O Grupo de Investigación e Análise de Tráfico da Garda Civil investiga a dous adolescentes de 15 e 16 anos de idade por conducir un coche pola localidade coruñesa de Bergondo sen obter nunca o carné.
Os feitos remóntanse ao pasado 12 de abril, cando ambos foron sorprendidos conducindo un vehículo, a pesar de ser menores de idade. Todo iso tras ser detectados despois de subir varios vídeos a redes sociais manexando un coche por estradas secundarias de Bergondo.
Tal como explica a Benemérita, os vídeos revelaban que o automóbil circulaba a unha velocidade superior á permitida, o que aumentaba o risco de accidente. Ademais, eran menores de idade, legalmente inhabilitados para obter o carné.
Xa está en marcha a V edición do Mera Sup Festival, que terá lugar na primeira fin de semana de maio. Unha cita consolidada no circuito nacional que fusiona no areal oleirense deporte, mar, música e gastronomía para ofrecer un experiencia inesquecible para todos os asistentes.
Durante o festival poderase gozar das competicións internacionais de Stand Up Paddle: o Campionato de España e Galego de Praia, que consiste en completar un circuíto entre ondas que porá a proba a técnica, destreza e resistencia dos pilotos, e que contará coa participación de deportistas de Hawai, Dinamarca, Sudáfrica, Xapón, Inglaterra, Francia, Portugal, Italia….
Tamén se disputará o Campionato de España de Sprint Marítimo, co distancias máis curtas. E por último, o Campionato de España de Prone, atraendo aos mellores deportistas de cada modalidade para ofrecer un espectáculo deportivo de primeiro nivel, tanto para os pilotos e o público.
Música e moito máis
Ademais das apaixonantes competicións, SupMera ofrecerá, dende o venres e ata o domingo, unha gran variedade de actividades para todos os gustos, como música en directo a cargo de DJs e bandas como Samba dos Amigos, Anuncia ou Juego Sucio, deporte adaptado liderado por Enki, obradoiros de manualidades, xornadas de limpeza de praias e recollida de residuos con WeSustainability, rutas e saídas de paddle surf, e clínicas e sesións para quen desexen perfeccionar as súas habilidades neste deporte acuático.
Un dos pratos fortes do evento será a presenza de deportistas de recoñecido prestixio como Connor Baxter ou Guillermo Carracedo. Connor, de Hawai, cun balance de 10 vitorias no Campionato do Mundo e Carracedo, xa coñecido na provincia (é natural de Louro, Muros) é Campión de Europa de Sup Surf, compartirán as súas experiencias, consellos e habilidades, inspirando novos talentos e afeccionados ao sup.
O Xulgado do Social número 6 da Coruña condenou á empresa que xestiona o centro deportivo do Castrillón, Viraxes, a readmitir un traballador ao que, segundo a CIG, “despediu en represalia por negarse a manifestar a súa afiliación sindical”.
A sentenza, explica o sindicato, “declara nulo o despedimento ao entender que a empresa vulnerou os dereitos fundamentais do monitor, concretamente o dereito á liberdade sindical e o dereito a non sufrir discriminación”.
O xulgado condena á empresa “a readmitir de inmediato ao traballador no seu posto, a abonarlle os salarios deixados de percibir e impón, ademais, o pago dunha indemnización pola vulneración dos dereitos fundamentais”.
As ANPAS dos centros de ensino público de Oleiros, en colaboración co Concello de Oleiros, organizan esta tarde de xoves 25 de abril, 17.00 horas, no Auditorio de A Fábrica (Perillo), unha intresante charla sobre o impacto das pantallas na infancia.
