O CEIP de Torrexallóns (Laxe), o CEIP de Pousada Carcacía (Padrón) e a Escola de Educación Infantil de Carnés (Vimianzo) (cunha, dous e catro matriculas respectivamente) non abrirán as súas portas o próximo curso escolar “debido á insuficiente matricula por falta de alumnado”.
Así o comunicou a Consellería de Cultura, Educación, FP e Universidades este venres, que sinalou tamén que os nenos matriculados nestes centros xa teñen praza nos colexios de referencia dos seus respectivos concellos.
Así, o próximo curso escolar arrincará en Galicia o próximo 11 de setembro cun total de 11.934 aulas para 225.013 alumnos das etapas de Infantil, Primaria, ESO e Bacharelato no sistema educativo público.
A Xunta asegurou nunha nota de prensa que se reforza o número de unidades para o próximo ano académico en comparación co curso anterior, no que “estiveron en funcionamento 11.916 aulas”, a pesar de rexistrarse “case 2.000 matriculas menos” –226.811 alumnos o curso pasado–.
Enorme recorte
Segundo CIG-Ensino, a Consellaría vén de acometer un dos maiores recortes dos últimos anos coa supresión de 89 prazas e 60 unidades só en infantil e primaria en Galicia, concretamente 38 de infantil e 51 de educación primaria, incluídas nestas, sete en distintos centros de educación especial.
Na cidade sufrirán recortes en unidades ou en persoal varios centros de ensino da comarca coruñesa:
- CEIP Ponte dos Brozos (Arteixo)
- CEIP Curros Enríquez (A Coruña)
- CEIP Sagrada Familia (A Coruña)
- CEIP Plurilingüe Alborada (A Coruña)
- CEIP Emilia Pardo Bazán (A Coruña)
- CEIP Wenceslao Fernández Flórez (Cambre)
- CEIP Portofaro (Cambre)
- CEIP Isaac Díaz Pardo (Culleredo)
- CEIP Plurilingüe de Tarrío (Culleredo)
- CEIP Sofía Casanova (Culleredo)
- CEIP Plurilingüe da Rabadeira (Oleiros)
15.000 SOLICITUDES
Para a escolarización no próximo curso, a Consellería recibiu sobre 15.000 solicitudes de praza para nenos e nenas que entran por primeira vez nos colexios galegos (concretamente o alumnado de tres anos que entra en 4º de Educación Infantil), para quen se oferta algo máis de 26.000 prazas dispoñibles no sistema.
Segundo a Consellería, isto supón que preto do 58% das prazas de novo ingreso ofertadas quedan libres. É dicir, que o 99,2% do alumnado que solicitou praza en 4º de Infantil nos centros do catro provincias para este curso obtívoa no colexio escollido como primeira opción.
Cifras, máis que persoas
Así mesmo, o departamento que dirixe Román Rodríguez quixo lembrar que os cocientes establecidas pola normativa estatal para Infantil e Primaria son de 25 alumnos por aula, e en Galicia, o 70% das aulas destas etapas teñen 20 alumnos ou menos (e destas, destacou, o 30% teñen 10 ou menos alumnos).
A isto engadiu que a Comunidade mantñen unha media de 9,8 estudantes por cada docente fronte á media nacional de 11,4 en España.
