A maxistrada do Xulgado de Instrución número 2 da Coruña, en funcións de garda, decretou prisión provisional comunicada e sen fianza, por homicidio, para os dous detidos pola morte dun home en Arteixo (A Coruña), que recibiu uns disparos na rúa na tarde do domingo. Fíxoo tras pasar ambos este martes a disposición xudicial.
O falecido é un home de 42 anos, con iniciais G.S.R., porteiro dun local de lecer nocturno na cidade herculina, confirmaron, á súa vez, fontes consultadas por Europa Press.
Segundo informou Urxencias Sanitarias de Galicia-061, os servizos sanitarios tiveron coñecemento dos feitos ás 17,55 horas do domingo e ao lugar enviaron unha ambulancia asistencial de Soporte Vital Avanzado (SVA).
A vítima foi atendida e finalmente faleceu no punto. Desde a Garda Civil ratificaron que manteñen todas as hipóteses abertas en relación á investigación que se abriu tras os feitos.
Pola súa banda, o 112 confirmou que unha persoa alertou de que un home estaba ferido por arma en Arteixo. Segundo explicou, atopouse co home tirado na estrada, na rúa José Pérez Ballesteros, sen saber moi ben que sucedera ata que percibiu que había persoas con armas nos arredores.
Con esta información, os xestores do 112 Galicia pediron a colaboración dos axentes da Garda Civil e da Policía Local, ademais dos profesionais de Urxencias Sanitarias de Galicia-061 para atender ao ferido.
Á súa chegada ao lugar dos feitos, os axentes locais confirmaron que había unha persoa ferida por arma e urxían a asistencia médica, que chegou a bordo dunha UVI móbil, aínda que finalmente o home faleceu.
O Goberno municipal celebrou hoxe a segunda das mesas sectoriais organizadas con representantes de entidades vinculadas co sector das vivendas de uso turístico (VUT), para actualizar unha normativa que non se estaba a aplicar polas limitacións autonómicas existentes neste ámbito.
As recentes sentenzas que avalan a capacidade reguladora dos concellos neste sector, permiten que os Concellos tomen medidas reais, como se lle vén solicitando.
Así, o Concello da Coruña limitará as VUT aos baixos e primeiras plantas e a edificios completos, e só a edificios completos no ámbito Pepri, segundo recollía xa o planeamento en vigor desde o ano 2013.
Na mesa, o concelleiro recolleu as aportacións que lle fixeron chegar desde as entidades de cara a introducir novas regulación no sector. As partes quedaron emplazadas a un novo encontro antes de que finalice o ano, encontro no que cada unha das entidades fará as concrecións que considere de cara á nova normativa.
Mantiveron esta mañá de martes 31 de outubro unha reunión entre o voceiro do Goberno municipal e concelleiro de Economía e Planificación Urbana, José Manuel Lage, e a vicepresidenta segunda da Xunta e conselleira de Medio Ambiente, Territorio e Vivenda, Ángeles Vázquez. Trátase do segundo encontro tralo mantido en setembro para abordar, principalmente, o encaiado selado do vertedoro de Nostián
Lage trasladoulle á conselleira que o proceso xa está en trámite, despois de que o executivo local chegase a un acordo coa concesionaria da planta. “A empresa asumiu os necesarios traballos para selar adecuadamente dita superficie, traballos que acometerá proximamente con recursos propios”, explican dende o consistorio.
Xabaríns
Ademais, os dous representantes de ambas as administracións asinaron hoxe tamén o convenio para poñer fin á presenza de xabarís no termo municipal coruñés, polo que a Xunta financiará as trampas e o Concello será o que desenvolva a “captura” na práctica.
Aseguran que se trata dun documento que non permite só unha solución conxuntural á situación actual, senón que establece un protocolo de actuacións a futuro.
