Será por medio dunha pregunta oral co seguinte texto: “Considera Inés Rey que todas as persoas e empresas que viven ou realizan actividades económicas na Coruña reciben o mesmo trato por parte do Goberno Local cando cometen ilegalidades urbanísticas?”. “Preguntamos isto logo de ver o trato que recibiu o portavoz do Goberno Local após cometer irregularidades urbanísticas en inmóbeis da súa propiedade [coa concesión dunha licenza en tempo récord] e estamos a ver que hai unha certa arbitrariedade á hora de tratar as ilegalidades urbanísticas”, di Veira.
Así, pon como exemplo “o caso moi evidente de Primor”, nos Cantóns, “cunha empresa que se saltou a legalidade urbanística e que acabou abrindo ao público a pesar de que non cumpría os requisitos que se lle esixían para lle conceder a licenza e a pesar dunhas declaracións moi contundentes da alcaldesa”.
Membros da Confraría de Pescadores da Coruña mobilizáronse este mércores ante a Delegación do Goberno en Galicia para esixir ao Executivo central que asuma a “responsabilidade” e sente a negociar coa Xunta e o colectivo para “tomar medidas” e achegar unha solución ante a “situación límite” que sofren os mariscadores e mariscadoras da ría do Burgo unha vez finalizadas as obras de dragado.
“Hai un estudo de impacto ambiental que hai que cumprir, no que se plasma este dano que se causa ao sector, derivado dunha obra, e quen ten que asumir a responsabilidade é o Ministerio – de Transición Ecolóxica e Reto Demográfico –“, insistiu o portavoz do colectivo, Manuel Baldomir, tras reclamar a Xunta e Goberno o pago de axudas.
Doutra banda, lamentou que ambas as administracións estean “a tirar 74 postos de traballo ao lixo” e advertiu da “situación límite” que están a vivir as familias ao non poder “facer fronte aos pagos” por levar “moitos meses sen cobrar”. E é que ata que creza a cría, unha vez finalizadas as obras de dragado e acometida a sementeira e poidan faenar, deben pasar “entre 18 e 24 meses”.
“Non se pode avanzar se as dúas administracións non coinciden na mesma reunión coa Confraría para tomar esas medidas que hai que tomar”, criticou en alusión a que nos últimos encontros convocado algunha delas ausentouse. Por iso, avanzou que o colectivo se manifestará os mércores ante a Delegación do Goberno e os venres continuarán cortando o tráfico na zona da Pasaxe para demandar a Xunta e Goberno o pago de axudas.
Era visto que, coa acumulación de papel que está a provocar a folga do servizo de recollida do lixo, ía comezar a pasar estas cousas. Esta mañá aparecía un contedor de papel calcinado no Barrio das Flores.
Non se sabe se puido ser un acto vandálico ou mesmo un operario, pero o incendio mesmo afectou ao vehículo que estaba ao carón, acabou cunha parte derretida.
Mantén pois o polémico sindicato STL en vilo a toda unha cidade.
A concesionaria do servizo de recollida de lixo da Coruña, Prezero, abriu unha trintena de expedientes disciplinarios coincidindo cos paros intermitentes convocados. Isto mentres segue o lixo acumulado en colectores e ao seu ao redor. Os motivos foron “o incumprimento das medidas de seguridade, ausencias non xustificadas ou baixo rendemento“, segundo confirmaron fontes próximas ao caso consultadas por Europa Press.
“Foron notificados entre onte e hoxe“, engadiron, e corresponden a infraccións cometidas “desde que empezou a folga”, o pasado 24 de xuño, convocada polo Sindicato de Traballadores da Limpeza (STL), organización maioritaria no comité, con motivo de “despedimentos inxustificados”, “externalización de servizos” e “incumprimentos” do convenio.
Respecto deste asunto, o portavoz do comité de folga de residuos urbanos, Alfonso Seijo, indicou a Europa Press que “tanto o sindicato como o comité de empresa non teñen constancia de que lle chegou ningún expediente disciplinario a ningún traballador”.