A ponente será a coñecida María Couso, de @play.funlearning. Licenciada en Pedagoxía en 2009 pola Universidade Nacional de Educación a Distancia (UNED), leva 17 anos prestando apoio psicopedagóxico na chegada de nenos adoptados procedentes doutros países (China,
Rusia, Etiopía), traballa con nenos con dificultades de aprendizaxe e trastornos como dislexia e TDAH (atención á diversidade). Dende 2019 ofrece formacións ó profesorado e ás familias de forma aberta por todo o territorio nacional co seu proxecto “Cerebro y Juego” promovendo o uso de xogos de mesa como ferramenta de aprendizaxe (ABJ) e como metodoloxía facilitadora de procesos cognitivos.
Trixésimo terceiro partido de Imanol Idiakez como adestrador do Depor en partido oficial (19V 10E 4D).
— — —
Non é doado dar por feito algo neste club, pese a que as contas pintan moi ben. Máis aló dos puntos e das vitorias, a seguridade é a gran baza nesta recta final da tempada. Seguridade no xogo, seguridade na defensa, seguridade nos trocos e seguridade na banqueta. Estes poderían ser os alicerces que sustentan a segunda volta branquiazul, xa que por fin, se atoparon os ingredientes perfectos para cociñar un ascenso. Imos gardar un pequeno oco para a desgracia de todos os anos porque, se de algo sabemos polo noroeste é de desgracias cando todo parece resolto a noso favor.
Seguridade transmitida pola forma de xogar, por encaixar ben as pezas e manter a tódolos xogadores activados. Salvo Pablo Valcarce, Paris Adot e Salva Sevilla, inéditos na segunda volta, Berto Cayarga, inédito ata esta fin de semana, Luis Quintero, nada de nada dende que veu ao club, o resto de xogadores tiveron a súa aportación nas 14 xornadas invicto no que vai de segunda volta. Seguridade na defensa pois tan só se recibiron 7 goles en contra en 14 xornadas e seguridade na banqueta, pois coa tranquilidade precisa Imanol Idiakez amosou á solvencia que se viña pedindo dende o principio da tempada. Menos mal que non houbo tortilla aló por outubro, porque outro Óscar Cano dinamitaría a moral de moitos deportivistas! Punto tamén para Soriano e o seu aguante con Imanol. Parece que, por fin, a paciencia aterrou en Riazor.
Poñamos algo de sentidiño no tema ascenso. A verdade é que os números acompañan e a inercia gañadora non parece ter fin. Aínda así, a nosa historia recente, non invita a festas antes de tempo. Imos trocar os fuciños de Arsenio polo sentidiño de Lendoiro. Esta semana invita ao optimismo, pois o Barça Atletic visita á Ponferradina e o Nástic á Cultural. Parece claro que de ampliar á distancia nesta fin de semana co segundo clasificado poderiamos ir enchendo as balaustradas de bandeiras.
Miguel Barreiro Bugallo. Coruñés e deportivista no exilio mesetario. Sufrindo ó depor dende 1988. O que sei de fútbol, o Depor empéñase en negarmo. Firme defensor do fútbol de botas negras.
O artista coruñés Enrique Tenreiro, que pintou en outubro de 2018 unha pomba na tumba do ditador Francisco Franco no Val dos Caídos, iniciou este mércores un peche nun escaparate dunha galería da cidade da Coruña pola “demora” na resolución do Tribunal do Supremo sobre o seu caso.
Así o expuxo, en declaracións aos xornalistas, con motivo dun peche que o propietario da galería, Camilo Chas, situou nunha “performance artística”, que periodicamente se fará no establecemento, e que o escultor enmarcou tamén nunha acción de protesta.
Faino, expuxo, para pór de manifesto a tardanza, ao seu xuízo, na resolución do Tribunal Supremo sobre o seu caso, despois de ser absolto dos delitos contra a liberdade de conciencia e de actos de profanación e danos en 2022. “A base do xuízo foi a hora da pintada”, lembrou tras precisar que o testemuño dun garda civil acreditou que “non interrompín a misa”. A pesar da súa absolución, presentouse recurso no Supremo, do que agora está á espera do seu fallo.
