Traballadores de centros da Consellería de Política Social convocan este martes, 20 de xuño, caravanas por catro cidades –Vigo, A Coruña, Lugo e Ourense– en protesta polo “ninguneo” da Xunta respecto das súas demandas de melloras laborais, salarios e dotación de maior persoal.
Nun comunicado, o Comité Intercentros denuncia que a Xunta “incumpre” a súa palabra ao non presentar nun mes un documento con cuestións como creación de postos de traballo dentro da RPT (relación de postos de traballo), compensación por traballar domingos e festivos, así como análises da tipoloxía de usuario dos centros e solucións inmediatas.
Critican que non teñen “ningún tipo de compensación por traballar os sábados, domingos e festivos desde o ano 2012, suspendida temporalmente, a pesar de que dita compensación se recolle expresamente na Lei de Emprego de Galicia”. Igualmente, reclaman a necesidade de máis persoal, xa que continúan con cocientes de persoal/uusario do ano 2006.
Así mesmo, os traballadores avisan de que os centros “non están preparados estruturalmente” para albergar unha nova tipoloxía de usuarios máis novos –con diversas patoloxías psiquiátricas, alcohólicos, de dependencia ou arraigamento social– que “xeran conflitos” ante a seguridade dos maiores en residencias.
E é que apuntan que os profesionais “non teñen os medios necesarios para unha boa atención, nin moito menos persoal suficiente para cubrir as necesidades, urxencias ou crises que poida aparecer neste tipo de usuarios”.
Ademais das caravanas deste martes, os empregados de centros de Política Social ten tamén previsto concentrarse o 28 de xuño ante o edificio administrativo da Xunta en San Caetano, Santiago.
Atopei a Marcos Mera para unha aperta e un parloteo sobre profesión e vida.Que se Medicina rural, que se Medicina urbana; que se motivación inicial para a Medicina de Familia, que como anda a vocación actual; que se equilibrio coa vida persoal. Preguntoume: e os escritos?
Verbalicei o que levaba dentro dende fai tempo: que aquel ímpetu pola escrita se diluíra, seguramente nun proceso de parada de ilusión pola profesión.
Fíxome reflexionar que que unha vaia recolocando as parcelas da súa vida non quere dicir que deixe de lado actividades que si lle gustaban e lle axudaban.
As condicións na Sanidade Pública para exercer da forma que me gustaría non son as idóneas. Pero iso tampouco significa que a profesión deixase de ser bonita e, a ratos, gratificante.
Hai tardes nas que teño tanta sobrecarga mental de todo o que tiven que atender que no modo piloto automático non aprecio detalles motivadores. Pero hainos, e de todas as cores. Nesta nova andaina… aquel señor que acababa de coñecer nun “chequeo” que mando a urxencias polo electrocardiograma, que marcha con cara de non entender nada e remata cun marcapasos; aquela señora que despois de falar en varias consultas das tristuras e dos medos me pide unha aperta; aquel señor que si coñece Lousame e co que charlo sobre a comarca e iso axuda á relación médica-doente; aquela rapaza da caída da bicicleta na que tras explorarlle o xeonllo sospeito afectación do ligamento cruzado + menisco + ligamento lateral e acerto; aquela chamada días despois de repasar o caso da chica que responde con moito agradecemento.
Que si, que é o que hai que facer, que para iso estudamos, que para iso exercemos… pero facer balance das cousas boas ao final do día ou, a lo menos, ao final da semana, axuda a seguir adiante.
E ter xente preto que tamén fai os seus balances e chos comparte, motiva.
Nota: animo a Marcos a ser o seguinte en publicar algo neste rincón de Xornal da Coruña.
Alicia Barreiro Cambeiro. Médica de Primaria no Centro de Saúde de Monte Alto.
Fin de semana de reflexión social e compromiso nos Xardíns de Méndez Núñez. O VII Encontro Internacional Campamento pola Paz “Odio ou Convivencia” da Rede Acampa foi todo un éxito, gracias á participación da sociedade herculina, que demostrou a súa empatía e receptividade a esta proposta reflexiva arredor dos Dereitos Humanos e o Dereito ao Refuxio.
