A irrupción dos vehículos verdes de Bolt na cidade fan reflexionr sobre a falta dunha ordenanza específica para regular as VTC (vehículos de transporte con condutor).

Así o entende o movemento Sumar, que pide ao Concello e á Xunta que actúen para protexer o sector público do transporte, tendo en conta que a nova ordenanza que formula o Concello podería abrir a porta á competencia privada, permitindo autorizacións urbanas de VTC, algo que “resulta incompatible coa defensa dun modelo público de mobilidade”, para Sumar.

Lembran que a normativa vixente —a Lei de Ordenación dos Transportes Terrestres (LOTT), o seu Regulamento (ROTT) e o Real Decreto-lei 13/2018— deixa claro que os servizos  urbanos das VTC só poden realizarse baixo condicións establecidas polas Comunidades  Autónomas e os Concellos. “A Xunta ten competencias para fixar regras e limitacións nos traxectos urbanos, e o Concello pode facelo mediante a súa ordenanza de mobilidade, sancionando prácticas irregulares. Pero na Coruña, en lugar de corrixir o baleiro legal que existe, o goberno local semella disposto a abrir o mercado do transporte público á competencia privada, o que resulta incomprensible nun executivo que se define como progresista e que conta co apoio do BNG”, denuncia.

“É preocupante que a alcaldesa Inés Rey poida estar valorando autorizar licenzas de VTC —afirma Trinidad Palacios, voceira de Movemento Sumar Coruña—. Tiñan diante un problema coñecido e, en lugar de actuar para protexer o público, elixen camiños que poden ser lesivos para o servizo de mobilidade da cidade”, denuncian, apoiando as reivindicacións dos taxistas na manifestación celebrada en Santiago esta semana.

As plataformas VTC non son un servizo público e operan baixo modelos de tarifas dinámicas que poden dispararse nos momentos de alta demanda, como á saída dun concerto ou nun episodio de choiva intensa. Un informe estatal difundido pola Cadena SER en maio de 2025 estimou que os usuarios destas plataformas pagan arredor de 42 millóns de euros anuais en sobrecustos, unha realidade que evidencia a falta de control e a desigualdade de condicións respecto ao transporte regulado.

Por todo isto, Movemento Sumar Coruña esixe “á Xunta de Galicia que estableza de inmediato un marco normativo firme e claro para as VTC, e ao Concello da Coruña que
descarte calquera proposta que implique abrir o transporte público á competencia privada e aposte por unha regulación que defenda o interese xeral, a igualdade e a mobilidade sostible”.

Novas relacionadas

Os VTC poderán circular pola Zona de Baixas Emisións da Coruña nas mesmas condicións que os taxis

A Xunta interpuxo 112 multas a vehículos VTC por servizos urbanos na Coruña

A Xunta reclama á alcaldesa da Coruña “exercer as súas competencias” sobre os VTC