Un mozo resultou ferido leve cando cruzaba por un paso de peóns na Rolda de Outeiro, na Coruña, segundo informaron a Europa Press desde a Policía Local. O suceso produciuse ao redor das 14.50 horas cando o mozo, de 22 anos, foi alcanzado por un vehículo no momento que pasaba por un paso de peóns sen regular. Foi na incorporación desde Alfonso Molina, sentido entrada á cidade, precisaron desde a Policía Local. O mozo foi trasladado a un hospital con feridas leves.
Colocada a cúpula do multiusos de Bastiagueiro tras unha espectacular operación cunha grúa especial
Tremenda a atención mediática que conlevou a instalación da cúpula do novo edificio público de Bastiagueiro. I é que foi unha operación complexa, que durou case 8 horas coa axuda dun guindastre de alta potencia para subir, pouco a pouco a estrutura de 750 toneladas.
O proceso continúa anclando a estrutura de 41,5 metros de diámetro á xa construída, que conforma, a base de grandes planos de formigón, o sistema de paredes e vidros que lle aportan ao edificio a súa característica forma de zigurat redondeado que desde o principio, segundo dixo o arquitecto, Fernando Martínez, buscou ter a maior integración paisaxística visual pese ás súas dimensións.
“Ten esa forma de pirámide que vai decrecendo coa altura para que deixe ver o bosque posterior; é un polígono con forma circular coa idea democrática que todo o mundo poida estar á mesma distancia do foco”. Son palabras do arquitecto, que resaltou o carácter verde do edificio, xa que desde dentro, cando o espectáculo o permita, poderase divisar o fondo vexetal da contorna, o que o convirte nun edificio moi especial, xa que este tipo de recintos solen ser pechados ao exterior.
O edificio “colmea”
O edificio, non só será para espectáculos culturais, senón tamén para competicións deportivas, congresos e reunións de todo tipo, porque dispón de todas estas instalacións na planta baixa que o fan moi versátil.
Fixo tamén alusión ás gradas fixas e ás retráctiles, pero tamén aos boicots que sufriu a obra: “Este edificio íase construír hai máis de 20 anos, pero naquel momento o PSOE de Oleiros boicoteara a obra cando xa estaba en fase de concurso, polo que ademais de non poder iniciar a construción, houbo que indemnizar á empresa contratada”. “Un edificio que se chamará a colmea porque dentro traballa todo o mundo, cada persoa co seu cometido”, dixo o alcalde.
Co seu potencial de máis de 4.000 asentos, a existencia deste edificio de Bastiagueiro fará posible programar espectáculos, deportes, feiras e outros acontecementos aos que se vai adaptando o aforo.
Intervidos máis de 150 quilos de polbo no porto da Coruña
O Servizo Marítimo Provincial da Garda Civil da Coruña levou a cabo a incautación de 151,80 quilogramos de polbo que estaba a ser transportado sen a documentación regulamentaria que garanta a súa trazabilidade e orixe legal.
A actuación produciuse durante un dispositivo de inspección na zona de saída do porto da Coruña. Os efectivos do Servizo Marítimo procederon a deter e inspeccionar unha furgoneta, que abandonaba as instalacións portuarias.
Na parte traseira do vehículo, os axentes atoparon tres capazos e dúas caixas, que contiñan un total de 151,80 quilogramos de polbo. Tras as comprobacións pertinentes, confirmouse que a mercadoría carecía de calquera dato de rastrexabilidade ou documentación que acreditase a súa orixe, pesada previa, ou o lugar de descarga.
Isto, explica a Garda Civil, constitúe unha infracción grave en materia de pesca. Como resultado da intervención, procedeuse á denuncia da condutora do vehículo, por unha infracción á Lei 11/2008 de Pesca de Galicia, especificamente polo transporte de especies pesqueiras sen a preceptiva pesada previa e a ausencia de documentación de rastrexabilidade.
A mercadoría incautada foi trasladada á Lonxa da Coruña para a súa pesada oficial, confirmando a cantidade final de 151,80 quilogramos. As dilixencias e a correspondente denuncia polas irregularidades documentais e de rastrexabilidade foron remitidas á Delegación Territorial da Consellería do Mar e a mercadoría destinouse ao Banco de Alimentos.
