O Concello da Coruña ultima a reclamación á concesionaria da planta de tratamento de residuos de Nostián “polo sobrecusto de xestión dos residuos rexeitados”, informa o goberno local. Faino despois de que a Xunta de Goberno Local aprobase unha reclamación á UTE Albada de 15,7 millóns de euros, incluíndo tamén os intereses de demora.
Faino de acordo coa sentenza emitida o pasado mandato polo Tribunal Superior de Xustiza de Galicia (TSXG) na que se confirmaba que o custo do tratamento dos residuos rexeitados debía ser asumido pola concesionaria. O goberno local iniciou, tras iso, en novembro, o procedemento administrativo para a reclamación.
Ademais, na Xunta de Goberno aprobouse a solicitude de crédito de 22,7 millóns de euros que permitirán, sinala o consistorio, o financiamento de parte dos 90 millóns destinados a investimentos dos orzamentos municipais 2024.
A Fiscalía imputou formalmente delito de homicidio ao tres detidos pola morte de Yoel Quispe, o mozo español, de orixe peruana, que na madrugada do día de Noiteboa foi apuñalado mortalmente na Coruña. Pola súa banda, a familia sumouse a esta imputación aínda que pide máis probas ao entender que os feitos son constitutivos dun delito de asasinato, explicou a Europa Press o seu avogado, Adrián Borrajo.
Mentres, as defensas pediron no caso dos dous mozos detidos, pero en liberdade con obrigación de comparecencias no xulgado, o sobresemento, mentres que no caso do que se considera autor do apuñalamento mortal e que está en prisión expuxo as letrado dilixencias de investigación.
A imputación formal, dentro das actuacións xudiciais tras os feitos, tivo lugar este venres no marco dunha comparecencia do tres investigados, novos coruñeses de entre 18 e 21 anos. A un considéraselle o autor da puñalada e aos outros dous posibles cooperadores necesarios. “Hoxe imputóuselles a presunta comisión dun delito de homicidio e as súas formas”, explicou o letrado da familia en relación á tipificación penal. No entanto, dixo que tanto fiscalía como a acusación particular solicitaron “probas testificales para aclarar os feitos”.
E é que, de cara ao escrito definitivo de acusación, a familia entende que houbo un asasinato. “Hai aleivosía sobrevinda”, sentenciou o seu letrado, que rexeitou que houbese unha pelexa de bandas.
AMIGOS CONCÉNTRANSE NOS XULGADOS: “NON É HOMICIDIO, É ASASINATO”
Unha vintena de persoas, amigos e achegados de Yoel Quispe, concentráronse este venres nos xulgados para reclamar “xustiza” e que se amplíe a investigación a outras persoas. “Non é un homicidio, é un asasinato”, asegurou un dos participantes, Brais Caneda, en declaracións a Europa Press. Sobre a protesta, dixo que se produce con motivo das actuacións xudiciais tras a detención de tres mozos coruñeses, de entre 18 e 21 anos.
No caso dun, decretouse prisión como presunto autor dun delito de homicidio mentres que no dos outros dous acordouse liberdade con obrigación de comparecencias xudiciais. Nos xulgados, tamén estivo a nai de Yoel, Yovana, que expuxo, á súa vez, que nesta xornada estaban citados “os detidos”.
“Queremos que veñan todos, son máis”, sinalou Brais Caneda en relación ás citadas actuacións xudiciais e o feito de que sexan tres e non máis as persoas detidas e postas a disposición xudicial. E é que a contorna de Yoel Quispe, español de orixe peruana, sostén que debe ampliarse a imputación a outras persoas que participaron nos feitos que desencadearon a morte.
“Haberá máis mobilizacións ata que estean os 10 investigados”, aseverou tamén durante unha protesta na que se escoitaron berros de ‘asasinos’ e proclamas pedindo a pena máxima e que “o crime de Yoel non quede impune”. “Non calaremos ata que vexamos que todos os que o fixeron págano”, apostilou.
A Central Sindical Independente e de Funcionarios (CSIF) urxiu á Consellería de Presidencia, Xustiza e Deportes a “cumprir os acordos do Consello Xeral do Poder Xudicial (CGPJ)” e implante “sen máis demora” as gardas de 24 horas na Coruña e Vigo.
