Despois da primeira noite de peche, o profesorado en folga (convocada polos sindicatos CIG e STEG) protagonizou unha mañá de loita por un ensino público digno cunha manifestación multitudinaria polo barrio de Elviña e Monelos.

A primeira reflexión ao espertar foi destacar que o propio peche é un acto reivindicativo, que viña sen facerse dende 2013, cando o profesorado se pechou en contra da LOMCE, o que dá idea da dimensión da situación actual, na que os sindicatos volven convocar folgas e peches para pedir á Consellería se sente a negociar as demandas de toda a comunidade educativa ante un servizo público que esmorece ante os recortes da Consellería.

Con esa idea erguéronse e sacaron as pancartas para darlle visibilidade ao peche e á folga na entrada do alumnado do IES de Elviña e no CEIP Alborada, invitando a todo o profesorado a que se unise á manifestación. Despois dun pequeno almorzo, ás 11:00h, concentráronse de novo para arrincar unha masiva manifestación que contou co apoio de numerosas familias.

”As familias xa levan moitos tempo sufrindo os recortes no ensino público, peor aínda que o sufrimos o profesorado”, recoñece Diviña Núñez, de CIG-Ensino. “En boa parte porque o eslabon máis débil é a atención á diversidade, e aí familias están moi sensibilizadas pero tamén moi apoiadas polas ANPAs e moi mobilizadas”, sinalou agradecendo o apoio nesta xornada. “Xa nos veñen trasladando ano tras ano, sobre todo ao comezo e ao final do curso os recortes continuos, cos que calidade do ensino se ve mermada dunha forma drástica”.

Se ben aínda non puideron facer contabilidade do seguemento á folga (a Xunta cuantificou nun 30%), si que valoraron moi positivamente o apoio tanto na manifestación de onte en Santiago como na de hoxe na Coruña, onde acodiron un gran número de profesorado, familias, ANPAS e tamén alumnado de toda a provincia.
De feito, o Sindicato de Estudantes amosou o seu apoio total á folga do profesorado criticando os “recortes e a privatización do PP” lembrando tamén a loita contra o acoso escolar. Van máis alá e alentan unha folga xeral de toda a comunidade educativa, non sen criticar o “acordo da vergoña que CCOO, UGT e ANPE coa Consellería”.

A marcha percorrou o barrio de Elviña entre o CEIP Alborada e a sede da Delegación Territorial da Consellaría de Educación, onde lanzaron berros por unha Folga Xeral, ademais de arengas como “Ensino Público e de calidade”, “Non aos recortes en educación”, “A Xunta de Galiza, recorta e privatiza”, “O Ensino na rúa, a loita continúa”; “O ensino é un dereito e non un privilexio”.

 

View this post on Instagram

 

A post shared by Xornal da Coruña (@xornaldacoruna)

A encargada de ler o manifesto final por parte da CIG-Ensino, Xela Armas, recalcou que “o profesorado galego está facendo historia con esta loita iniciada a comezos de curso despois de 15 anos de recortes nos que todas as enerxías e a responsabilidade profesional se volcaron en atender o alumnado. O profesorado galego non abandonou a loita nin o pulso á Consellaría en todo este tempo e esa forza é a que a obriga a ceder de cando en vez en cuestións que rexeitaba de facto nun primeiro momento. O camiño andado, sobre todo nestes apenas dous meses de curso, tennos que levar a sentirnos moi satisfeitos e satisfeitas”.

Peticións dos sindicatos convocantes

• Baixada de ratios no inicio de todas as etapas educativas a partir do vindeiro curso 26/27.
• Recuperación do horario lectivo recortado en 2011 (21 horas en primaria e infantil) e en 2012 (18 horas no resto de ensinanzas) tamén a partir do vindeiro curso e fin da discriminación horaria nos CIFP e centros de ensinanzas artísticas. “Galiza é a única comunidade de todo o Estado que permanece coas 20 horas en secundaria e outras ensinanzas”, lembran.
• Medidas concretas que garantan unha correcta atención á diversidade (criterios para a dotación de persoal especialista de PT e AL, incremento do número de orientadores/as nos centros, cómputo como dobre ou triplo do alumnado con necesidades en todas as etapas, autorización de desdobres, PDCs e FP básica en todo o territorio…)
• Un plan real de eliminación de burocracia que leve aparellado, entre outras medidas, un incremento da dedicación horaria para equipos directivos, coordinacións e titorías.
• Melloras retributivas: incremento retributivo lineal para todo o profesorado no complemento autonómico que permita recuperar o poder adquisitivo perdido, recuperación do cobro do verán para o persoal substituto que traballe 5 meses e medio e equiparación salarial do PESSFP co resto de profesorado de FP.
• Redución da xornada laboral a partir dos 55 anos e recuperación das licenzas por formación retribuídas.

Máis novas

O CEIP Alborada acolle o peche pola folga no ensino

Máis novas do ensino

Outras novas das ANPAS