O Concello da Coruña reclama á Xunta un Centro de Crise 24 horas para vítimas de violencia sexual e a Xunta analiza abrir máis centros
A alcaldesa da Coruña, Inés Rey, reclamou á Xunta un Centro de Crise 24 horas para vítimas de violencia sexual na cidade herculina, un recurso que existe noutras urbes galegas, segundo recalcou.
“Non é razoable que unha coruñesa que sofre unha agresión sexual teña que ser derivada a outra cidade nun momento de máximo impacto emocional”, expuxo.
Fíxoo durante a presentación da campaña polo 25 de novembro, o Día Internacional da Eliminación da Violencia contra a Muller baixo a lema ‘Non hai escusas’ e centrada na violencia vicaria, na explotación sexual e na violencia dixital.
Rey confirmou que datos que apuntan a “un aumento dos delitos contra a liberdade sexual en Galicia, na provincia e na cidade da Coruña”.
En resposta, a Consellería Política Social recordou que dende finais de 2024 están en funcionamento cinco centros de crises para a atención a vítimas de violencia sexual, un máis do que esixe a normativa. Na provincia da Coruña hai dous centros, un en Santiago e outro en Ferrol, integrados nas áreas hospitalarias correspondentes, que prestan atención presencial e telefónica a todas as mulleres galegas que o precisen.
A Consellería non descartou abrir máis puntos de atención no futuro.
Máis info
«Non hai escusas», o lema do programa de actividades do 25N herculino
Sísifo abre as portas da sociedade a base de calor
Levamos estas semanas falando dos cimentos da nosa sociedade, desas infraestruturas máis básicas do sistema de servizos sociais da Coruña. Temos falado do servizo de atención en rúa a persoas sen fogar, emais do centro de Baixa Esixencia de Labañou, dous servizos coordinados polo Equipo Municipal de Inclusión Social.
Un EMIS que basea a súa intervención no senfogarismo en clave de rede coas entidades sociais que forman parte do terceiro sector. E parte desa rede é o servizo de Sísifo, un punto calor-café que a Fundación Érguete-Integracíón ofrece no Barrio das Flores.
Este pasado venres, Sísifo celebrou unha xornada de portas abertas no marco da campaña de achegamento ao barrio da Rede de Unidades de Atención de Adiccións (UNAD). Toda a familia de Érguete recibía aos usuarios e usuarias que cada día se achegan para almorzar algo quente, para lavar a roupa, para pegarse unha ducha, para pedir axuda en citas administrativas ou sanitarias e, sobre todo, para ser escoitadas.
E a reposta das persoas usuarias foi fantástica, agradecendo a labor das profesionais de Érguete, degustando os bocatiñas e os riquiños e mesmo xogando a un divertido xogo coas traballadoras sociais da entidade.
Durante a xornada falamos con dúas mulleres que se achegan ao local da entidade, xa formalizado como espazo seguro para mulleres en exclusión social severa. Unha delas estivo en situación de rúa durante meses pero agora, que ten unha habitación e un precario traballo, segue achegándose a ver ás Sueli, Carolina e compañía para pedir asesoramento e charlar un pouco sobre os servizos sociais da cidade.
Outra das mulleres que se achegan á cita, leva un mes en situación de rúa, despois de sufrir o roubo de todas as súas pertenzas. Estas semanas non falla cada día ao calor das traballadoras da entidade, que coa súa profesionalidade, pero tamén co respecto e co agarimo necesario, lle axudan a afrontar os desafíos da vida sen teito, informándoa das posibilidades que lle ofrece a rede de servizos sociais da cidade, e acompañándoa nos periplos sanitarios e burocráticos. Ela non dubida un segundo en agradecer esa atención e ese cariño que supón un impulso para saír adiante.
Máis novas
O Centro de Baixa Esixencia de Labañou cumple un ano: “Un espazo de dignidade dentro da cidade”
Os Servizos Sociais da Coruña para as persoas sen fogar, un mar de segundas oportunidades
A Fundación Érguete-integración abre un espazo seguro para mulleres en exclusión social severa
Institucións Penitenciarias recoñeceu o papel da Fundación Érguete polo Día da Mercé
A Fundación Érguete, Agalure, AFACO e a Fundación Mulleres, os premios socias da Deputación
Rueda pide “seriedade” e “coherencia” á alcadesa da Coruña sobre a Facultade de Medicina
Continúa a ida e volta arredor da descentralización da carreira de Medicina. Hoxe a primeira hora era a alcaldesa da Coruña Inés Rey a que volvía defender a viabilidade dunha Facultade de Medicina herculina. Non tardou en responder o presidente da Xunta, Alfonso Rueda, pedindo “seriedade” e “coherencia” á rexedora, que calificaba a negativa a implantar este Grao fóra da capital galega como unha postura “arcaica” e que trata de manter “privilexios medievais”.
