O presidente da Asociación de Empresarios de Hostalaría da Coruña, Héctor Cañete, sumouse ao rexeitamento expresado xa desde o sector da hospedaxe á taxa turística na Coruña. A preguntas dos xornalistas, nun acto para reducir o desperdicio alimentario, asegurou que a posición de hostaleiros, hoteleiros e representantes do sector de cruceiros é “clara”.
“Non hai presión turística suficiente nin na Coruña nin en Galicia“, considerou en liña co trasladado polo sector da hospedaxe. “É unha taxa só recadatoria“, sentenciou para considerar, fronte á decisión adoptada polo Tribunal Superior de Xustiza de Galicia (TSXG) en relación á solicitude pola taxa en Santiago de Compostela, que debería “suspenderse preventivamente” a súa implantación.
A sección 2 do Tribunal Superior de Xustiza de Galicia emitiu unha sentenza na que recoñece que o Concello de Oleiros si está lexitimado para impugnar a autorización outorgada pola Xunta á planta de tratamento de aceites e hidrocarburos que a empresa LIMPOIL quere instalar no Porto de Oza. Agora a Consellería de Medio Ambiente terá que resolver o rescurso interposto polo Concello, que inicialmente fora inadmitido.
O Concello demandaba que se anulase a autorización ambiental integrada outorgada a LIMPOIL, por ser contraria a dereito, alegando que a localización inadecuada (en plena ría, próxima a praias e zonas de interese ambiental e pesqueiro); existen deficiencias na avaliación ambiental (simplificada e sen informes suficientes); carece de protocolos de seguridade, medidas preventivas e xestión de augas residuais; e falta de rigor na análise dos efectos socioeconómicos e ambientais. Con esta setanza xudicial ordénase á administración autonómica a que se pronuncie expresamente sobre o fondo destas alegacións.
Esta mesma empresa xa fora denunciada no 2002 ante os tribunais polo Concello de Oleiros porque os vertidos que recollía nas augas do porto (restos de aceite, combustibles, etc…) eran derramados posteriormente nunha nave situada en Icaria, a través da rede de sumidoiros municipal.
Para o Concello “as características desta planta son totalmente incompatibles coa actividade pesqueira que hai no porto de Oza. Xa no seu día, o informe da Consellería de Medio Ambiente recollía o impacto desta planta nunha contorna especialmente sensible”. “Este peirao non é un polígono industrial e atópase a carón das praias de Oza e Santa Cristina e nas proximidades da ría do Burgo”, relatan fontes municipais. “Despois de décadas de loita por unha ría saneada, xeradora de riqueza a través de actividades de lecer, da pesca e do marisqueo, a cidadanía da comarca non debe sufrir a presenza dunha planta ilegal contaminante”.
A Coruña celebra a Semana da Arquitectura cun programa dedicado aos espazos públicos da cidade, no marco dunha iniciativa que organiza xunto á Escola Técnica Superior de Arquitectura e o Colexio de Arquitectos.
No marco da mesma, haberá rutas, visitas, conferencias e mesas redondas ao redor de prazas, parques e proxectos urbanos emblemáticos.
O concelleiro de Urbanismo, Rehabilitación, Vivenda e Edificación, Francisco Díaz, xunto a representantes da universidade e da entidade colexial, presentou, no Palacio Municipal de María Pita, a programación desta nova edición, que se celebrará do 6 ao 12 de outubro baixo a lema ‘A cidade do público’.
Díaz destacou que esta edición pon o foco nos espazos comúns da cidade, desde a praza de María Pita ata proxectos recentes de recuperación urbana. Tamén resaltou que a arquitectura “non só mídese polos edificios singulares, senón tamén polos lugares de encontro que constrúen a vida colectiva”.
Os dous grupos da oposición farán que o goberno municipal esclareza un pouco a escura situación sobre a que vive a cidade arredor do Mundial 2030. Ambos levarán varias preguntas ao pleno deste xoves 2 de outubro (ás 10:00) sobre o asunto, unha vez que non teñen recibido ningunha información sobre as negociacións que está realizando o grupo socialista, dende que, en decembro, a rexedora aseguraba que o Mundial está asegurado e que contaba con inversores privados.
O BNG
“Ten o Goberno Local algunha novidade para lle contar ás coruñesas e aos coruñeses en relación ao mundial 2030?”, así reza a pregunta oral que o noso concelleiro David Soto. “Que administracións van financiar o proxecto e cal vai ser o seu custo? Que prazos se manexan para licitar a ampliación de Riazor? Quen vai ser o operador privado que explote o estadio e para que fins? Vaise escoller nun concurso aberto?”; preguntará o edil do BNG.
“Queremos saber cal é o estado do proxecto para A Coruña ser sede do mundial 2030. Queremos saber se se chegou a algún acordo con algunha administración ou con algunha empresa. E facémolo porque o BNG non recibiu información por ningures. O Goberno Local está a actuar cunha absoluta falta de transparencia”, refire David Soto.