A CSIF lembrou que se trata dunha petición avalada por un acordo do propio CGPJ, que daba luz verde a este servizo e informaba en sentido positivo sobre o mesmo, ante os datos de carga de traballo dos xulgados de instrución destes partidos xudiciais.
Segundo critica a organización sindical nun comunicado, a día de hoxe a Xunta segue sen realizar as xestións necesarias e sen dar a autorización económica precisa para implementar as gardas. “Non podemos entender esta teimosía por parte da Xunta e a súa negativa, sen ningunha xustificación, a cumprir co acordado co CGPJ“, engadiron, explicando que tanto a Administración estatal como a autonómica están obrigadas a dotar presupuestariamente todas as demandas legalmente adoptadas polo CGPJ e o Tribunal Superior de Xustiza de Galicia (TSXG).
“E así o fixo o Ministerio, mentres que a Xunta séguese negando, no que consideramos un ataque inaceptable á división de poderes“, reivindicaron. Por todo iso, a CSIF remitiu un novo escrito a Xustiza para pór en marcha estas gardas. “A Consellería debe de acabar dunha vez por todas coa discriminación que sofre Galicia co resto de España e implantar, con 8 xulgados de instrución, as gardas de 24 horas para A Coruña e Vigo”, sentenciaron, esixindo un calendario con datas para a súa posta en marcha.
O proxecto «Personalizando o emprego como solución ao sinhogarismo», de Hogar Sí, é un dos 12 gañadores da 8.ª edición dos Premios Fundación La Caixa á Innovación Social. A iniciativa coruñesa galardoada ofrece un proceso personalizado de integración e consolidación sociolaboral a persoas sen fogar. O xurado recoñeceu o compromiso co cambio e a acción social desta iniciativa, que achega novas miradas e solucións para promover a xustiza social e a igualdade de oportunidades.
Esta iniciativa aspira a que as persoas sen fogar teñan os ingresos económicos suficientes como para poder decidir libremente sobre o seu proxecto de vida mediante o emprego, sendo o fin último acompañalas nun proceso personalizado de integración e consolidación sociolaboral. No proxecto faise unha avaliación baseada na teoría do cambio. Recóllese información da evolución das persoas en áreas crave como a inserción e o mantemento no mercado laboral ordinario, a situación socioeconómica, a situación residencial, a empleabilidad e a calidade de vida.
Esta iniciativa recibirá 15.000 euros. A cerimonia de entrega dos premios, celebrada este xoves en CaixaForum Madrid, foi presidida pola ministra de Educación, Formación Profesional e Deportes, e portavoz do Goberno, Pilar Alegría, e o director xeral da Fundación La Caixa, Antonio Vila Bertrán.
Retomamos a serie de entrevistas coas Asociacións de Nais e Pais dos centros educativos da nosa cidade, para poñer en valor o seu traballo voluntario, pero tamén para denunciar a orfandade na que se atopan. Servizos tan fundamentais para as familias como madrugadores, comedor e extraescolares dependen da vontade das familias que se atreven a formar parte das ANPAS, a pesar das incomprensión e da máxima esixencia de boa parte da comunidade escolar, e da falta de apoio por parte das administracións.
Porque a conciliación non pode depender dun sistema público que só se ocupa das crianzas de 9:00h a 14:00h, 5 horas que non permiten ter un traballo de verdade, tendo que acodir na meirande parte dos casos a eses servizos que deberían ser xestionados dende os estes públicos, e non depender da vontade, do tempo, das familias.
Hoxe facemos parada no oasis do CEIP San Pedro de Visma, un verxel de natureza. Da problemática urbanística xa falaremos a vindeira semana, pero hoxe queremos seguir analizando esa orfandade das ANPAS con Arantza Sánchez, que xa leva case 10 anos formando parte da mesma. “Levo moito tempo, sempre vendo que imos a peor, con cada vez máis responsabulidades e á vez máis esixencias”, explica con rabia.
Hortas no verxel do CEIP
Cantas persoas estades na ANPA?
Pois este ano somos 5 persoas, o tope, non conseguimos máis. Pero hai persoas novas no cole e e difícil que se adapten e que aprendan todos os procedementos polo que a carga principai recae en 2 ou 3. Este ano para nós foi unha tolemia. Pasamos de 100 a 160 becas de comedor, e xestionalas todos é tremendo. E aínda por riba nos vén a xunta poñendo esixencias, dicindo que non podemos cobrar unha cota anual, de 20 euros…
Eu pido vacacións en setembro para xestionar todo isto…
Como lle facemos chegar ás familias todo o traballo voluntario que hai detrás
Nós imos comezar publicar todos os traballos na web, como fan outras ANPAS; todo o que aportamos ao cole, e todo. Temos unha listas de difusión do Telegram e contamos co apoio de dirección de Abalar, pero ao final as familias casi protestan máis que agradecen.
