Inicio Blog Páxina 43

Un acertante da Bonoloto gana máis de 2 millóns de euros na Coruña

europapress
-
0
Un acertante da Bonoloto gana máis de 2 millóns de euros na Coruña

O dono dun boleto de ‘A Bonoloto’ validado na Coruña percibirá máis de 2 millóns de euros ao ser o único acertante de Primeira Categoría no sorteo celebrado este luns, segundo informou Lotarías e Apostas do Estado.

En concreto, o gañador recibirá un total de 2.042.669,30 euros. O boleto foi validado na Administración de Lotarías número 21 da Coruña, situada en avenida de Hércules, 108-110.

Ao non existir boletos acertantes de Segunda Categoría (cinco acertos máis complementario), o importe destinado á devandita Categoría pasa a incrementar o da inmediata inferior.

A combinación gañadora do sorteo da Bonoloto celebrado este luns, 4 de agosto, estivo formada polos números 4, 22, 23, 31, 32, 47. O número complementario é o 36 e o reintegro, o 0. A recadación ascendeu a 2.483.165,50 euros.

O devir do Noroeste tras convertirse no “mellor festival do estado”

Ubaldo Cerqueiro
-
0
O devir do Noroeste tras convertirse no “mellor festival do estado”

Non caeron en saco roto as declaracións de Gonzalo Castro sobre a “profunda reflexión” sobre o Noroeste. Unhas declaracións que parecían máis dun membro da patronal ou mesmo dun comisionista, que dun concelleiro de Cultura, que fixeron tremer os cimentos do sector cultural da cidade.

Xa o ano pasado a plataforma de profesionais da cultura da Coruña denunciaban a política de “Morriñas e Recordas” do grupo de goberno socialista. Este pasado día 30, o Concelleiro recoñecía que se trata dunha estratexia de “política cultural”, que prima os eventos privados aos organizados dende o sector público.

A realidade é que o proceso de desmantelamento do que chegou a ser chamado o ”o mellor festival do mundo” é constante nos últimos anos, botando por terra aquel formato “expandido” do festival referencia da cidade que permitía levar a música, con bandas de gran calidade, a numerosas prazas.

O edil socialista leva anos demostrando a súa falta de previsión e de organización, e o seu desinterese por este festival ata o punto de que a 3 días do comezo do festival e aínda non se coñecía o cartel.
De feito, aínda a golpe de xoves o equipo de dirección do festival estaban confirmando datas e asinando contratos con algunhas bandas para completar o elenco.

Con todo, a programación presentada o sábado, sen rolda de prensa sequera, mantén as cifras de concertos e escenarios do ano pasado, pero fican lonxe daquelas magníficas edicións do 2018/19 ou que mesmo de 2023, cando se duplicaban as accións e os escenario desta edición número 38.

O Festival Noroeste por fin ten Cartel

Ulos Orzamentos?

O edil argumentou que os cachés das bandas potentes de todo o planeta son inasumibles para un ente público. Xentes do sector recoñecen que a proliferación de festivais privados (en toda Galicia, pero nomeadamente na Coruña, cos Morriña Fest, SoundFest, Noites do Porto, Recorda Fest…) están a provocar unha burbulla no sector. Con todo, moitos aproveitan a falta de previsión e organización do festival para inflar as esixencias económicas.

Detrás está a problemática co IMCE (Instituto Municipal Coruña Espectáculos), envolto en polémicos suplementos de crédito que duplican o seu presuposto anual, pero do que dende 2021 non se publican os seus contratos na plataforma de transparencia a pesar das peticións do BNG e mesmo da Valedora do Pobo.

Deste xeito non podemos saber cantos cartos públicos reciben as empresas privadas que promoven estes festivais. Si se sabe que a Xunta, a través de Turismo, leva adxudicados contratos a El Puerto Producciones, propiedade dun dos Rivera da Estrella Galicia, 1,2 millóns nos dous últimos anos a través de sendos contratos de 300.000 para cada edición do Morriña (participado tamén por Bring The Noise, a promotora do Resu, que á súa vez ten no seu accionado ao fondo Superstruck que ten nos seus invesores á sionista KKR) e do SoundFest en 2024 e 2025 para “a promoción do turismo en Galicia”… Tamén o Recorda Fest recibiu 180.000 de Turismo de Galicia no mesmo formato de patrocinio.

