Un home acusado de violación de 11 vivendas en Oleiros aceptou unha pena de 21 meses de cárcere no xuízo fixado para este venres na sección segunda da Audiencia Provincial da cidade herculina.
Fíxoo tras un acordo entre as partes personadas ao recoñecer os feitos o procesado e acordarse unha rebaixa da pena que o home aceptou. Segundo o escrito de Fiscalía, os feitos desenvolvéronse entre 2020 e 2021 cando o acusado “coa intención de coller calquera obxecto de valor que alí houbese” entrou en varios inmobles.
O home subtraeu principalmente xoias, que nunha ocasión o seu valor superaba os 790 euros e carteiras con documentación e diñeiro en efectivo. Ademais, deberá indemnizar a nove das súas vítimas. A contía total ascende a 5.950 euros.
Avanza a XV Mostra de Cinema Periférico (S8). E xa ten vivido un dos momentos máis destacables desta edición coa presenza de Margaret Honda (San Diego, 1961). A aproximación desta creadora ao cinema procede do interese na súa parte material: o tipo de película, o proceso fotoquímico, a colorimetría. As súas obras non se poden reproducir máis que no seu formato orixinal en celuloide; a maneira en que Honda concibe e aborda a súa obra achéganos máis a unha peza escultórica nun museo que a unha cinta fílmica nun festival.
Así (S8) aceptou o reto que supón proxectar unha peza como Spectrum Reverse Spectrum, feita en película de 70 mm, sen cámara, só con ferramentas de posprodución e cuxa proxección só é posible no seu formato orixinal. Unha experiencia sensorial que puido ser gozada moi poucas veces na historia e que, en España, tivo lugar por primeira vez o xoves 6 de xuño no (S8) grazas ás instalacións e equipamento do museo científico coruñés Domus.
Margaret Honda na Domus by Andrea Rodríguez
O museo da Coruña conta con dous proxectores desas características. A propia Margaret Honda comentaba esta mañá que a Domus estaba equipada cunha das mellores cabinas de proxección que ela coñecera. A película de 70 mm é un tamaño de película de alta resolución. A tecnoloxía IMAX , a mesma dos proxectores da Domus, proporcionaba unha maior calidade de son. A partir dos anos noventa, cando xorden os sistemas de son dixital para impresións de 35 mm, foi desaparecendo xa que tiña un custo económico moi superior.
Tal como conta Elena Duque, a programadora do festival “a primeira película de Margaret Honda (San Diego, 1961), Spectrum Reverse Spectrum, é de hai dez anos (2014) e está feita en 70 mm. Quen podería pensar en usar o formato de cinema máis grande e espectacular para iniciarse neste? Sen ningunha intención de volver o seu ollar á épica, Honda simplemente viu no 70 mm un material co cal levar a cabo unha idea que xurdiu despois dunha longa carreira dedicada principalmente á escultura (que continúa hoxe)”.
Acollía o Palacio de María Pita este xoves 6 de xuño un novo pleno do Concello da Coruña. Un pleno longo, de case 5 horas, con apenas 20 espectadores pola canle de Youtube municipal, que tiña como punto principal o recoñecemento extraxudicial de crédito para pagar as facturas pendentes do IMCE.
Despois dun debate inútil durante máis dunha hora entre os tres voceiros municipais, o pleno aprobou o recoñecemento cos votos a favor de PSOE e BNG, pero cos votos en contra do PP. Tamén se aprobo unha ordenanza municipal para axilizar os procedecementos burocráticos.
Judith Fontela Baró no seu último pleno como Concelleira na Coruña
O pleno arrincaba coa despedida á concellleira do PP Judith Fontela Baró, que renunciou ao seu posto como edil tras ser nomeada Directora Xeral de Mobilidade. A que foi compañeira da rexedora hai 20 anos na Facultade de Dereito, despediuse da corporación, e o PP anunciou que, en principio, será a seguinte na lista, María Jesús Fariña, a que tome o relevo.
O pleno rematou cunha moción popular contra a xestión de persoal que coordina o edil Lage Tuñas.
O pleno, cos votos a favor de PSOE e BNG, e abstención do PP, aprobou a Aprobación inicial da Ordenanza municipal de bases reguladoras xerais para a concesión de subvencións polo Concello da Coruña e polos seus organismos públicos. Unha necesaria renovación dunha Ordenanza que segue vixente den 2005, que segundo debullou Lage Tuñas, “reducir os tempos de tramitación administrativa, dotarnos dunha norma que permita mellorar os procedementos, que terá un impacto positivo na relación co terceiro sector, e no tecido social, deportivo e cultural”. O voceiro socialista asegurou que se eliminan trámites como a presentación de documentos que xa teña a administración pública.
