O Concello da Coruña inicia este ano 2024 unha nova intervención arqueolóxica no Castro de Elviña, concretamente na ladeira sur. Os traballos enmárcanse no proxecto ‘As dúas vidas dos poboados fortificados’, financiado polo Centro de Investigación das Paisaxes Atlánticas Culturais, e avanzan no obxectivo do Goberno de Inés Rey para a posta en valor do Castro de Elviña como espazo cultural e histórico.
En concreto, levará a cabo unha intervención na ladeira sur do Castro de Elviña, na contorna exterior do espazo amurallado, que analizará unha serie de anomalías nesta contorna identificadas por medios geofísicos no ano 2022.
Segundo o informe realizado no momento da identificación, obsérvase un gran potencial de acordo coa prospección xeofísica, así como unha particular localización das estruturas, situadas nun contexto aparentemente oposto ao castro, pero a uns escasos 50 metros de distancia.
O responsable do proxecto e director dos traballos, Samuel Nión, xa dirixira dúas campañas de escavación no Castro de Elviña, así como parte do equipo técnico, noutro tres. A súa investigación, centrada na Protohistoria do territorio atlántico, deu lugar a máis de 25publicacións e 40 charlas, varias delas centradas no Castro de Elviña, o seu desenvolvemento construtivo, a súa relación co ámbito mediterráneo e a súa implantación territorial.
A tope atópase estes días a Casa dos Xoguetes. Centos de persoas pasan estes días por este espazo que trata de fomentar a circulación de xoguetes, e loitar contra o consumismo exacerbado destas datas.
Se a 27 de decembro xa recibiran 5.000 xoguetes, a día de hoxe de seguro que son moitos máis. Xentes chegan cun tope de 10 xoguetes, e poden botar un ollo entre os que hai e canxealos por outros 10. Moitos simplemente fan oco para a chegada dos Reis na casa, pensando en darlle unha nova vida a eses xoguetes que a rapazada xa non usa.
Dende logo, unha fermosa iniciativa de economía circular.
A Casa dos Xoguetes está aberta na OMIC situada na Costa da Palloza, 8, en horario de luns a venres das 10.00 ás 19.00 horas e sábados de 10.00 a 14.00 horas.
Cinco mulleres e dez homes integran as candidaturas que o PSOE coruñés elevará á comisión executiva provincial de face á conformación das listas para as eleccións autonómicas do 18 de febreiro.
Así o informan nun comunicado despois de que aprobasen en asemblea extraordinaria os nomes das 15 persoas postuladas e que agora se remitirán á citada comisión.
De acordo co procedemento que regula a conformación de listas, a comisión executiva local recibiu estas propostas no prazo marcado polo que agora enviaranse para a conformación das listas provisionais, que serán, posteriormente, trasladadas á comisión nacional de listas para a súa aprobación por parte do comité nacional do PSdeG.
As candidaturas presentadas son as de cinco mulleres: Ana Alvite García, Cristina Calvo Espasandín, Silvia Longueira Castro, Begoña Rodriguez Rumbo e Elena Sarmiento Dez.
A estes nomes, súmanse dez homes: Julio Ernesto Abalde Alonso, Rafael Arangüena Sande, Eduardo Astray Viqueira, Jesús Fernández Diez, Adrián Fernández Pascual, Iván Guardado Porto, Manuel Losada Fernández, Julio Ransés Pérez Boga, Ramón Roca Montenegro e José Manuel Simoes Blanco.
O domingo 7 de xaneiro a ONG coruñesa Ecodesarrollo Gaia organiza no seu local (C/Antonio Pereira nº3 Baixo) unha recollida de material escolar para levar aos centros educativos de Senegal onde este tipo de material é moi escaso e precario.
Esta acción enmárcase na campaña “Este ano pídelle lapis aos Reis para Senegal”, na que a organización anima aos cativos coruñeses a ter en conta ao alumnado dos centros educativos senegaleses e pedir lapis e outro material escolar para eles.
Apenas levan 5 meses sobre os escenarios con este proxecto, pero xa levan vivido experiencias inesquecibles. Así o recoñecían Roi da Costa e Xavier Veirasao saír do Centro Penitenciario de Teixeiro despois de realizar o espectáculo #ImproDepor ante unhas 200 persoas privadas de liberdade.
A xornada serviu para pechar un programa da Fundación Érguete, financiado polo departamento de Servizos Sociais do Concello de Carballo, que tamén incluíu un taller de graffiti coa artista Iria Fafián, que permitíu que unha vintena de internos carballeses embelecesen cun fermoso mural un dos módulos da prisión.
Mural realizado por internos carballeses coordinados por Iria Fafián na entrada dun dos módulos
Así, no marco da política de abrirse ao mundo real que leva desenvolvendo o Ministerio de Interior e Instituciónes Penitenciarias nos últimos anos, e no que o CP de Teixeiro é un centro pioneiro, tentouse ofrecer un espectáculo cultural que sirva para que os internos coñezan outras formas de ocio e lecer.