Segundo fontes municipais, o Morriña custa 0 euros ás arcas do Concello, unha vez que o solo público que ocupan estes festivais, e que impide acceder á cidadanía ao liberado porto de Batería durante todo o verán, permítese a través dun acordo da promotora coa Autoridade Portuaria. No limbo quedan os procesos de licitación das barras destes eventos realizados en solo público, que deberían ser tramitados ordinariamente, pero dos que se descoñece o procedemento.

Desmantelamento

O Festival PopRock foi historicamente o festival de refencia da cidade. Esa cita que dende os anos 90 xuntaba case un cento de miles de persoas na contorna do areal de Riazor para ver durante dous días grandes referencias nacionais e internacionais, maridados con artistas emerxentes.

O festi pegou un salto cualitativo co goberno da Marea, cando en 2015 inventaba o famoso formato “expandido” que tanto gusta á veciñanza e á hostalería local, porque vertebra a cidade a través da música, e permite ir paseando e ir vendo diferentes concertos polas prazas. Aquela edición o festival xa incluía 26 concertos en 5 espazos diferentes da cidade, comezando o festival un luns e enchendo a semana de citas culturais para todos os públicos (e petos). Sidonie, Leon Benavente e Los Planetas eran os cabezas de cartel.

O concepto “expandido” foi medrando: en 2016 xa foron 60 concertos en 9 espazos con Editors e Ocean Color Scene como cabezas de cartel en Riazor; en 2017, 90 bandas en 15 escenarios (Kaiser Chiefs, Iván Ferreiro e Jesus adn Mary Chain na praia); 80 en 14 lugares en 2018 (Viva Suecia, The Pretenders e Belle&Sebastian como grandes reclamos) e 75 en 13 en 2019 (destacando a presenza de Paty Smith, Natty Peluso ou Belako).

O primeiro Noroeste do goberno socialista, certo que saíndo da pandemia en 2021, xa rebaixaba o formato a 25 concertos en 4 escenarios. Ese ano non houbo concertos en Riazor, e as bandas destacadas eran nomes como Triangulo de Amor Bizarro, Alice Wonder, Los Zigarros ou Marlango.

O Concello recuperaba folgos en 2022, con 50 concertos en 10 escenarios, volvendo a pisar a area de Riazor. UB40 eran os grandes cabezas de cartel xunto con Tanxugueiras e Baiuca.
Aí mantiveron o nivel en 2023, con ata 60 concertos en 9 escenarios, tendo a Primal Scream, Lory Meyers ou Zara Larsson como grandes reclamos.

Pero xa o ano pasado, en 2024, comezaron a rebaixa, reducindo a 31 concertos en 5 escenarios, pero camuflando a redución ao incluír no plan un programa de contacontos que ampliaban a nómima en 20 artistas máis e outras 5 localizacións. Crystal Fighters, Xoel e Vetusta Morla eran os cabezas de cartel.

Neste 2025 as cifras mantéñense, pero a esencia vai mudando. Volven ser 30 concertos, desta volta en 6 escenarios. Máis alá da calidade dos concertos, é simbólico o cambio do escenario de Santa Margarita, un espazo público cun auditorio case natural inmellorable, polo Portiño, un espazo privado ao que hai que trasladarse en coche.
Moitos lamentan tamén que a xornada do sábado non haia eventos para ir quecendo a gran noite de praza en praza.

Máis novas

O goberno socialista recoñece a prevalencia dos festivais privados sobre o Noroeste: “Quen queira ver grupos de nivel, que pase por taquilla”

Primeiras queixas pola tardanza na publicación do programa das Festas de María Pita e do Noroeste

Os muradáns The Rapants puxeron a bailar a todo Riazor

As Fillas de Cassandra revolucionan o Noroeste

Caión convértese no “porto das esencias do idioma” na área metropolitana da Coruña

editor
-
0
Caión convértese no “porto das esencias do idioma” na área metropolitana da Coruña
  • Segundo un estudo realizado polo catedrático Elisardo López Varela, en Caión rexístrase a maior porcentaxe de uso do galego escrito nas inscricións funerarias dos lugares máis próximos á cidade da Coruña.
  • A tendencia do uso do galego nos camposantos segue a ser emerxente, segundo confirma o Modelo Burela na iniciativa educativa “Palabra e Memoria”

— — —

Desde que en outubro de 2024 o xornalista David Canto Veiga fixese público o proxecto da “cartografía do uso das linguas” nos cemiterios galegos, ao longo e ancho dos 313 concellos comezou a actuar unha auténtica “selección galega de visualización dos camposantos”. O seu obxectivo: visualizar os epitafios, facer recollida dos máis chamativos e plasmar a información nun breve informe para poder realizar máis tarde un estudo pormenorizado.

