Inicio Blog Páxina 20

Martinete ponse, por fin, de festas. O Ventorrillo tamén tiran de orgullo de barro

Redacción
-
0
Martinete ponse, por fin, de festas. O Ventorrillo tamén tiran de orgullo de barro

Tras a demolición do edificio abandonado que tanto tempo definiu o barrio, Martinete entra nun novo capítulo e quere celebralo reunindo veciños, familias e amigos nunha gran festa comunitaria.

Os días 20 e 21 de xuño de 2026, o barrio de Martinete celebrará a súa primeira festa veciñal. Esta festa nace como símbolo da unidade, a perseveranza e o esforzo dos veciños que loitaron xuntos durante anos para mellorar o seu contorno.

Baixo o lema “Xuntos construímos o noso barrio”, a Asociación Veciñal de Martinete Os Anxos organizou un fin de semana pensado para todas as idades.

O programa inclúe un paseo comunitario, un pregoeiro, unha sesión vermú, unha churrascada, xogos infantís, unha festa da escuma e actuacións de Paty Lesta & The Hits, The Nunzias, Clandestinos e DJ Javito.

Xa poden ir reservando o churrasco no 650 03 30 42!

Festas no Ventorrillo

No Ventorrillo, a celebración terá un marcado carácter reivindicativo e festivo arredor da
diversidade. Baixo o lema “Orgullo de barrio, orgullo de todes”, o programa comezará ás 13.30 horas cunha sesión vermú a cargo de The Feedback. Pola tarde, un dos pratos fortes será a presenza da drag La Brillos, con dous pases ás 17.30 e 18.30 horas, intercalados coa lectura do manifesto dos colectivos LGTBIQ+ ás 18.00 horas. A xornada continuará coa actuación musical de Zeltia e May ás 19.15 horas.
A programación complétase con iniciativas paralelas como un churrasco popular, un mercadillo de artesanía, unha exposición de murais realizados nos últimos anos no barrio e a presenza dun servizo de probas rápidas de VIH, reforzando o carácter inclusivo, social e comunitario do evento.

Festas do Ventorrillo Coruna 2026 copia

Sindicatos reclaman na Coruña medidas para garantir o futuro da Seguridade Social

europapress
-
0
Sindicatos reclaman na Coruña medidas para garantir o futuro da Seguridade Social

Representantes de UGT, CSIF, CCOO e CIG concentráronse este mércores ante a Dirección Provincial da Seguridade Social na Coruña para reclamar ao Ministerio de Inclusión, Seguridade Social e Migracións o cumprimento dos acordos asinados coa representación dos traballadores. As organizacións sindicais demandan tamén a adopción de medidas que “permitan garantir o futuro dun servizo fundamental para a cidadanía”.

Segundo denunciaron, malia os compromisos adquiridos pola Administración, “seguen sen producirse avances reais” en cuestións fundamentais para o funcionamento da Seguridade Social. Entre elas, referíronse á reorganización administrativa, á cobertura e provisión de postos de traballo, á estabilización e renovación dos cadros de persoal, á mobilidade, ao desenvolvemento do traballo a distancia, á mellora da formación, á prevención de riscos laborais e á promoción profesional.

Así mesmo, advertiron de que as produtividades do persoal da Seguridade Social seguen sen actualizarse en liña coas melloras aplicadas noutros organismos da Administración Xeral do Estado. Segundo os sindicatos, esta situación dificulta a captación e retención de profesionais nun organismo que afronta importantes retos presentes e futuros.

A mobilización celebrada na Coruña forma parte dunha xornada de protestas desenvolvida de maneira simultánea en distintas provincias do Estado, entre elas Madrid, Valencia, A Rioxa, Sevilla, Zaragoza, Murcia, Bilbao, Girona, Albacete, Oviedo, Santander, Palma de Mallorca, Tenerife e Las Palmas. Con esta protesta, as organizacións sindicais reclaman ao Ministerio que atenda as demandas do persoal e adopte medidas que permitan reforzar un servizo público clave para millóns de persoas.

Avia Veira acusa a Inés Rey de “triunfalismo e autocomplacencia”

Redacción
-
0
Avia Veira acusa a Inés Rey de “triunfalismo e autocomplacencia”

Saía onte alcaldesa Inés Rey a facer balance do seu mandato. Unha intervención na que destacou o seu liderazgo e capacidade de diálogo.

De contado, respondía a candidata do BNG ás eleccións municipais de 2027, a concelleira Avia Veira, que criticaba que “o triunfalismo, a autocompracencia e a propaganda non dan ocultado a realidade dun Goberno de Inés Rey esgotado e sen ideas novas”.