“Son case dous anos, pensas se se están tomando o seu tempo para dar a volta á sentenza, se me teñen que condenar prefiro que sexa agora, se cadra cun goberno posterior non habería minima posibilidade”, dixo no caso de que non se confirme a absolución e de que tivese que pedir o indulto.
REIVINDICAR A “LIBERDADE”
Enrique Tenreiro, que insistiu en que o seu obxectivo cando pintou a tumba de Franco foi reivindicar a “liberdade”, asegurou que a súa intención é estar tres días, en liña co exposto polo galerista que sinalou que “en principio” será ata o venres o peche.
Farao nun escaparate de tres metros cadrados, no que simulou unha habitación cunha pequena planta e unha televisión, unha mesilla, un váter químico e outros elementos como unha manta, ademais de libros.
Todo nunha performance que busca tamén evidenciar “que a xustiza é un servizo máis”. “Por que os españois temos que esperar a que o Supremo tarde anos”, sinalou. “Non podo estar tranquilo ata que ratifique a miña absolución”, apostilou Tenreiro, que vestirá un mono laranxa como “un preso en Estados Unidos” durante o seu peche.
Pola súa banda, Camilo Chas, explicou que no escaparate poderanse deixar comentarios, sen censura, e que haberá un foro no que a xente decidirá o venres que comida comerá o artista. O xoves convocaranse citas a través dunha rede social.
Vai coñecendo a xente da Coruña, e de Arteixo, a historia Manuel Puga y Parga “Picadillo”. O concurso de tapas que leva o seu nome xa é toda unha demostración da necesidade de traer ao século XXI a historia deste gastrónomo herculino que realizou un dos primeiros supervendas de cociña en todo o estado.
Para celebralo, e coincidindo co Día do Libro, este 23 de abril, a Real Academia Galega vén de subir ao Arquivo Galiciana a copia dixital do mecanoscrito de El rancho de la tropa, saído do prelo en 1909. O volume, que contén unha serie de receitas para un menú destinado ao sustento da milicia, é un bo exemplo do inconfundible estilo do autor, accesible, irónico e vitalista.
Neste libro de receitas, Picadillo invita, indicando ademais o custe en pesetas de cada prato, a seguir as súas instrucións para facer unha carne con patacas, un bacalao con arroz, unhas lentellas, un pote, unha chorizada, uns callos, unha fabada, ou, claro, un Rancho “Picadillo”. Un menú para manter á tropa firme.
Esta é unha das obras dun pioneiro da literatura gastronómica en Galicia, nado o 23 de abril de 1874, fai xusto 150 anos; un persoeiro que gozou de gran popularidade polos artigos e os libros que escribiu cun inconfundible estilo cheo de ironía e vitalidade
Fillo de Manuel Puga y Parga, alcalde de Santiago de Compostela e avogado de Curros tras a denuncia da Igrexa contra Aires da miña terra, el mesmo chegou a ser rexedor da Coruña. Morreu na vila herculina aos 44 anos de idade, por mor da pandemia de gripe de 1918.
Picadillo nun carro de vacas no pazo familiar de Anzobre, Arteixo-Fonte-Arquivo da RAG
Manuel Puga y Parga naceu no seo dunha familia acomodada. O seu pai, Luciano María Puga Blanco, avogado de Curros Enríquez no axuizamento pola publicación de Aires da miña terra, era tamén catedrático da Universidade de Santiago de Compostela, cidade da que tamén foi rexedor. Picadillo licenciouse en Dereito e traballou na Dirección Xeral de Rexistros e Notariado durante o goberno de Cánovas del Castillo, posto ao que renunciou tras a morte do político conservador nun atentado. De volta en Galicia exerceu como xuíz municipal en Arteixo e comezou a publicar artigos sobre temas costumistas e gastronómicos nos xornais coruñeses. Iniciaba así unha exitosa carreira como escritor que deixaría media ducia de volumes relacionados coa cociña.