O PP lamentou a falta de consenso co resto de partidos, e a falta de particicipación do tecido social e deportivo na creación da ordenanza, a pesar da existencia dos Consellos Municipais de Cultura e Deporte, ademais doutros espazos de diálogo.
O punto forte, IMCE
Grave é o caso das facturas impagadas do IMCE. 4,2 millóns de euros gastados en eventos culturais sen crédito orzamentario, incumplindo os trazos da legalidade, que compromete a estabilidade financiencia do Concello, como recoñecen os informes.
O voceiro municipal, Lage Tuñas, nunha longa intervención argumentou que sempre houbo que acodir á modificacións de crédito para pagar as festas, e que, recoñecendo que non é o procedemento máis axeitado, agora mesmo cómpre aprobar a modificación para poder pagar aos proveeedores.
Dende o BNG criticaron o procedemento, que calificou da “bola de neve froito da cultura do ti vai facendo”. “A situación do IMCE non é de recibo”, denunciou un Jorquera, que así e todo, votou a favor da modificación de crédito.
O edil popular foi máis crú. “Esqueceron vostedes que todo isto foi en ano electoral? Ti vai facendo, e xa pagará maría santísima”, criticou. “Hai que pagarlles a estas empresas, hai facturas por máis de importe de 400.000 e hai que pagarlles”, recoñeceu, pero ”non imos aprobar a chapuza, este exemplo de contratación irregular, moitas veces a dedo; por que non foi a un concurso?”.
O PP preguntou ademais por que non trouxeron o tema moito antes ao pleno, mesmo ocultándolle parte da información ao seu aliado de goberno, en relación ao BNG.
Lage Tuñas tirou do argumento “E tí máis”, acusando a Lorenzo de ter aprobado no 2012 outra modificación de crédito de 2 millóns…
Novo edificio na Gaiteira
Despois dos momentos máis tensos da sesión, aprobouse por unanimidade o estudio de detalle para a construción dun novo edificio na Ronda de Outeiro, 38, a altrua da Gaiteira. Un edicifio de 3 alturas, para o que non houbo alegacións e con informes favorables.
Parcela da Ronda de Outeiro onde se vai construir un novo edificio
Nostián
Foi aprobada por unanimidade tamén a moción do BNG para instar ao Concello a axilizar o proceso de licitación do servizo de tratamento e xestión de residuos sólidos da Coruña, para “converter Nostián nunha verdadeira planta de reciclaxe, non de almacenaxe de refugallos”. Jorquera lembrou que o servizo leva dende 2019 prestándose en precarios, sen movementos municipais”, e pediu que se consensuase co Consorcio das Mariñas.
A Concelleira de Medio Ambiente, Noemí Díaz, asegurou que votaría a favor, mesmo cunha enmenda do PP, porque “xa estamos niso”. “Temos as bases de licitación preparadas, e contamos co Consorcio. Nas vindeiras semanas poderemos comezar co procedemento”, asegurou.
COF de Monte Alto
Foi a edil do BNG Mercedes Queixas a que levou a, aprobada, moción sobre o precario momento que vive o Centro de Orientación Familiar de Orillamar, pedíndolle ao Concello e á Xunta que repoña as traballadoras en baixa. PP e BNG aceptaron enmendas e transaccións mutuas, se ben a edil popular Carmen No acusou á rexedora de “feminismo naiz e de postín” por “deixar na rúa” a tantas mulleres.
Altri e comercio local
Tensión “europea” se viviu entre PP e BNG arredor da rexeitada a moción do BNG sobre Altri, coa oposición do PP e a abstención do PSOE.
Porén, PP e BNG confluíron para aprobar conxuntamente, coa abstención do PSOE, unha moción para impulsar o comercio local.
Aparcamento en Matogrande
Falouse tamén de Matogrande. Gonzalo Mora levou aos compañeiros de corporaciónfde viaxe a 1994 á zona do Ofimático, pasando polo xa erguido barrio en 2003, ata a actualidade, xa con Xuxán en marcha. O PP pide un plan específico, en coordinación cos veciños, para mellorar a circulación así como as prazas de aparcamento.
O PP incidiu nos problemas de seguridade e pide máis presenza policial, así como a mellora do mantemetno das infraestruturas e equipamentos municipais: asfalto, beirarrúas, sinais, papeleiras, bancos, farolas, etc., carecen de atención.
