Inicio Blog Páxina 430

Colorín, colorado…

Miguel Barreiro Bugallo
-
0
Colorín, colorado…
  • Partido de volta do Playoff (12/06/23)
  • Castellón – Depor (4 – 3) – eliminado da fase ascenso

—-

Esta desfeita por fin rematou. Moitas son as explicacións ao non ascenso do Dépor desta tempada 22/23, pero polo menos non podemos dicir que nos pilla por sorpresa. Mal acaba o que mal empeza e nesta tempada todo foron malas decisións dende o mes de setembro.

Partía o Depor con certas boas vibracións despois do verán empurrado pola onda deportivista tralo fracaso do Albacete. Pero, unha vez máis, as decisións precipitadas tiraron todo pola borda. Tempada de setes xornadas, planificacións con pés de barro e cheirume a queimado todo o ano. Óscar Cano non tivo a sabedoría para manexar as dimensións do club e non puido definir unha forma de xogar, ademais de afastar da titularidade a media ducia de xogadores fixeran o que fixeran os titulares. Falo dos Trilli, Yeremay, Arturo, Alex Bergantiños… que non contaron cas opcións que tiveron os Rubén Díez, Olabe, Isi Gómez e demais rémoras e maulas que arrastraron o equipo a esta situación.

O Dépor acusou unha terrible falta actitude e falta de carácter. Ese plus competitivo que aportan os xogadores arxentinos e uruguaios coa súa forma de entender o xogo e a competición, ese plus que nós non temos e que lastrou as poucas opción de ascenso cas que chegamos ao playoff. Faría ben a próxima dirección deportiva en buscar este perfil no mercado e aportar carácter ó plantel.

Pouco podemos dicir de onte. Foi o resumo perfecto para o que foi a tempada de Dépor. Unha tempada de tres adestradores, unha tempada cunha vitoria dende xaneiro fóra da casa, unha tempada sen vitorias cos rivais de playoff, incluíndo o líder do momento, unha tempada sen recambios e revulsivos dende o banco. Pero, unha tempada cunha afección abrindo programas de radio, saíndo en portadas de periódicos non deportivos o despuntando nas redes por riba de entidades de categorías superiores. Estes non fallan, estes sempre están e sempre estarán.

@rcdeportivo

Quizais este sexa o motivo polo que o clube non estea en risco de desaparición.
Haberá moitas baixas este verán e moitas novidades. Dito está que marcha toda a dirección deportiva e entendo que Rubén de la Barrera merece un proxecto planificado, con posibilidades de decidir nas fichaxes e traballar varias semanas arrincando de cero en agosto. Pola miña parte entendo que a súa figura ten certo arraigo na afección, feito do que agora mesmo non nos podemos permitir non aproveitar.

Mágoa de tempada na que sempre se viu todo moi lonxe e na que non se soubo corrixir direccións equivocadas. Unha decepción máis: derrota en Mallorca, descenso co Fuenlabrote, surrealismo na xéneses da 1ª RFEF, derrota co Albacete e derrota co Castellón, para que logo digan do Lloruña e do ascenso por decreto. Toca secar as bágoas, mirar o mar de Riazor maldicindo unha nova derrota, limpar a camiseta e gardala ata o ano que vén. Toca baixar as orellas e aceptar o que hai. Hoxe chórase, mañá tocará rir, porque isto é o depor.

 

  • Miguel Barreiro Bugallo. Coruñés e deportivista no exilio mesetario. Sufrindo ó depor dende 1988. O que sei de fútbol, o Depor empéñase en negarmo. Firme defensor do fútbol de botas negras.

