A alcaldesa da Coruña, Inés Rey, declarou a súa “preocupación e sorpresa” pola imputación ao expresidente socialista José Luis Rodríguez Zapatero. “O Zapatero que eu coñezo non é o Zapatero dese auto xudicial”, afirmou.
En declaracións á Cadena SER, recollidas por Europa Press, Rey sinalou que está a ser unha semana “moito máis complicada”, xa que o Zapatero co que tratou é un “referente para moitos” e durante oito anos “mellorou a vida da xente sen ningún escándalo de corrupción”. “Doeríame moito se isto fose certo e creo que me doería aínda máis se non o fose, porque pase o que pase a imaxe do propio Zapatero e do partido queda danada”, lamentou, engadindo que agora “hai que agardar” e dar marxe para ver que se pode acreditar do que recolle o auto.
Para a alcaldesa coruñesa é “lóxico” que a dirección federal e os socialistas apelen á presunción de inocencia, porque é un “referente e un activo moi importante para á esquerda”, pero asegurou que están “profundamente preocupados e aínda medio en shock”. “O Zapatero que eu coñezo non é o Zapatero dese auto xudicial”, reiterou. Durante a entrevista, a mandataria local aproveitou para reivindicar o papel da esquerda “cando goberna” pola súa capacidade de “mellorar a vida das persoas”, ao tempo que destacou os datos económicos e de emprego de España no contexto internacional actual. Así, referiuse ás melloras nas condicións laborais, á baixada da taxa de paro e á posición do país a nivel internacional.
“Con tanta incerteza xeopolítica, con problemas que se escapan das nosas propias fronteiras, o que necesita o país é estabilidade e un liderado forte. Creo que iso representa o presidente do Goberno e cando cheguen as eleccións serán os cidadáns os que valoren a xestión”, indicou.
ELECCIÓNS MUNICIPAIS
En relación coa política municipal, a mandataria defendeu a xestión levada a cabo na Coruña nos últimos sete anos. “As contas das municipais son a xestión, e na Coruña levamos sete anos gobernando unha cidade que é motor económico, social e cultural de Galicia e que estaba nun letargo”, subliñou. Inés Rey resaltou que hoxe a cidade é “líder” en ámbitos como a transformación dixital, a industria, a creación de emprego, as políticas de vivenda e as actividades culturais. Ademais, afronta a súa “segunda gran modernización” cun proxecto que a transformará nos próximos anos.
Neste sentido, lembrou que a Coruña foi a primeira cidade de Galicia en aplicar a declaración de zona de mercado residencial tensionado “a pesar de todas as dificultades, trabas e pedras no camiño” por parte da Xunta. “A media do aluguer baixou arredor de 100 euros despois de tomar esta medida”, asegurou.
Tamén cargou contra o Goberno galego pola coordinación aeroportuaria, reclamando maior implicación. “Quen ten que asumir a bandeira da coordinación aeroportuaria é a Xunta de Galicia, é o presidente da Xunta”, insistiu, defendendo unha política conxunta para facer competitivos os tres aeroportos galegos fronte a outros. Finalmente, respecto das súas expectativas electorais ante unha posible candidatura de Miguel Lorenzo polo Partido Popular, asegurou que concurrirá aos comicios “co aval da xestión” e con “propostas para seguir transformando e modernizando” a cidade herculina.
