos con armas, somos terroristas; se facemos boicot somos antisemitas; e se damos charlas estamos alentando o odio. Como podemos defendernos entón?”, preguntábase con vehemencia.
O fracaso da Autoridade Palestina
Foi inquirido Safa a falar da actual Autoridade Palestina, histórico grupo de goberno que a día de hoxe é completa colaboradora da ocupación sionista. Tornou a voz, e con vergoña recoñeceu a lamentable actuación deses homes xa de avanzada idade que foron líderes da resistencia e que hoxe son parte activa do xenocidio, proxetendo ao exército israelí no canto de aos seus veciños. Precisamente explica o asunto no seu último libro, “La segunda nakba palestina: El proceso de paz” (Ed. Utopía, 2023).
Safa rematou asinando uns exemplares de “La revolución árabe. Democracia, nacionalismo y religión” (Hoja de Lata, 2017), o segundo libro que realizara antes de “Palestina, grito por la libertad” (Do Castro, 2003).
As conversas ao remate da charla durante un bo rato
O portavoz do grupo municipal do PP no Concello da Coruña, Miguel Lorenzo, convocaba esta mañá unha rolda de prensa na que sinalou que a alcaldesa da Coruña, Inés Rey, debería cesar ao concelleiro de Economía e Planificación Urbana, José Manuel Lage, da súa competencia en Urbanismo por “irregularidades” nas obras do seu piso.
“Eu cesaría ao concelleiro nas competencias de Urbanismo, non deu exemplo”, sinalou avanzando as preguntas que vai lanzar no pleno este xoves. “Non é exemplarizante para a cidadanía que a alcaldesa estea a defender esta postura”. “Onde pon ela o límite no que é un adecuado comportamento, eu cesaría ao concelleiro nas competencias de Urbanismo, que fixo obras sen licenza e un cambio de uso no que pode haber ou non irregularidades”, sentenciou sobre este caso.
Fíxoo despois de que o PP expuxese na próxima sesión plenaria a comparecencia en pleno do edil para “dar explicacións”, unha medida que primeiro deberá contar cos votos suficientes — para o que pediu o apoio do BNG — e que, de saír adiante, tería lugar outro día. “Cada un ten a súa estratexia política”, dixo ao ser cuestionado sobre esta posible explicación xa o día 11 ante a pregunta que expoñen os nacionalistas. “Eu a pregunta oral fágolla á alcaldesa, non a Lage”, precisou.
E é que o edil popular expuxo que debe aclarse a concesión dunha licenza “en tempo récord fronte a outros cidadáns que pasan meses e anos, por exemplo, para cambiar un ascensor”.
Por este motivo, dixo que presentan unha moción en relación a isto. Así apuntou que o que queren é que cando soliciten un expediente, como foi no caso do edil Lage, “déasenos copia do expediente, que estea completo”, citou, ademais de pedir que se faga en prazo.
O Tribunal Superior de Xustiza de Galicia (TSXG) admitiu a trámite un recurso de Defensa do Común contra o estudo de detalle da parcela número 2 do campo de Estrada-Maestranza, presentado, segundo informa a entidade, o pasado 4 de abril.
Nun comunicado, alega que as parcelas son “espazos públicos” e que a súa venda por parte do Ministerio de Defensa a unha promotora vasca “encerra unha operación meramente especulativa e mercantilista”.
“Allea ás necesidades sociais dos veciños coruñeses”, sinala nun comunicado, no que incide en que “o gran escándalo que suporía permitir construír vivendas neses terreos radica no feito de que os mesmos son parte inseparable do sistema defensivo barroco máis importante de Galicia”.
Defensa do Común afirma, ademais, que recorrerá a todas as vías que teña ao seu alcance “para impedir que se consome unha afronta a toda a cidade coa perda de espazos de titularidade pública”.
O Equipo de Patrimonio da Unidade Orgánica de Policía Xudicial da Comandancia da Coruña desarticulou en Arteixo un grupo criminal que se dedicaba a asaltar e roubar vivendas na Coruña e que se saldou coa detención de tres persoas.
A investigación, explican nun comunicado, iniciouse a partir da análise de información e a vixilancia sobre os roubos con forza en domicilios na rexión, o que permitiu identificar preto de Arteixo a un grupo de estranxeiros, posiblemente do Leste de Europa, que destacaban polas estritas medidas de seguridade que adoptaban ao moverse pola provincia.