A Concelleira de Barrios, Nereida Canosa, lembrou que Matogrande ten servizos suficientes, e que o Concello local pensa máis nos peóns e na bici que nos coches. Así e todo, a moción foi aprobada por unanimidade.
Moción pola xestión de persoal
O edil popular Roberto Rodríguez lanzou unha crúa crítica contra a xestión de persoal no Concello da Coruña por parte de Lage Tuñas. “Que máis pode pedir a oposición que un concelleiro que minte. Cando vostede fala, a credibilidade da señora Rey desaparece”, lanzou Rodríguez, que lembrou que o Xulgado abriu dilixencias previas para ver se hai prevaricación na xestión de persoal no Concello da Coruña.
Nos rogos e preguntas o PP tamén lembrou o posible caso de corrupción do edil de urbanismo nas obras dun piso da súa propiedade.
David Soto, por parte do BNG, que votou a favor, lembrou que o PP foi o primeiro que comezou co uso abusivo das comisións de servizo.
E Lage Tuñas defendeuse apuntando que “a comisión de servizo é un elemento reglado”.
David Soto, do BNG, falando das comisións de servizo
Que un instituto se convirta en produtor musical e arme un festival coma este é un fito histórico en todo o país.
Serán 4 das mellores bandas do panorama musical galaico as que formen a cita que arrinca este venres 7 de xuño ás 17:00h da tarde na praza de Náutica, no que, de seguro, será unha cita histórica para a vinculación entre as comunidades educativas da cidade e a música en galego.
As Bandas
Lontreira, a banda da Illa de Arousa, vén coa súa electrónica galaica cargada de mar e diversión.
Tamén subirán ao escenario unha das revolución da música indie pop da nosa cidade. Leria, formada polas herculnas Mayra, Helena, Itzi e Andrea, chega coa súa “chulita” frescura.
Para o remate quedarán dúas das propostas máis internacionais da nosa música, como son Boyanka Kostova, que traerán a súa Foliada do Inferno á Coruña tras arrasar no Composfet; e Grande Amore, que ademais da súa electrónica, Nuno vai traer unha sorpresa.
Incidencia brutal da campaña
A hostalería, moi implicada co Aquí tamén se fala
Incrible a incidencia que está tendo a campaña promovida polos mestres do IES Rafael Dieste Arcadio González e Alberto Pombo, (podedes coñecer mellor a Alberto na fantástica entrevista que Eva Vieites lle ten realizado no blog da Biblioteca do Ágora). Unha campaña que xa implica a 25.000 estudantes de 200 centros educativos de todo o país, pero tamén trascendendo as fronteiras do sistema educativo.
Seguro que xa vistes os carteis do #Aquítaménsefala en algún escaparate, porque son xa 50.000 espazos os que colaboran coa iniciativa.
Unha incidencia técnica nun tren que cubría na mañá deste venres o traxecto entre as cidades de Vigo e A Coruña obrigou a desaloxar aos pasaxeiros na estación de Vilagarcía de Arousa.
O servizo, circulaba cuns 20 minutos de demora, chegou ás 10,30 horas estación vilagarciá pero, a pesar de que os pasaxeiros se subiron ao tren, non retomou a marcha. Segundo trasladaron a Europa Press usuarios afectados, o revisor comunicou aos pasaxeiros que unha avaría impedía continuar e debían abandonar os vagóns para esperar á chegada doutro tren.
Os viaxeiros foron recollidos por un novo servizo da liña entre Vigo e A Coruña, salvo os pasaxeiros con destino Catoira, Pontecesures e Padrón, que serán trasladados en taxi porque o novo tren non realiza esas paradas, segundo comunicou Renfe.
A alcaldesa de Cambre, María Pan, perdeu a cuestión de confianza, vinculada aos orzamentos para este ano, á que se someteu este xoves ao non contar con anterioridade cos apoios necesarios para sacar adiante estas costas. A rexedora obtivo unicamente os votos do seu propio grupo, Unión por Cambre, con sete edís; os dous de Alternativa dos Veciños e o da concelleira non adscrita, dez en total fronte ao once votos en contra, de PSOE (4 edís), PP, o mesmo número, e os tres do BNG.
Desde os grupos da oposición, atribuíuse o voto en contra á “falta de diálogo” para o deseño dunhas contas por parte dun goberno en minoría, algo que a alcaldesa rexeitou. “Se hoxe non sae a cuestión de confianza e logo non hai moción de censura pérdense 30 días”, dixo sobre unhas contas das que incidiu na necesidade da súa aprobación para pagar “servizos esenciais” ante os pagos pendentes no consistorio.