Técnicos municipais do Concello da Coruña, bombeiros e Policía desprazáronse este martes ao número 120 da Rolda de Nelle, na cidade herculina, nunha actuación que formaba parte dunha inspección técnica do inmoble, con denuncias veciñais pola súa ‘ocupación’.
Entre outros, participaron axentes da Policía Nacional que chegaron a deter a unha persoa, segundo confirmaron desde o corpo policial a Europa Press. Non entanto, precisaron que esta detención non foi “dentro de ningún operativo” senón que se produciu cando realizaban “labores de apoio” na citada inspección do edificio. Outras fontes próximas ao caso sinalaron que se trataría dunha persoa en busca e captura.
IMPEDIR DESPRENDEMENTOS
Pola súa banda, desde o consistorio explicaron que técnicos de Medio Ambiente, Servizos Sociais, Urbanismo e bombeiros acudiron esta mañá ao inmoble para comprobar a súa seguridade e impedir desprendementos e situacións potencialmente perigosas e garantir a seguridade das persoas. Esta actuación, engadiron, desenvolveuse ante a “ausencia de medidas” por parte do propietario da vivenda ao que se lle require “desde 1999” que actúe respecto diso.
A miña avoa materna morreu xusto antes da pandemia e aforrouse o medo de estar soíña na residencia todos eses meses.
No tanatorio puxéronnos unha especie de catering funerario nun carriño portátil, con bocadillos de embutido e variedade de zumes e boliños. Ninguén probou bocado, os nudos na gorxa e no estómago impedían a deglución e a dixestión.
A noite antes do funeral, cando nos dispoñiamos a marchar á casa, unha amiga da miña nai decidiu que era un crime deixar todos eses manxares no tanatorio, que o ocaso pagara iso, e comezou a envolver os bocatas e os boliños en panos de papel e a embutilos (valga a redundancia) no meu bolso, que non era moi grande. Os bocadillos desfacíanse e o pan e o embutido mesturábanse coas miñas pertenzas, incluso algún sobresalía polo bolso atestado de comida.
Saímos rindo da sala e ó pasar pola recepción tiven que morderme a lingua para poñer cara de dor e non parecer unha desalmada. O arrecendo a lomo e chourizo que deixaba ó meu paso podería espertar ós mortos.
O día seguinte celebrábase o funeral. Eu debía pensar que estabamos en Austin Texas e quería falar da miña avoa, das noites que a miña irmá e máis eu pasabamos na súa casa vendo Informe Semanal, de como nos quentaba as mans e os pés (non había calefacción) a base de fregas, do que lle encantaba a romería da Silva e de Santa Margarida, o San Xoán, o ramo (ruda fiuncho herbaluisa romeu fento xesta malva) e as sardiñas, dos centos de veces que nos contou a historia do porco tinguido de verde por arrimarse á porta da casa pintada polo seu pai, de como quería reunirse co noso avó Eduardo e os seus pais alá no ceo, de cando nos dicía que os cemiterios non daban medo porque estaban cheos de flores, de que tiñamos que temer a algún vivos e non ós mortos, das castañas e as cabazas, e así de mil cousas.
Pero resulta que o cura tiña outros plans e sacoume a ler algo de San Xoán creo, e eu comecei a ler pero o meu cerebro levábame á Silva, á fonte de Cances, ós ramos de San Xoán, ó porco e a todo o bonito, e comecei a choromicar, a hipar e a moquear, e tivo que saír unha señora a seguir lendo unha carta ós Tesalonicenses ou ós Corintios ou a Deus sabe a quen, porque eu estaba a outra cousa.
Lembro todo isto porque un ano máis chegan as celebración de tódolos santos e tódolos defuntos, e é o momento para rendir homenaxe ós nosos devanceiros e acudir ós cemiterios e levar as flores, pero se cadra tamén para facer colares de castañas, carvar as cabazas, desempoar os álbums de fotos antigas, saír ó truco ou trato (antigamente unha limosniña para os defuntiños) polos barrios coruñeses (case todos o celebran), disfrazarse de meiga ou de Jason ou de Santa Compaña, e rir despois de chorar.