A literatura culinaria de Picadillo amosa unha clara preferencia polos pratos e sabores populares, e a vontade do autor de exceder os límites do simple receitario. No seu libroPote aldeano-que a Academia posúe como parte da Biblioteca Emilia Pardo Bazán- Picadillo executa unha verdadeira novela de costumes de gran valor etnográfico, no que o xantar forma parte dos itinerarios do autor pola Galicia de primeiros de século XX. Descríbense alí os ritos e menús do Entroido, os casamentos, as romarías, as supersticións e as festas patronais e mesmo a preparación dunha caldeirada nunha embarcación cos mariñeiros que saíran faenar:
Momentos después, la olla es colocada en uno de los asientos transversales de la embarcación. Alrededor de ella nos sentamos todos, unos en el suelo, otros en la borda, otros en los bancos contiguos. Allí no hay manteles, ni servilletas, ni tenedores, ni fuentes, ni nada. Cada uno de los comensales tiene por todo servicio un pedazo de pan que le sirve de plato y un cuchillo que hace las veces de todo lo demás. Los cuchillos penetran en el recipiente y extraen de él la tajada que cada cual cree más apetitosa, y que, colocada sobre la rebanada de pan, va siendo ingerida paulatinamente y en un mutismo absoluto. Tan sólo hay una excepción, y esa excepción soy yo. Sírveme de plato la tapa de la olla, distinción que se me hace por el hecho de ser señorito, invitado y forastero.
Picadillo entre os asistentes a unha homenaxe ao marqués de Figueroa no Circo de Artesáns (1916)-Fonte Arquivo da RAG
‘La cocina práctica’: versos en galego dun futuro presidente da RAG
La cocina práctica (1913), o seu libro máis coñecido, recolle os artigos que fora publicando nas páxinas de ElNoroeste e ElOrzán. O volume, que gozou dun éxito inmediato e foi reimpreso en numerosas ocasións, conta cun limiar de Emilia Pardo Bazán. A autora describe a escola culinaria de Picadillo do seguinte xeito: “La cocina de Picadillo es clásica, tradicional; no á la antigua española, á la marinedina añeja; platos del tiempo de mi niñez, familiares; sabores amigos”.
A obra está inzada dos habituais retrincos humorísticos de Picadillo, ás veces na introdución dos pratos: La reina de las aves que está a nuestro alcance es indiscutiblemente la perdiz. Esto no quiere decir que las codornices sean malas, líbreme el cielo de semejante infamia. Más grandes las perdices, más jugosas por tanto, más fáciles de condimentar, tienen otra vista después de preparadas y son, en resumen, algo. Noutras ocasións, a ironía envolve a descrición dos cadros costumistas: Una tienda de esas mixtas en que se hermana el mollete con el petróleo, la harina con la cuerda de esparto, el explosivo con el cristal de diferentes tamaños, y la punta de París con el chocolate.
Fano da man dos activistas ambientais da Asociación Mar de Fábula, que desenvolve co apoio da Deputación, este singular proxecto circular (apañar liño mariño nas praias, analizalo, limpalo e despois crear arte con esas crebas) dende hai 5 meses que trata de fomentar hábitos saudables e axudar na reinserción social dos internos. Entre Crebas
Así, pasada tarde de luns, catro membros da Asociación Mar de Fábula achegáronse ao CIS armados con grandes caixas de peixe cheas de anacos de lixo plástico, ben lavadiño. Durante máis 3 horas, máis de 30 internos e internas do centro, de forma voluntaria, persoas adultas de todas as idades e perfis escoitaron as aventuras de Mar de Fábula na defensa do mar da boca de Virxinia, Pedro e María. O asistentes, escoitando, moi atentos, ás veces interrumpindo, aportando experiencias, ideas propias e gargalladas, fixeron da reunión un momento fondamentehumano e agradable onde todos éramos un.