MÁIS CRÓNICAS DO DÉPOR

Blanca Quiroga e Xosé Ramón Taracido, dous nomes para a historia

Ricardo Vales
-
0
Blanca Quiroga e Xosé Ramón Taracido, dous nomes para a historia
Un repaso aos numerosos accidentes marítimos producidos na costa coruñesa ofrece unha mirada que os coruñeses contemplamos como unha sinistra determinación. Cada un, coa súa historia. Con familias desfeitas, detrás. Traxedias anónimas para o gran público. Unha sombra permanente coa que a Coruña leva convivindo moitos anos. Así, o 12 de maio de 1976, o petroleiro Urquiola, afúndese, derramando 100.000 toneladas de crú e cunha vítima mortal na persoa do seu capitán. Unha premonición do que nos agardaba. O Mar Egeo, en 1992, provoca un gran incendio, con linguas de lume avanzando fronte ao mar que rodea a Torre de Hércules. Todo empezou de improviso en medio da noite, mentres que a veciñanza de Durmideiras entregábase ao sono, allea ao perigo de  vento e lume que iba asolar como unha gadaña toda a cidade. O Prestige, en 2002, derrama 70.000 toneladas de fuel provocando unha das maiores traxedias medioambientais cun área de 2000 kilómetros dañada e con ramificacións mesmo en aguas de Portugal e Francia. Erkowit e Casón, tamén son outros dos nomes que comparten honores estelares coa relación de catástrofes ecolóxicas. Quizais esos sexan os accidentes marítimos máis coñecidos polo gran público, mais hai un que, para quen esto escrebe, segue proxectado no cerebro.
Pasaron 35 anos dende aquel fatídico 3 de xaneiro de 1988, data na que o mercante de bandeira chipriota, Mitera Sotidia, embarrancara ás 6 da mañá, na praia de Bens, concretamente na Punta do Burro, a tres millas de Caión, como consecuencia do forte temporal que azotaba de madrugada o norte da costa atlántica. O mercante navegaba en lastre, dende o porto italiano de Augusta deica Bilbao, con 15 tripulantes a bordo. Unha avería na sala de máquinas precipitou a chamada de auxilio. Os remolcadores Punta Salinas e Punta Service, así como a patrulleira da Armada, Mahón, e o Servizo Aéreo de Rescate (SAR), xunto a embarcación da Cruz Roxa do Mar, Blanca Quiroga, acudiron ao rescate. A tripulación resultou ilesa, pero nas operacións de rescate, a Blanca Quiroga, con 5 tripulantes a bordo, volcou preto das Illas Sisargas como consecuencia dun golpe de mar, desaparecendo baixo as augas, Xosé Ramón Taracido, de 45 anos, voluntario da Cruz Roxa do Mar e mergullador do laboratorio do Instituto Oceanográfico, deixando viuva e un fillo de curta idade. Un amplo dispositivo de búsqueda púxose en práctica sen resultado positivo, Meses máis tarde, un arrastreiro recolle o corpo de Taracido enredado no copo do aparello. Un servizo altruista que pagou caro. Para os compañeiros do Oceanográfico aquel accidente permanecerá sempre como unha sombra permanente. A súa memoria vivirá mentres vivamos quenes coincidimos con el.
Foi precisamente o naufraxio do pesqueiro, La Isla, unha baka de 32 metros de eslora, afundido o 4 de outubro de 1970, na Pedra do Boi, con 14 falecidos e no que tan só sobreviviu o maquinista, o que revelou a necesidade de dotarse dun servizo de salvamento eficaz neste ponto do litoral, principio e fin da cidade, que por entón non dispuña de lancha de salvamento nen helicóptero. Así, en 1973, entra en funcionamento a Blanca Quiroga, hoxe fora de servizo, mais cun percorrido de 29 anos as súas costas, dos que beneficiaronse indistintamente cantidade de veleiros e percebeiros en perigo e cunha tripulación de voluntarios excepcionais que compatibilizaban a súa vocación con outros traballos profesionais, sen horario e sempre a punto para embarcar, características que os fan acreedores da rúa que o Concello aprobou para honrar a traxectoria da Blanca Quiroga e de Xosé Ramón Taracido, dous nomes de auténtico luxo, porque ambos simbolizan a imaxe da Coruña firme e incansábel no espíritu de servizo.
  • Ricardo Vales, expresidente da Asociación Veciñal de Atochas-Monte Alto e Responsábel de Comunicación da Plataforma Cívica Defensa do Común.

