As asociacións empresariais do sector de transporte de viaxeiros por estrada na provincia da Coruña esixiron “responsabilidade” de cara a retomar o diálogo e evitar a folga indefinida convocada a partir do 2 de febreiro polas centrais sindicais CIG, CCOO e UGT. “A solución aos problemas do sector e as demandas laborais non se atopará mediante a violencia”, sinalan ao denunciar episodios deste tipo durante os paros anteriores e que as centrais sindicais negan.
“Senón na mesa de negociación, con propostas realistas e responsables”, engaden. Tamén argumentan que ao longo dos dous últimos meses “e non só nos días de folga, esa violencia afectou a uns 70 autobuses de empresa de distintas asociacións, dos que máis da metade, uns 40, pertencen a compañías de Transgacar”, recolle esta no seu comunicado.
Entre outras incidencias, citaron rotura de lúas, picadas en rodas, sabotaxes ás baterías, pintado de retrovisores ou furto de chaves, entre outras. Entre outros lugares, alude a Muros, Muxía, Cee, Carballo, A Coruña, A Estrada, Negreira, Bergondo ou Ferrol. As organizacións que representan ás empresas do sector sosteñen que só puxeron unha condición o día 22 para volver sentar a negociar. “Que cesasen os actos de coacción e de violencia e esta condición non se cumpriu pois lamentablemente ese mesmo día e o seguinte, venres 23, reiteráronse os danos aos vehículos”.
“E, unha vez máis, impediuse prestar os servizos mínimos que, pola lexislación vixente, son de obrigado cumprimento, agravando así os prexuízos da folga aos cidadáns”, engade. “En concreto, esa mesma noite do xoves e venres roubaron as chaves de seis autobuses en Muros, houbo sabotaxes nas baterías de dúas microbuses en Noia e foron picadas as rodas dun microbús en Noia e de dous autobuses en Pontevedra“.
“Esta causa, e non outra, foi a que impediu retomar as negociacións, e se non se cumpre, seguirá a impedilo”. Por este motivo, esixen, para volver á mesa de negociación, “que as centrais sindicais manifesten, e así se recolla na acta que para o efecto se levante, que condenan dunha forma clara e contundente a violencia e as coaccións que están a impedir realizar, cando menos, os servizos mínimos”. “Cumprida esta condición, a negociación seguiría aberta ata lograr un acordo”, apostilan.
