Rematou unha nova edición do Festival Mar de Mares e fíxoo co xesto máis poderoso da súa actividade: unha limpeza dos fondos mariños do peirao.
Uns 80 voluntarios (entre eles 40 mergulladores profesionais) conseguiron rescatar 2 toneladas de lixo da zona da Mariña. Algo menos que nas últimas edicións, pero é certo que tamén foron menos a cantidade de persoas participantes.
Pechou así o Festival 10 días de actividades (exposicións, conferencias, xornadas na natureza para avistamento de aves mariñas, monólogos, cinema…) que puxeron o foco no coidado da nosa contorna perspectiva educativa, lúdica e social, gracias ao compromiso da entidade Redes de Sal.
Porque “O mar non é un vertedoiro do mundo” e a nosa obriga é coidalo, de aí o SOS lanzado dende o festival.
O home detido pola Policía Nacional da Coruña como presunto autor de matar a unha muller nunha vivenda do barrio da Sacra Familia con quen mantiña unha relación sentimental está pendente do seu paso a disposición xudicial. Segundo fontes consultadas por Europa Press, eran parella e o nome da vítima figuraba no sistema de seguimento integral de caso de violencia de xénero (VioGén). O crime xa foi confirmado como violencia machista.
Os feitos producíronse minutos antes das 07.00 horas deste domingo, o a rúa de San Isidro e foi o 112 Galicia o que recibiu a chamada de alerta. O home foi detido no domicilio onde se produciu o crime. Agora, a Policía Nacional investiga os feitos e a relación entre a muller e o detido. A vítima recibiu decenas de puñaladas con “bastante asañamento”, segundo informou a subdelegada do Goberno na Coruña, María Rivas, en base aos resultados da autopsia.
En rolda de prensa para dar conta deste asunto, Rivas explicou que o home confesou á súa exmuller –coa que ten dous fillos en común– “que acababa de matar á súa parella actual” e foi ela quen avisou a Emerxencias. A continuación, relatou, a Policía Nacional personouse no domicilio no que convivían, situado na rúa San Isidro no barrio da Sagrada Familia, onde se procedeu á detención do presunto agresor e localizouse o “coitelo” utilizado no crime machista. Previsiblemente, o home pasará este martes, día 17, a disposición xudicial.
IGUALDADE ELEVA A 14 AS MULLERES ASASINADAS NO QUE VAI DE ANO
O Ministerio de Igualdade elevou a 14 as asasinadas este ano por violencia machista e a 1.308 desde 2003, cando se empezaron a solicitar datos, tras confirmar o caso da muller da Coruña. Igualmente, o departamento que dirixe Ana Redondo indicou que se trata dunha muller de 49 anos asasinada presuntamente pola súa parella este domingo, 15 de xuño. A vítima tiña dúas fillas menores e tres fillos maiores de idade froito doutra relación. Existían denuncias previas por violencia de xénero contra o presunto agresor.
Con este caso, Galicia suma dous crimes machistas en 2025, mesma cifra que Cataluña. A única comunidade que as supera é Andalucía, con catro asasinatos por violencia de xénero. Mentres, Asturias, Baleares, Canarias, Castela e León, A Rioxa e Estremadura teñen un caso cada unha.
A Coruña foi partícipe dunha nova mobilización artellada por 119 entidades do país que forman parte da iniciativa PararLaGuerra.es. Un movemento apoiado por centos de profesionais destacados da Cultura e miles de cidadáns que chaman á cidadanía para unirse contra o Xenocidio que están cometendo en Palestina, a facer todo aquilo que estea nas nosas mans e a atoparnos nas rúas para que cada vez sexa maior o clamor polo alto o fogo definitivo e o cumprimento inmediato das condicións máis básicas que esixe a legalidade internacional e os Dereitos Humanos.
Así, como en máis de 125 cidades de todo o estado, un cento de persoas concentrábanse este pasado sábado no Obelisco, baxio o lema “Polo FIN do XENOCIDIO. Por unha Paz Xusta. Palestina Libre Alto o Lume Definitivo Nin terrorismo, nin xenocidio”.
“O que está a acontecer en Gaza é un xenocidio que ten como obxectivo final o exterminio e a limpeza étnica de máis de dous millóns de gazatíes, a metade dos cales son menores. Este é o criminal proxecto de Netanyahu, co apoio incondicional de Trump, que non ten ningunha xustificación”, sinalaba o manifesto.
Lembraron que “estamos ante un dos momentos máis crueis e mortíferos da matanza que o goberno israelí leva vinte meses perpetrando contra unha poboación civil inocente, desarmada e indefensa. É urxente un alto o fogo definitivo como primeiro paso para poñer fin ao xenocidio”.
“Todos os días as tropas de Israel perpetran un sen fin de crimes de guerra. Todos os días bombardean hospitais, escolas, refuxios ou tendas de campaña. Todos os días destrúen vivendas, campos de cultivo, infraestruturas de auga potable e saneamento, sen máis propósito que o exterminio e que Gaza sexa inhabitable. Todos os días acribillan a homes, mulleres, nenos e nenas que só claman por axuda.”
“Á extrema violencia das bombas súmase o rigor dun asedio que condena á fame total ao pobo palestino. A ONU asegurou que máis de 14.000 bebés poderían morrer en Gaza se a axuda humanitaria non chega a tempo. Sen embargo, puidemos ver imaxes do exército israelí bloqueando a axuda ou incluso disparando contra a multitude desesperada que acode a conseguir algo de comida.”
Ademais da marea xerada nos últimos tempos coas carreiras populares, poucas actividades reúnen tantas familias arredor do deporte como o Día do Deporte na Rúa. Un evento que cada ano se fai máis curto, pero que serve para que moitas crianzas descubran novos desafíos deportivos.
A contorna de Riazor estivo ateigada durante toda a mañá dominical, puidendo practicar 63 modalidades deportivas gracias á presenza de 93 entidades. Máis de 1000 persoas involucradas nun evento que xunto milleiros de persoas no ventado barrio herculino.
Se no Orzán había zona de surf, polo areal de Riazor, podíanse practicar waterpolo ou piragüismo, ademais dos xa habituais quiddich, rugby, fútbol gaélico, volei e fútbol praia. As “rojigualdas” do grupo militar das carreiras de obstáculos non pasaron desapercibidas…
Na explanada de Riazor, ademais do numeroso público entregado ao zumba, había baloncesto, balonmán, futbito, hockey… na zona do paseo había esgrima, e pola banda da Tribuna do estadio deportes de contacto ou tenis. Toda unha marea de posibilidades para seguir fomentando hábitos de vida saudables entre a rapazada.
Rematou co sorteo de varios regalos a edición número 38 do Día do Deporte na Rúa, esperando que o ano que vén o Concello poida estirar un pouco o horario, pois de 11:00h a 14:00h quédase bastante curto para a marea de xente que hai.
Mundos Digitales, o Congreso Internacional de Animación, Efectos Visuais e Novos Media, celebrarase entre o 3 e o 5 xullo na cidade heculina e contará cos “máximos responsables dos proxectos nacionais e internacionais máis destacados do panorama audiovisual do ano”. Terá a súa sede no Palacio de Exposicións e Congresos da Coruña (Palexco) e a produción virtual será un dos seus temas principais. Así o explicaron os organizadores durante a presentación deste encontro que tivo lugar no novo estudio virtual Coruña Estudo Inmersivo da Cidade das TIC.
Na mesma, participaron, entre outros, o Concelleiro de Fomento e Promoción da Coruña, Gonzalo Castro; o director da Axencia Galega das Industrias Culturais (AGADIC) da Xunta de Galicia, Jacobo Sutil; así como o deputado provincial Bernardo Fernández. Nesta edición, segundo concretaron, o prestixioso director Tim Miller, responsable de producións como ‘Deedpool’, ‘Terminator: Dark Fate’ ou das antoloxías ‘Love, Dead & Robots’ e a recentemente estreada ‘Secret Level’, será galardoado co Premio Especial. A cita, ademais do Festival Internacional de Curtametraxes de Animación, contará coa súa tradicional Feira de Emprego, outro dos alicerces de Mundos Dixitais, “unha actividade que se afianzou como unha das máis relevantes do congreso e que continúa sendo unha das máis grandes de Europa por número de empresas e asistentes”, recalcaron os seus promotores.
Día emocionante o vivido o sábado en Borobás. Tiña lugar a entrega dos premios da XL edición do Premio Antón Losada Diéguez, convocado polos concellos de Boborás e O Carballiño, co patrocinio da Deputación de Ourense. E as pequenas pezas escultóricas, e os 6.000€ de premio, recaeron en dous herculinos: Alberto Pombo e Manuel Rivas. Os seus traballos foron escollidos como os mellores de 2024 polo xurado, constituído por membros dos Concellos, pero tamén da RAG, das tres Universidades galegas e da Deputación ourensá.
O xurado sinalou a contribución ao coñecemento da «outra música» e destacou o tratamento da abordaxe histórica coa nova metodoloxía dos estudos culturais argumentando que: «Desprega ante o público lector a obra dunha xeración que soubo arrequecer o panorama musical do século XX desde o compromiso coa cultura de noso».
O de Arteixo, afónico polo festival pangalaico, contou como anécdota que de pequeno non era un gran lector, pero en 3º ESO, Sechu Sende e Henrique Rabuñal chegaron a clase cun libro de Manlo Rivas e “os meus pais puideron celebrar esa vitoria de que o seu fillo por fin quería ler”. Pombo viaxou ao Mozambique dos anos 50 para viaxar ás orixes da música pop galega, e recordou o analfabetismo da súa propia avoa, para agradecer os esforzos da súa familia.
Manolo Rivas
No caso de Manolo Rivas, flamante premio nacional de literatura, e recentemente recoñecido como Coruñés do Ano polo Circo de Artesáns, o xurado distinguiu a súa última novela, Tras do Ceo, de Edicións Xerais, como gañadora da modalidade de Creación Literaria, destacando a calidade literaria e lingüística dunha obra que, recuperando elementos xa clásicos na produción do autor, constrúe un universo narrativo absolutamente actual e pon o foco no choque entre a natureza e unha civilización que se revela como destrutora do hábitat que nos fai seres humanos.
Recoñeceron que o escritor «manexa con suma habelencia unha progresiva tensión narrativa» a partir de escenas marcadas pola desigualdade, a explotación, a violencia e a destrución, co obxectivo de provocar a reflexión no lector e de penetrar nas emocións e sentimentos máis profundos, aqueles que resultan difíciles de expresar con palabras.
Normalizar o uso da lingua entre a mocidade da cidade a través da música. Así funciona o proxecto Aquí tamén se fala, que volvía facer historia este venres 13 de xuño, convertindo á rapazada dun instituto nos promotores dun festival profesional, sendo o único festival do mundo promovido por un instituto público. A segunda edición deste festival de barrio, aberto e de balde, convertiu música galega contemporánea nun elemento de identidade, e segue conseguindo revertendo o rumbo lingüístico da nosa cidade.
A praza da Tolerancia, foise enchendo co paso da tarde, como tamén pasaba no SondoCamiño, pasando das bandas máis novas como os Ulex, que arrincaba a festa, a bandas asentadas no panorama galaico.
Foron máis de 5.000 mozos e mozas de toda a provincia as que encheron de maxia e enerxía a praza, e se puido comprobar o fenómeno “fan” que están a provocar as bandas galegas na nosa xuventude.
Polo camiño, o alumnado do IES Rafael Dieste sentíanse como verdadeiros promotores, tratando cos técnicos e cos artistas como se dunha produtora profesional se tratase. Este ano ademais foi máis numeroso o alumnado implicado na organizació, completando todo un exercicio laboral de máxima esixencia para a rapazada que lidera este proxecto que leva mobilizados 250 centros educativos (outra vez comezando de cero) e 25.000 estudantes de toda Galicia.
Ao carón, dando conta da comunidade xerada, a Asociación de Veciños metendo unha man en todo, coas cantinas pero sen vender alcol.
Dos sons punkeiros da banda compostelá a praza baixaba o ritmo para atender ás letras traballadas de PAVA. As Lucía Aldao, Analis e compañía demostraron estar listas para grandes citas.
Chegaba o ton máis tradi cos Alana, trio formado por Antía Vázquez (Oleiros), Pablo Castro (Vimianzo) e Eloy Vidal (Ponteceso). As pandeiretas e os sons electrónicos fixeron erguerse e bailar a tope á mocidade de Labaañou.
Era a hora da sorpresa, que viña directamente relacionada coa campaña para cambiarlle o nome ao equipo da cidade. Jesús Suárez fixo seu o lema #ODeporédaCoruña, puxo a camiseta de Javi Quiroga (@onovonormal) e cantou ben alto o seu himno branquiazul Mar de Fondo”, coreado polo entregado público coruñés.
Quedaba a traca final, e volveu ser o Chicho de Ortiga (o ano pasado foi con Boyanka Kostova), o que, xa fóra do horario infantil, convertiu a Tolerancia nunha verbena salvaxe. Tremendo como consegue facer romper a bailar á chavalada coas súas cumbias e demáis ritmos cari-galaicos cheos do vento máis clásico verbeneiro.
Movendo a cintura rematou a noite, demostrando que a música galega contemporánea é todo un reclamo, aínda que a media coruñenta non se dea por decatado.
A Policía Nacional da Coruña detivo a un home como presunto autor de matar a unha muller nunha vivenda do barrio da Sagrada Familia. Segundo explicaron fontes coñecedoras do suceso, os feitos producíronse minutos antes das 07.00 horas deste domingo, na rúa de San Isidro, e o foi o 112 Galicia o que recibiu a chamada de alerta.
O home foi detido no domicilio onde se produciu o crime. Agora, a Policía Nacional investiga os feitos e a relación entre a vítima e o detido. Pola súa banda, a Delegación do Goberno contra a violencia de xénero informou, a través do seu perfil oficial da rede social ‘X’, que solicitan datos por este asasinato por presunta violencia de xénero.
INÉS REY EXPRESA A SÚA “MÁIS PROFUNDA CONSTERNACIÓN”
A alcaldesa da Coruña, Inés Rey, expresou a súa “máis profunda consternación” e a súa “firme condena” ante o suposto crime de violencia machista ocorrido este domingo no barrio da Sacra Familia. Nunha mensaxe no seu perfil oficial da rede social ‘X’, a alcaldesa da cidade herculina mandou o seu apoio e agarimo para a familia da vítima. “O machismo mata. Erradicalo é unha responsabilidade colectiva”, remarcou. Así mesmo, a alcaldesa convocou á cidadanía este luns ás 20.00 horas na Praza de María Pita a unha concentración en “repulsa” do sucedido.
A sección primeira da Audiencia Provincial da Coruña xulga este martes, 17 de xuño, a un home para o que se piden 13 anos de cárcere por golpear, vexar e controlar á súa muller durante 15 anos de relación. “Instaurou desta forma no fogar un ambiente presidido polo temor e a submisión, onde non dubidaba en evidenciar co seu comportamento o desprezo que a súa parella lle merecía, polo mero feito de ser muller“, resume o escrito de acusación.
O home, nacido en 1966, conviviu durante 15 anos coa muller no seu domicilio da Coruña e cunha filla menor de idade, quen presenciou en numerosas ocasións a violencia de xénero cara á súa nai. Fiscalía asegura que “desde o principio” da relación o acusado “fixo obxecto á muller dun trato vexatorio e humillante, con desvalorizacións e insultos que profería frecuentemente e que adoitaban ir acompañados de empuxóns, golpes, agarróns do pelo ou inmovilizaciones polo pescozo”.
Tamén instaurou na relación “un control sistemático” da vida da muller, “chegando a interferir negativamente nas relacións coa súa propia familia para mantela o máis illada posible, ou tratando de influír nela para que non traballase fóra de casa”. O acusado tamén realizaba ameazas cara á muller do tipo “que a ía a matar” ou “que a ía a botar de casa e que se buscase outro sitio”, expresións que profería ante a súa filla tamén.
Entre outras agresións que se detallan, en xaneiro de 2016, o acusado agarrou do pelo á muller, zarandeouna e deulle unha puñada no nariz. Ela non acudiu ao médico nin denunciou, pero si lle pediu axuda á súa filla, que lle comprou un billete para viaxar a Alemaña, onde se trasladou, aínda que regresaron ás poucas semanas, tras insistentes chamadas do home nas que lle pedía perdón. En xuño de 2018, na planta baixa da casa, o individuo rompeulle varios dentes dunha puñada na boca á muller. A filla baixou da súa habitación e puido ver á súa nai ensanguentada. Tampouco houbo denuncia.
En abril de 2019, no parque do Alvedro, en Cambre, o home deu dúas labazadas á muller, quen negou os feitos ante unha patrulla da Garda Civil que se personou no lugar e non foi a centro médico algún. Finalmente, a vítima presentou denuncia en abril de 2020. O acusado enfróntase a penas por delitos como, entre outros, malos tratos, lesións con deformidade, ameazas e vexación/inxurias. Tamén se require unha indemnización de 10.000 euros por dano moral.
Era o evento que puña a cidade da Coruña no centro das miradas da loita social en todo o estado. Un evento referente a nivel internacional, vinculado cunha Rede mundial que combate e conciencia pola defensa dos dereitos humanos. Pero non parece ser algo que interese de verdade.
Pero o factor deferminante para que este verán non vaia haber Encontro Internacional da Rede Acampa pola Paz é a rebaixa do 50% no orzamento que aportaba o Concello da Coruña, que aportaba á súa vez o 60% do orzamento total). Esta diminución da aportación municipai fal inviable sacar adiante un proxecto da envergadura destes Encontros, que teñen traído á cidade xentes como o xuíz Baltarsar Garzón; Esteban Beltrán (de Amnistia Internacional); a minista Sira Rego, a india Vandana Shiva; Raquel Martí (de UNRWA España); Vicente Raimundo (de Save The Children); o xornalista Nicolas Castellano; a lideresa indíxena brasileira Luana Kaingang; a congoleña Caddy Adzuba, Premio Principe da Concordia; a xornalista colombiana Jinet Bedoya; a keniata Asha Ismail, fundadora de Save a Girl Save a Generation; o fotoxornalista palestino Majdi Fathi ou o ex presidente de Uruguai Pepe Mujica.
Porque para realizar un evento desta envergadura fan falta un orzamento de 120.000€ (billetes de avión, exposicións de gran tamaño, dereitos das fotos, hoteis dos ponentes, carpa, montadores, profesionais, vixilantes…), polo que ao comprobar que o Concello (o financiador principal ademais de Emalcsa, a Deputación e o resto de aportacións de patrocinadores pequenos e soci@s) ía rebaixar a súa axuda de 70.000 a 40.000€, a xunta xestora da Rede Acampa tivo que decidir suspendelo.
A Rede, que formulou no seu momento retrasar o evento a finais de ano, aínda non descartan que o Concello recupere a súa vontade pola defensa dos Dereitos Humanos e que se impliquen cun investimento real no evento, para recuperalo ben no outono ou ben para o ano que vén. “Acampa, a intención tena toda, porque cancelar é morrer”, sinalan dende a xestora deixando a porta aberta a unha novena edición.