Olladas outro tempo: Praza de Mina. 1906

Fernando Campos Mantiñán
-
0
Olladas outro tempo: Praza de Mina. 1906

Coruña remataba en Juana de Vega. Era alí onde se pechaba a Pescadería cunha muralla que defendía este barrio mariñeiro dende a época dos Reis Católicos. Pero no século XIX estas defensas xa non eran máis ca un estorbo para a apertura dunha cidade que precisaba espallarse, que estaba a aumentar a súa poboación ás presas e que quería converterse nunha cidade moderna. En 1869 derrúbase o “fronte de terra”, abrindo a porta ó primeiro ensanche da cidade. Pero para cando o arquitecto municipal Juán de Ciórraga presenta o proxecto definitivo dese novo e elegante barrio, xa estaba construido o edificio da fotografía. Erguérase en 1882, converténdose así no primeiro edificio do ensanche coruñés.

Pero non só era o primeiro, estamos a ollar un dos edificios máis bonitos da Coruña da súa época. O seu deseño correu a cargo de Faustino Domínguez Coumes-Gay, autor do Instituto Eusebio da Guarda, ou da Igrexa de San Andrés. Foi unha construción rompedora na estética coruñesa dese momento, descrita polo citado arquitecto municipal coma “feliz imitación das modernas edificacións de París”.  A mágoa é que non poidamos disfrutalo hoxe en día, pois malia que semelle seguir alí, non é certo. Non temos máis que levar esta imaxe ata a Praza de Mina para comprobar o cambio. O edificio foi sustituido case por completo en 1945, cando pasa a ser propiedade da compañía de seguros “la Unión y el Fénix”. Tan só respectase a pranta baixa e o primeiro andar, aumentando tres alturas e perdendo toda a fermosa decoración de molduras e dinteis que diferenciaba cada piso. Tamén perdéronse os dous preciosos miradores de galería que daban a Sanchez Bregua, ou a cúpula orixinal, máis esférica e armoniosa co resto do conxunto.

Pero o que máis nos chama a atención da instantánea non é esa aparentente innecesaria rotonda que cruzan os peatóns ignorando o tráfico. O chamativo é o tráfico mesmo. Ese carro tirado por un animal é o inicio dun imperio empresarial. A fotografía foi tomada en 1906, ano en que José María Rivera Corral fundou “Estrella Galicia” en Catro Camiños, como fábrica de cervexa e xeo. Voltou de México e apostou forte por un producto que non era tan consumido nese momento. Acertou de cheo, xa que máis de cen anos despois os seus productos distribúense por máis de 35 países.  

As cervexas de agora viaxan á temperatura xusta, nas enormes neveiras da flota de camións que as levan polo mundo adiante. Aínda así, creo que todos preferimos a viaxe no tempo ó momento xusto en que as botellas pasaban a modiño, sen présa, tintineando no pintoresco carro de madeira por diante do primeiro edificio do Ensanche.

 

FERnando-campos

  • Fernando Campos. Coruñés ata a médula e fanático da Historia, sobre todo se esa Historia é coruñesa. Máis de quince anos impartindo obradoiros culturais coma “Un paseo pola cidade”, “Personaxes da cidade” ou “ A Cidade Perdida” no Fórum Metropolitano e no Centro Ágora.

OLLADAS DOUTRO TEMPO

Palavea e Labañou póñense de festa

editor
-
0
Palavea e Labañou póñense de festa

Fin de semana de festas nos barrios da cidade.

