A dous días do remate do peche do prazo de alegacións ao plan inicial Coruña Marítima, e tras coñecer posición de Sumar Galicia, do BNG, ou de varios colectivos que denunciaban o “anacronismo” do documento das bases estratéxicas, onte foi unha representación de 40 entidades da comarca da Coruña, as que explicaron as súas alegacións conxuntas ás Bases Estratéxicas A Coruña Marítima.
Unhas alegacións conxuntas que directamente solicitan “arquivar e deixar sen efecto o documento de Bases Estratéxicas-Coruña Marítima ou, subsidiariamente, axustalo ao indicado nas alegacións formuladas”.
En rolda de prensa explicaron que pretenden “recuperar a memoria do que foi a mobilización cívica en defensa do Porto da Coruña, informar á cidadanía e continuar coas actividades nos próximos meses”.
Consideran que “o documento aprobado pola Comisión Coruña Marítima o 24/01/2025 racha cos eixos fundamentais e liñas básicas consensuadas durante anos sobre o futuro do porto interior da Coruña, supoñendo de facto, o regreso ao escenario definido nos Convenios de 2004″.
“Queda claro o regreso ao escenario do 2004, que se asume, tanto respecto da vixencia e vinculación como respecto dos seus eixos básicos. Dentro dos condicionantes e requirimentos está o de “Analizar y atender los compromisos y acuerdos de los Convenios suscritos en vigor para la financiación de la construcción del Puerto Exterior, junto con la financiación de la deuda de la Autoridad Portuaria, mediante la obtención de los aprovechamientos urbanísticos necesarios” (páx. 26), sendo a cobertura da débeda da Autoridade Portuaria A Coruña (APAC) reiteradamente mencionada como un dos principios e criterios básicos que deben sobredeterminar a futura ordenación. En definitiva, os aproveitamentos urbanísticos e a enaxenación de solo público portuario para financiar o pago da débeda”.
En relación coa titularidade e xestión públicas, a alegación das 40 entidades sinala que “unicamente se garante a relativa aos peiraos de Batería e Calvo Sotelo (mediante a fórmula concesional) e aquela parte que siga na actividade portuaria, pero non así respecto dos outros peiraos, en especial respecto de San Diego, para o cal a previsión é, previa desafectación, os usos lucrativos (residencial, hoteleiro, terciario), constituíndo para súa transformación (e correlativos retornos económicos) unha ou varias “sociedades” específicas (sen adxetivar públicas)”.
Respecto aos usos, a alegación conxunta sinala que o documento que presenta Coruña Marítima, “parte do obxectivo e resultado final dunha actividade portuaria subsidiaria e residual, degradada e limitada en superficie de ocupación. No documento (páx. 10) son os usos portuarios os que deben ser compatibles cos usos cidadáns (e non ao revés, que é o que determina a lei de portos para o ámbito portuario). Resultado do cal é a desafectación dunha ampla superficie de solo portuario e a proposta de traslado da actividade pesqueira ao peirao petroleiro (o que na práctica suporía a redución de arredor dun 30% respecto da actual) e limitando a actividade e tráfico comercial portuaria unicamente ao peirao do Centenario”.
Rematan ofrecendo unhs criterios e eixos que consideran básicos para este documento:
- “Esixencia ao Goberno do Estado da condonación do préstamo de Portos do Estado coa Autoridade Portuaria, así como a dotación plurianual significativa de financiamento ás actuacións urbanizadoras de interacción porto-cidade no porto interior, debendo en ambos casos ser incluídas na programación plurianual dos Orzamentos xerais do Estado para o 2025. Todo isto sen prexuízo da procedencia de renegociación das condicións (amortización e intereses) de dito préstamo”.
- “Creación dunha plataforma ou foro de participación estable sobre o litoral, aberto a entidades representativas, aos efectos de colaboración participada na elaboración de propostas. Someter a consulta popular (art. 71 Lei 7/1985) a proposta definitiva sobre a ordenación e xestión do ámbito”.
As 40 entidades
Defensa do Común, Asociación Veciñal de Atochas-Monte Alto, Campo da Pena de Palavea, AV Eirís, AV. Agra do Orzán, AV Iar do Castrillón, AV de Feans, AV de Labañou, AC Alexandre Bóveda, AC O Facho, AC Gomes Gaioso, AC Vieiros de Oleiros, AC Roxím Roxal de Paderne, AC Eira Vella de Betanzos, Cultura Aberta de Carral, Comité de Defensa das Rías Altas, Confraría de Pescadores, CIG, CCOO, CGT, Vangarda Obreira, Galiza Nova, XCG, Erguer, Forum Propolis, Irmandade Moncho Valcarce, Plataforma en Defensa da Ría de Sada e Betanzos, ADEGA, Ergosfera, Hábitat Social, ASPG, Alternativa dos Veciños, Unión Republicana, Marea Atlántica, Sada Maioría, Podemos, Anova, Verdes Equo, Movemento Sumar, BNG.
Máis novas
“Co Master Plan Coruña Marítima enfróntamos a unhas propostas anacrónicas”
Sumar Galicia reivindica “a orientación social e non especulativa” do plan Coruña Marítima
O BNG esixe a condonación da débeda e o mantemento da titularidade pública dos peiraos no Plan Coruña Marítima
Baixa, pero insistente, participación veciñal no primeiro taller temático sobre Coruña Marítima