Equipo de coordinación do encontro
Un evento organizado polo Movemento Campamento pola Paz, unha Rede que agrupa a case 80 organizacións relacionadas cos dereitos humanos, que seguirá traendo información real, veraz, directa, neste mundo da sobreinformación.
A reprodución da carteleira de Melilla, instalada fronte ao Palco da Música, foi, sen dúbida, o polo de atracción deste ano. Tamén o campo simulado que reproducía o que acontece en tantos campos de refuxiados por todo o mundo no que o odio, moitas veces en forma de lume, arrasa a esperanza das persoas máis vulnerables varadas nestes espazos sen dereitos e sen futuro.
Baltasar Garzón no valado da Rede Acampa
Visitas
Corral explicando a súa mostra
O público, e visitas concertadas de varios centros de ensino tamén apoiou as visitas guiadas dos fotoxornalistas convidados, que achegaron a súa mirada e a súa historia directa
Os grandes debates
A carpa central desbordou o público nos dous grandes debates, os que sentaron a Pepe Mujica, expresidente uruguaio, Virginia Álvarez, a xefa de investigación de Amnistía Internacional. Crúa a versión de Álvarez sobre o caso do valado de Melilla. “Non hai xeito de que, se non es louro e de ollos azuis, poida entrar en Europa de forma ordenada cando necesite protección internacional. É kafkiano que teñas que cometer ilegalidades para que se respecten os teus dereitos”, sinalou criticando a todo o estado por encubrir unha auténtica masacre preparada.
Mujica lembrou que “estamos cometendo estupideces estratéxicas; non en balde, dentro de 50 anos, a metade da humanidade será africana; E se nos responden con esta vergoña que practicamos con eles, ímolo pasar mal”. “A solidariedade a longo prazo tamén é comodidade. A Europa rica envellece, os pobres van ser unha maioría esmagadora”, sinalou.
Pola súa banda, o xuíz Baltasar Garzón falou de xustiza universal. “A xustiza, en materia de Dereitos Humanos, é conservadora e non pode selo”. “Hai que pensar en quen é a responsable deses estados fracasados, pensar no que leva a migrar a millóns de persoas; e aí Europa non é inocente”, explicou. “É moi rechamante que Meloni estableza acordos con Libia sabendo que estes retornos levan a seres humanos encarcerados, masacrados”.
Virginia Mielgo, xefa de operacións de Geo Barents de MSF, testemuña directa do que está a suceder no Mediterráneo Central, insistiu en denunciar a campaña mediática e política que criminaliza a migración e os esforzos de rescate das organizacións humanitarias. Tamén a dobre moral de Europa, capaz de asumir unha recepción eficaz e rápida dos ucraínos fuxidos da guerra pero que pecha fronteiras e permite que centos de seres humanos doutra cor de pel ou doutra orixe se afoguen no mar.
Aínda podedes pasar a ver as exposicións fotográficas nos xardíns ata o día 10 de xullo, e ver todos os contidos, vídeos do encontro e exposicións en https://coruna.redeacampa.org/gl/.
E mentres, imos xa pensando no Encontro Internacional do próximo ano, que xirará arredor da Infancia e da Xuventude
A Consellería de Educación anunciaba a semana pasada a eliminación para o curso 2023 – 2024 Ciclos de FP na modalidade de persoas adultas presencial en diversas familias profesionais.
Unha decisión que alterou a toda a comunidade educativa do mundo da FP de todo o país. Non foi menos na cidade da Coruña, e un grupo de estudantes prantouse o pasado venres diante dos edificios da Xunta de Elviña, na Delegación de Educación.
O estudantado rexeita a supresión de prazas que se está a dar nos centros educativos con oferta formativa de FP como na cidade o CIFP Ánxel Casal, no que se pasarían a eliminar os CS de Mediación Comunicativa, Integración Social e Educación Infantil na modalidade modular presencial.
“As nosas titulacións están orientadas a facilitarlle a vida a persoas en situación de vulnerabilidade, polo que consideramos a presencialidade fundamental para recibir a mellor educación posible, para ser realmente de utilidade e proporcionar un bo servizo”, explica Hayden Dopico Cardemil.