“É un Goberno Local que, ademais, nin escoita nin dialoga. Compórtase como se tivese maioría absoluta, cando nin sequera a ten simple”, censura a nosa portavoz en María Pita.

“Ao longo dos seus case 8 anos de mandato, o Goberno de Inés Rey ten demostrado que falla no pequeno, no mediano e no grande. Falla no pequeno -na limpeza das rúas, no mantemento dos barrios-, falla no mediano -cos contratos caducados en servizos como o do bus urbano ou o da planta de Nostián- e falla no grande, coa mala xestión das contas do
Concello, cun desfase orzamentario de 12 millóns de grandes, e co anuncio de eventos que, como o mundial 2030, finalmente fican en nada”, avalía Avia Veira, apuntando que moitos dos fitos conseguidos polo goberno socialista son froito dos acordos co BNG (desde a oficina para o asesoramento das persoas que viven alugadas até determinados investimentos nos barrios).

Para Avia Veira, é evidente tamén que Inés Rey “como alcaldesa non ten sido capaz de formar e liderar un equipo cohesionado. E sen un equipo cohesionado é imposíbel xestionar ben a cidade”.
“É un Goberno Local que goberna pensando non na xente nin nos barrios, senón nos intereses duns poucos. Fai as cousas por impulsos, sen planificación, sen compromisos firmes e sen traballo constante”, conclúe.

Máis novas

Inés Rey reivindica “o mandato do diálogo e a amabilidade” á fronte da cidade da Coruña

Ana Pontón presentou a Avia Veira como a candidata do BNG para que A Coruña “dea un paso adiante”

A UDC participa nun proxecto europeo para detectar sinais precoces da endometriose no fluxo menstrual

europapress
-
0
A UDC participa nun proxecto europeo para detectar sinais precoces da endometriose no fluxo menstrual

A Universidade da Coruña participa no proxecto europeo SENSOPAD a través do grupo NANOSELF do Centro Interdisciplinar de Química e Bioloxía, o CICA. A iniciativa busca desenvolver novas ferramentas capaces de detectar sinais precoces da endometriose a partir da análise do fluxo menstrual. Segundo detallou a UDC nunha nota de prensa, a endometriose afecta aproximadamente a unha de cada dez mulleres en idade reprodutiva en todo o mundo. Porén, malia a súa elevada prevalencia, segue a ser unha doenza infradiagnosticada e difícil de detectar.

En concreto, a universidade sinalou que o tempo medio para obter un diagnóstico é de 7,5 anos desde a aparición dos primeiros síntomas, aínda que en moitos casos a espera pode prolongarse ata unha década. Neste contexto, o proxecto combina dúas tecnoloxías complementarias. A primeira consiste nunha compresa intelixente capaz de detectar proteínas asociadas á endometriose directamente durante a menstruación e de avisar a usuaria de posibles sinais da doenza. A segunda tecnoloxía, denominada sensoMFgFET, é un dispositivo portátil baseado en grafeno capaz de identificar biomarcadores presentes nas mostras menstruais cunha gran sensibilidade.

Este dispositivo emprega transistores de efecto de campo modificados quimicamente para recoñecer biomarcadores específicos da endometriose e transformalos nun sinal eléctrico medible. Desde a UDC subliñan que o proxecto non pretende substituír o diagnóstico médico, senón ofrecer ferramentas que permitan orientar máis rapidamente as pacientes cara a unha avaliación clínica especializada. A iniciativa abre así unha vía para avanzar na detección temperá dunha doenza que continúa a ter un forte impacto na saúde e na calidade de vida de moitas mulleres.

A Xustiza dá a razón ao Concello sobre o Cárcere Vello

Ubaldo Cerqueiro
-
0
A Xustiza dá a razón ao Concello sobre o Cárcere Vello

Boas novas para a cidade da Coruña. A Audiencia Provincial vén de anular o convenio asinado en 2005, confirmando a sentenza de novembro de 2024, desestimando o recurso presentado polo goberno central.

Falamos de terrenos cedidos gratuitamente en 1925 polo Concello e que o devandito convenio fixaba o pago de 1,12 millóns de euros ao Ministerio do Interior, do que depende Institucións Penitenciarias, ao tempo que cedía unha parcela anexa de 9000 metros cadrados para a construcción do Centro de Inserción Social (CIS), unha vez que os reclusos foran trasladados, nos anos 90, ao novo cárcere de Teixeiro.