O PP
O Grupo Popular tamén presentou unha pregunta oral para o Pleno do xoves para saber cando ten previsto o Goberno municipal licitar o contrato para redactar o proxecto da reforma de Riazor para adecualo ás necesidades da candidatura do Mundial 2030, porque entenden “todo vai con demasiado atraso”.
”A cidade ten todas os vimbios para ser sede do Mundial, pero a inacción do Goberno municipal é alarmante. Presentamos unha pregunta oral sobre cando van licitar o proxecto, que aínda habería que redactar como paso previo a licitar as obras”.
Critican ademais a “alarmante falta de transparencia respecto a todo o que rodea á candidatura: ninguén sabe nin o custo final da reforma nin os prazos de execución –nin o RC Deportivo, principal afectado polas obras, nin a oposición municipal-, nin de como vai ser porque varían o aforo continuamente e tampouco hai noticias sobre as fontes de financiamento privadas e públicas”.
Dúas persoas resultaron feridas este martes por mor dun incendio declarado na cociña dunha vivenda situada na rúa Antonio Casares Rodríguez, no barrio de Elviña, na Coruña. Segundo detallou o 112 Galicia, sobre as 14.30 horas recibiu a alerta deste lume a través da chamada dun particular que alertaba de que unha tixola prendera lume e as chamas estendéronse ao extractor. Na mesma chamada, solicitaba tamén asistencia sanitaria para os ocupantes da vivenda, que inhalaran fume.
Con esta información, os operadores do 112 deron aviso ao Servizo de Urxencias Sanitarias de Galicia-061, aos Bombeiros da Coruña, á Policía Nacional, á Policía Local e aos efectivos de Protección Civil. Finalmente, dúas persoas foron trasladadas ao Complexo Hospitalario Universitario da Coruña. Un home, con queimaduras leves e inhalación de fume, e unha muller, tamén por inhalación de fume.
O Sindicato de Estudantes vén de convocar a todo o alumnado da cidade ás manifestacións de estudantes que terán lugar este xoves 2 de outubro no marco da Folga Estudantil convocada polo Sindicato de Estudantes en todos institutos e universidades do Estado contra o xenocidio sionista.
A manifestación coruñesa (haberá tamén en Vigo e en Ferrol) partirá ás 12:00h do Obelisco, no que lerán un manifesto coma este:
Folga xeral o 15 de outubro
Así mesmo, a Central Unitaria de Traballadores (CUT) vén de convocar unha folga xeral
en Galicia para o 15 de outubro como resposta ao xenocidio que está a sufrir o pobo palestino por parte do Estado de Israel coa complicidade das potencias occidentais.
O Consello de Ministros autorizou o convenio entre a Xunta, a Autoridade Portuaria da Coruña, Augas de Galicia e o Concello de Arteixo para mellorar a rede de saneamento do porto exterior de Punta Langosteira.
Mediante este acordo, permitirase a construción dun novo colector interceptor de augas Suevos-Bens en Arteixo que permitirá: por unha banda, a conexión do porto exterior da Coruña co sistema de saneamento de Arteixo; por outro, satisfacer a necesidade da Autoridade Portuaria de construír unha estación de bombeo situada na chaira do porto para recoller as augas residuais producidas en todo o recinto portuario.
A obra require un investimento de 2,7 millóns de euros e será cofinanciada pola Autoridade Portuaria da Coruña –que achegará 518.000 euros–, a Xunta de Galicia e o Concello de Arteixo. Será executada por Augas de Galicia. Con esta obra, preténdese tamén solucionar os problemas de capacidade na rede provocados polo aumento da auga nas tubaxes en Arteixo, debido á conexión co polígono industrial de Morás, que provoca desbordamentos puntuais en Suevos cando hai grandes choivas.
Esta mañá completouse a homenaxe ao pintor herculino levando os seus restos ao cemiterio de San Amaro.
Antes, o salón de sesións do Palacio Municipal de María Pita acolleu un acto institucional, no que se lle rendiu homenaxe ao artista no salón de plenos coa presenza de membros do Goberno municipal, corporación municipal e personalidades do mundo da cultura e da recuperación da memoria histórica.
Posteriormente, celebrouse unha cerimonia fúnebre no cemiterio municipal de San Amaro, onde os restos mortais do artista coruñés descansan desde este luns.
A alcaldesa da Coruña Inés Rey e o alcalde de Oleiros, Angel García Seoane, durante a homenaxe
Este homenaxe enmárcase dentro das actividades xa iniciadas coa inauguración, a comezos de mes, da exposición dos debuxos do artista na Casa Museo Casares Quiroga. Conta coa colaboración da Asociación para a Recuperación da Memoria Histórica (ARMH), a Asociación Cultural Alexandre Bóveda (ACAB), así como doutras asociacións e entidades da cidade, do grupo de investigación sobre a súa vida e obra, da escritora Syra Alonso e da Deputación da Coruña, que promove tamén charlas arredor da figura de Francisco Miguel e de Syra Alonso.
