Eran as 10:41h deste martes 15 de outubro (soou outa vez ás 10:56h) cando uns 300.000 móbiles da Coruña e a área metropolitana comezaron a vibrar a soar cun crú ton de alerta.
Carai, como azuzou os 300.000 móbiles da Coruña e a área metroplolitana a Alerta de @proteccioncivil por mor do SIMULACRO que están realizando en Repsol. pic.twitter.com/zX6mZJ7gHb
— Xornal da Coruña (@xornaldacoruna) October 15, 2024
Tratouse dun simulacro dun aviso masivo realizado pola Xunta de Galicia, en colaboración cos concellos da Coruña e Arteixo, e a empresa Repsol Butano, simulando un accidente na refinaría de Repsol en Nostián, para pór a proba o sistema de alerta masiva ES-Alert, de maneira que os veciños destes dous municipios e a súa contorna recibirán un aviso cun asubío continuo a máximo volume nos seus teléfonos móbiles.
O ES-Alert é un sistema de alerta masiva que permite enviar unha mensaxe a todos os móbiles dunha zona concreta en caso de emerxencia. Con esta proba, leva a cabo a simulación dun accidente nas instalacións da factoría de Repsol, que obriga a activar o Plan Exterior de Emerxencia do parque industrial onde se sitúa. Este sistema está integrado na Rede de Alerta Nacional do Ministerio do Interior e só funciona con ‘smartphones’, que teñen que estar acesos e co ‘modo avión’ desactivado.
Un dos obxectivos do simulacro deste martes en probar e dar a coñecer á cidadanía o sistema ES-Alert, que permite enviar esas mensaxes de forma masiva, con información e indicacións precisas, a persoas que se atopan nunha zona afectada por unha catástrofe ou unha emerxencia. Nese sentido, tamén se pretende que a cidadanía se familiarice con esta ferramenta para que estea preparada en caso dunha emerxencia real. Se fose así, a mensaxe que recibirían nos seus teléfonos contería instrucións claras sobre como actuar e medidas de autoprotección adecuadas á situación.
LIÑA TEMPORAL DO SIMULACRO
O simulacro arrincaba sobre as 10.00 horas coa suposta detección de lume nun camión de transporte de propano dentro das instalacións de Repsol Butano. As chamas alcanzaban o depósito de gasoil, os pneumáticos e a cabina. De inmediato activábase o plan de autoprotección da planta, soaban as sirenas de emerxencia e comezaban a arroxar auga os aspersores que protexen e manteñen fríos os depósitos. Os medios propios tamén arrefriaban desde o primeiro momento o vehículo afectado e prestaban o primeiro auxilio ás vítimas.
Paulatinamente fóronse mobilizando os diferentes servizos de emerxencias, que acudiron ata a planta para atallar a situación. Ademais, nas proximidades de Repsol Butano, no exterior, producíase un accidente de múltiples vítimas que tamén obrigaba a activar medios. Pasadas as 10.30 horas, e dadas as dimensións do suceso, desde o posto de mando acordábase activar Plan de Emerxencia Exterior A Grela-Bens, co que as sirenas, esta vez de maior intensidade, soaron na área e, uns 10 minutos despois, chegaban aos móbiles dos presentes no simulacro e dos usuarios en toda a contorna, as mensaxes de alerta. A previsión era a de chegar a uns 300.000 terminais.
Aínda que os móbiles comezaron a soar de forma masiva a gran volume, a recepción foi, non entanto, irregular, dado que algúns terminais non recibiron a alerta ou a recibiron significativamente despois que outros. Algunhas fontes vincularon esta situación á localización nunha zona de sombra das torres ou a terminais máis antigos ou sen actualizar. Ademais, aínda que os cidadáns non tiñan que comunicarse con Emerxencias (a mensaxe así o indicaba textualmente), o CIAE 112-Galicia recibiu esta mañá ao redor de medio cento de chamadas telefónicas para aclarar dúbidas sobre o funcionamento da ferramenta. Tamén se recibiron consultas a través das redes sociais, apunta o organismo.
PROBAR E MELLORAR A RESPOSTA
No posto de mando, onde se situou o camión da Axega, estiveron presentes distintas autoridades, como o director xeral de Emerxencias, Santiago Villanueva, a subdelegada do Goberno na Coruña, María Rivas, a delegada territorial da Xunta na Coruña, Belén do Campo, e o director da Axega, Marcos Araújo, así como o alcalde de Arteixo e a concelleira de Seguridade Cidadá da Coruña. Tamén participaron representantes da empresa Repsol Butano.
O simulacro, explicou aos medios Belén do Campo, realízase dentro da normativa que esixe unha proba deste tipo cada tres anos na contorna do polígono industrial da Grela-Bens, onde se sitúa Repsol Butano, empresa á que agradeceu a súa colaboración. Nela participaron un cento de persoas. “O que facemos é un simulacro dun accidente que pode pasar nun momento determinado e o que queremos é ver en que medida imos dar resposta cada unha das unidades e das administracións competentes” dixo Do Campo, quen lembrou que, no campo da prevención, é necesario que a cidadanía “estea preparada” para o uso de ferramentas como o É-Alert.
Tras o exercicio, lembrou a delegada territorial da Xunta, todos os intervintes farán unha avaliación para detectar puntos débiles ou a necesidade de “reforzar algunha liña” por se estes feitos pasasen “na vida real”. Nesta mesma liña, o director xeral de Emerxencias chamou a atención sobre a necesidade de pór en práctica a través de simulacros a intervención neste tipo de sucesos, que implica a coordinación de medios da administración autonómica, a estatal e as locais. Tamén eloxiou o sistema É-Alert e a posta das novas tecnoloxías “ao servizo da poboación”. “No caso de que fose unha situación real, a poboación estaría avisada e tería esa ferramenta para poder coñecer a situación ou que pasos ten que dar”, dixo Villanueva.