O Concello negouse a asumir a titularidade da parcela do CIS, o Estado a través da Sociedade de Infraestruturas e Equipamentos Penitenciarios SA (SIEPSA) recurría pedindo unha indemnización de máis de 14 millóns de euros, e agora a Audiencia Provincial dalle a razón ao Concello, sinalando que a invalidez desa permita por ser “bens de dominio público inalienables”, obrigando ao estado a asumir os gastos de conservación, vixilancia… dun edificio que aínda non foi declarado Ben de Interese Cultural, e eximindo ao concello de facer unha indemnización millonaria á administración estatal.

Primeiras reaccións

O grupo municipal do BNG celebra o fallo da Audiencia Provincial sobre o antigo cárcere ao confirmar que, tal e como sempre defendeu a formación nacionalista, “o convenio asinado no seu día entre o Concello e o Estado é nulo e ao establecer que a restauración do inmóbel, en estado ruinoso, ten que correr a cargo do Estado”. “Cómpre lembrar que un Pleno extraordinario realizado en decembro de 2022 rexeitou o acordo extraxudicial negociado polo Goberno Local co Estado. Nesa sesión plenaria, o BNG naturalmente votou en contra dese acordo por implicar un desembolso económico para o Concello”, afirma a nosa portavoz no Concello Avia Veira.

A sentenza pode ser recurrida ante o Tribunal Supremo.

Última “apertura”

A última vez que puidemos entrar no Cárcere Vello foi en xullo de 2013, cando dúas persoas entreban e ocupaban o espazo cunha clara mensaxe de protesta para esixir a súa rehabilitación.

Este era o seu estado:

Máis novas

Esixen o comezo das negociacións co Goberno Central para rescatar o Cárcere Vello do absoluto abandono

“O fallo sobre o Cárcere Vello esixe o compromiso para a devolución gratuita”

Abren as portas do Cárcere Vello

Nova campaña para recuperar e revertir ao patrimonio da Coruña o vello cárcere provincial

Só as persoas abonadas do Real Club Deportivo decidirán sobre a normalización do topónimo

Ubaldo Cerqueiro
-
0
Só as persoas abonadas do Real Club Deportivo decidirán sobre a normalización do topónimo

Parecía que había consenso social (máis alá da saída de ton do desafiuzado Paco Vázquez), pero finalmente serán só os socios, e non os máis de medio millon de siareiros que ten o Depor por todo o planeta, os que decidan se o Real Club Deportivo pasa a ser “da Coruña”, ou fica no limbo da ilegalidade lingüística, unha vez que o topónimo oficial da cidade (o de todas as cidades do país) é en galego.

Perdeu unha oportunidade de ouro a dirección do club de gañarse un tanto, se tivese anunciado o pasado Día das Letras Galegas a normalización do seu nome, aproveitando o traballo de concienciación realizado durante estes dous anos a mocidade do IES Rafael Dieste no marco da marabillosa campaña #Aquítaménsefala.

Unha medida que parecía tomada e que mesmo foi filtrada pola prensa. Porén, ante o consenso social evidente, algo debeu pasar no seo do club, que deu marcha atrás á decisión e que decidiu poñer en marcha un “proceso de consulta vinculante” co obxectivo de decidir de maneira consensuada sobre a adecuación da denominación oficial da entidade ao marco xurídico vixente en materia de toponimia oficial de A Coruña.

O club, no comunicado, fala de dirixirse á “masa social” do deportivismo, pero en realidade  “a consulta permitirá ás persoas abonadas decidir sobre a posibilidade de manter a actual denominación social do Club ou adaptala ao topónimo oficial da cidade”.

As opcións sometidas a votación serán manter a nomenclatura de “Real Club Deportivo de La Coruña” ou adecuar o nome do Club á toponimia oficial da cidade, adoptando neste caso a denominación de “Real Club Deportivo de A Coruña” en castelán e “Real Club Deportivo da Coruña” en galego. A “maioría simple” decidirá.

A consulta desenvolverase desde as 9:00 horas do 17 de xuño de 2026 ata as 18:00 horas do 21 de xuño de 2026, ambos inclusive, a través dun sistema de votación online. Así mesmo, o Club habilitará unha canle telefónica específica para maiores de 65 anos e outros colectivos que poidan precisar asistencia.

Evidentemente este medio, que forma parte da Asociación de Medios en Galego AMEGA, espera que os abonados do club demostren o seu compromiso coa nosa lingua.

Novas relacionadas

O colectivo #Aquítaménsefala estoupa contra a indiferenza do Real Club Deportivo

O Dépor realizará unha consulta vinculante aos seus abonados para galeguizar ou non o topónimo

O Dépor galeguizará en maio o seu nome. A mocidade fai historia

Javier Gil trae este mércores ao COAG a súa charla sobre o impacto social da especulación na vivenda

Redacción
-
0
Javier Gil trae este mércores ao COAG a súa charla sobre o impacto social da especulación na vivenda

Este mércores 17, ás 19:00h, a Delegación da Coruña do Colexio Oficial de Arquitectos de Galicia (Rúa Federico Tapia 64, baixo) acolle unha interesante charla. Baio o título de “Xeración inquilina. Un novo paradigma de vivenda para acabar coa desigualdade”, Javier Gil traer a súa visión sobre a situación acutal na que a vivenda está constituíndose como a principal causa de estruturación social e creación de desigualdade.

 

Máis novas

“Que pasa, que pasa? Que non teño casa!”

A necesidade dun marco financieiro para seguir mantendo as 54 vivendas para persoas en risco de exclusión social na Coruña

A patronal do metal incide na necesidade de avanzar na negociación

europapress
-
0
A patronal do metal incide na necesidade de avanzar na negociación

A patronal do metal na Coruña apelou a avanzar na negociación tras unha nova xornada de folga convocada no sector nesta provincia en demanda dun convenio “digno”. Foi con protestas e con convocatoria de novas mobilizacións na xornada do xoves, segundo avanzaron as centrais sindicais convocantes: CIG, UXT e CCOO.

Mentres as centrais sindicais culpan á patronal da falta dun achegamento de posturas, a parte empresarial traslada, nun comunicado, a súa vontade de “alcanzar un acordo equilibrado que achegue estabilidade e seguridade tanto ás empresas como ás persoas traballadoras do sector”. Entre as principais discrepancias, alude ao tempo de vixencia do convenio, segundo sostén, de tres anos para a parte social e de catro para a empresarial, ademais das diferentes propostas no incremento salarial ou a revisión do mesmo.

A CIG mantén a folga no metal da Coruña ante a “tomadura de pelo” da patronal

europapress
-
0
A CIG mantén a folga no metal da Coruña ante a “tomadura de pelo” da patronal

O secretario comarcal de CIG-Industria en Ferrol, Sergio Martínez, cualificou de “totalmente ridícula” a nova oferta da patronal do metal na provincia da Coruña e anuncia que os paros convocados para este martes e mércores, 16 e 17 de xuño, mantéñense tras unha reunión que, na súa opinión, supuxo “cinco horas perdendo tempo”.

Martínez explicou que a reunión, celebrada este luns desde as 10,00 ata pasadas as 15,00 horas, na que participaron representantes de CIG, CCOO e UXT, apenas rexistrou un movemento por parte da representación empresarial: “Subir un 0,25% a partir do 2027 respecto da plataforma que nos presentaron o venres”. Unha proposta que tachou de “ridícula” e que evidencia que ambas as partes están “nas antípodas”.

“Non hai avance ningún, nin en materia salarial, nin en vixencia, nin en fixos descontinuos, nin en nada. Nada de nada”, sentencia o sindicalista, quen engade que os sindicatos fixeron “rebaixas nas súas pretensións” que non foron tomadas en consideración.

Concentración este martes

Así, numerosos traballadores do sector do metal na provincia da Coruña concentráronse na cidade herculina no marco das protestas convocadas esta semana, con dúas novas xornadas de folga, este martes e o mércores, en demanda dun convenio “digno”.

Convocados por CIG, UXT e CCOO, máis dun centenar de empregados participaron nunha concentración nos Cantóns, na cidade herculina, próxima ao lugar onde se celebraba un foro con presenza, na inauguración, de autoridades como o presidente da Xunta, Alfonso Rueda.

Foron varios centenares que lanzaron petardos e corearon lemas como “nin un paso atrás”, “estamos en folga” e con asubíos á saída das autoridades presentes no citado foro económico, pero sen que se rexistrasen incidentes.

Máis novas do conflito

Nova xornada de folga no metal da Coruña mentres a patronal propón retomar o diálogo

 

CIG, UGT e CCOO condenan o ataque á xornalista durante a folga do metal

1...192021...773Page 20 of 773

Xornal da Coruña é o primeiro gran xornal dixital exclusivamente en galego da Coruña e a súa área metropolitana

Contacta: redaccion@xornaldacoruña.gal

SÍGUENOS

© Xornal da Coruña - Xurimaru Servizos de Comunicación 2010 S.L.

QUE É XdC? | AVISO LEGAL | PUBLICIDADE | COOKIES