O barrio de Labañou e San Roque de Fóra celebra a Festa dos Porcos este sábado 10 de xuño, na praza da Tolerancia, con diferentes actividades para todos os públicos. Chus Castro será a encargada de dar o pregón da xornada, que comezará ás 12.00 horas con Cántigas da Terra e a Banda de Música de Arzúa.
Pola tarde a compañía Sue Moreno con 4.0 ofrecerá un espectáculo circense para os máis pequenos, tamén na mesma praza. A programación rematará con tres actuacións musicais.
Comezará o dúo Feminino Plural, composto por Silvia Penide e Carla López ao que lle seguirá a banda ourensá O Sonoro Maxín. O cantante Berto, un dos nomes de maior relevancia no panorama musical galego actual, será o encargado de poñer fin a estas Festas de Labañou, organizadas pola Asociación Veciñal Labañou-San Roque-Zona Escolar-Rosales co apoio do Concello da Coruña e da rede cultural da Deputación da Coruña.
Así nos pon en contexto a asociación:

Palavea

O barrio de Palavea tamén celebrará esta fin de semana as súas Festas Patronais de Santo Antonio e Santa Cristina na praza Padre Busto, con actividades para todos os públicos. O sábado 10 de xuño, pola mañá, haberá pasarrúas circense e xogos xigantes para os máis
pequenos e pequenas. Tamén se realizarán obradoiros de Cap Paint e de Skate, orientados á xente máis nova. Pola tarde comezarán as actuacións de The Coin Brass, XXIV Ancianos, Crowed e The Homeless que rematará pola noite coa actuación da Orquestra Barcelón.

O domingo 11 de xuño a xornada festiva comezará da man da Agrupación Folerpas, que amenizará as rúas con música tradicional. Tamén se fará a entrega de premios do II Certame de Deseño de Carteis e a proxección da película ‘Luca’, orientada ao público infantil á que lle seguirá a sesión vermú con Foliada D’ases e “A fuego lento” de Javi Malabares. A xornada do domingo rematará coas actuacións do grupo de Musicoterapia de Abegondo e Palavea, Carmino Karachi, Mr. Kamándula e Leria.

Mercado das nubes

Ademais, mercado municipal de San Agustín acollerá esta fin de semana unha nova edición do Mercado das Nubes, maridando 54 postos con diferentes propostas gastronómicas, artísticas, artesanais e relacionadas co mundo da moda e celebrarase primeiro andar deste espazo municipal.
O Mercado das Nubes de verán comezará este venres (de 17.00 a 21.00) e prolongarase
durante as xornadas do sábado (11.00 a 21.00 horas) e do domingo (11.00 a 18.00 horas).

Un incendio calcina unha vivenda na Coruña e provoca queimaduras ao inquilino

europapress
-
0
Un incendio calcina unha vivenda na Coruña e provoca queimaduras ao inquilino

Un incendio calcinou unha vivenda situada na planta baixa dun edificio da rúa dos Tulipanes, na Coruña, e unha persoa tivo que ser trasladada con queimaduras polos servizos sanitarios.

Segundo informou o 112 Galicia, o suceso produciuse pasadas as 07,00 horas deste sábado. Varios veciños contactaban coa central de emerxencias para avisar que notaban calor e vían fume nas escaleiras do edificio, pero descoñecían de onde procedía.

Con esta información, os operadores do 112 puxeron os feitos en coñecemento dos Bombeiros da Coruña e do Servizo de Urxencias Sanitarias de Galicia-061. Tamén foron informados a Policía Local, Policía Nacional e os efectivos de Protección Civil da cidade.

Tras atallar o lume e ventilar a zona das escaleiras, os bombeiros indicaron ao 112 Galicia que non foi preciso desaloxar o inmoble. Con todo, si confirmaron que a vivenda afectada ardeu por completo e o morador resultou ferido, ao sufrir queimaduras nas mans.

Miñones e Bugallo encabezan as listas do PSdeG pola Coruña

europapress
-
0
Miñones e Bugallo encabezan as listas do PSdeG pola Coruña

O comité provincial do PSOE da Coruña aprobou este xoves por aclamación as candidaturas coas que a formación concorrerá ás eleccións xerais do próximo 23 de xullo e que encabezan o ministro de Sanidade, José Miñones, ao Congreso, e o alcalde de Santiago en funcións, Xosé Sánchez Bugallo, ao Senado.