Pensades que vos corresponden ás competencias de organización de comedor e actividades extraescolares? Non é un proceso de privatización o feito de termos que contratar empresas para o catering?
Que veñan funcionarios da Xunta e vexan o traballo que hai, e como loitamos ano tras ano para que saian adiante. Somos 370 alumnos e por exemplo na actividades públicas da Federación de ANPAS; tes un mínimo de 10, e despois me teño que ir ás privadas. Aquí falla algo, non entendo.
Que outras problemáticas vos atopades? Como ves a implicación da comunidade familiar na organización da ANPA?
As esixencias dos pais é o máis difícil. Veñen con que non contestaches un correo… ou ti mandas por telegram, abalar, e logo fan o que lles dá a gana. Intentas informar todo o que podes e despois fan o que queren. A xente non le, cóstame entendelo.
Que tal o servizo de madrugadores?
Outra tolemia. De ter 10 nenos, agora temos 70, contando con esporádicos. Estamos contentos con Jardanau (a empresa que xestiona madrugadores e comedor no 90% dos centros coruñeses) aínda que si que é certo que poderían mellorar certos menús.
Como son as relacións da vosa ANPA coas administracións?
Pois para a burocracia temos unha asesoría, que nos leva o papeleo. Se xa é difícil traer xente para a ANPA, que saiban facer a burocracia xa non che conto.
A relación co Concello é cada vez peor. Antes no Consello Escolar tiñamos un representante municipal, que transmitía todo. Logo que nos fixesen caso é outra cosa. Pero este ano non temos.
Por moito que mandemos información, se non temos representante como o imos trasladar? Levamos 8 anos loitando por un pavillón, que serviría para todo o barrio, para todos os clubs, e en teoría este ano está aprobado, pero xa non confiamos demasiado.
O voso centro tamén forma parte do programa de dixitalización Edixgal, do que tanto se fala estes meses. Cal é a postura tendes?
Non o queremos. Aquí temos os 5º e 6º de Primaria que usan ordenadores, pero fatal. Ti como pai te preguntan, non sabes… perdes tempo… de feito a profe de matemáticos decidiu pedir libro. Os representantes das familias no Consello escolar xa trasladamos que non queremos continuar o programa. Ademais, paréceme unha tontería, unha vez que nos institutos non existe este programa.
O Complexo Hospitalario Universitario da Coruña (Chuac) atópase, un ano máis, entre os centros con maior actividade trasplantadora a nivel nacional con 257 transplantes de órganos sólidos en 2023. Esta cifra supón o terceiro maior número de transplantes orgánicos da historia deste centro nun ano, segundo os datos achegados polos responsables do hospital na presentación da memoria de transplantes correspondente ao ano pasado.
En concreto, realizáronse 129 transplantes de ril (nove de doante vivo), 53 de fígado, 49 de pulmón, 22 de corazón e catro pancreáticos, así como dous transplantes infantís e seis transplantes dobres. Desde o inicio dos progamas de transplante no ano 1981 e ata o 2023, o hospital realizou un total de 7.144 transplantes de órganos sólidos, situándose como un dos centros con maior actividade en España.
Sobre a espera media, precisaron que “depende do órgano”. “Todo depende de ter doantes”, incidiu o responsable da Oficina de Transplantes do Chuac, Fernando Mosteiro, nun balance de datos con presenza, entre outros, do xerente da área sanitaria da Coruña e Cee, Luís Verde.
DOAZÓNS
Respecto das doazóns, no ano 2023 o número de doantes ascendeu a 32, dos que 19 foron de doante vivo. O informe destaca, tamén, os 13 doantes en asistolia controlada. A taxa de doazón da área sanitaria coruñesa, con 58,3 doantes por millón de poboación, sitúase moi por encima da media estatal (48,9) e autonómica (40,5), superando o obxectivo marcado pola Organización Nacional de Transplantes para o ano 2023.