Os axentes identificaron ademais un patrón de actuación: aproveitaban a ausencia dos propietarios durante festividades como a Semana Santa para cometer os roubos. Este grupo enfocábase principalmente en chalés ou casas unifamiliares illadas, vinculándoselles directamente con ata trece roubos nas localidades de Laracha, Bergondo, Carral e Culleredo.
Durante a investigación localizouse o agocho onde o grupo almacenaba os obxectos roubados, recuperando numerosas xoias, bixutaría e outros obxectos de valor.
Ante a evidencia de que planeaban abandonar a provincia, coordinouse un operativo con diversas unidades para a súa detención. Un foi capturado pola Sección de Fiscal e Fronteiras da Garda Civil, tentando saír da provincia, nun voo desde o Aeroporto de Alvedro cara ao sur de España.
As outras detencións realizáronse na vía pública, en operacións coordinadas entre a USECIC (Unidade de Seguridade Cidadá de Comandancia) da Coruña e o Equipo de Patrimonio de Policía Xudicial.
Nos rexistros recuperáronse obxectos valiosos roubados, incluídos reloxos de alta gama e xoias, principalmente de ouro, que foron devoltos aos seus donos. Tamén se acharon ferramentas utilizadas para entrar nas vivendas, como desaparafusadores e utensilios punzantes.
O tres arrestados, de entre 38 e 48 anos, foron postos a disposición do Xulgado de Instrución Nº 8 da Coruña, que ordenou o seu ingreso en prisión provisional sen fianza.
O presidente da Deputación da Coruña, Valentín González Formoso, reclamou á Xunta que reinvista parte do canon da auga nos concellos. Fíxoo nunha visita ao municipio de Cee no que, pola súa banda, reivindicou os investimentos provinciais no municipio, entre outras actuacións, en saneamento.
Isto contrapúxoo á Xunta. “Recada os canones na factura ao veciños pero non reinviste nin un só céntimo dese canon”, dixo sobre a da auga.
“Con Feijóo xa expomos que en 10 anos só convocouse unha vez a comision galega de cooperación local”, apostilou Formoso, que lembrou que entón expuxeron “unha proposta xusta, que o 50% quedase para investimentos neses concellos e sempre obtivemos o non por resposta”. “É o xusto”, apostilou.
Como cada 8 de abril, os membros de Secretariado Xitano da Coruña celebra o Día Internacional do Pobo Xitano. Hoxe, celebraban no Centro Cívico de San Pedro de Visma, un acto institucional en presenza da concelleira da Área de Benestar Social, Yoya Neira. Nesta ocasión, para ler o manifesto de defensa da diversidade, demostrando o compromiso do colectivo na na loita contra os prexuízos e a procura de vías de diálogo, de integración e de superación das barreiras.
A escolarización das xeracións máis novas, a reubicación de familias que vivían en asentamentos, e a inserción laboral da mocidade, en especial de nenas e mulleres, son as liñas principais das políticas de integración das persoas do colectivo.
”A palabra chave é coñecer”, sinalou Santiago Barrul, do Secretariado abrindo as portas da súa comunididade para favorecer a inclusión sociolaboral. “Coñecer a nosa cultura, a nosa historia e a nosa achega é a mellor forma de acabar cos prexuízos”, engadiu.
O acto terminou coa degustación da pota xitana e a verza xerezana que elaboraron dous membros da entidade e co recordatorio de que o ano que vén a celebración do 8 de abril centrarase na conmemoración dun fito histórico: o 600 aniversario da chegada documentada das primeiras persoas xitanas á península.
Ademais, mañá, un grupo de mozos e mozas de etnia xitana, que están a asistir a un itinerario formativo en hostalería organizado por Secretariado Xitano, asistirán a un taller de procura de emprego no Centro Municipal de Emprego.
A Fundación La Caixa e o Concello da Coruña exhiben, no Obelisco, unha exposición que busca descubrir o significado da cor no mundo a través de instantáneas de National Geographic.
Trátase dunha mostra con 42 fotografías de reputados fotógrafos de National Geographic que plasman nas súas imaxes a gran paleta de cores que compón o noso mundo.