E é que a rexedora incidiu en que a súa decisión de someterse a unha cuestión de confianza (María Pan asumiu o cargo tras a dimisión do anterior alcalde, Óscar García Patiño, de Unión por Cambre) obedeceu, entre outras cuestións, á necesidade de implantar unhas contas cun “criterio de anualidade” e o pago de servizos.
“Hai que devolver a Cambre a senda da normalidade”, insistiu nunha sesión con reproches dos grupos de PP, PSOE e BNG por “falta de diálogo” ao que a alcaldesa respondeu que si incluíron cuestións expostas por figurar nos orzamentos que expuxo o goberno local e avanzou a intención de negociar en agosto coa oposición os de 2025.
“Non hai unha intención real de sentar a dialogar”, sostivo a edil do PP Diana Piñeiro. “É imprescindible a colaboración”, argumentou o concelleiro socialista Diego Alcantarilla, que denunciou “decisións impostas” por parte do goberno local. “Non houbo unha reunión para negociar”, apostilou Daniel Carballada, do BNG, quen non se mostrou partidario dunha moción de censura. Fronte a estas manifestacións, desde Alternativa dos Veciños defendeuse que está a haber cambios e pediuse diálogo “a todas as partes”.
Dúas persoas foron atendidas por inhalación de fume ao arder unha lavadora nunha das vivendas dun edificio de catro alturas situado na Avenida de Oza, na cidade da Coruña.
Segundo informou o CIAE 112, o suceso tivo lugar ás 17,15 horas, cando un particular informou de que saía fume polas xanelas dun terceiro piso dun edificio.
Con estes datos, desde o 112 Galicia pasouse aviso aos Bombeiros da cidade, á Policía Local e aos membros da Agrupación de Voluntarios de Protección Civil da localidade.
Tras chegar ao momento, os axentes indicaron que unha persoa inhalara fume e que podía ser necesaria a intervención dos profesionais sanitarios para a súa valoración, polo que, enseguida, os xestores de emerxencias puxeron a situación en coñecemento do Servizo de Urxencias Sanitarias de Galicia-061.
Así mesmo, os Bombeiros engadiron que algúns veciños estaban a abandonar as súas casas pero que parecía que todos estaban en perfecto estado.
Con todo, tras finalizar a súa intervención, o persoal sanitario confirmou que foi necesario atender no mesmo lugar a dúas persoas, por inhalación de fume, pero que non necesitaron ser evacuadas.
O xuízo pola morte de Samuel Luiz, o mozo de 24 anos que faleceu durante a madrugada do 3 de xullo de 2021 tras recibir unha malleira no paseo marítimo da Coruña, celebrarase entre o 13 de setembro e o 15 de outubro na Audiencia Provincial da Coruña, aínda que o día 12 realizarase a selección do xurado popular.
Así o informa o Tribunal Superior de Xustiza de Galicia (TSXG) tras decretalo a maxistrada presidenta do tribunal nun auto no que especifica que as sesións comezarán ás 9.45 horas e celebraranse, durante ese período, todos os días, de luns a venres, en horario de mañá.
Tal e como establece o artigo 37 da Lei Orgánica do Tribunal do Xurado, a maxistrada emitiu o auto de feitos justiciables, no que, ademais da data do xuízo, detalla os feitos que han de ser axuizados polo nove cidadáns/as que comporán o xurado popular e resolve sobre os medios de proba propostos polas partes.
En concreto, expón 87 cuestións ás que deberán dar resposta, ás que se suman outro sete sobre o grao de execución do delito e a participación do cinco acusados. A maxistrada presidenta tamén detalla que o xurado popular decidirá se os feitos descritos constitúen un delito de asasinato, ademais dun posible delito de roubo con violencia pola presunta subtracción do móbil da vítima que se atribuíu na investigación a un dos acusados.
En canto ás circunstancias agravantes, precisa que se determinará se dúas dos acusados (D.M.M. e C.S.B.) executaron os feitos relatados “por causa da súa animadversión cara á orientación sexual homosexual que lle atribuíron á vítima”.
Como circunstancias eximentes e/ou atenuantes, a maxistrada presidenta sinala que ha de establecerse, a través das probas presentadas na vista, se tres dos procesados, debido á previa inxesta de bebidas alcohólicas ou de drogas, atopábanse en estado de intoxicación, dando lugar “a algunha situación de alteración, diminución ou eliminación da súa capacidade para formar a súa vontade e comprender o alcance dos seus actos”.