Posición do BNG
Se onte era o PP o que pedía a intervención municipal, hoxe o BNG o que propón tomar medidas extraordinarias ao goberno municipal, “ao abeiro do que establece a lei”. Faino cunha emenda de adición a unha moción proposta polo Partido Popular para o seu debate no Pleno deste xoves 4 de xullo.
“Do punto de vista do BNG, non abonda con que a alcaldesa medie entre a concesionaria e os traballadores. O Concello ten que utilizar todas as
ferramentas que ten na súa man” para garantir que a acción do STL -un suposto sindicato investigado por graves delitos- non afecte a saúde das
coruñesas e os coruñeses, remarca Jorquera.
En canto ao feito de que na madrugada deste mércores ardesen varios colectores en diferentes puntos da cidade herculina, Seijo, desvinculou ao colectivo destas actuacións. “Que non nos traten de relacionar con isto, estamos a facer unha folga moi pacífica“, recalcou para apuntar que este tipo de actitudes fan “moito dano á cidadanía” e aos propios traballadores en folga.
Pola súa banda, a alcaldesa da Coruña, Inés Rey, cuestionada polos xornalistas sobre estes temas, indicou que a empresa “o que ten que facer é esixir e controlar que se cumpran os servizos mínimos cando estean en folga e os días que non están en folga prestar o servizo nas condicións que require o prego”.
“Esta pasada noite non se cumpriu o servizo como debe facerse“, sinalou para engadir que o Consistorio tomará “todas as medidas que a legalidade vixente permita para pór fin a esta situación”.
Chegan a todas partes os recortes na sanidade pública. Así o denuncia o Concello de Oleiros, que lamenta que ata setembro, o xa escaso servizo de pediatría que se presta na Casa do Mar de Mera para a zona norte do Concello de Oleiros, vai ser eliminado.
Os nenos e nenas de Dexo, Serantes, Maianca e parte de Dorneda serán derivados a Santa Cruz, onde tamén se recortarán á metade as horas de atención, pasando a atender só polas mañás. O mesmo sucederá en Perillo durante o mes de agosto.
“Esta situación vai provocar unha sobrecarga do traballo dos excelentes profesionais pediátricos que atenden os nenos e as nenas de Oleiros e un colapso nas citas”, entenden dende o Concello, reclama que a Xunta cubra as vacacións dos facultativos e non se recorten servizos.
Lembran ademais que “o déficit de pediatras existente non é novo, xa vén de anos atrás. Xunta e Estado deben adoptar os cambios oportunos para a formación dos pediatras necesarios para o correcto funcionamento do sistema sanitario. A saúde dos nenos e nenas debe ser a prioridade número un da sanidade”.
Entregaba onte a Xunta, por primeira vez, uns premios aos mellores proxectos de investigación realizados polos centros educativos no marco do Bacharelato de Excelencia en Ciencias e Tecnoloxía, STEMBach. Unha iniciativa que ten como finalidade impulsar a formación STEM (ciencias, tecnoloxía, enxeñaría e matemáticas) e as habilidades científico-tecnolóxicas, en especial no tratamento de datos e na incorporación da intelixencia artificial á sociedade, así como fomentar as vocacións neste eido entre os máis novos.
Foron 61 proxectos presentados que demostran a calidade e o talento do alumnado galego. Entre os tres máis destacados atopamos o IES Eusebio da Guarda da Coruña, que levou o primeiro premio co proxecto Novas dianas terapéuticas para o tratamento da artroses; un modelo con algas mariñas, realizado por Natalia Gómez e Ha Nul Kim.
Tamén levaron premio o IES Rosalía de Castro de Santiago e o con Influencia das condicións IES Eduardo Blanco Amor de Ourense.
As premiadas, todas mulleres, irán de viaxe á feira SciFest de Dublín, en Irlanda.
O lixo acumúlase nas rúas da Coruña nunha xornada máis con colectores repletos e residuos depositados no chan no marco de convocatorias de paros intermitentes por parte dos traballadores e sen acordo coa concesionaria, Prezero. E, a pesar de que a situación comeza a ser un problema de insalubridade pública, os folguistas e a empresa continúan sen ceder e o concello, sen intervir.
