Fermosa homenaxe a que vai render a Asociación Xérmolos e a Irmandade Manuel María, este vindeiro 8 de setembro a un dos coruñeses máis comprometidos coa cultura galega. Coincidindo co cabo de ano do poeta lucense, as entidades homenaxean cada ano na vila onde naceu e onde está enterrado, en Outeiro de Rei, a persoeiros singulares e comprometidos coa nosa identidade.

”Todos os anos a Asoc. Xérmolos e a Irmandade Manuel María honramos a memoria de Manuel María celebrando a súa obra e vida, con persoas singulares e especiais. Facémolo ofrecendo de agasallo “a navalla de Manuel María”, pois el coleccionaba navallas, non para ferir a ninguén, senón, como dicía el, pola contra para partillar pan, queixo na mesa, para compartir amizade”, explica o coordinador das entidades Alfonso Blanco.

Este ano, ademais da homenaxe a título póstumo a Suso Fernández, da Libraría Bahía de Foz, gran amigo do poeta e narrador, as entidades homenaxearán ao noso Xurxo Souto. “Queremos agasallar coa navalla de Manuel María a Xurxo porque é un home exemplar, para as entidades da Terra Chá, gran amigo e transmisor e espallador da obra do poeta. Berrando “Manuel María, Gaiteiro!”, Xurxo pregoa a grandeza, inmesidade, a exemplaridade da obra do poeta. Xurxo exemplifica que é posible estar comprometido no noso país, de transmitir paixón e forza”, sinala Blanco.

A homenaxe arrincará cun xantar no Río Ladra. Ás 17 horas terá lugar un recital nas Penas de Rodas; de seguido ás 18 horas prego no cemiterio de Outeiro de Rei e para rematar, ás 19 horas celebrarase un rito compartido no Campo de Santa Sabela.

Para reservar, podedes contactar no 646413890.

As palabras de Xurxo

Leremos estes días un artigo que está preparando Xurxo, pero xa nos deixa estas verbas sobre a homeaxe:

Recibir a navalla de Manuel María é para min a felicidade. Neste nome e neste símbolo prodúcese unha auténtica “conxunción astral” na biografía das miñas emocións.
Dende a Terra Chá a poesía de Manuel María ilumina Galiza toda. Eu tiven a sorte de que fose o meu mestre. Nos dez anos que residiu na Coruña, na última etapa da súa vida, mantiven con el unha relación moi estreita. Calquera dúbida sobre calquera aspecto da cultura galega atopaba axiña resposta na súa palabra. Mesmo tiven a honra de ser convidado varios anos por Saleta e mais el ao xantar do día da súa onomástica, na casa da rúa Fonte Gundín, con vistas ao mar da Marola.
Absoluta felicidade tamén, porque a distinción provén directamente Xermolos, persoas tan queridas, sempre baixo o abeiro de Alfonso Blanco, coas que puiden colaborar nun espectáculo marabilloso: O “Pardiñazo”, o XL aniversario do Festival de Pardiñas.
E digo que é unha conxunción astral, porque a outra persoa homenaxeada, neste caso “in memoriam” é Suso do Bahía, sabio focego. O verán pasado, a Orquestra Bravú Xagai tocamos en Foz e botamos unha peza dedicada a el e mais a Manuel María.
Espiral das emocións que non acouga. Con Covadonga Carrasco e Xoán Creus hai anos visitamos unha vez máis a casa do poeta. Queriamos escribir unha longo artigo, precisamente, sobre a súa “colección de navallas”.
En fin, 8 de setembro, “lucem candidiore nota” que din os latinos. Día de absoluta felicidade, digo eu.
Gratitude infinita, Xermolos.
Que medre a palabra de Manuel María!

Xurxo Souto, Gaiteiro!

O músico Richi Casás xa lle dedica estas palabras a Xurxo: