A Universidade da Coruña (UDC) manifestou este martes o seu malestar por que o Servizo Galego de Saúde (Sergas) vaia a adscribir a docencia do Grao en Medicina en todos os hospitais de Galicia á Universidade de Santiago de Compostela (USC), que por agora é a única que imparte a titulación. Así o denunciaba un comunicado interno do vicerreitor de Investigación e Transferencia, Jerónimo Puertas, e sinálano fontes da UDC sobre o próximo concerto que a Consellería de Sanidade asinará coa USC e que, precisamente este mércores, recibirá o visto e prace do consello de goberno da universidade compostelá.
Os concertos que están en vigor actualmente datan do 2001 e están prorrogados ata o 30 de xuño de 2026. Para actualizalos máis aló desta data, a Xunta xa mantivo reunións ao longo deste ano nas que se acordou tanto o texto como os anexos. De feito, estes documentos están actualmente en tramitación. Nos convenios orixinais, publicados en 2001 no Diario Oficial de Galicia (DOG), cada universidade contaba como centros asociados os que estaban na súa área de influencia. Con todo, en 2015 houbo un acordo para descentralizar a docencia clínica de Medicina ao resto de hospitais galegos, mantendo non entanto como grao único o de Santiago. Agora, o novo concerto coa USC adscribiralle todos os hospitais universitarios para impartir esta titulación.
E isto chega poucos días despois de que a UDC iniciase o proceso formal para solicitar a impartición do Grao en Medicina para o curso 2027/28, a pesar de que continúa aberto o diálogo coa Administración e o resto de institucións académicas para avanzar na descentralización do de Santiago. Neste contexto, a UDC advirte que o feito de que o Complexo Hospitalario Universitario da Coruña (Chuac) vaia a quedar vinculado á USC “significa que a docencia se imparte por profesorado da devandita universidade”. “Por tanto, co novo convenio Sergas-USC, a docencia clínica de Medicina sería impartida integramente por profesorado da USC en todos os hospitais de Galicia. Isto non é descentralizar, senón recentralizar“, afea a institución coruñesa.
SANIDADE DEFENDE QUE “AVANZA NA DESCENTRALIZACIÓN”
Fronte a esta denuncia, fontes da Consellería de Sanidade confirman a adaptación dos concertos coas universidades públicas para que o Sergas poida pór “todos os seus recursos a disposición” da formación sanitaria. A Xunta lembra que, desde 2015, os estudantes de Medicina pola USC fan prácticas en todos os hospitais universitarios galegos, incluído o Chuac coruñés. “O obxectivo é que así o sigan facendo”, recalca a Consellería, que xustifica que os cambios no concerto coa USC permiten adaptarse a esta realidade.
Por iso, sinala que o novo concerto que está en trámite coa UDC non só é que permita “seguir avanzando na descentralización” do grao en Santiago, senón que non prevé cambios na relación da universidade herculina coas infraestruturas das áreas sanitarias da Coruña-Cee e Ferrol. Isto quere dicir que os estudantes de Medicina en Santiago seguirán recibindo docencia clínica na Coruña. No caso de que o Chuac se adscribise “en exclusiva” á UDC, advirte a Xunta, non habería esta posibilidade.
Con todo, a universidade coruñesa nega este extremo e garante que o estudantado de Medicina pola USC “seguirá recibindo docencia clínica no Chuac” igualmente, como ocorreu “ata agora”. “Negar isto é descoñecer a realidade universitaria”, engade. Así mesmo, a UDC defende que, a pesar das “trabas” atopadas en cumprir coa súa “lexítima aspiración” de implantar Medicina, xa conta cun “corpo moi numeroso de doutores e doutoras”, ao que engade o Instituto de Investigación Biomédica e os máis de 20 profesores vinculados ao Sergas que dan clase en titulacións da rama sanitaria, como Enfermaría.
PLAN DE EQUILIBRIO FINANCEIRO, EN SETEMBRO
Por outra banda, a UDC acordou este martes coa Xunta a presentación, ao longo do mes de setembro, dun plan de equilibrio financeiro para un período de tres anos para sanear as contas e garantir a estabilidade económica da institución. Así o conviñeron o reitor, Ricardo Cao, e o seu equipo durante unha reunión en Santiago co conselleiro de Educación, Ciencia, FP e Universidades, Román Rodríguez, e o de Facenda e Administración Pública. Este plan de ingresos e gastos, segundo informa a Xunta nun comunicado, debe presentarse “como paso previo” aos orzamentos da universidade para 2026. E é que o actual equipo de goberno puxo de manifesto na liquidación de 2023 que había un desequilibrio financeiro de 13 millóns de euros.