Esta situación prodúcese desde que empezaron os paros, o día 24 de xuño, convocados polo Sindicato de Traballadores da Limpeza (STL), organización maioritaria no comité, con motivo de “despedimentos inxustificados”, “externalización de servizos” e “incumprimentos” do convenio.
Os paros do servizo repetiranse os días 8, 25, 26 e 27 de xullo e con previsión de que sigan en agosto, en días intermitentes. “Non temos noticias da empresa, seguen sen chamarnos”, informou a Europa Press o portavoz do comité de folga de residuos urbanos, Alfonso Seijo.
Lembrou, ademais, que os traballadores esixiron á parte empresarial “a presenza dun mediador da inspección de traballo no seo do AGA, onde se celebrou unha única reunión”, así como a dun “axente externo pertencente ao goberno municipal, petición á que se fixo caso omiso”. “Se non hai alguén do Concello na mesa de negociación este comité non se vai a sentar a negociar con ninguén”, recalcou.
Doutra banda, a alcaldesa da Coruña, Inés Rey, nos últimos días fixo un chamamento ás partes a un acordo, con demanda de “transparencia nas negociacións”. “O estancamento das conversacións vén derivado de que non se poden pedir cuestións que non vai se é posible cumprir porque probablemente non teñan encaixe legal”, destacou nunha entrevista á Cadena Ser recollida por Europa Press.
Chegou o verán e con el o espectáculo dos grandes cruceiros no porto coruñés. Novamente, o ‘Anthem of the Seas”, un dos buques destas características máis grandes do mundo, volve ser unha atracción no peirao da cidade.
Este é o transatlántico máis grande que xamais arribou na Coruña. Construído nos estaleiros Meyer Werft en Bremerhaven (Alemaña), este buque, de 347 metros de eslora, conta con 16 cubertas, un rexistro bruto de 167.800 toneladas e unha capacidade para 4.180 pasaxeiros distribuídos en 2.090 camarotes de réxime dobre. O dato, sumado ao da tripulación, eleva por encima das 5.000 o número de persoas que poden viaxar no seu interior.
Un dos seus elementos distintivos é a cápsula de vidro desde a que se pode gozar de vistas a 90 metros sobre o nivel do mar.
Hai talento na cidade da Coruña, pero para seguir medrando moitas veces hai que saír. Falamos hoxe con Amanda Pinos, trombonista afincada na Coruña que está procurando apoios para seguir formándose en EEUU. “Agora teño que marchar porque quero formarme na excelencia, pero teño claro que quero volver para aquí, e traer a riqueza doutros sitios, pero continuando aquí o camiño”. “Tiven tanto cariño aquí e a xente arroupume tan ben que é imposible non querer estar aquí”, destaca.
No seu orgulloso galego neofalante (“creo que é importante valorar as raíces”), cóntanos como está a ser a súa carreira musical como trombonista profesional. Natural de Ponferrada, trasladouse á Coruña hai 9 anos, cando, con 17, decidiuse a vir estudar no Conservatorio de Música a especialidade de trombón, e posteriormente unha segunda carreira da especialidade en Pedagoxía da Linguaxe musical. Hai 7 anos tivo unha lesión que lle obrigou a comezar de certo, pero a día de hoxe aspira ao máximo co seu trombón.
A día de hoxe compaxina a súa actividade dando clases en Adagio Cantabile, escola de música de Os Rosais, con numerosos bolos. Ten mesmo dado algun concerto como solista coa Orquestra Sinfónica de Galicia (na foto principal de Carlos, da Opinión) (“un soño para min, pois eu viña de pequena dende Ponferrada só para vela”, recoñece), e con outras orquestras fóra de Galicia. Pero non se pecha ao clásico. Tamén ten tocado co Combo Viramundo de Xoel López; cos galegos MJ Pérez ou Berlai, con Brassica Rapa, banda de mulleres galegas moi variada, ou co jazz e rock progresivo de Amoeba Split.
