A Federación Provincial de ANPAS de Centros Públicos da Coruña fixo público un informe no que advirte dunha deterioración que cualifica de “progresiva e alarmante” do ensino público na provincia. O documento foi elaborado pola súa xunta directiva a partir das achegas remitidas polas propias asociacións de nais e pais federadas.
Segundo expón a entidade, a análise recolle incidencias en “ao redor de 70 centros educativos públicos”, nos que estarían escolarizados aproximadamente 22.000 estudantes. A Federación subliña que esta cifra non reflectiría a totalidade da problemática existente, xa que, segundo indica, a situación “afecta a moitos máis centros na provincia”.
O informe sinala “carencias estruturais en profesorado e persoal de apoio, infraestruturas, accesibilidade, recursos sociosanitarios, así como deficiencias en limpeza e mantemento”. De acordo co texto feito público, estas eivas estarían a ter impacto “na calidade educativa, na inclusión e na seguridade” do alumnado.
Desde a Federación sosteñen que as incidencias recollidas abranguen tanto cuestións relacionadas coa cobertura de prazas docentes e de atención específica como problemas vinculados ao estado das instalacións e á dispoñibilidade de servizos complementarios.
A entidade considera que a acumulación destas deficiencias configura unha situación que define como “crítica” e que require, ao seu xuízo, unha resposta por parte das administracións competentes.
MANIFESTACIÓN O DÍA 28 NA CORUÑA
Ante este escenario, a Federación e arredor de 200 ANPAS federadas acordaron convocar unha manifestación para o sábado 28 ás 11.00 horas na Coruña. A mobilización partirá da praza de Ourense e rematará no Parrote.
Coa convocatoria, as asociacións de familias pretenden visibilizar a situación descrita no informe e reclamar medidas que permitan corrixir as carencias detectadas nos centros públicos da provincia.
Anpas e Afas convocan unha gran protesta na Coruña contra os “parches” na educación pública
Máis novas sobre o Ensino Público
Outras novas das ANPAS