“Luísa Villalta representa toda a liberdadade e inconformismo que nos identifica aos coruñeses e coruñesas, así como o profundo liderado cultural que ten a nosa cidade e que queremos reivindicar e lembrar coa homenaxe á súa figura” explican dende o consistorio.
O Concello aproveitará que se conmemora o 20 aniversario do seu falecemento para renderlle esta singular homenaxe. A cerimonia comezará na Cruz dos Esquecidos coa actuación da Coral Polifónica Follas Novas, e o e percorrido rematará coa tradicional ofrenda no monumento aos Mártires pola Liberdade, en recordo a todas as vítimas do franquismo na Coruña.
Ademais, o Concello neste 2023 recordará o 50 aniversario do voo 118 de Aviaco, considerada a maior traxedia aérea de Galicia con 85 persoas falecidas, 79 pasaxeiros e seis tripulantes, a totalidade de persoas a bordo do avión.
Afundación promove a cuarta edición do ciclo de concertos ‘Butaca de Jazz’ na súa sede da Coruña cun cartel que inclúe nomes como Alberto Vilas, Rita María e Filipe Raposo e a banda Sumrrá.
O festival celébrase no marco do programa solidario de Afundación ‘Cultura por Alimentos’ polo que a entrada a cada concerto será a realización dunha doazón de alimentos, ademais de retirar a entrada en Ataquilla.com.
No caso de que non se realice a doazón, deberase abonar a entrada. Os alimentos depositaranse nos colectores habilitados na entrada do auditorio para ser logo entregados ao Banco de Alimentos Rías Altas.
Na presentación desta mañá interviñeron, entre outros, Marité Cores, coordinadora da área de Cultura de Afundación, quen destacou que “se trata dun ciclo xa consolidado no outono coruñés co que pretendemos ofrecer unha oferta de jazz de alto nivel con propostas galegas, nacionais e internacionais”.
Inundar as redes con mensaxes sobre igualdade e contra a violencia de xénero. Ese é o obxectivo que o Club de Béisbol e Softbol Cambre se marca na súa campaña anual polo 25N, Día Internacional da Eliminación da Violencia contra a Muller.
A campaña, que durará todo o mes de novembro, constará de varias actividades. Por unha banda, as redes sociais do Club Cambre CBS (Facebook, Twitter e Instagram) servirán para publicar numerosas mensaxes de concienciación a prol da igualdade e contra a violencia machista. O obxectivo, segundo explicou o presidente, “é chegar ao maior número de persoas posible, cubrindo a veciños de todas as idades”.
Ademais, dentro da programación do 25N, o Club celebrará dúas citas deportivas: o Torneo a favor da loita pola tolerancia e a non violencia de xénero e o Torneo a favor da Igualdade entre Homes e Mulleres.
A primeira terá lugar o sábado 18 de novembro e participarán equipos júnior-infantil do CBS Cambre, Club Lume (Lugo) e Club Os Tilos (Teo).
O segundo acto terá lugar o sábado 25 de novembro e contará coa participación de CBS Cambre A, Cambre B e Cambre C. Ambos os actos terán lugar no pavillón do Temple. A maiores, a entidade tamén preparou unhas chapas conmemorativas coa mensaxe Todos somos béisbol e softbol.
Este venres, 3 de novembro, o DJ e produtor coruñés Roi Gorbas lanzará o seu novo vinilo, Tigre. Trátase dun EP intimista con catro temas no que homenaxea a quen foi o seu compañeiro de risas, aprendizaxes e aventuras nos últimos anos: “Tigre”. A obra poderase escoitar a partir do venres 24 de novembro en Beatport e, a partir do 8 de decembro, no resto de plataformas dixitais.