Amanda Pinos co Combo Viramundo de Xoel Lopez no Castelo Contoa-Foto-Aigiboga
Agora toca voar, e continuar coa súa formación na excelencia en EEUU. “En EEUU, a pedagoxía é moi ben fundamentada, creo que necesito ese nivel, para poder formar un bo camiño, pero aqui, que é o meu lugar e poder continuar apoiando a cultura/arte/ensino da nosa cidade”. Pero facer un master de Trombón en EEUU é un gasto dificilmente asumible. “O problema é que as diferenzas económicas entre EEUU e aquí son tan grandesque non queda máis remedio que ir con moito apoio financieiro. Teño axuda de alí, e teño axudas das escolas máis altas, pero non é suficiente para calquera persoa de aquí. E como polo visto non é doado sacar becas aquí en España, agardo que a base de pequenos apoios poida sacar o apoio necesario”, explica.
Por iso está desenvolvendo unha campaña de crowfundingpara asumir as ducias de milleiros de dólares que lle vai costar a matrícula e a estancia.
Ten superado as esixentes probas de 3 universidades, pero seguramente se decantará pola DePaul University School of Music en Chicago para continuar a súa carreira. Pero para iso necesita a nosa axuda, como a de case 150 persoas que xa incluiron os seus donativos. “A verdade é que estou impresionada e contentísima coa axuda da xente. Estou abrumada, porque se cadra non esperaba tanto apoio, e non sabes como agradecer todo isto, porque a xente é tan xenerosa que é incrible. Éncheme o corazón”.
A precaria situación da OSG
Aproveitamos a conversa para preguntarlle pola precaria situación da Orquesta Sinfónica de Galicia. Antes de nada quere destacar a importancia da mesma: “Cando fun a facer as probas a EEUU, en varios sitios coñecían a Orquestra Sinfónica de Galicia, polo que é un orgullo”. Vén de facer dous concertos como solista coa Sinfónica de Galicia, e lembra que para ela é un soño. “Eu viña a Coruña dende Ponferrada a escoitar esta orquestra porque é unha das mellores de toda España, e cun valor internacional moi grande, e agora tiven a oportunidade de tocar con eles… É incrible”, relata emocionada.
Pero non é ouro todo o reloce. Sobre a precaria situación da OSG considera que “iso hai que cambialo xa. Non é xusto que teñamos unha orquestra tan tan boa, moi recoñecida fóra mesmo fóra do estado, e que estean cunhas condicións tan mínimas, tan baixas. Necesitan, para empezar, un mellor o auditorio, porque se tivese un espazo mellor estaría moito mellor”.
Apunta tamén que tamén habería que mellorar o finanenciamento: “Antes tiñan becas, porque a Orquestra Xove de Galicia fai unha labor incrible, e que hai que poñer en valor e defender o seu traballo de canteira. Dende dentro están facendo unha labor preciosa, apoiando novas compositoras, directoras… con grandes músicos a un nivel superalto. Pero desilusiona que non teña máis apoio. A situación ten que cambiar xa”, sinala con contundencia.
Veremos, se cando volva do outro lado do charco, a situación da OSG está mellor e pode desenvolver a súa, seguro, exitosa carreira, dende o Palacio da Ópera. Polo de pronto podemos ir dándolle unha axudiña a través do gofundme.
O Partido Popular da Coruña levará ao pleno do próximo xoves, día 4, a petición do cesamento do portavoz do Goberno local, José Manuel Lage, por “mentir reiteradamente” na súa comparecencia o pasado 11 de abril “ao negar en varias ocasións realizar obras” nun inmoble da súa propiedade situado na cidade herculina.
Faino fronte ás explicacións dadas na sesión plenaria por Lage quen alegou que en todo se actuou conforme á legalidade.
“Quen se atreve a mentir en público a todos os coruñeses non ten credibilidade para ser o portavoz dun goberno”, recalcou o portavoz do grupo municipal do PP, Miguel Lorenzo, este martes nunha rolda de prensa convocada para informar sobre asuntos de actualidade.