Neste caso, foron Roi e Xavi os que trouxeron as risas a prisión co espectáculo de improvisación #ImproDepor (que conta tamén con Lucía Veiga e Patricia Castrillón). “Un espectáculo que sabes como empeza pero non como remata”, como explica, porque se desenvolve integramente coa participación dun público que se convirte en protagonista.
Divertidísima quedou a historia trenzada a través da verbas lanzadas por Roi, Xavi e unha interna nun xogo parecidop ao “palabras encadeadas”, aínda que neste caso non sexa un nome politicamente correcto. Só podían dicir unha palabra cada un para fiar unha historia creada na rapidez extrema, que provocou esas necesarias risas entre o público.
O show continúa cun xogo histórico. Coma se fose o bombo da Champions, outra asistente sobe ao escenario e saca unha bola na que vén sinalado un ano que foi importante para a historia do Real Club Deportivo. 1995, o ano da primeira Copa do Rei, do primeiro título. A partir de aí, os Roi e Xavi, tiran de talento e de axilidade mental para trasladarse a aquel ano e contar como podería ter vivido a persoa protagonista aquela final. Todo aderezado con cambios constantes de rexistro a través das diferentes emocións ou estilos cinematográficos que ían lanzando cada minuto os asistentes. Divertidísimas as historais inventadas no momento, salpicadas coas alucinantes imitacións das que es capaz Roi, actor especialista en dobraxe.
Unha xornada tremendamente especial, que permitiu que as persoas privadas de liberdade liberasen a súa tensión por un día, e que vexan de preto que é posible disfrutar da vida, pasalo ben, sen necesidade das drogas, o gran cabalo de batalla da nosa sociedade.
O primeiro bebé do ano 2024 en Galicia chámase Kyliam e naceu no hospital Álvaro Cunqueiro de Vigo xusto coas badaladas do novo ano, ás 00,00 horas. Paula, a terceira do ano, naceu na Coruña.
Segundo informou a Consellería de Sanidade, o neno pesou 3,420 gramos e é fillo dunha parella de pais primeirizos do concello pontevedrés de Gondomar.
A segunda en nacer este ano foi unha nena, Cloe, que tamén chegou ao mundo no Álvaro Cunqueiro de Vigo, no seu caso ás 00,04 horas, pesando 2,905 quilos. É a segunda filla dunha parella de Salvaterra do Miño.
O terceiro nacemento do ano foi o de Paula, que chegou ao mundo ás 00,10 horas deste 1 de xaneiro no Hospital Materno Infantil Teresa Herrera da Coruña. O bebé pesou 2,640 quilos.
O comité de empresa da UTE encargada da limpeza viaria na Coruña presentou denuncia contra o Concello “por incumprimentos dos contratos subscritos a través dos pregos de prescricións técnicos e administrativos”.
Así o informa nun comunicado o Sindicato de Traballadores de Limpeza (STL) con representación no comité e cuxos dirixentes están investigados por corrupación, branqueo e estafa.
Nel, explican que a decisión de remitir o caso á Fiscalía faise por non tomarse “as accións correspondentes” por parte do consistorio. “Máis ben caso omiso”, engade.
Ademais, asegura darán un tempo “prudencial” ao goberno local “para que tome as accións correspondentes”, á vez que lle lembra que “ten a capacidade de chegar a rescatar a concesión”.
Cuestionada respecto diso nun acto co PSdeG xunto ao seu candidato á presidencia da Xunta, José Ramón Gómez Besteiro, a alcaldesa, Inés Rey, eludiu pronunciarse respecto diso ao tratarse dunha cuestión no ámbito xudicial.
A alcaldesa da Coruña, Inés Rey, demandou á Xunta a creación do consorcio metropolitano de transporte, nun acto xunto ao candidato socialista á Presidencia da Xunta, José Ramón Gómez Besteiro, quen se comprometeu a crealo en caso de gañar os socialistas as eleccións galegas.
“A Xunta non comparece para apostar pola mobilidade”, argumentou a rexedora nun acto na parada do bus de Entrejardines e con presenza doutros alcaldes da comarca. Xa, noutra orde de cousas, cuestionada pola noite de Fin de Ano, resaltou que culminase sen “incidencias graves” e que só se rexistrase “algunha puntual”.
Ademais, polos proxectos para este ano, incidiu na entrada en vigor dos orzamentos municipais “que farán desta cidade punteira”, sinalou para aludir, ademais, a medidas enfocadas, entre outras cuestións, “á necesaria protección social”.
PRAZAS ESCOLAS INFANTÍS MUNICIPAIS
Por outra parte, o Concello da Coruña abre este xoves, 4 de xaneiro, unha nova convocatoria para a solicitude de prazas vacantes na Rede de Escolas Infantís Municipais (REIM), cunha oferta de 52 prazas destinadas a pequenas e pequenos nados entre os anos 2021 e 2023.
Segundo informa o goberno local, as solicitudes poderán formalizarse ata o vindeiro venres 12 de xaneiro, ambos inclusive. Estas prazas, correspondentes ao curso 2023-24, repártense entre seis do oito escolas infantís municipais.