As imaxes de fotógrafos como Joel Sartore, Steve McCurry, Lynn Johnson ou Jodi Cobb, entre outros, captan a esencia de paisaxes, culturas e tradicións de todo o globo, desde Papúa-Nova Guinea ata India pasando por Islandia, República Democrática do Congo, Chile ou Estados Unidos.
A exposición forma parte do programa ‘Arte na rúa’, a través do cal a Fundación La Caixa quere achegar a ciencia e a arte ás persoas fose do marco habitual de museos e salas de exposicións.
Así se expuxo nunha presentación con presenza da concelleira de Medio Ambiente do Concello da Coruña, Noemí Díaz; a directora comercial de CaixaBank Rede Galicia, Marta Albela; a delegada territorial da Fundación A Caixa en Galicia, Susan Santos; e a asesora da mostra, Alexandra Laudo.
Noutra orde de cousas, a Domus acolle este sábado os premios ‘Imaxina’, aos que optan 20 proxectos de dez centros educativos, informa o consistorio.
A quinta edición dos Premios Mil Primaveras xa ten gañadores. E dous dos proxectos escollidos pola Coordinadora de Técnicos de Normalización Lingüística (CNTL), coa colaboración económica da Deputación Provincial de Pontevedra, son da cidade da Coruña: o Aquí tamén se fala do IES Rafael Dieste e o Recuncho Gamer de Iago Gordillo.
A entidade trata con Premios que non teñen dotación económica, recoñecer e visibilizar proxectos que favorecen a reflexión e a acción, potencian a oralidade, reforzan a formación e introducen a nosa lingua en ámbitos de interese para a mocidade. Buscan ademais crear comunidade e asociar a lingua con valores positivos.
Logo de avaliar os 37 proxectos presentados, o xurado seleccionou os catro seguintes:
Aquí tamén se fala (IES Rafael Dieste, A Coruña)
É unha iniciativa nacida en 2023 que implica activamente o alumnado para concienciar o conxunto da sociedade sobre o uso da lingua e que nos últimos meses xa se espallou por 200 centros por todo o país. O xurado salientou a súa planificación, con obxectivos xerais e específicos moi ben definidos e medibles, o feito de converter as persoas destinatarias en axentes implicadas no proceso e que sitúa o galego como elemento de integración e cohesión social.
A familia do IES Rafael Dieste é a promotora deste proxecto Aquí tamén se fala
Recuncho Gamer (Recuncho Gamer)
É un proxecto audiovisual que divulga de forma amena contido sobre videoxogos, entendéndoos como un produto cultural no cal converxen moitas artes. O xurado salientou que leva o galego a un ámbito estratéxico e moi atractivo para un sector da poboación, que desbota prexuízos e estereotipos de xénero e que incide na cultura popular do momento, onde é moi necesaria a presenza da nosa lingua.
Iago Gordillo tamén recolleu o Premio ao @RecunchoGamer nos Premios Youtubeiras
Ademais dos coruñeses, estes son os outros dous proxectos escollidos:
CeibaRimas (Merenda Creativa)
É un proxecto que busca dinamizar o uso do idioma entre a mocidade introducíndose no ambiente da xente máis nova a través dos espazos de improvisación oral, o coñecido como freestyle ou rap improvisado. O xurado destacou que é un proxecto que promove o uso oral da lingua asociándoa a un estilo musical que conecta coa xente moza. Tamén salientou que inclúe valores como a igualdade, a inclusión e o respecto, que ofrece obradoiros e recursos e que favorece a socialización.
Elos. Engánchate ao galego! (Concello de Santiago de Compostela)
É un programa de voluntariado lingüístico co obxectivo de reforzar con conversa informal a formación do alumnado que se achega ao galego desde outras linguas. O xurado salientou que parte da necesidade das persoas usuarias doutra iniciativa formativa, favorece a socialización e a integración da poboación que quere aprender a nosa lingua e contribúe a mellorar a escasa oferta formativa para persoas adultas.
Xurado
O xurado dos Premios Mil Primaveras de 2023 estivo formado por Rosa Moreiras Cuñarro, técnica de normalización lingüística do Concello de Ames, Irene Romero Iturralde, docente, Lorena García Álvarez, deseñadora gráfica, Cláudia Morán Mato, xornalista, e Paula Soto Viñas, técnica de normalización lingüística do Concello de Moaña.
