Os traballadores da sanidade privada da provincia da Coruña intensificarán as protestas para urxir á patronal que pacte un novo convenio colectivo. Así, haberá novas xornadas de folga nos próximos meses, as primeiras o xoves 14 e o venres 15 de marzo. En abril tamén haberá paros os días 15, 16 e 17, mentres que en maio serán o 13, o 14, o 15 e o 16. Ademais, celebraranse manifestacións e concentracións ante os principais hospitais privados da provincia case semanalmente, incluído este mércores 6 ante o Hospital Quirón da Coruña.
Así o avanzaron nunha rolda de prensa ofrecida este martes en Santiago representantes sindicais na mesa de negociación. Miguel Tizón, da CIG, acusou á patronal de “plantarse” e “romper” o diálogo ao redor dun convenio provincial que caducou xa no ano 2022. Tras meses de negociacións, a parte empresarial quere acudir á mediación dentro do Consello Galego de Relacións Laborais, unha solución que as organizacións de traballadores rexeitan por velo “unha chantaxe”.
LIÑAS VERMELLAS
Isto é así, manifestou Tizón, porque a patronal non inclúe tres aspectos que os sindicatos ven unha liña vermella: que non retire o sistema de trienios, que se modifique a retribución das baixas e que se paguen os domingos. Tamén reclaman unha nova xornada anual “que se adapte á media do Estado no sector” e que se actualicen as táboas salariais, porque as puntuais subidas que se produciron nos últimos anos debéronse a que “o Goberno actualizou” o salario mínimo interprofesional.
“Pode a priori parecer sorprendente que a parte social decida non acudir a un acto de mediación, pero será meramente burocrático porque imos co articulado completo do convenio, non se tocou aínda nin un só punto”, explicou, pola súa banda, a representante de CC.OO., Iria Estévez. E é que os sindicatos dubidan “da boa fe” da patronal nesta negociación porque non houbo pola súa banda, din, “ningún tipo de intención de chegar a un acordo”.
RECLAMAN Á XUNTA QUE “INTERCEDA”
Neste contexto, as organizacións sindicais tamén miran cara á Xunta, tendo en conta que “o 45 por cento do negocio” da sanidade privada depende dos seus concertos co Servizo Galego de Saúde (Sergas). “Eles (a patronal) din que son insuficientes, pero non somos nós quen temos que negociar co Sergas. Iso non ten por que recaer sobre os empregados”, advertiu Tizón (CIG), quen insta o Goberno galego a “interceder neste conflito”.
Estévez (CCOO) lembra que “se lle entregou un escrito” ao Sergas “para que mediase”, á vez que lamenta que a parte empresarial empregue “sempre” o “mantra” de que están a traballar “a perdas”. Así mesmo, os sindicatos advertiron que planean recorrer os servizos mínimos que expón a Xunta para as folgas no sector, porque “son de parte”. “O único que aseguran é que os negocios non perdan”, criticou o representante da CIG.