Codirector do selo Fanzine Records e do festival Fanzine Fest, é, sen dúbida, unha das figuras imprescindibles do techno nacional das dúas últimas décadas. Destaca ademais o seu afán dinamizador da cultura local de clubs e promotora de citas como eventos FIRC ou FECEC.
A vida familiar que hai dentro dos Centros Educativos de Educación Infantil e Primaria (CEIP) é un mundo bastante agochado. Pouca xente, ata que o vive en primeira persoa, coñece o funcionamento, e o incansable traballo das Asociacións de Nais e Pais nos colexios públicos.
E moitas veces, no canto de agradecer este esforzo voluntario por mellorar a calidade da ensinanza dos nenos e nenas, a ignorancia provoca que algunhas familias o único que fagan é criticar, no canto de agradecer ou animarse a colaborar.
Co afán de poñer en valor este traballo colaborativo que protagonizan centos de familias de toda a cidade, que fan que as comunidades escolares sexan un dos alicerces da nosa sociedade, comezamos esta serie de entrevistas con varias das ANPAS. Entrevistas nas que afondamos sobre as carencias, a falta de apoio institucional, e a asunción de responsabilidades que administracións como a Xunta delegaron nas familias.
Porque cómpre lembrar, que a día de hoxe, o horario oficial no que os centro de ensino asumen a custodia, e educación, das crianzas, é de 9:00h a 14:00. 5 horas que para nada reflicten os ritmos da sociedade actual, e que non respectan unha conciliación adecuada. Deste xeito, de non ser polas ANPAS, nas que recae o peso da organización de servizos tan necesarios como o de madrugadores, o comedor ou as actividades extraescolares, e que permiten ampliar o horario “escolar” entre as 8:00h e as 18:00h, sería imposible facer unha xornada laboral completa para calquera traballador/a.
Xa fixemos parada no CEIP Salgado Torres e hoxe nos achegamos ao barrio de Monte Alto para falar coa ANPA Monte Vixía do CEIP Torre de Hércules.
1. Pensades que vos corresponden ás competencias de organización de comedor e actividades extraescolares?
– ANPA Monte Vixía do CEIP Torre de Hércules: Pode ser que nos corresponda pero que como asociación de nais e pais, sendo todos voluntarios e con poucos membros, é complicado. Polo anterior penso que debería ser unha responsabilidade compartida coa Xunta ou asumida pola Xunta na súa totalidade.
2. Cales son os cambios principais que proporíades ao respecto?
– ANPA Monte Vixía do Torre de Hércules: Incluír ao centro e á Xunta na xestión e seguimento destas competencias.
3. Credes que debe cambiar algo na relación das ANPAs coas administracións?
– ANPA Monte Vixía do Torre de Hércules: Pois a relación é moi pequena. De feito non somos invitadas cando hai visitas institucionais, tanto do Concello como da Xunta.
4. Cales dirías que son os problemas principais aos que se enfronta unha ANPA?
– ANPA Monte Vixía do Torre de Hércules: Ao meu parecer creo que é complicado estar ao tanto de solicitudes, ofertas, orzamentos… sendo poucos e voluntarios. Creo que debe ser unha responsabilidade compartida coa escola e liderada pola escola.
Poucos membros, pouco tempo, moitas competencias e demanda das familias. É preciso implicación e presenza para crecer e mellorar.
5. Canta xente diríades que se implica na organización dos servizos da ANPA maís alá da Xunta Directiva?
– ANPA Monte Vixía do Torre de Hércules: A día de hoxe a verdade é que somos un grupo bastante numeroso de familias implicadas, con varias comisións para organizar diversos aspectos. Pero máis alá da directiva, penso que de forma extraordinaria algún profesor ou monitor, algunha familia e a federación de país e nais, que intenta axudar sendo coñecedora das carencias e dificultades existentes.
Imaxe do magosto celebrado o ano pasado no centro organizado pola ANPA