Preguntado polos xornalistas na rolda de prensa posterior ao Consello da Xunta, o titular do Executivo autonómico instou a Inés Rey a ser “coherente” ao falar das universidades privadas, lembrando que “hai pouco tempo amadriñou unha universidade privada na súa cidade”. “Un pouco de coherencia”, aseverou.
Neste contexto, Alfonso Rueda insistiu en que espera que o acordo selado entre as tres universidades sexa “bo para o tres” e para a Facultade que, reiterou, “ten que ser a de toda Galicia”. Un acordo polo que non haberá máis descentralización que a impartición de varias asignaturas nos campus da Coruña e de Vigo, o que de seguro provocará unha serie de dificultades para o alumnado.
Tamén dixo esperar que este acordo sexa “un exemplo” para outros pactos e que, na súa opinión, tamén dá “unha lección a posturas localistas que non ven máis aló e cre que calquera ocasión é boa para ter un mínimo de rédito electoral”. “O caso da alcaldesa da Coruña neste caso é evidente”, resolveu.
Máis novas
A Xunta acada unha paz temporal con Medicina: seguirá habendo só unha facultade en Santiago
O metrosidero de 200 anos do cuartel da Policía Local, ao concurso estatal da Árbore do Ano
No interior do cuartel da Policía Local de Orillamar gardan un fermoso tesouro. Ademais das centos de pertenzas atopadas que esperan aos seus donos no almacén de obxectos perdidos, o cuartel da Rúa Tui ten unha das árbores máis impresionantes da cidade: un metrosidero excelsa Gaertn de máis de 200 anos de vida.
Trátase, de feito, do exemplar máis antigo da cidade, que destaca polo seu valor natural, tendo en conta ademais que parece que a súa orixe é neozelandesa.
Pois esta xoia natural formará parte do certame “Árbore e Bosque do Ano en España 2026”, unha iniciativa, promovida pola ONG Bosques Sin Fronteras, que recoñece árbores senlleiras non só pola súa beleza ou tamaño, senón polas historias e vínculos humanos que representan.
A votación para escoller os exemplares gañadores estará aberta do 17 de novembro ao 17
de decembro a través da web oficial do certame: www.arbolybosquedelaño.es. Para que o
voto sexa válido é preciso introducir un correo electrónico e confirmalo.
A candidatura coruñesa poderá acceder ao certame europeo Tree of the Year, se resulta escollida na fase estatal.
A historia do metrosidero
O metrosidero da Coruña impresiona polas súas dimensións: 20 metros de altura, un perímetro de 8 metros no tronco e unha copa de 30 metros de diámetro. Desde hai anos forma parte do Catálogo Galego de Árbores Senlleiras (código 63A) e destaca tanto pola súa antigüidade como pola súa excepcional presenza no espazo urbano.
Ademais do seu valor natural, o exemplar conta cunha historia que lle engade atractivo e relevancia: diferentes estudos suxiren que esta árbore, de orixe neozelandesa, podería ter sido introducida en Galicia por mariñeiros españois no século XVI. Unha liña de investigación recollida no libro “Nova Zelandia, un puzle histórico”, do escritor e mariño Winston Cowie, propón que esta árbore podería ser unha peza clave para entender o papel da navegación española nas exploracións do Pacífico.
“Este metrosidero é moito máis ca unha árbore: é parte da memoria viva da cidade e un símbolo da conexión entre natureza, identidade e coñecemento. Presentar a súa candidatura é unha forma de poñer en valor o noso patrimonio e de proxectar A Coruña cara fóra cun relato único e cheo de significado. Animamos á veciñanza a participar na votación e a facer que esta árbore leve o nome da Coruña por toda España”, destacou a concelleira de Infraestruturas e Mobilidade, Noemí Díaz.