A lingua galega revive nos cemiterios

Despois da recollida de datos de máis de 80.000 familias, repartidas por 245 termos municipais, a iniciativa educativa “Palabra e Memoria” observa que a porcentaxe de inscricións funerarias en que aparecen as palabras “muller”, “home”, “fillos” ou “netos” teñen tendencia emerxente. O cambio, recente, débese ao relevo xeneracional e á mellora na atención das empresas funerarias. Persoas alfabetizadas en galego nos primeiros anos da etapa democrática pasan agora a ocuparse do coidado do lugar en que respousan definitivamente os seus parentes (co cambio de xeración das persoas, cambia tamén a valoración e o uso do idioma) e pasan tamén a ter cargos de responsabilidade nas empresas do sector, o que facilita a superación de vellos obstáculos.

Nas comarcas da Coruña e das Mariñas, foi un albanel -Enrique García-, que exerceu como enterrador en varias parroquias comprendidas entre Pontedeume e Betanzos, quen comezou o traballo de campo. Despois de participar con Xoán Manuel Vidal Casal no estudo do patrimonio documental de Bemántes (Miño), observou máis de 12.000 inscricións colocadas por 3.000 familias nas parroquias de 6 concellos. Os resultados do uso da lingua galega estaban entre o 1 e o 5%. Con todo, eran superiores aos rexistrados polo filólogo Diego Cabarcos, da UDC, nas parroquias de San Pedro de Visma e San Cristovo das Viñas (0’7%), pola profesora Xema Sanxurxo en Oza ou pola escritora Emma Pedreira en Sada.

Despois das visualizacións realizadas por diversas persoas en parroquias de Abegondo, Culleredo e Oleiros, a sorpresa saltou en Caión.

Caión

O grande equipo de visualización no que participan de maneira altruísta máis de cen persoas repartidas polas catro provincias contou coa colaboración dio catedrático Elisardo López Varela, que recolleu información en Sorrizo (Arteixo), onde revisou un total de 154 propiedades e localizou unicamente tres familias que desen o paso a redactar en idioma galego as mensaxes de recordo. A porcentaxe, un pouco inferior ao 2%.

En Caión, no concello da Laracha, o panorama é diferente. O ex-director do Instituto Eusebio da Guarda revisou en pormenor as 429 lápidas dos 110 panteóns familiares e rexistrou 30 mensaxes escritas ao estilo da que recorda a escritora Rosalía de Castro desde 1891. Nalgúns panteóns están todas e noutros combínanse os dous idiomas, sendo o galego o que está nas máis recentes. Atendendo ao criterio temporal, a máis antiga é de 1992, a maior parte son posteriores a 2020 e o ano máis repetido é 2024.

Este 18% dos epitafios en galego están na liña do 19% recopilado por Ester Castro García en Cabaleiros (Tordoia) e lixeiramente por encima dos estudados por Xosé Caamaño Andrade en Santa Comba, A Baña, Negreira, Mazaricos e Val do Dubra.

Cartografía dos cemiterios galegos

Toda esta información recollida polo equipo coordinado por David López está publicada na “Cartografía do uso do galego nos camposantos”, que contén información sobre máis de 80.000 familias repartidas por 245 concellos. O proceso continúa aberto á colaboración cidadá.

Lucía Aldao abriu a Feira do Libro cun pregón lúcido e combativo

editor
-
0
Lucía Aldao abriu a Feira do Libro cun pregón lúcido e combativo

A Feira do Libro da Coruña xa está en marcha. Este mediodía tivo lugar o acto inaugural, que contou coa participación da Federación de Librarías de Galicia —organizadora do evento—, xunto co Concello da Coruña, a Deputación da Coruña e a Xunta de Galicia como entidades colaboradoras. Pero a protagonista absoluta foi sen dúbida a poeta coruñesa Lucía Aldao, quen asinou un pregón lúcido, combativo e cheo de lirismo, celebrando os libros como espazos de liberdade, encontro e resistencia.