Logo, noutra sala con varias mesas, entre ocurrencias, humor e invitacións de café con leite de máquina, o lixo plástico de Mar de Fábula foi collendo diferentes formas de maneira creativa e divertida baixo as mans destos homes e mulleres que están a deixar en nós unha fonda pegada de empatía e afecto porque coidar a natureza, limpar o mar, xuntos, crea equipo.
O consello de administración da Autoridade Portuaria da Coruña aprobou este martes o outorgamento dunha concesión á Fundación Marta Ortega Pérez (MOP) que ten por obxecto dar continuidade ás súas actividades cuturales no peirao de Batería. Na reunión tamén se adxudicou a obra da rede ferroviaria interior do Porto Exterior de Punta Langosteira.
A Fundación MOP solicitou unha concesión no peirao de Batería por un prazo de seis anos, con posibilidade de prorrogalo anualmente por outro tres anos. Unha vez tramitada a solicitude, o consello de Administración deu o visto e prace ao outorgamento da concesión.
Segundo recóllese na solicitude, “a Fundación consolida así o proxecto iniciado en 2021 no peirao de Batería cunha exposición fotográfica de Peter Lindbergh, tras acondicionar unha nave e uns antigos silos de cemento”, explica a Autoridade Portuaria. Esta mostra, lembra, tivo continuidade con exposicións das obras de Steven Meisel e, na actualidade, de Helmut Newton.
A previsión que expón a Fundación MOP é manter no tempo estas actividades, no mesmo espazo que xa utiliza agora coa figura dunha autorización.
Con respecto ao porto Exterior, o Consello adxudicou as obras da rede ferroviaria interior e a súa prolongación a Sacyr Construción, cun prazo de 23 meses e un orzamento de 22,3 millóns de euros que serán financiados polos fondos Next Generation da Unión Europea, como o resto do acceso ferroviario.
Tras a adxudicación, as obras da rede interior poderán comezar o próximo verán e finalizar a mediados de 2026, cando está previsto que conclúan tamén as obras da conexión coa rede, de forma que o acceso ferroviario do porto exterior xa poderá entrar en servizo.
O Día da Ciencia na Rúa volverá ser unha realidade o vindeiro 4 de maio no Parque de Santa Margarida. Un día de festa formativa, no que o alumnado de toda a provincia se convertirá en espallador científico.
Participarán un milleiro de escolares de 54 centros educativos, procedentes da Coruña, Betanzos, Cambre, Carral, Arteixo, Cerceda, Culleredo, Coristanco, Oleiros, Ordes, Pontedeume, Outes, Arzúa, Ribadeo, Miño, Ortigueira, As Pontes, Baio, Ribeira e Poio. Xunto a eles, persoal da investigación e divulgación presentarán un diverso programa de actividades para toda a cidadanía nas haimas da Cátedra Emalcsa-UDC, a Facultade de Ciencias da UDC, a Escola de Enxeñeiros de Camiños da Universidade da Coruña, o Centro Interdisciplinar de Química e Bioloxía (CICA), o Centro de Investigación en TIC (CITIC), o Centro Oceanográfico da Coruña, o Instituto de Investigacións Biomédicas da Coruña (INIBIC), a Fundación IMQ San Rafael, o Servizo Municipal de Educación da Coruña, a asociación Luzada da USC ou a Axencia Galega de Sangue, Órganos e Tecidos.
Haberá numerosas actividades paralelas arredor do edificio da Casa das Ciencias ofrecidas pola Asociación Galega de Xadrecistas-AGAX, a Agrupación Astronómica Coruñesa Ío, Bricolabs, Incude (Iniciativas Culturais e Deportivas Universitarias), UDCiencia I+D. Unha das novidades é o espectáculo de monólogos científicos da man de Ciencia Calidade a partir das 17.30 horas.
Ademais, ese mesmo día será de Xornada de portas abertas nos Museos Científicos e Castelo de San Antón.