Máis novas
«Non hai escusas», o lema do programa de actividades do 25N herculino
O Concello presentou hoxe a campaña polo 25 de novembro, Día Internacional da Eliminación da Violencia contra as Mulleres, que este ano se desenvolve de novo baixo o lema «Non hai escusas». A rexedora Inés Rey, e a concelleira de Benestar Social, Participación e Igualdade, Nereida Canosa, puxeron o acento na necesidade de reforzar os recursos de atención ás vítimas e de combater o discurso negacionista da violencia machista.
De feito, repasaron a mesa os datos oficiais que apuntan a un aumento dos delitos contra a liberdade sexual en Galicia, na provincia e na cidade da Coruña e insistiu en que “detrás de cada cifra hai unha muller, unha nena, unha familia que ve a súa vida quebrada; non podemos normalizar nin relativizar esta realidade”. Por iso, solicitou á Xunta a posta en marcha de cinco Centros de Crise 24 horas noutras cidades galegas e reclamou que A Coruña conte cun recurso propio.
O programa
Pola súa banda, a concelleira Nereida Canosa presentou a programación municipal do 25N, estruturada en tres grandes eixos: a violencia vicaria e a exercida contra as e os menores; a trata, a explotación sexual e a prostitución, avanzando cara a relacións afectivo-sexuais sas; e a violencia dixital e as novas formas de agresión a través das tecnoloxías.
Entre as principais accións destacan a xornada sobre a violencia contra os e as menores e a violencia vicaria no salón de actos da Fundación ONCE; o ciclo “Conversas con…” con Amelia Tiganus e Erick Pescador; o espectáculo teatral didáctico “Mozas nas redes” nos centros de secundaria; obradoiros, xogos e contacontos nos espazos de atención á infancia e nas ludotecas municipais; actividades específicas na Escola Intercultural da UAMI; accións de sensibilización no Espazo Diverso e nas bibliotecas municipais; así como as iniciativas comunitarias da Plataforma pola Igualdade e contra a Violencia de Xénero do Castrillón (PICUS).
O deporte e o espazo público volverán ter un papel central coa andaina do 25 de novembro, a formación dun gran lazo humano violeta na contorna de Riazor e a lectura dun manifesto en lembranza das vítimas e en apoio ás superviventes.
Máis novas
“A Carreira da Muller”: repensando a solidariedade desde a diversidade
Inés Rey cuestiona á Xunta sobre a descentralización do Grao de Medicina e defende unha facultade en A Coruña
A alcaldesa da Coruña, Inés Rey, expresou este luns as súas reservas sobre a postura da Xunta de Galicia respecto á descentralización do Grao de Medicina e defendeu a necesidade de contar cunha facultade pública nesta disciplina na cidade herculina. “Non me creo á Xunta de Galicia, levamos moitos anos falando de descentralización e nunca foi posible”, declarou a preguntas dos medios sobre o preacordo que o Executivo autonómico e as universidades abordan hoxe nun grupo de traballo. Rey sinalou que opinarán con “máis garantías” cando se coñezan os detalles do acordo e subliñou que A Coruña debe ter a súa propia Facultade de Medicina ante a demanda existente en Galicia.
A rexedora tamén se pronunciou sobre a futura regulación dos vehículos de transporte con condutor (VTCs), asegurando que o Goberno local traballará nunha ordenanza que garanta a convivencia entre o taxi como servizo público e os VTCs como servizo complementario. “Hai momentos nos que o taxi non cobre a demanda e hai que garantir o servizo público”, afirmou.
Neste sentido, indicou que se solicitarán datos ao sector para elaborar un estudo e modernizar a xestión do transporte urbano. Criticou que a Xunta concedeu licenzas para VTCs sen análise previa da demanda e insistiu en que a regulación debería ser a nivel autonómico, permitindo compatibilizar ambos os servizos e garantir a cobertura efectiva para os usuarios.
Detido por ferir cun coitelo a outro nun bar da Coruña
A Policía Nacional arrestou este luns, ao redor das 07.00 horas, a un home por ferir cun coitelo a un home durante un altercado nun bar na Coruña. “O detido presuntamente picou varias veces a outro cliente cunha arma branca“, ratificaron fontes policiais consultadas por Europa Press.
O ferido foi trasladado ao complexo hospitalario universitario da Coruña (Chuac) en estado “non moi grave”, segundo confirmaron as mesmas fontes. En relación a este suceso ocorrido nunha cafetaría da cidade, proseguen as actuacións policiais para esclarecer todas as circunstancias do sucedido.
