O goberno local da Coruña non descarta sancionar á empresa adxudicataria do mercadillo de Nadal por “incumprimentos”, segundo sinalou a rexedora, Inés Rey, ante as queixas de comerciantes e da empresa encargada da electricidade sobre a actuación de NC7 Events. As denuncias por problemas coas casetas provocaron que máis dunha decena de postos optasen por non continuar coa súa actividade, reducindo notablemente o número de stands abertos ao público na praza de María Pita.
“Entendo a decepción dalgúns comerciantes”, sinalou a alcaldesa, quen, malia destacar a “afluencia moi positiva” de visitantes desde a primeira semana, admitiu a existencia de “incumprimentos moi graves” por parte da empresa adxudicataria. Rey incidiu en que o goberno local xa requiriu formalmente o cumprimento dos pregos de condicións e asegurou que utilizarán todos os instrumentos legais para que se cumpra o pactado nas bases da licitación.
A alcaldesa concretou que entre as medidas que se están a estudar figuran sancións económicas e a posibilidade de iniciar un procedemento que inclúa a prohibición de concorrer a licitacións públicas durante un período de tres anos. “Estamos a estudar todas as posibilidades”, reiterou Inés Rey, sen descartar tampouco a reclamación de indemnizacións polos prexuízos causados á imaxe do evento e aos profesionais instalados no mercado.