“Trátase dunha decisión unilateral, imposta e sen previo aviso que prexudica un modelo de ensino de calidade e que vai en detrimento da igualdade de oportunidades a nivel educativo”.
Lembran que o profesorado apenas tivo 24 horas para manifestarse, e lamentan que a Consellería “venda o aumento de prazas a distancia como xustificación pero iso non é viable na meirande parte dos ciclos, sobre todo na rama de Servizos Socioculturais e á comunidade, onde as competencias se adquiren mediante a interacción entre o profesorado e o alumnado”.
Repercusións
Consideran que esta decisión terá repercusións, entre outros, nos seguintes aspectos: – A imposibilidade de continuidade de estudos na modalidade escollida para 149 estudantes no CIFP Ánxel Casal, sendo preto do 90% deste alumnado mulleres. – O desprezo aos centros educativos como espazos de socialización e promoción de hábitos de convivencia e vida saudable. – A negación de oportunidades de educación ao alumnado con poucos recursos económicos, reducindo a oferta pública presencial. – O alumnado matriculado na modalidade de adultos presencial verase na obriga a cambiar á modalidade de distancia antes de rematar o ciclo formativo. – O alumnado que non obteña praza na oferta presencial pública non lle quedará máis remedio que buscar oferta en centros privados. – A meirande parte do alumnado verase na obriga de abandonar os estudos por non axustarse esta modalidade as súas necesidades. – O alumnado non recibirá o acompañamento educativo que precisa (menos actividades prácticas guiadas, traballo en equipo, etc). – Perda en xeral de calidade no ensino, tendo en conta que a presencialidade facilita a formación da competencia profesional no ámbito dos servizos socioculturais e a comunidade (sentido crítico, valores de xustiza social e respecto das persoas, importancia dos coidados…).
A alcaldesa da Coruña, Inés Rey, presentou a estrutura do novo goberno municipal “e as súas responsabilidades”, con once concelleiras socialistas e baseada en tres grandes áreas: Economía e Planificación Urbana; Benestar Social; e Fomento e Promoción da cidade.
Fíxoo nunha rolda de prensa e tras a súa investidura como rexedora o pasado sábado día 17. “Asumimos o reto de impulsar a segunda modernización da cidade”, sinalou Rey e explicou que a repartición de funcións fíxose en base a “tres alicerces, a dinamización económica e desenvolvemento urbano e sustentable, a protección social e a proxección da cidade”.
En canto ás súas propias competencias, a alcaldesa sinalou que se ocupará de “a relación cos barrios, proxectos europeos e axenda urbana e a relación con outras administracións”.
A primeira das áreas nas que se divide o novo goberno municipal é a de Economía e Planificación Urbana, que estará dirixida por José Manuel Lage, quen será portavoz municipal e primeiro tenente de alcalde, ademais de concelleiro de Economía, Facenda e Planificación Urbana.
Deste departamento dependerá Nereida Canosa, concelleira de Innovación Tecnolóxica, Cidade das TIC e AESIA, Mobilidade e Infraestrutura; Francisco Díaz, concelleiro de Urbanismo, Rehabilitación e Vivenda e Edificación; Noemí Díaz, titular de Medio Ambiente; e Montse Paz, responsable de Interior, Atención Cidadá, Seguridade Cidadá e Tráfico.
A segunda área é Benestar Social, dirixida por Yoya Neira, segunda tenente de alcaldesa e concelleira de Benestar Social, Igualdade, Mocidade e Participación. Dela, dependerá Juan Ignacio Borrego como titular de Emprego e Educación.
A terceira sección corresponde á área de Fomento e Promoción da cidade, con Gonzalo Castro á cabeza como terceiro tenente de alcalde e concelleiro de Cultura, Memoria Histórica e Normalización Lingüística. Este departamento inclúe a Manolo Vázquez como titular de Deportes; e Diana Cabanas como concelleira de Turismo, Comercio, Mercados, Hostalería e Relacións Institucionais.
A Parva, a cantina do mercado de San Agustín, acolleu este pasado venres a inauguración da exposición ‘Bosquexos no mercado’. Unha mostra colectiva composta por obras do alumnado da Escola de Arte e Superior de Deseño Pablo Picasso, que permanecerá no interior do mercado ata setembro.