Pregon da Feira do Libro da Coruna 025

A feira desenvolverase entre o 1 e o 10 de agosto, en horario de mañá de 11 a 14 h e de tarde de 17:30 a 21:30 h. Trátase do primeiro gran evento das Festas de María Pita, e contará con 38 librarías e editoriais participantes, máis de cen actividades programadas e máis dun centenar de autoras e autores convidados, conformando unha oferta literaria e cultural diversa para todas as idades.

A programación da feira é ampla e diversa, con propostas para todos os públicos e cada día da semana. Entre os eventos máis salientables están, este venres 1, a presentación de Rober Cagiao ás 19:00 h e o recital poético de Yolanda Castaño ás 20:15 h.

O sábado 2, será a quenda de Antía Yáñez e Arantza Portabales ás 19:00 h, seguidas de Pedro Feijoo ás 20:15 h. O domingo 3, ás 18:45 h, celebrarase a presentación da obra Luzeiras.

O luns 4 comezará con teatro familiar de Pedras de Cartón ás 17:15 h e continuará cun obradoiro de banda deseñada ás 18:45 h. O martes 5 inclúe o obradoiro “Aprende a ler sen luz”, de achegamento ao braille, ás 18:00 h, e un roteiro literario con Rodrigo Costoya ás 19:00 h.

O mércores 6 destaca polo teatro familiar con Pablísimo ás 17:30 h, e pola presentación da novela As obras póstumas de Diego Giráldez ás 20:00 h, acompañado pola escritora Blanca Riestra e o director de Xerais Fran Alonso. O xoves 7 haberá dobre cita na Carpa 2: Guada Guerra presentará Las cosas que nos pasan ás 19:00 h, e ás 20:15 h será a quenda de Manuel Rivas con Tras do ceo, acompañado pola académica Olivia Rodríguez e polo editor Fran Alonso.

O venres 8 celebrarase ás 18:00 h o obradoiro familiar de marcapáxinas plantables, dirixido por Raquel de Árbore Azul, e ás 20:00 h, Laura Agustí e María Hesse conversarán sobre as súas obras. O sábado 9, ás 17:30 h, haberá contacontos con Silvia Penide, seguido ás 18:30 h polo obradoiro de iniciación ao cómic “Unha viaxe con Rosalía”, con Paula Mayor, e ás 20:00 h, a presentación da novela Amnesia de Francisco Lorenzo, que dará paso a un quiz literario con sorteo dunha copia da obra entre os participantes. Finalmente, o domingo 10 ás 10:00 h, Cristina Pato presentará Fora de foco.

A feira pechará as súas portas cun evento moi especial: o micro aberto “A porta vacía”, moderado por Branca Trigo, ás 20 horas do domingo.

MÁIS NOVAS

Chega o programa das Festas de María Pita

Baiuca invocou as bruxas de María Pita

Ubaldo Cerqueiro
-
0
Baiuca invocou as bruxas de María Pita

Unha hora antes, Rosa Cedrón saudaba dende o balón do pazo para dar o pregón. A filla adoptiva da cidade herculina apuntou que “A Coruña non é só un lugar no mapa, é unha patria íntima, un símbolo, un faro que endexamais se apagará”.

apg_20250801_ALCALDESA_PREGON_ROSA_CEDRON_FESTAS_MARIA_PITA_005
Rosa Cedrón foi a pregoeira

Tomaron o relevo os alalás das Andrea e Alejandra Montero (as cantareiras de Miño) como as percusións tradicionais de Xosé Lois Romero, que maridan á perfección cos sons electrónicos que pincha Alejandro Guillán. A praza fitou en trance, pero tamén fartou de bailar (as pesar dos corredores de valados que impedían o tránsito entre a zona do público para atopar amizades) e de corear os Verdegaios, as Bruxas ou o Barullo que crea esta máxica combinación.

O concerto contou coa participación de dúas das novas divas da música galaica, como son a baiesa Antía Ameixeiras co seu violín, e a zaseira Antía Muíño coa súa voz e a súa garra cada vez máis potente.

Así, a golpe de puro “tradi”, arrincaron as Festas de María Pita.

Concerto de Baiuca en Maria Pita

Máis info

Chega o programa das Festas de María Pita

 

Salvamento Marítimo rescata dous tripulantes feridos dun buque fronte ás costas da Coruña

europapress
-
0
Salvamento Marítimo rescata dous tripulantes feridos dun buque fronte ás costas da Coruña

O helicóptero Helimer 402 de Salvamento Marítimo evacuou este domingo a dous tripulantes feridos dun buque que navegaba fronte ás costas da Coruña e que se dirixía a Cádiz.