Francisco Miguel naceu na Coruña en 1897. Foi pintor, ilustrador, crítico de arte e libreiro, cunha traxectoria vencellada á vida cultural da cidade e aos movementos artísticos europeos e americanos. Entre 1921 e 1933 residiu en París, Cuba e México, onde mantivo relación con figuras como Diego Rivera, Frida Kahlo e David Alfaro Siqueiros. De regreso a Galicia, asentouse en Oleiros, onde foi detido e asasinado o 29 de setembro de 1936 en Queo de Arriba (Carballo).
A cerimonia celebrada en San Amaro contou coa participación da Banda Municipal de Música da Coruña, que interpretou obras de compositores galegos como Marcial del Adalid, Juan Montes, Andrés Gaos e Chané, así como unha peza de Edward Elgar. Tamén tivo lugar unha ofrenda simbólica de cunchas de viraventos. A homenaxe contou coa presenza de familiares do artista, desprazados desde México para recibir os seus restos.
O martes, en Oleiros
Este mesmo martes, ás 19:30 h, en Santa Cruz, no Auditorio das Torres, e organizada pola Asociación pola Recuperación da Memoria Histórica (ARMH) en homenaxe ao pintor Francisco Miguel, está prevista a intervención de:
Jorge Calle (investigador).
David Lozano(investigador).
Regina de Miguel Gila (bisneta de Francisco de Miguel)
Carmen Rodeja, da ARMH.
Soledad Agra, deputada de Igualdade, Lingua e Dereitos Civís da Deputación de A Coruña
Os grupos de PSOE e BNG iniciaron a negociación do orzamento municipal de 2026 cunha reunión a dúas bandas, coa que intentan non ter que chegar á situación deste ano, cando os orzamentos só foron aprobados tras unha moción de confianza vinculada por parte do goberno loca.
Ambos grupos destacaron a “boa disposición” no encontro mantido este luns no que pactaron un calendario e unha metodoloxía de traballo.
Así o trasladaron o portavoz socialista, José Manuel Lage Tuñas, e o do grupo nacionalista, Francisco Jorquera, en declaracións aos medios tras a reunión.
“Quedamos emprazados a negociar a fondo o orzamento ao longo do mes de outubro”, concretou o líder do BNG para recalcar que o seu partido ten “a mellor disposición” para iso.
Ademais, Jorquera, acompado dos edís Mercedes Queixas, Avia Veira e David Soto, destacou como unha “cuestión previa fundamental todo o que ten que ver con democracia e participación”. Así, pediu a recuperación das competencias de control e fiscalización do grao de cumprimento das contas municipais en pleno. Pediu tamen negociar antes dos plenos aqueles asuntos que se someten a debate, mesmo incorporando propostas do BNG.
En todo caso, o portavoz nacionalista non quere prexulgar os resultados das conversas: “Será a propia negociación a que vaia esclarecendo se hai ou non marxe para o acordo”.
Pola súa banda, Lage, acompañado pola vicevoceira municipal e concelleira de Benestar Social, Igualdade e Participación, Nereida Canosa, e a directora da área de Alcaldía, Emma Cid, explicou que se tratará dun prespuesto “ambicioso” co obxectivo de “dinamizar a economía, incrementar a protección social e fundamentalmente desenvolver unha política centrada nos barrios da cidade”.
Lage confirmou que o próximo orzamento reforzará o Plan de Barrios posto en
marcha este 2025. “Vexo boa disposición por parte do BNG, estamos no minuto cero, as sensacións son boas”, sinalou para engadir que confía en que estes contactos poidan finalizar en acordo. “É posible un prespuesto progresista para a cidade”, apuntou.
O Concello da Coruña licita a elaboración do novo Plan de Emerxencias Municipal (PEMU) co obxectivo de actualizar os protocolos establecidos e adaptalos ás novas tecnoloxías “para conseguir unha maior eficacia na súa implantación”.
Para a concelleira de Seguridade Cidadá, Montserrat Paz, o obxectivo desta medida é “dar unha atención directa eficaz e áxil á cidadanía en diferentes situacións”. Segundo traslada o consistorio herculino, a elaboración deste plan por parte dunha asesoría especializada terá un orzamento de 60.000 euros.
O PEMU, engade, contará con “un sistema común de última xeración que permitirá a interconexión dos distintos equipos de emerxencias e seguridade da cidade”, así como outros servizos municipais, para “dar unha resposta máis rápida e precisa ante calquera situación”. Ademais, buscará que haxa “unha mellor coordinación entre administracións”, apunta o Concello.