Son máis dun cento de bosquexos feitos polo alumnado de 1o curso de Ilustración e Deseño Gráfico en diferentes formatos e técnicas en visitas organizadas por varios docentes á praza.
A exposición nace dos apuntes feitos no propio edificio para o estudo da perspectiva no módulo de Debuxo Aplicado á Ilustración, que imparten os profesores Carlos Alfonzo e Javier Macho, e das prácticas de traballo de campo na disciplina de Debuxo Artístico da especialidade de Deseño Gráfico, a cargo da docente Gloria R. Simón. “Moitos dos participantes nunca asistiran a clase de debuxo nin fixeran debuxo natural na rúa”, apunta o profesorado. Na mostra hai imaxes de interior e exterior do mercado, de praceiras, postos ou obxectos. Á inauguración asistiron hoxe diversos membros da comunidade escolar, entre eles, os tres profesores que guiaron ao estudantado nos traballos.
A exposición poderá visitarse no horario de apertura habitual da Parva: de luns a xoves entre as 9.00 e as 16 horas; venres, de 9.30 a 20.00 horas e os sábados, de 9.30 a 16.30 horas.
Éxito rotundo da V Barbería Solidaria celebrada este sábado no Obelisco. Un evento que se viu beneficiado pola boa ubicación (polo Obelisco pasa máis xente que polos Xardíns, ocupados ademais coa Rede Acampa), e conseguíu a súa meirande recadación das 5 edicións celebradas.
Van máis de 4,500€ (conseguidos de 8€ en 8€, que era o que custaba cada corte) destinados á Asociación Coruñesa de Esclerosis Múltiple-ACEM, a outra gran protagonista da xornada.
Segundo Mallo, ademais de ser o gran organizador xunto coa Asociación, foi o animador, o speaker, que foi presentando aos 61 barbeiros/as que perderon cartos e unnha xornada de traballo para participar nesta cita. Moit@s barbeir@s da cidade, pero tamén da Estrada, As Palmas de Gran Canaria, Ourense, Valladolid, Vigo, Lugo, Ortigueira, Arteixo, Córdoba, Alcorcón… xentes que se achegan pola súa conta ata aquí para vivir esta toda experiencia común.
Dúas importantes incógnitas da política municipal coruñesa quedaban pendentes de resolver tralas eleccións do 28 de maio: a composición do novo goberno municipal e as fórmulas que se porán en práctica para solucionar as cuestións que A Coruña ten aínda pendentes, principalmente as relacionadas co urbanismo. Ambas cuestións non se refiren únicamente a matices concretos da distribución das concellalías, senón que afectan de cheo ao modelo de cidade que nos propoñen. A primeira incógnita quedou prácticamente despexada ao día seguinte das eleccións, cando Inés Rey, aferrada á consideración de que a maioría natural era do PSOE, sen máis, anticipaba que prefería gobernar en solitario, despreciando mesmo elaborar calquera programa de goberno conxunto co BNG susceptíbel de dar respostas imaxinativas ás preocupacións máis urxentes da cidade. O seu único argumento foi que A Coruña apostou por forzas progresistas, mais sen comprometerse a plantexar a posibilidade de ensaiar un goberno de coalición nucleado precisamente en torno a esa maioría de progreso que arroxaron as urnas e que, para amplos sectores sociais, parecían condición indispensábel para poder encarar con certo optimismo o futuro da cidade mudando moitas das liñas de actuación seguidas no anterior mandato.