Segundo relatou Salvamento Marítimo a Europa Press, ao redor das 07.10 horas recibiuse o aviso de que dúas persoas que ían a bordo do buque ‘Huashan’ necesitaban ser evacuados por motivos médicos. Deste xeito, mobilizouse ao Helimer 402, que os levou ata a base, onde os esperaba unha ambulancia do 061 que os trasladou ata un centro médico.

Convocan unha concentración para esixir a recuperación da Casa Cornide para a cidade da Coruña

Ubaldo Cerqueiro
-
0
Convocan unha concentración para esixir a recuperación da Casa Cornide para a cidade da Coruña

Dabamos conta o pasado mércores de que a familia do ditador Franco abriría a Casa Cornide para visitas a partir do 4 de agosto. Unha apertura que chega 7 meses despois de que o Consello da Xunta aprobase a declaración como BIC o 27 de abril de 2023, o que teoricamente xa os obrigaba a ofrecer visitas dende a súa publicación no DOG (24-5-2021).

Nós xa probamos o primeiro día e comprobamos o complicado que era conseguir unha cita, pois as de agosto practicamente estaba copadas e a partir de setembro xa non aceptaban reservas. O caso é que lei obriga a abrir ao público os BIC “catro días ao mes, como mínimo, durante catro horas ao día”, e os Franco acóllense a ese mínimo e sinalan como día de visitas os luns, con cinco persoas cada hora. “Consideramos que para facilitar as visitas deberían incluirse tamén, como mínimo, os sábados e domingos, con grupos de 15 persoas en cada visita dunha hora”, piden dende a plataforma Defensa do Común, a pesar de considerar esa apertura como unha boa noticia.

Con todo, a entidade veciñal non vai parar con esta apertura, senón que vai continuar ata “botar aos Franco da cidade”. Así, convocan unha nova concentración para este luns 4 de agosto de 2025, ás 11:30h, lembrando que “os Franco foron declarados persoas non gratas por acordo do Pleno municipal da Coruña de 11 de setembro de 2017”.

Nesa concentración reivindicarán que o concello da Coruña acelere o proceso de denuncia no xulgado para recuperar a propiedade. “Exiximos que os Franco devolvan todo o roubado (xa conseguimos a recuperación para o patrimonio público do Pazo de Meirás por sentencia xudicial, así como as estatuas de Ezequiel e Xeremias do Portico da Gloria)”, sinala a plataforma nun comunicado, ao tempo que piden eliminar nomes do rueiro como Pedro Barrié de la Maza, Alfonso Molina Brandao e Sergio Peñamaría de Llano, que “aínda conservan en A Coruña rúas, retratos en edificios públicos, placas e todo tipo de distincións que non pode admitir unha sociedade democrática”.

Os Franco habilitan as visitas á Casa Cornide na Coruña tras ser multados por incumprir con esta obrigación

A Coruña sae a rúa para esixirlle aos Franco a devolución ao patrimonio galego da Casa Cornide

 

O Festival Noroeste por fin ten Cartel

Ubaldo Cerqueiro
-
0
O Festival Noroeste por fin ten Cartel

A 4 días do comezo, e a través dun comunicado, o Concello da Coruña vén de presentar da 38 edición do Festival
Noroeste Estrella Galicia. A pesar da reflexión á que invitaba o edil de cultura Gonzalo Castro, o festival que se celebrará do mércores 6 ao domingo 10 de agosto, conta con máis dunha trintena de concertos en 6 escenarios diferentes, repartidos por toda a cidade.

Con todo, o tecido social e cultural da cidade segue lamentando a falta de interese, previsión é organización do festival referencia da cidade, tardando ata o extremo para publicar o cartel, acabando aínda onde de pechar moitas das contratacións.

Horarios Noroeste

Como principal novidade, nesta edición haberá concertos en María Pita, que substiúe ao Parque de Santa Margarita.

Nace tamén unha nova localización no Portiño, con Mercado da Colleita, impulsado por Hijos de Rivera, e actividades para toda a familia.

O cartel está inspirado nas vidreiras das galerías da Mariña, que forman unha das vistas máis bonitas de toda Galicia.