En concreto, a lista á Cámara baixa está integrada polo ministro de Sanidade, José Miñones, como número úno; a exsenadora Obdulia Taboadela como dúas; a concelleira nas Pontes Montse García Chavarría no número tres; o exdiputado Diego Taibo no cuarto posto; José Domínguez Castro, de Corcubión, como número cinco; a socialista de Trazo Paula Castiñeiras como número seis; a exsubdelegada do Goberno na Coruña Pilar López-Riobóo como número sete; e o alcalde de Ponteceso en funcións, Lois García Carballido como número oito.

Pola súa banda, a candidatura para o Senado pola provincia da Coruña está encabezada polo alcalde de Santiago en funcións, Xosé Sánchez Bugallo, quedando como suplente o exregidor de Oroso, Manuel Mirás, quen nos últimos días postulouse para concorrer nas listas co obxectivo de volver ser senador na próxima lexislatura. Ademais, completan a candidatura a ferrolá Natividade González Laso, como segunda titular, e Fabián Canosa, de Camariñas, como titular número tres.

O secretario xeral do PSOE provincial da Coruña, Bernardo Fernández, destacou que se trata de candidaturas “conformadas polo mellor capital humano que dispón o PSdeG” nun momento “crave” no que están en xogo dous modelos, o do PSOE, de “non deixar a ninguén atrás” e o do PP, “que vai deixar a parte do país na estacada”.

No acto, o ministro de Sanidade aproveitou para agradecer aos militantes que participaron nas asembleas e destacou o capital humano dunhas candidaturas que van saír a “defender a mellor España fronte á peor dereita”. “Unha dereita tirada á extrema dereita”, dixo Miñones, que destacou que a mellor España pasa por “seguir protexendo á xente”.

A unidade de cardiopatías conxénitas do Chuac realizou máis de 2.500 intervencións desde a súa posta en funcionamento

europapress
-
0
A unidade de cardiopatías conxénitas do Chuac realizou máis de 2.500 intervencións desde a súa posta en funcionamento

A unidade de cardiopatías conxénitas do complexo hospitalario universitario da Coruña (Chuac) realizou máis de 2.500 intervencións desde a súa posta en funcionamento. Estes datos achegáronse coincidindo co acto de aniversario da citada unidade, un evento que contou coa presenza, entre outros, do conselleiro de Sanidade, Julio García Comesaña.

Desde o ano 1998, o Hospital Universitario da Coruña conta cun programa estable de tratamento das cardiopatías congénitas, un grupo de enfermidades que se caracterizan pola presenza de alteracións na estrutura do corazón ao nacer.

Así, desde a posta en marcha da unidade, realizáronse xa máis de 2.500 intervencións e, entre o ano 2010 e 2022, rexistrou un total de 35.290 consultas infantís e pediátricas. Anualmente, realiza máis dun centenar de cirurxías cardíacas e tamén leva a cabo máis de cen de cateterismos no ámbito cardíaco.

Reconstrúen a morte do home asasinado no barrio das Flores: non puido defenderse

europapress
-
0
Reconstrúen a morte do home asasinado no barrio das Flores: non puido defenderse

Os dous médicos forenses que elaboraron o informe pericial pola morte dun home no Barrio das Flores, en setembro de 2021 na Coruña — feitos presuntamente cometidos por un coñecido que lle debía diñeiro– confirmaron que non hai sinais de defensa e tampouco “ningunha lesión que suxira loita”.

Así o manifestaron no xuízo que se celebra na Audiencia Provincial da Coruña e en relación a un corpo que presentaba 18 puñaladas nas costas e unha máis á altura do esternón. No entanto, recalcaron que o cadáver “non estaba no seu mellor estado”, en alusión á descomposición do mesmo.

Ademais, concluíron que a “lesión esencial” que produciu o falecemento do home foi a ferida frontal que sufriu. “A perda de sangue da incisión do tórax foi o que produciu a morte, en minutos”, explicaron. O resto de puñaladas, engadiron, non provocaron á vítima lesiones “incompatibles coa vida”. Así mesmo, argumentaron que “de forma diferida, non inmediata, poderían xerar complicacións que, en horas ou días, poderían causar a morte”.