Trátase da EIM Agra do Orzán, EIM Arela (Elviña), EIM Carricanta (Castrillón), EIM Os Rosales, EIM Luís Seoane, EIM de Monte Alto e EIM Vos Cativos (Palavea).
A gran maioría das prazas ofertadas nesta nova convocatoria correspóndense coas aulas de 2-3 anos, para nenos e nenas nacidos no 2021, tendo a totalidade das prazas ocupadas en lasaulas de 0-1 anos e de 1-2 anos, coa excepción dunha única praza dispoñible neste último tramo para a EIM Os Cativos de Palavea.
Son datas moi difíciles para as xentes con menos recursos. O Nadal fainos volver, á meirande parte da sociedade, ao seo da familia, pero son moitas as persoas que non teñen familia coa que ir pasar a Noiteboa ou a noite de Fin de Ano. Hai xente que, nin sequera, pode dispoñer dalgo quente para cear.
Coa intención de ofrecer un detalle que permita converter estas dúas datas en algo especial, por pequeno que sexa, a Fundación Érguete, no seu punto de calor-café do programa Sísifo, desenvolve a campaña “Nadal Solidario”, gracias á colaboración da Fundación la Caixa. Unha campaña que xa leva anos realizándose, e que xa é unha tradición entre as persoas que non teñen fogar ou que teñen menos recursos, como acontece coa indispensable Cociña Económica.
E por pequeno que sexa o detalle (un polo asado con patacas, uns bombóns e unha mantiña), a xente amósase tremendamente agradecida coas educadoras sociais Carolina López Lima e Sueli Aller,que realizaron o reparto nesta mañá de dominto 31 de decembro (como o día de Noiteboa) e que contaron coa colaboración dos pequenos Telmo e Mauro, que se animaron a darlle así un toque aínda máis especial a xornada solidaria.
Telmo e Mauro colaboraron co reparto
Sísifo
O agarimo que destilan as conversas entre as case 50 persoas que pasaron polo local de Sísifo, situado no Barrio das Flores, e as profesionais, dan conta da necesidade de que haia entidades que traballan directamente a pé de rúa.
O programa Sísifo leva en Coruña dende 2006, e permite que xentes sen fogar dispoñan dun lugar onde poden almozar, ducharse, lavar a roupa, cargar o móbil… ou tamén recibir apoio psicolóxico das profesionais, e mesmo axuda e acompañamento para pedir e acodir a citas médicas ou outras máis burocráticas.
Un servizo realizando dende o respecto máximo e o cariño que culmina con novas como as que vivimos esta mesma mañá: Jesús (nome ficticio), un usuario habitual, vén de atopar traballo, e marcha para Santiago absolutamente convencido de quere pasar páxina, de que non quere estropearse máis a vida coas drogas, e de que está preparado para volver a unha vida normal.
Carolina López Lima e Sueli Aller no Nadal Solidario en Sísifo
Non todo foron boas novas, Leticia (nome tamén ficticio doutra usuaria) non puido acodir por segue con grandes problemas de pulmón e foi a sua parella a que se achegou polo polo asado; ou María, que acaba de perder ao seu pai e aínda non ten forzas para esinar o seu sorriso habitual a pesar da escasa dentadura que lle queda despois de loitar moitos anos contra as drogas.
Cando menos, Óscar, Leticia e María, ademais doutras máis de 40 persoas, terán un polo asado ben rico que levar á boca esta noite de Fin de Ano.
A cousa viña, e mantén, unha marea de incerteza que provoca bastante desazón no electorado da esquerda progresista galega que segue vendo no BNG unha baza excesivamente sectaria. E esa incerteza é constantemente ratificada polas idas e vidas dos propios representantes dos diferentes partidos que conforman esa ala do espectro político.
Por un lado a dirección de Madrid non apoiaba o acordo con Sumar asinado pola dirección galega; mentres Pablo Iglesias, fundador de Podemos, reclamaba que non se presentaran e pedía o voto para o BNG. Pola outra banda, outro dos fundadores, Juan Carlos Monedero, apostaba polo contrario, que foran en coalición con Sumar.
Pero, ao final, falaron os inscritos, que é o poder supremo do “morados”, e dixeron “non” ao acordo de Sumar por unha importante maioría, máis do 62%.
A votación incluía tamén que candidatura irá ás eleccións e ó o 41% dos inscritos votou pola lista “oficialista”, a de “Transformar Galicia”, que encabeza a ex edil da Coruña Isabel Faraldo, (recibiu 2513 votos) fronte a un 34% que apostou pola “non oficialista”, a de Rexurdir Galicia. No medio, case 24% que votaron en branco, 595 persoas.
Faraldo competirá ao Marta Lois, candidata de Sumar, por recibir ese voto progresista non tan nacionalista, coa sombra das eleccións municipais, onde en cidades como a nosa, a falta de entendemento entre Por Coruña (formada por Podemos, EU e Alianza Verde) e a Marea Atlántica, provocou que ambas forzas quedasen fóra do pleno malia contar con máis de 4.000 votos cada unha.