Mais o caso é que o éxito que Inés Rey atrubúe ao seu partido debe ser relativizado se repasamos os datos da xornada electoral do 28 de maio respecto aos de 2019. Así, o PSOE contabilizou 36.188 votos, fronte aos 37.531 obtidos en 2019, isto tradúcese nun retroceso de 1.343 votos, mentres que o BNG incrementou o seu saldo electoral en 6.804, resultado dos 15.754 cuantificados en 2023 fronte aos 8.950 de 2019. A precariedade da súa maioría, isto é, 11 concellais dun máximo de 27, obrigará a Inés Rey e ao seu partido a depender do BNG ou do PP ao non contar cun seguro de vida para seu goberno. Calquera intento de sacar adiante algunha cuestión que resulte trascendental para o futuro da cidade ou dunha alternativa progresista pasa pola necesidade de asumir que eso xa non pode facerse só dende o PSOE. A ilusión tanto tempo sostida perante a campaña electoral de que era posíbel, desexábel, buscar un goberno forte capaz de mudar moitos dos vicios adquiridos en forma de ambigüedades respecto a moitos temas, abriron unha brecha insalvábel con amplos sectores sociais. Un rasgo claro desa política foi o constante incumprimento de acordos aprobados en diferentes sesións plenarias, cuxa relación sería interminábel, mais dos que val a pena lembrar algún botón de mostra como as parcelas do Campo da Estrada-Maestranza, Casa Cornide, vello cárcere, fachada marítima, así como os espazos en desuso tutelados aínda polo Ministerio de Defensa. Extremando a nota cabe decir que a iniciativa volverá a situarse no terreo directo das reivindicacións dende a rúa facendo aflorar feitos e razóns que hoxe permanecen no caixón. En resumo, unha nova lexislatura na que o PSOE debe clarificar se vai a seguir comportándose como xestor dunha clase que conservaría no esencial o seu poder e privilexios na cidade a través da especulación urbanística, facilitándolles mesmo a redacción dos planeamentos urbanísticos para a consumación dos seus proxectos, ou vai apostar pola expansión do solo público reclamando o que está en mans doutras institucións, asumindo con ilo boa parte das reivindicacións que os movementos sociais desvelaron e puxeron en primeiro plano.
Ricardo Vales é expresidente da Asociación Veciñal de Atochas-Monte Alto e Responsábel de Comunicación da Plataforma Cívica Defensa do Común
A Policía Nacional detivo este pasado domingo á moza que causou “a maior parte das lesións” a dous axentes que interviñeron o pasado venres, día 19, para tratar de impedir unha liorta entre mozas na rúa Pérez Cepeda, na Coruña.
Segundo informou o corpo nun comunicado, a muller foi detida, como presunta responsable das lesións producidas, por un delito de atentado á autoridade e os seus axentes. A Policía Nacional informou que ao redor das ás 22,00 horas do pasado venres, unha dotación policial acudiu á rúa Pérez Cepeda ante a chamada de varios veciños que alertaban dunha liorta entre varios mozos.
No lugar, entre un tumulto dunhas 15 persoas, foron requiridos pola nai dunha moza, que manifestou, segundo relato policial, que a súa filla consumira algún tipo de sustancia estupefaciente e atopábase fóra de si.
Os dous policías acudiron a auxiliar á moza que reaccionou “violentamente e lanzou varias puñadas e lapotes aos axentes, conseguindo golpealos con algún deles”. Así, debido á súa agresividade, os policías inmobilizárona co obxectivo de que non se causase ningún dano a si mesma.
Desta forma, mentres o axentes mantíñana suxeita, algúns novos presentes no lugar empezaron “a empuxar e increpar aos axentes”. Nun momento dado, un viandante alertou aos axentes de que polas súas costas achegábanse dous mozos que portaban unha barra metálica, “con intención de agredilos”.
Ante isto, un dos policías incorporouse e dirixiuse a eles, e estes tiraron a barra ao chan e saíron correndo do lugar. Finalmente, conseguiron que a moza permanecese no lugar ata que chegaron os sanitarios e trasladárona en ambulancia a un centro sanitario para a súa valoración.
Non deixa de chover. Polo menos durante este Cluns 19 de xuño, onde as choivas e treboadas porán en risco (amarelo) á Coruña e outras 14 provincias da metade norte peninsular, segundo o prognóstico da Axencia Estatal de Meteoroloxía (AEMET).
Asturias, Cantabria, Burgos, León, Palencia, Soria, Navarra, Áraba, Guipúzcoa, Biscaia, Huesca, Zargoza, A Coruña e A Rioxa son as provincias que terán aviso amarelo por treboadas e choivas, afectando este último fenómeno tamén á Coruña con outra alerta amarela.
A inestabilidade durará boa parte da semana, malia que se espera que vaia mellorando de cara á fin de semana.