Cuestionados pola arma homicida, os médicos, en calidade de peritos, dixeron que “a priori o máis probable” é que as incisións fosen ocasionadas por “unha soa arma”. “Son lesións moi parecidas entre elas”, puntualizaron.

ADICCIÓNS DO ACUSADO

Na vista, declarou tamén a forense encargada de tomar as mostras de saliva e cabelo ao acusado. O resultado destas probas, segundo dixo, “reflicte un consumo crónico de cocaína e alcol”.

Durante o xuízo, testificou ademais a responsable do laboratorio da brigada de policía científica, quen certificou que no escenario do crime achouse unha cabicha dun cigarro “con ADN do detido”.

Quirónsalud A Coruña aplica por primeira vez na sanidade privada galega unha técnica endoscópica en tumores de páncreas

europapress
-
0
Quirónsalud A Coruña aplica por primeira vez na sanidade privada galega unha técnica endoscópica en tumores de páncreas

O Hospital Quirónsalud A Coruña aplica, por primeira vez na sanidade privada galega, unha innovadora técnica endoscópica para o tratamento de certos tumores pancreáticos.

Segundo explica o centro hospitalario, a través do endoscopio introdúcese unha agulla coa que, “con gran precisión”, se punciona o tumor pancreático “para destruílo mediante a aplicación de radiofrecuencia”.

Para o especialista en dixestivo do Hospital Quirónsalud A Coruña, David Martínez Ares, unha das vantaxes que supón esta técnica que utiliza un “método de ablación térmica” fronte á cirurxía convencional é que é “menos invasiva”.

Este feito, “tradúcese nunha taxa de complicacións moito menor e nunha estancia hospitalaria moito máis breve” xa que o paciente irase ao seu domicilio “nun prazo entre 24 a 48 horas” se non hai incidencias. Outra das vantaxes para o doutor é que a cirurxía se realiza baixo sedación en lugar de anestesia xeral.

Esta técnica está indicada no tratamento dos tumores neuroendocrinos pancreáticos funcionantes ou no non funcionantes de menos de dous centímetros de tamaño e con achados na biopsia que suxiren un comportamento menos agresivo, segundo puntualiza o hospital.

O envorco dun camión de recollida de lixo de Arteixo deixa dous operarios feridos

europapress
-
0
O envorco dun camión de recollida de lixo de Arteixo deixa dous operarios feridos

Dous operarios do servizo de recollida de lixo resultaron feridos este venres tras envorcar en Arteixo o camión co que traballan. Fontes municipais precisaron que o vehículo é da Laracha.

En concreto, segundo recolleu o 112 Galicia, o accidente produciuse no quilómetro 7 da estrada DP-0513, na parroquia de Monteagudo, nun lugar que limita entre A Laracha e Arteixo.

A central de emerxencias sinalou que os dous ocupantes conseguiron saír ao exterior do camión, pero non baixar de encima debido á gran altura ata o chan. Así, explicou que tanto un traballador non implicado como os dous operarios accidentados puxéronse en contacto co 112 Galicia para informar sobre o ocorrido. Con todo, pouco despois da primeira comunicación relataron que os axudaron a baixar, aínda que necesitaban asistencia sanitaria.

Ademais, como o camión obstaculizaba completamente a circulación no punto, os servizos de emerxencia cortaron o tráfico ata o restablecemento das condicións da vía. Neste operativo participaron Urxencias Sanitarias de Galicia-061, a Garda Civil de Tráfico e Protección Civil de Arteixo e da Laracha. Así mesmo, foron informados os Bombeiros de Arteixo e os servizos de mantemento da estrada.

1...429430431...580Page 430 of 580

Xornal da Coruña é o primeiro gran xornal dixital exclusivamente en galego da Coruña e a súa área metropolitana

Contacta: redaccion@xornaldacoruña.gal

SÍGUENOS

© Xornal da Coruña - Xurimaru Servizos de Comunicación 2010 S.L.

QUE É XdC? | AVISO LEGAL | PUBLICIDADE | COOKIES