Ademais dunha nutrida elección de bandas galegas (ata 19 bandas do país) ben acaídas neste festival como Grande Amore, Leria ou Mondra, e outras que diversifican estilos como Luar na Lubre e Guadi Galego, chegan tamén bandas de todo o planeta (Reino Unido, Países Baixos, Mali, Marrocos ou Senegal).

Escenarios

A praia de Riazor, a praza de María Pita, o Castillo de San Antón, Campo da Leña, praza de Azcárraga e O Portiño serán os escenarios desta trixésimo oitava edición do Festival Noroeste Estrella Galicia. Neste último haberá actividades para toda a familia, con Mercado da Colleita, que volve formar parte da programación desde o venres ata o domingo. Rapariga DJ, Raphael da Ghetto, Eme DJ, Yo Soy Ratón e DJ Peligro ofrecerán espectáculos neses días.

Galicia brillará como nunca en Riazor o venres 8 de agosto. Carlos Ares, artista, produtor e compositor cunha das voces máis persoais e inquietas da escena alternativa, dará paso aos Locais Luar na Lubre, a banda coruñesa de música galega máis internacional, e Grande Amore: “o grupo máis ruidoso da súa xeración”, recentemente recoñecido co Premio MIN 2024 ao mellor álbum en galego.

Na praia recalará o sábado 9 una das bandas de rock moderno máis formidables de Inglaterra: The Vaccines, que xunto a Siloé e a multipremiada artista galega Guadi Galego, unha das artistas máis relevantes da escena actual, poñerán o peche ao escenario máis emblemático do festival.

Unha das voces máis impresionantes da actualidade Queralt Lahoz, ou o sempre irreverente Albert Pla, entre outros, inaugurarán María Pita como espazo escénico do Noroeste Estrella Galicia.

O Campo da Leña subirá o volume con bandas como Los DelTonos, O’funk’illo, Hermana Furia, Doctor Snob e Battosai, entre outras.

No Castelo de San Antón, pola súa banda, actuarán Vieux Farka Touré, Ballaké Sissoko & Piers Faccini e McEnroe. As invitacións para estos concertos estarán dispoñibles no despacho de billetes da praza de Ourense a partir do martes 5 de agosto, no seu horario habitual. Poderanse retirar un máximo de dúas invitacións por persoas. Dez minutos antes de comezar o concerto, a entrada ao castelo será libre ata completar capacidade.

Azcárraga, que sempre regala á cidade algunhas das sorpresas máis gratas do festival, acollerá sobre as súas táboas a P.P. Arnold (USA), que nas súas 5 décadas de traxectoria Rlacionouse con Tina Turner, The Rolling Stones ou Rod Stewart, ás tamén americanas Annie and the Caldwells co seu potente soul disco do Mississippi ou a JP Bimeni and the Black Belts (África), un mestre do funk-soul moderno de inspirador estilo soul africano.

Falece unha muller nun incendio no seu domicilio na Coruña

europapress
-
0
Falece unha muller nun incendio no seu domicilio na Coruña

Unha muller faleceu este sábado nun incendio declarado no seu domicilio da rúa Vila de Carral da Coruña e que calcinou por completo unha das habitacións. Segundo relatou o 112 Galicia a Europa Press, o suceso tivo lugar ao redor das 16.50 horas, momento no que recibiron varios avisos alertando de que saía fume da terceira planta dun edificio de cinco plantas da mencionada rúa.

Ata alí desprazouse a Policía Nacional, a Policía Local, os bombeiros e, unha vez no lugar, avisouse a Urxencias Sanitarias porque había unha persoa falecida. Aínda que unha habitación ardeu por completo, a estancia anexa na que se atopaba a falecida non se viu afectada.

Viñetas desde o Atlántico celebra a súa edición máis ambiciosa cunha homenaxe a Castelao e máis de 70 autores

David Sobrino Platas
-
0
Viñetas desde o Atlántico celebra a súa edición máis ambiciosa cunha homenaxe a Castelao e máis de 70 autores

A cidade da Coruña acollerá do 11 ao 17 de agosto a edición máis ampla ata a data do festival Viñetas desde o Atlántico, que en 2025 celebra unha edición centrada na relación entre cómic e música, cunha programación renovada que inclúe 20 exposicións, máis de 70 autores participantes, concertos ilustrados, talleres e accións gastronómicas. A figura de Castelao terá un lugar destacado como homenaxeado polo 75 aniversario do seu pasamento.