Por segunda vez na historia Galicia presenta unha porcentaxe de negativas familiares (15,5 %) menor que a media española (18 %), éxito obtido grazas á baixa cifra de negativas do Chuac (6 %), precisaron. Entre os retos para este ano, fixaron manter o impulso da doazón en asistolia controlada, consolidar os protocolos de doazón tras eutanasia, detección de doantes extra-UCI e promover campañas divulgativas.
Un home acusado de ter á venda na Coruña máis de 4.000 artigos falsificados de marcas como Chanel, Loewe ou Prada aceptou dous anos de prisión, no xuízo fixado para este xoves na sección primeira da Audiencia Provincial coruñesa. Fíxoo tras un acordo entre Fiscalía, defensa e as acusacións particulares ao recoñecer os feitos o procesado e acordarse unha rebaixa da pena que o home aceptou. Ademais da pena de cárcere, o procesado deberá abonar unha multa de 1.095 euros e máis de 36.000 euros ás marcas polo prexuízo ocasionado polas cantidades defraudadas.
Non entanto, o tribunal aceptou a suspensión da pena de prisión imposta, a instancias da solicitude da defensa, coa condición de non delinquir nun prazo de dous anos e do pago da indemnización pactada. Segundo o escrito de acusación do Ministerio Público, funcionarios da Garda Civil inspeccionaron en 2017 un establecemento comercial da Coruña, no que o home foi sorprendido con “numerosos obxectos, copia idéntica ou case idéntica dos orixinais, de empresas sobradamente coñecidas do mundo da roupa, complementos e moda, coa finalidade de polos no mercado”. En total, os axentes confiscaron 4.110 pezas e insignias de marcas como Tous, Versace, Prada, Bimba e Lola, Luís Vuitton, Dona Kara New York, Loewe, Chanel, Adidas e Nike. Por todo iso, o fiscal atribuíalle ao acusado un delito contra a propiedade industrial.
O Concello da Coruña deu luz verde, na sesión plenaria celebrada este xoves, á regularización do polígono de Pocomaco, o que permitirá, segundo o goberno local, executar investimentos públicos para a súa mellora. O acordo coa directiva do citado polígono foi ratificado pola corporación municipal o que permitirá acabar coa situación dos viarios do polígono desde a súa construción.
Segundo lembrou o concelleiro da área de Economía e Planificación Urbana e portavoz do goberno local, José Manuel Lage, “esta iniciativa ten como obxectivo liquidar unha situación anómala existente en Pocomaco desde hai máis de 50 anos“. “Por mor desta anomalía, os propietarios do polígono de Pocomaco están a ser privados da prestación de servizos públicos e investimentos dos que si se benefician outros polígonos da cidade”, precisou.
Moisés Jorge Naranjo deixa a xerencia do Consorcio de Turismo da Coruña, unha responsabilidade que ocupaba desde agosto de 2021, para iniciar unha nova etapa profesional, segundo informou a alcaldesa, Inés Rey.
Naranjo conclúe unha etapa á fronte do consorcio coruñés “na que, entre outros logros, incrementáronse notablemente as cifras de visitantes na cidade”. “Sendo a cifra total de viaxeiros de 2023 superior á de catro anos antes e aumentando nun 33% a presenza de turistas internacionais”, indica.
“Ademais durante a súa xerencia, consolidouse A Coruña como destino MICE e conseguiuse superar a barreira do millón de pasaxeiros que chegaron a Alvedro”, sinala a rexedora que lle agradece o seu “compromiso, dedicación e profesionalidade”.
O Encontro Mundial de Humorismo ofrecerá novas funcións de ‘A ruína‘ e ‘Celebreixon‘, cuxas entradas sairán á venda este xoves, 1 de febreiro, segundo informa o consistorio coruñés. Roberto Vilar ofrecerá un segundo pase do seu primeiro show en solitario o domingo 28 de abril mentres que o espectáculo de Ignasi Taltavull e Tomás Fontes terá unha nova función na tarde do 4 de maio.
O Encontro Mundial do Humorismo celebrarase do 25 de abril ao 5 de maio e para estas novas funcións as entradas poranse á venda a partir deste xoves, ás doce do mediodía. Este ano vendéronse xa case 17.000 entradas, superando as 15.000 de 2023, remarca o goberno local coruñés, que subliña as múltiples funcións e producións propias que se ofrecen nun único evento.