PROBAS NON INCLUÍDAS
No auto, a maxistrada decretou que procede admitir as probas propostas polas partes nos seus respectivos escritos de acusación e defensa, fóra dos informes policiais de visionado de imaxes e da chamada infografía forense coa correspondente reportaxe videográfico, tal e como decretou o TSXG.
Ademais, de conformidade co peticionado polos seus defensas, accedeu a que os acusados D.M.M., C.S.B., A.F.G. e K.A.S.C. declaren en último lugar, tras concluír o resto da práctica da proba, e a que o acusado A.M.R. declare ao principio.
TRES SEGUIRÁN EN PRISIÓN
A maxistrada presidenta tamén decidiu manter a medida cautelar de prisión provisional, comunicada e sen fianza, imposta a D.M.M., A.F.G. e a K.A.S.C. Outros dous, entre elas a muller, atópanse en liberdade con obrigación de comparecencias ante o xulgado.
Así mesmo, procedeu a ordenar as citacións das partes, peritos e testemuñas e o libramiento dos exhortos, despachos e mandamentos, así como a organización do traslado dos acusados desde o centro penal onde se atopan ingresados para a súa asistencia ao xuízo.
Ademais, decretou que a letrada da Administración de Xustiza proceda ao sorteo para a designación dos 36 candidatos a xurado, de conformidade coa Lei do Xurado.
Esta mañá de xoves hai pleno en Maria Pita. Un pleno no que quería participar a plataforma cívica Galiza pola República e Polo Dereito a Decidir, colectivo que agrupa a 28 entidades de todo tipo da comarca da Coruña, para ofrecer a súa opinión desde o Escano Cidadán, co gallo do 10º aniversario da coroación do rei Felipe VI, (19 de xuño de 2014).
A Plataforma sinalaba que a súa intención era “falar sobre a figura do exmonarca Juan Carlos e os motivos da súa abdicación, así como da necesidade dun referendo consultivo sobre o modelo político e institucional da forma de Estado. Consideramos que as diversas administracións do actual Estado, tal como son os Concellos, polo seu carácter democrático, deben dar paso ás opinións da cidadanía e as súas entidades representativas en exercicio dos seus dereitos constitucionais”.
Pero a súa solicitude foi denegada polo Departamento de Participación Cidadá ao considerar que “o asunto a expoñer non se considera de interese municipal”.
”Ata cando a Coruña vai ser un sitio distinto para o PSOE?” pregúntanse a Plataforma, formada polas seguintes entidades: A.C. Alexandre Bóveda, A.C. O Facho, C.S. Gomes Gaioso da Coruña, A.C. Irmáns Suárez Picallo de Sada, Cultura Aberta de Carral, Anova, BNG, Corrente Vermella, Marea Atlántica, Podemos, Sada Maioría, Propolis, Unión Republicana, Galiza Nova, Xuventudes Socialistas, Erguer, CIG, Vangarda Obreira, Eira Vella de Betanzos, A.C. Vieiros de Oleiros, Colectivo das Pedras Galladas de Culleredo, A.C. Roxín Roxal de Paderne, A.S.C. Campo de Pena, Proxecto Cárcere da Coruña, CRMH da Coruña, Irmandade Moncho Valcarce, ARMH da Coruña.
O colectivo lembra que, por exemplo o Goberno municipal de Pontevedra (BNG, PSdeG-PSOE) acordaba o 15 de febreiro de 2021 cambiar a avenida Juan Carlos I por Virxinia Pereira (compañeira de Castelao); ou que o pleno de Sada acordaba cos votos de Sada Maioría, BNG e Alternativa dos Veciños, e abstención do PSOE, “instar ao Goberno do Estado a que inicie os procesos necesarios para a celebración dun referendo ou consulta á cidadanía sobre a forma de Estado: monarquía ou república”.
A Garda Civil do Posto Principal de Oleiros detivo un home como presunto autor dun delito de agresión sexual a unha menor durante a celebración das festas do Perillo. A agresión tivo lugar o 16 de maio deste ano, e a vítima foi atendida inicialmente polo persoal do Punto Violeta instalado polo Concello de Oleiros para a atención ás vítimas de violencia machista, quen inmediatamente activaron o protocolo existente para estes casos, avisando ás forzas e corpos de seguridade.
A Garda Civil iniciou unha complexa investigación, dado que a vítima descoñecía a identidade do presunto agresor.
Como resultado do traballo de campo realizado, os axentes implicados, tras unha exhaustiva análise dos datos facilitados pola menor e da información recollida durante a investigación, lograron a identificación total do presunto agresor.
Unha vez coñecida a identidade, a Garda Civil procedeu á súa detención como presunto autor dun delito de agresión sexual.