A presentación oficial do festival tivo lugar este venres no Palacio de María Pita. A alcaldesa da Coruña, Inés Rey, destacou a cooperación institucional que fai posible o evento: “Cando todas as administracións e empresas traballamos xuntas, a cultura chega máis lonxe”. Pola súa parte, o director do festival, Manel Cráneo, cualificou esta edición como “moi especial” e puxo en valor “a diversidade de propostas e o reforzo das actividades complementarias”.

O representante da Xunta, Anxo Lorenzo, subliñou o potencial do cómic na industria cultural galega, mentres que o deputado provincial José Ramón Rioboo afirmou que Viñetas “é un dos piares culturais da provincia”.

UN PROGRAMA QUE MEDRA: MÁIS AUTORES E MÁIS EXPOSICIÓNS

A edición de 2025 aumenta considerablemente a súa oferta respecto ao ano anterior. Participarán 73 creadores, fronte aos 40 de 2024, e haberá 20 exposicións en distintos espazos culturais da cidade. Entre os nomes destacados figuran Dave Cooper, recoñecido ilustrador canadense; Magius, Premio Nacional de Cómic; Fermín Solís, Carlos Azagra, Encarna Revuelta, Miguel B. Núñez, Clara e Olivia Cábez, Don Rogelio J, Marika Vila, Sandra Lordi, Raquel Gu e Paco Coyote, entre moitos outros.

As exposicións estarán repartidas por toda a cidade, con mostras como Quino na música e Viñetas y Decibeis no Quiosco Alfonso, obras premiadas nos Premios Castelao en María Pita, ou a instalación Astro-Ratón y Bombillita na Sala Palexco. Tamén se exporán traballos na Casa Museo Picasso, grazas á colaboración con diferentes institucións culturais.

A homenaxe a Alfonso Daniel Rodríguez Castelao será un dos eixes centrais da programación, con actividades específicas arredor da súa figura e legado, nunha mostra que conxuga a recuperación da memoria con novos formatos expositivos.

VIÑETAS MINI, VILETAS ÑAM E VIÑETAS PRO: CULTURA PARA TODOS OS PÚBLICOS

Un dos puntos fortes do festival será a programación paralela que reforza a dimensión educativa, profesional e lúdica do evento. A sección Viñetas Mini ofrecerá talleres diarios con autores convidados, actividades nas bibliotecas municipais e espectáculos infantís. Pola súa parte, a sección Viñetas Pro permitirá que novos talentos do cómic galego presenten os seus portafolios a editoras e participen en revisións, charlas e mesas profesionais.

Ademais, a Rúa BD, situada nos Xardíns de Méndez Núñez, contará coa presenza de 35 editoriais e librarías especializadas, ademais de máis de 100 actividades abertas ao público como sinaturas, presentacións, masterclasses e visitas guiadas.

No eido musical, destaca o concerto gráfico de Hombre Tigre, así como actuacións de autoras como Anabel Colazo e Raquel Montero, sen esquecer a proxección do documental Quinografía e o Latexa Night Show, un formato de entrevistas conducido por Neves Rodríguez.

Tamén regresará Viñetas Ñam, o apartado gastronómico do festival, no que numerosos restaurantes da cidade ofrecerán pratos inspirados no universo do cómic, reforzando a implicación da hostalaría local co evento e ampliando o impacto do festival na economía urbana.

UN FESTIVAL QUE CRECE CON CADA EDICIÓN

Con esta proposta renovada e transversal, o Viñetas desde o Atlántico reafirma a súa identidade como escaparate da banda deseñada a nivel peninsular, apostando por novas sinerxías creativas, como a música e a gastronomía, e abrindo espazos de encontro para públicos diversos. A cidade da Coruña consolida así a súa posición como referente cultural do verán, con eventos que combinan tradición, vangarda e participación cidadá.

1...424344...626Page 43 of 626

Xornal da Coruña é o primeiro gran xornal dixital exclusivamente en galego da Coruña e a súa área metropolitana

Contacta: redaccion@xornaldacoruña.gal

SÍGUENOS

© Xornal da Coruña - Xurimaru Servizos de Comunicación 2010 S.L.

QUE É XdC? | AVISO LEGAL | PUBLICIDADE | COOKIES